NO IORG
هه‌لبژارتى4

 

سه‌رۆك مه‌سعود بارزانی، ب هه‌لكه‌فتا 60 سالیا گه‌هشتنا وی بۆ ناڤ رێزێن پێشمه‌رگێ كوردستانێ په‌یامه‌ك به‌لاڤكر.

سه‌رۆك بارزانی ب رێیا پێگه‌هێ خوه‌ یێ تایبه‌ت ل تۆرا جڤاكی یا تویته‌ری په‌یامه‌ك ئاراسته‌ی هێزا پێشمه‌رگێ كوردستانێ كر و راگه‌هاند، چاڤێ هه‌موو پێشمه‌رگان ماچی دكه‌م.

د پشكه‌كا دی یا په‌یاما خوه‌ دا، سه‌رۆك بارزانی سلاڤ بۆ گیانێ شه‌هیدێن كوردستانێ هنارتن و گۆت” سلاڤ بۆ گیانێ پاقژی شه‌هیدان”.

دهێته‌ زانین ل 20 گۆلانا 2022 دبیته‌ سالیادا 60 یا ژیێ پێشمه‌رگایه‌تیا سه‌رۆك بارزانی.

سه‌رۆك بارزانی د ژیێ 16 سالیێ دا ل رۆژا 20 گۆلانا 1962 بۆ جارا ئێكێ چویه‌ دناڤ رێزێن هێزا پێشمه‌رگێ كوردستانێ دا و چه‌كێ شۆره‌شی كریه‌ ملی خوه‌.

هه‌ر د وی چارچۆڤه‌ی دا، باره‌گایێ بارزانی په‌یامه‌ك به‌لاڤكر و تێدا هاتیه‌، به‌ری 60 سالان سه‌رۆك مه‌سعود بارزانی چه‌كێ شه‌ره‌فێ یێ پێشمه‌رگایه‌تیێ كره‌ ملێ خوه‌، 60 سال خه‌باتا به‌رده‌وام یا پێشمه‌رگایه‌تیا سه‌رۆكی، بۆمه‌ هه‌موویان چرایا رێیا خه‌باتێ یه‌.

هه‌روه‌سا تێدا هاتیه‌ ژی، 60 سالیا پێشمه‌رگایه‌تیا ته‌ پیرۆز، سه‌رۆك.ته‌ ب خه‌باتا خوه‌ ئه‌م فێركرین بێژین” نه‌خێر بۆ بنده‌ستیێ”.

ئه‌ڤرۆ:

سه‌ره‌رای بریارا ئه‌مریكا كو رێ دده‌ت كۆمپانیێن بیانی ل رۆژئاڤایێ كوردستانێ كار بكه‌ن لێ وه‌لاتیێن رۆژئاڤایێ كوردستانێ ژ ره‌وشا نها دلگرانن و داخواز دكه‌ن كو ئه‌مریكا، رۆسیا و وه‌لاتێن ئێكه‌تیا ئۆرۆپا سنۆره‌كێ بۆ زێده‌گاڤیێن توركیا دانێن، چونكو ژ بلی عه‌فرینێ نها توركیا ل ده‌ڤه‌رێن دی ژی ده‌ست ب سیاسه‌تا گوهۆرینا دیمۆگرافیا رۆژئاڤایێ كوردستانێ كریه‌ و هه‌روه‌سا وه‌لاتیێن كورد دترسن كو توركیا ده‌ست ب ئۆپه‌راسیۆنه‌كا نوو ل رۆژئاڤایێ كوردستانێ بكه‌ت و ژ به‌ر هندێ ژی دخوازن كو نه‌ته‌وه‌یێن ئێكگرتی، ئه‌مریكا، رۆسیا و وه‌لاتێن ئێكه‌تیا ئۆرۆپا ل هه‌مبه‌ر بزاڤێن توركیا بێده‌نگ نه‌مینن و هه‌لوه‌سته‌كێ توند نیشا بده‌ن.

هۆزان  عه‌فرینێ چاڤدێرێ سیاسی دیار كر كو مخابن مه‌ترسیێن مه‌زن ل سه‌ر رۆژئاڤایێ كوردستانێ هه‌نه‌، راسته‌ ئه‌مریكا ڤێ دووماهیێ بریاره‌ك دلخوه‌شكه‌ر دا كو رێ دده‌ته‌ كۆمپانیێن بیانی ل رۆژئاڤایێ كوردستانێ كار بكه‌ن، توركیا ژی هه‌ر زوو ل دژی بریارا ئه‌مریكا نه‌رازیبوونه‌كا توند نیشا دا، ئه‌و یه‌ك ژی نیشا دده‌ت كو توركیا نه‌ڤێت ره‌وشا رۆژئاڤایێ كوردستانێ باش ببیت.

ناڤهاتی ئه‌و یه‌ك ژی دیار كر كو دڤێت به‌ری هه‌ر تشته‌كێ هه‌ر دو جڤاتێن كوردی یێن رۆژئاڤایێ كوردستانێ ده‌ست ب گه‌ره‌كا نوو یا دانوستاندنان بكه‌ن و هه‌موو ئاریشێن هه‌ی د ناڤبه‌را خوه‌ دا چاره‌سه‌ر بكه‌ن، چونكو پێدڤیا كوردان ل سووریێ و رۆژئاڤایێ كوردستانێ ب ئێكگرتنێ هه‌یه‌، مخابن نها كورد دناڤا خوه‌ دا ئێكگرتی نینن و ئه‌و یه‌ك ژی دێ كارتێكرنا خوه‌ ل پاشه‌رۆژا كوردان كه‌ت، وه‌لاتیێن كورد ل رۆژئاڤایێ كوردستانێ ژی ژ به‌ر هندێ دلگرانن و داخواز ئێكگرتنا هه‌ر دو جڤاتێن كوردی یێن رۆژئاڤایێ كوردستانێ دكه‌ن.

نه‌شه‌ت محه‌مه‌د چاڤدێرێ سیاسی ژی دیار كر كو رژێما به‌شاری ل گه‌ل توركیا و هه‌موو دوژمنێن كوردان كار دكه‌ت دا نه‌هێلیت كورد ل سووریێ بگه‌هنه‌ مافێن خوه‌، لێ مخابن كورد ژی ل هه‌مبه‌ر پیلانێن نها هشیار نینن و یا پێدڤی ناكه‌ن، دڤێت هه‌ر زوو هه‌ر دو جڤاتێن كوردی ل سه‌ر پرۆژه‌یه‌كێ هه‌ڤپشك كار بكه‌ن و پێدڤیا رۆژئاڤایێ كوردستانێ ب رێڤه‌به‌ریه‌كا نوو یا هه‌ی، دڤێت هه‌موو هێز و ئالیێن سیاسی ل رۆژئاڤایێ كوردستانێ پێكڤه‌ د رێڤه‌برنا رۆژئاڤایێ كوردستانێ دا پشكدار بن، چونكو براستی ژی مه‌ترسیێن گه‌له‌ك مه‌زن ل سه‌ر پاشه‌رۆژا رۆژئاڤایێ كوردستانێ هه‌نه‌ و مخابن كورد ژی د ناڤا خوه‌ دا ئێكگرتی نینن، بێگومان ڤێ یه‌كێ كارتێكرنا خوه‌ ل وه‌لاتیێن كورد ل رۆژئاڤایێ كوردستانێ كریه‌ و وه‌لاتی ژ ره‌وشا نها دلگرانن.

ئه‌ڤرۆ:

ب هزاران وه‌لاتیێن كورد یێن رۆژئاڤایێ كوردستانێ نه‌رازیبوونا خوه‌ ل هه‌مبه‌ر پرۆژێ نوو یێ توركیا ل دۆر بجهكرنا په‌نابه‌رێن سووریێ ل رۆژئاڤایێ كوردستانێ دیار كرن و داخواز ژ ئه‌مریكا و رۆسیا كرن كو نه‌هێلن توركیا دیمۆگرافیا رۆژئاڤایێ كوردستانێ بگوهۆریت.

46 سازیێن سڤیل و ب هزاران وه‌لاتیێن كورد ل رۆژئاڤایێ كوردستانێ نه‌رازیبوونا خوه‌ ل هه‌مبه‌ر پرۆژێ نوو یێ توركیا دیار كرن و راگه‌هاندن كو توركیا دڤێت دیمۆگرافیا رۆژئاڤایێ كوردستانێ ب ته‌مامی بگوهۆریت و عه‌ره‌بێن په‌نابه‌ر یێن سووری ل رۆژئاڤایێ كوردستانێ بجه بكه‌ت، ئه‌و یه‌ك ب چو ره‌نگه‌كێ ناهێته‌ قه‌بوولكرن و ئارمانجا توركیا ئه‌وه‌ كو كورد ل رۆژئاڤایێ كوردستانێ نه‌مینن، ژ به‌ر هندێ ژی دڤێت ئه‌مریكا، وه‌لاتێن ئێكه‌تیا ئۆرۆپا، رۆسیا و نه‌ته‌وه‌یێن ئێكگرتی ل هه‌مبه‌ر پرۆژێ نوو یێ توركیا كو ب ته‌مامی ل دژی كوردانه‌ بێده‌نگ نه‌مینن و دڤێت داخواز ژ توركیا بكه‌ن كو پرۆژێ خوه‌ بده‌ته‌ راگرتن و هه‌كه‌ توركیا ل سه‌ر هنارتنا په‌نابه‌رێن سووری بۆ رۆژئاڤایێ كوردستانێ یا رژد بیت دڤێت ئه‌مریكا و رۆسیا ئاسته‌نگیان دروست بكه‌ن.

وه‌لاتیێن رۆژئاڤایێ كوردستانێ هه‌روه‌سا دیار دكه‌ن كو به‌ری نها گه‌له‌ك جاران توركیا داخوازا راگه‌هاندنا ده‌ڤه‌ره‌كا ئارام ل باكورێ سووریێ دكر، هه‌ر وی ده‌می مه‌ره‌ما توركیا ئاشكرا بوو و توركیا دخواست ل ژێر ناڤێ ده‌ڤه‌ره‌كا ئارام په‌نابه‌رێن سووریێ ل رۆژئاڤایێ كوردستانێ بجه بكه‌ت و دیمۆگرافیا رۆژئاڤایێ كوردستانێ بگوهۆریت، لێ ئه‌مریكا و وه‌لاتێن ئێكه‌تیا ئۆرۆپا وی ده‌می پشته‌ڤانی ل پرۆژێ توركیا نه‌كرن و توركیا نها ل ژێر ناڤێ هنارتنا په‌نابه‌رێن سووریێ دخوازیت دیمۆگرافیا رۆژئاڤایێ كوردستانێ بگوهۆریت و ئه‌و یه‌ك ب چو ره‌نگه‌كێ ناهێته‌ قه‌بوولكرن.

چاڤدێرێن سیاسی ژی دیار دكه‌ن كو توركیا دڤێت ئه‌زموونا عه‌فرینێ ل سه‌رێ كانیێ و گوندێن دی یێن رۆژئاڤایێ كوردستانێ دوباره‌ بكه‌ت و ل ژێر ناڤێ هنارتنا په‌نابه‌رێن سووریێ هه‌موو ده‌ڤه‌رێن كوردان داگیر بكه‌ت و عه‌ره‌بێن كو نها وه‌كو په‌نابه‌ر ل توركیا ئاكنجی بووینه‌ ل گوند و باژێرێن دی یێن كوردان ل رۆژئاڤایێ كوردستانێ بجه بكه‌ت، هه‌كه‌ توركیا بشێت كاره‌كێ وه‌سا بكه‌ت دێ دیمۆگرافیا رۆژئاڤایێ كوردستانێ ب ته‌مامی هێته‌ گوهۆرین، چونكو به‌ری نها رێژا ئاكنجیبوونا كوردان ل باژێرێ عه‌فرینێ ٩٠% بوو، لێ پشتی كو عه‌فرین ژ ئالیێ توركیا ڤه‌ هاته‌ داگیركرن و توركیا ژی عه‌ره‌ب و توركمان ل عه‌فرینێ بجهكرن نها رێژه‌یا ئاكنجیبوونا كوردان ل عه‌فرینێ ناگه‌هیته‌ ٢٠% و رۆژانه‌ كورد ژ ترسا چه‌كدارێن سه‌ر ب توركیا ژ عه‌فرینێ دڕه‌ڤن و به‌رێ خوه‌ دده‌نه‌ باژێرێن دی یێن رۆژئاڤایێ كوردستانێ، توركیا دڤێت ب رێیا هنارتنا په‌نابه‌رێن سووری هه‌موو رۆژئاڤایێ كوردستانێ داگیر بكه‌ت، لێ ئه‌مریكا و رۆسیا دشێن ئاسته‌نگیان ل هه‌مبه‌ر پرۆژێ نوو یێ توركیا دروست بكه‌ن.

دوهی ل پیرمام سه‌رۆك بارزانی پێشوازی ل شانده‌كێ هه‌ڤپه‌یمانیا رزگاركرنا نیشتمانی كو پێكهاتبوو ژ محه‌مه‌د حه‌لبوسی سه‌رۆكێ جڤاتا نوونه‌رێن ئیراقێ و خه‌میس خه‌نجه‌ر سه‌رۆكێ هه‌ڤپه‌یمانیا سه‌روه‌ری یا سوننی و ئه‌حمه‌د مه‌ته‌ری سه‌رۆكێ ده‌سته‌یا سیاسی یا ره‌وتێ سه‌دری و حه‌سه‌ن عه‌زاری سه‌رۆكێ فراكسیۆنا سه‌دری ل جڤاتا نوونه‌رێن ئیراقێ.

د كۆمبوونه‌كێ دا باسێ ره‌وشا سیاسی یا ئیراقێ و پێكئینانا كابینا نوو یا حوكمه‌تا ئیراقێ و ده‌ستپێشخه‌ریێن رێبه‌رێ ره‌وتێ سه‌دری موقته‌دا سه‌در.

د كۆمبوونێ دا فازل میرانی سكرتێرێ مه‌كته‌با سیاسی یا پارتی و رێبه‌ر ئه‌حمه‌د به‌ربژارێ پارتی بۆ پۆستێ سه‌رۆك كۆمارێ ئیراقێ به‌رهه‌ڤبوون.

ئه‌ڤ كۆمبوونه‌ د ده‌مه‌كی دابوو كو ل رۆژا ئێكشه‌مبیا بۆری سه‌ركردایه‌تیا پارتی كۆمبوو و بریار دا هه‌ڤپه‌یمانیا رزگاركرنا نیشتمانی كۆمببیت بۆ وێ چه‌ندێ بزاڤا راسته‌رێكرنا پرۆسا سیاسی ل ئیراقێ و ڤه‌گرنا گرێیان بكه‌ن.

ئه‌ڤرۆ:

به‌رپرسه‌كێ وه‌زاره‌تا ده‌رڤه‌ یا ئه‌لمانیا راگه‌هاند كو چه‌ند مه‌هێن رێژه‌یه‌كا زۆر ژ كوردان ل توركیا و هه‌رێما كوردستانێ داخوازا مافێ په‌نابه‌ریێ ل ئه‌لمانیا كرینه‌، لێ به‌رپرسێن ئه‌لمانیا ب ره‌نگه‌كێ ئاشكرا دیار كرینه‌ كو ره‌وشا كوردان هه‌م ل توركیا و هه‌م ژی ل هه‌رێما كوردستانێ باشه‌ و ژ به‌ر هندێ ژی پڕانیا وان كه‌سێن كو داخوازا په‌نابه‌ریێ كربوون داخوازا وان هاتیه‌ ره‌تكرن.

وه‌لاتیێن كورد یێن كو داخوازا په‌نابه‌ریێ كرینه‌ ژی دیار دكه‌ن كو هه‌لوه‌ستێ نوو یێ حوكمه‌تا ئه‌لمانیا جهێ دلگرانیێ یه‌، چونكو هێشتا ژی ل توركیا گه‌ف ل سه‌ر كوردان هه‌نه‌ و ژ به‌ر شه‌ری و ئالۆزیان هنده‌ك كه‌س نه‌چارن كو به‌رێ خوه‌ بده‌نه‌ وه‌لاتێن ئۆرۆپا ب تایبه‌تی ژی ئه‌لمانیا و داخواز دكه‌ن كو حوكمه‌تا ئه‌لمانیا پێداچوونێ د هه‌لوه‌ستێ خوه‌ دا بكه‌ت.

چاڤدێرێن سیاسی ژی دیار دكه‌ن كو ئێدی وه‌لاتێن ئێكه‌تیا ئۆرۆپا به‌رهه‌ڤ نینن وه‌كو به‌رێ په‌نابه‌ران وه‌ربگرن، چونكو نها پرانیا خه‌لكێن ئۆرۆپی ل دژی هاتنا په‌نابه‌رانن بۆ وه‌لاتێن وان.

ئه‌ڤرۆ:

بالیۆزخانا ئه‌مریكا ل سووریێ دلگرانیا خوه‌ ل هه‌مبه‌ر سۆتنا باره‌گایێن ئه‌نجوومه‌نێ نشتیمانی یێ كوردی ل رۆژئاڤایێ كوردستانێ دیار كریه‌ و داخواز ژ رێڤه‌به‌ریا خوه‌سه‌ر كریه‌ كو ئێدی رێ نه‌ده‌ن ئالۆزیێن وه‌سا دوباره‌ ببن.

ل گۆر راپۆرته‌كا رۆژناما شه‌رقولئه‌وسه‌ت بالیۆزخانا ئه‌مریكا ل سووریێ دلگرانیا خوه‌ ل هه‌مبه‌ر ئالۆزیێن ڤێ دووماهیێ ل رۆژئاڤایێ كوردستانێ دیار كریه‌ و داخواز ژ به‌رپرسێن رێڤه‌به‌ریا خوه‌سه‌ر ژی كریه‌ كو رێ نه‌ده‌ن ره‌وشا هه‌ی پتر ئالۆز ببیت و هه‌روه‌سا داخواز كریه‌ كو سۆتنا باره‌گایێن پارتێن سه‌ر ب ئه‌نجوومه‌نێ نشتیمانی یێ كوردی ل سووریێ نه‌هێنه‌ دوباره‌ كرن.

هه‌مان رۆژنامێ دیار كریه‌ كو فه‌رماندارێ هێزێن ئه‌مریكا ل رۆژئاڤایێ كوردستانێ ژی ب رێیا ته‌له‌فۆنێ ل گه‌ل فه‌رماندارێ گشتی یێ هێزێن سووریا دیموكرات ئاخڤیه‌ و دلگرانیا خوه‌ ل هه‌مبه‌ر كریارێن ڤێ دووماهیێ ل رۆژئاڤایێ كوردستانێ دیار كریه‌ و داخواز ژ فه‌رمانداریا گشتی یا هێزێن سووریا دیموكرات كریه‌ كو ئاسایشا رۆژئاڤایێ كوردستانێ بپارێزن و رێ نه‌ده‌ن هنده‌ك كه‌سێن توندره‌و ئێرشی باره‌گایێن پارتێن سیاسی ل رۆژئاڤایێ كوردستانێ بكه‌ن، چونكو ئه‌و یه‌ك دێ بیته‌ ئه‌گه‌رێ هندێ ره‌وشا هه‌ی پتر ئالۆز بیت و ئه‌مریكا ب چو ره‌نگه‌كێ ل گه‌ل هندێ نینه‌ نها ره‌وشا ناڤخوه‌یی ل رۆژئاڤایێ كوردستانێ یا ئالۆز بیت.

د راپۆرتێ‌ دا ئاماژه‌ ب هندێ ژی هاتیه‌ كرن كو بالیۆزخانا ئه‌مریكا داخواز ژ هه‌ر دو جڤاتێن كوردی یێن رۆژئاڤایێ كوردستانێ ژی كریه‌ كو ده‌ست ب گه‌ره‌كا دی یا دانوستاندنان بكه‌ن و هه‌موو پرسێن هه‌ی د ناڤبه‌را خوه‌ دا چاره‌سه‌ر بكه‌ن، چونكو دڤێت پرسێن د ناڤبه‌را هێز و ئالیێن سیاسی یێن ل رۆژئاڤایێ كوردستانێ دا دوور ژ شه‌ری و ب رێیێن سیاسی بهێنه‌ چاره‌سه‌ر كرن و ئه‌مریكا ب هه‌موو ره‌نگه‌كێ پشته‌ڤانیێ ل ده‌ستپێكرنا قۆناغه‌كا نوو ل رۆژئاڤایێ كوردستانێ دكه‌ت و ئه‌مریكا ئێرشێن ل سه‌ر باره‌گایێن پارتێن سه‌ر ب ئه‌نجوومه‌نێ نشتیمانی یێ كوردی ژی ب توندی شه‌رمزار دكه‌ت و دڤێت كریارێن وه‌سا جاره‌كا دی نه‌هێنه‌ دوباره‌ كرن.

ئه‌و یه‌ك د ده‌مه‌كێ دایه‌ كو حه‌فتیا بۆری ل رۆژئاڤایێ كوردستانێ هنده‌ك كه‌سان ئێرشی باره‌گایێن ئه‌نجوومه‌نێ نشتیمانی یێ كوردی ل سووریێ كرن و چاڤدێرێن سیاسی ژی دیار دكه‌ن كو ئالۆزیێن نها د ناڤبه‌را هه‌ر دو جڤاتێن كوردی یێن رۆژئاڤایێ كوردستانێ دا دێ زیانه‌كا خوه‌ یا گه‌له‌ك مه‌زن بۆ پاشه‌رۆژا كوردان ل سووریێ هه‌بیت و دڤێت هه‌ر دو جڤاتێن كوردی ژ بۆ پاشه‌رۆژا كوردان و پاراستنا به‌رژه‌وه‌ندیێن نه‌ته‌وه‌یی ل رۆژئاڤایێ كوردستانێ پێكڤه‌ ده‌ست ب قۆناغه‌كا نوو بكه‌ن و هه‌موو پرسێن هه‌ی ژی دڤێت دوور ژ توندوتیژیێ و ب رێیێن سیاسی بهێنه‌ چاره‌سه‌ركرن، چونكو هه‌كه‌ كورد ل سووریێ د ناڤا خوه‌ دا ئێكگرتی نه‌بن دێ زیانێن مه‌زن گه‌هنه‌ دۆزا كوردی ل سووریێ.

ئه‌ڤرۆ، سه‌رجان مه‌حمود:

ئالۆزیێن د ناڤبه‌را رێڤه‌به‌ریا خوه‌سه‌ر یا رۆژئاڤایێ كوردستانێ و رژێما ئه‌سه‌دی دا به‌رده‌وام دكه‌ن و هێزێن سه‌ربازی ل ده‌ڤه‌را حه‌له‌بێ كو ماهر ئه‌سه‌دێ برایێ به‌شار ئه‌سه‌دێ سه‌رۆكێ رژێما سووریێ فه‌رمانداریا وێ دكه‌ت هه‌ول دده‌ن ب دارێ زۆرێ تاخێن ئه‌شره‌فیه‌، شێخ مه‌قسود و ئه‌لشه‌هبا بكه‌نه‌ ژێر كۆنترۆلا خوه‌ و بۆ ڤێ چه‌ندێ هه‌موو رێیێن كو دچنه‌ ڤان تاخان داخستینه‌ و تاخێن كوردان ب ته‌مامی هاتینه‌ دۆرپێچ كرن، هێزێن رژێما سووریێ داخواز ژ كوردێن وان تاخان كرینه‌ یان دڤێت هه‌موو داخوازیێن هێزێن سووریێ بجه بینن یان ژی دڤێت تاخێن خوه‌ چۆل بكه‌ن.

د ڤێ مژارێ دا ئه‌ڤین عه‌فرین چالاكڤانا مافێن مرۆڤان بۆ رۆژناما ئه‌ڤرۆ راگه‌هاند كو به‌ری نها ژی چه‌ندین جاران رژێما سووریێ ئه‌و تاخ دۆرپێچ كرینه‌ و ئاریشه‌ بۆ كوردان دروست كرینه‌ و گۆت: (هێزێن هه‌والگریێ به‌ری نها داخواز ژ هنده‌ك وه‌لاتیێن كورد یێن وان تاخان كربوون كو دڤێت زانیاریان ل دۆر هێزێن كوردی و چالاكیێن كوردان بده‌نه‌ وان، لێ ئه‌و یه‌ك ژی ئالیێ خه‌لكی ڤه‌ ب توندی هاتبوو ره‌تكرن، ژ به‌ر هندێ ژی دو حه‌فتینه‌ كو هێزێن رژێما سووریێ رێ ناده‌ن خوارن و ده‌رمان بگه‌هیته‌ ده‌ستێ كوردان و ره‌وشا ئاكنجیێن كورد نها گه‌له‌ك خرابه‌، لێ وه‌لاتی به‌رهه‌ڤ نینن كو داخوازیێن هێزێن رژێما به‌شاری قه‌بوول بكه‌ن، وه‌لاتیێن كورد خوه‌ بۆ هه‌ر ئه‌گه‌ره‌كێ ژی به‌رهه‌ڤ كرینه‌).

د دووماهیا ئاخڤتنا خوه‌ دا ئه‌ڤینێ ئه‌و یه‌ك ژی راگه‌هاند ل دووڤ زانیاریێن كو گه‌هشتینه‌ وان شانده‌كێ رۆسیا د ناڤبه‌را رێڤه‌به‌ریا خوه‌سه‌ر و حوكمه‌تا ئه‌سه‌دی دا ناڤبه‌ینكاریێ دكه‌ت دا كو دۆرپێچا ئابووری ل سه‌ر تاخێن كوردان بهێته‌ راكرن و گۆت: (پشتی كو رێڤه‌به‌ریا خوه‌سه‌ر به‌رسڤا دۆرپێچا ئابووری یا ل سه‌ر تاخێن كوردان ل حه‌له‌بێ دا و هه‌موو بنگه‌هێن ئێمناهیێ ئانكۆ بنگه‌هێن د ده‌ستێ رژێما ئه‌سه‌دی دۆرپێچ كر ره‌وش هاتیه‌ گوهۆرین، چونكو هێزێن سه‌ر ب رێڤه‌به‌ریا خوه‌سه‌ر ناهێلن نها هێزێن ئێمناهیێ یێن رژێما سووریێ فرۆكه‌خانا قامشلۆ ژی بكار بینن و گه‌له‌ك رێیێن ستراتیژی هاتینه‌ كۆنترۆلكرن، پشتی ڤێ پێنگاڤا رێڤه‌به‌ریا خوه‌سه‌ر رۆسیا ده‌ست ب بزاڤه‌كا نوو كریه‌ و ئه‌م چاڤه‌رێ دكه‌ین د چه‌ند رۆژێن بهێت دا ئالۆزیێن هه‌ی بهێنه‌ چاره‌سه‌ر كرن).

ب، سه‌رجان مه‌حمود:

ده‌زگه‌هێن راگه‌هاندنا توركیا ب گرنگی به‌حسێ سه‌ره‌دانا سه‌رۆكێ حوكمه‌تا هه‌رێما كوردستانێ بۆ توركیا دكه‌ن و دیار دكه‌ن كو رۆلێ هه‌رێما كوردستانێ د ئیراقا ئێكگرتی و بجهبوونا ئێمناهیێ‌ و په‌یوه‌ندیێن ئابووری دا ل ده‌ڤه‌رێ گه‌له‌ك گرنگه‌ و توركیا باش دزانیت كو هه‌رێما كوردستانێ خوه‌دان پێگه‌هه‌ك بهێزه‌ ل ده‌ڤه‌رێ.

مه‌سرور بارزانی سه‌رۆك وه‌زیرێن هه‌رێما كوردستانێ ل گه‌ل شانده‌كێ حوكمه‌تێ رۆژا 15/4/2022 سه‌ره‌دانا توركیا كر و ل كۆ‌‌چكا دۆلماباخچه‌ ‌ل باژێرێ ئسته‌نبۆلێ ل گه‌ل ره‌جه‌ب ته‌یب ئه‌ردۆغانێ سه‌رۆك كۆمارێ توركیا هه‌ڤدیتنه‌ك ساز كر و د هه‌ڤدیتنێ دا په‌یوه‌ندیێن ئابووری، بازرگانی و پێشخستنا په‌یوه‌ندیێن دوقۆلی و پێشهاتێن ل رۆژهه‌لاتا ناڤین و ئیراقێ هاتنه‌ گه‌نگه‌شه‌ كرن.

رۆژنامه‌یێن توركیا یێن وه‌كو سه‌باح، حوڕییه‌ت و مللیه‌ت و گه‌له‌ك مالپه‌رێن توركیا ب گرنگی به‌حسێ هه‌ڤدیتنا سه‌رۆك كۆمارێ توركیا و سه‌رۆك وه‌زیرێن  هه‌رێما كوردستانێ كرن و راگه‌هاندن كو هه‌ڤدیتنه‌كا ئه‌رێنی و ب مفا هاتیه‌ سازكرن و ئاشكرا كرن كو د رۆژێن بهێت دا دێ پێنگاڤێن مه‌زن د وارێن ئابووری، بازرگانی و ئێمناهیێ دا هێنه‌ ئاڤێتن.

ل ئالیێ دی مالپه‌رێن ده‌نگێ ئه‌مریكا و دویچه‌  یا ئه‌لمانیا ژی د نووچه‌یێن خوه‌ دا راگه‌هاندن كو حوكمه‌تا هه‌رێما كوردستانێ و توركیا دخوازن په‌یوه‌ندیێن د ناڤبه‌را خوه‌ دا بگه‌هیننه‌ ئاسته‌كی بلند و هه‌ردو ئالی ژی هه‌ول دده‌ن ئارامیێ ل ده‌ڤه‌رێ بجه بكه‌ن و مالپه‌رێن ناڤهاتی راگه‌هاندن ژی پشتی مه‌سرور بارزانی بوویه‌ سه‌رۆك وه‌زیرێن هه‌رێما كوردستانێ ئه‌ڤه‌ جارا دویێ یه‌ سه‌ره‌دانا توركیا دكه‌ت و د هه‌ر دو سه‌ره‌دانێن خوه‌ دا ژی ب گه‌رمی پێشوازی لێ‌ هاتیه‌ كرن.

سه‌باره‌ت ب هه‌ڤدیتنا هه‌ر دو سه‌رۆكان رۆژنامه‌ڤان و نڤیسه‌رێن توركیا ژی راگه‌هاندن كو رۆلێ هه‌رێما كوردستانێ د ئیراقا ئێكگرتی و بجهبوونا ئێمناهی و په‌یوه‌ندیێن ئابووری دا ل ده‌ڤه‌رێ گه‌له‌ك گرنگه‌ و دیار ژی كرن كو كارساز و سه‌رما‌یه‌دارێن توركیا دشێن د گه‌له‌ك واران دا پرۆژه‌یێن ئابووریێ ل هه‌رێما كوردستانێ ئه‌نجام بده‌ن و د ڤێ چارچۆڤێ دا هه‌ڤدیتن و كۆمبوونێن د ناڤبه‌را هه‌ردو ئالیان دا بۆ ئارامیا ده‌ڤه‌رێ ب گرنگ ل قه‌له‌م دان.

چاڤدێرێن سیاسی ژی دیار دكه‌ن كو توركیا هه‌ست ب گرنگیا هه‌رێما كوردستانێ كریه‌ و باش دزانیت كو هه‌رێما كوردستانێ خوه‌دان پێگه‌هه‌كا خوه‌ یا گه‌له‌ك بهێزه‌ ل ئیراقێ و ئه‌ڤرۆكه‌ بێی هه‌رێما كوردستانێ چو حوكمه‌ته‌ك ل ئیراقێ ژی ناهێته‌ ئاڤاكرن، ژ به‌ر هندێ توركیا ژی دڤێت مفای ژ پێگه‌هێ هه‌رێما كوردستانێ وه‌ربگریت و نها په‌یوه‌ندیێن توركیا و هه‌رێما كوردستانێ د باشن و ئه‌و یه‌ك د به‌رژه‌وه‌ندیا هه‌ر دو ئالیان دایه‌ و سه‌ره‌دانا سه‌رۆكێ حوكمه‌تا هه‌رێما كوردستانێ ژی جاره‌كا دی سه‌لماند كو هه‌رێما كوردستانێ بۆ توركیا گه‌له‌ك گرنگه‌.

ئه‌ڤرۆ، هۆشه‌نگ تاجر:

پارتا سوسیالیست یا كوردستانێ پرۆژه‌یه‌كێ بۆ چاره‌سه‌ركرنا پرسا كوردی ل توركیا پێشكێش دكه‌ت و د پرۆژێ خوه‌ دا دا به‌حسێ هندێ كریه‌ دڤێت زمانێ كوردی ببیته‌ زمانێ فه‌رمی یێ خواندنێ و پێدڤیه‌ هه‌موو قه‌ده‌غه‌یێن ل سه‌ر ناڤێ كوردستانێ و خه‌باتا پارتێن سیاسی یێن كوردی بهێنه‌ راكرن.

بایرام بۆزیه‌ل جێگرێ سه‌رۆكێ گشتی یێ پارتا سوسیالیست یا كوردستانێ بۆ ئه‌ڤرۆ دیار كر كو پارتا وان ده‌مه‌كه‌ ل سه‌ر چاوانیا چاره‌سه‌ركرنا پرسا كوردی ل توركیا كار دكه‌ت و به‌ری نها وان سه‌ره‌دانا گه‌له‌ك پارتێن سیاسی، رێكخستنێن جڤاكێ سڤیل و كه‌سایه‌تیێن ناسكری ل باكورێ كوردستانێ كرینه‌ و وه‌كو پارتا سوسیالیست یا كوردستانێ وان پرۆژه‌یه‌ك به‌رهه‌ڤ كرینه‌ و د پرۆژێ خوه‌ دا به‌حسێ چاوانیا چاره‌سه‌ركرنا پرسا كوردی ل توركیا و باكورێ كوردستانێ دكه‌ن و گۆت: (بێگومان بۆ هه‌ر كه‌سه‌كێ ئاشكرایه‌ كو پرسا كوردی نها پرسا سه‌ره‌كی یا توركیا یه‌، چونكو هه‌تا نها پرسا كوردی ل توركیا نه‌هاتیه‌ چاره‌سه‌ركرن و ئه‌و یه‌ك بوویه‌ ئه‌گه‌ر كو توركیا تووشی گه‌له‌ك قه‌یرانێن مه‌زن بوویه‌، ب تایبه‌تی ژی قه‌یرانا ئابووری، ژ به‌ر هندێ ژی دڤێت پرسا كوردی دوور ژ شه‌ری و ب رێیێن سیاسی و ئاشتیانه‌ بهێته‌ چاره‌سه‌ركرن، ژ به‌ر هندێ ژی به‌ری هه‌ر تشته‌كێ دڤێت ده‌وله‌تا توركیا هه‌بوونا پرسا كوردی ب فه‌رمی قه‌بوول بكه‌ت).

ناڤهاتی ئه‌و یه‌ك ژی دیار كر كو دڤێت زمانێ كوردی ل توركیا ببیته‌ زمانێ فه‌رمی، ل باكورێ كوردستانێ ژی دڤێت زمانێ كوردی ببیته‌ زمانێ فه‌رمی یێ په‌روه‌ردێ، هه‌روه‌سا دڤێت چو ئاسته‌نگی ل هه‌مبه‌ر كار و خه‌باتا پارتێن سیاسی یێن كوردی ل توركیا نه‌مینیت، دڤێت رێ بهێته‌ دان پارتێن كوردستانی ب ناڤێ كورد و كوردستان خه‌باتێ بكه‌ن و نابیت ئاسته‌نگی ل هه‌مبه‌ر خه‌باتا سیاسی یا پارتێن كوردستانێ بهێته‌ دروستكرن و گۆت: (به‌ری نها ژ به‌ر سیاسه‌تا ئاسیمیلاسیۆنێ یا ده‌وله‌تا توركیا ناڤێن گه‌له‌ك ده‌ڤه‌رێن كوردی هاتینه‌ گوهۆرین، دڤێت ناڤێن وان ده‌ڤه‌ران دیسان وه‌كو به‌رێ ببنه‌ كوردی، هه‌روه‌سا دڤێت ده‌وله‌تا توركیا ده‌ستان ژ سیاسه‌تا خوه‌ یا توندوتیژیێ ل هه‌مبه‌ر گه‌لێ كورد ل توركیا و باكورێ كوردستانێ به‌رده‌ت، چونكو بۆ ده‌وله‌تا توركیا ژی هاتیه‌ سه‌لماندن كو ئه‌و نه‌شێن ب زۆلم و زۆرداریێ پرسا كوردی چاره‌سه‌ر بكه‌ن، پرسا كوردی ب شه‌ری و توندوتیژیێ ناهێته‌ چاره‌سه‌ركرن، ئه‌ڤرۆكه‌ پتر ژ هه‌ر ده‌مه‌كێ كورد ل توركیا هشیارن و داخوازا مافێن خوه‌ دكه‌ن).

جێگرێ سه‌رۆكێ گشتی یێ پارتا سوسیالیست یا كوردستانێ ئه‌و یه‌ك ژی دیار كر كو گه‌له‌ك خالێن دی یێن گرنگ ژی د پرۆژێ وان دا هه‌نه‌ و ئه‌و دێ ب فه‌رمی پرۆژێ خوه‌ پێشكێشی هه‌موو هێز و ئالیێن سیاسی و رایا گشتی ل توركیا و جیهانێ كه‌ن، چونكو بۆ هه‌ر كه‌سه‌كێ ئاشكرایه‌ ب چاره‌سه‌ركرنا پرسا كوردی دێ گه‌له‌ك قه‌یرانێن دی یێن نها ل توركیا ژی هێنه‌ چاره‌سه‌ركرن.

ئه‌ڤرۆ، عه‌زیز هه‌ورامی

هه‌ژماره‌كا چاڤدێرێن سیاسی و نڤیسه‌ر و رۆژنامه‌ڤان دبێژن، بزاڤا گۆران و هه‌موو حزبێن زۆنا كه‌سك ئاگه‌ه ژدزین و تالانكرنا ل ڤێ زۆنێ هه‌یه‌ به‌لێ ژ ترسان و ژ هه‌بوونا پشكێن خوه‌ د به‌رهه‌ڤ نینن به‌حسێ وێ دزیێ بكه‌ن و بێده‌نگی یا هه‌لبژارتی.

ئیمداد عه‌بدوللا، رۆژنامه‌ڤان ژ سلێمانیێ بۆ رۆژناما (ئه‌ڤرۆ) دبێژیت” قه‌یرانا نه‌مانا پاره‌ی ل به‌نكێن سلێمانیێ دیرۆكه‌ك یا هه‌ی، هۆكار ژی بۆ دزی و گه‌نده‌لیێ و ده‌ست ب سه‌رداگرتنا داهاتێ خالێن سنووری و باجا دزڤریت، حوكمه‌تا خوه‌جهی یا هه‌ر پارێزگه‌هه‌كێ به‌رپرسه‌ ژ هه‌ده‌ردانا سامانێ گشتی و نه‌مانا پاره‌ی ل به‌نكان، ئه‌م هه‌موو ژی دزانین كی ئیدارا سلێمانیێ ب رێڤه‌دبه‌ت و ئه‌و ژێ به‌رپرسن، لژنێن فه‌رمانگه‌هێن ب شه‌ش ده‌مژمێران ل به‌رده‌م به‌نكان دراوه‌ستن تاكو پارێ خالێن سنووری و هاتنوچوونێ و باجا بچیته‌ به‌نكان به‌لێ پێ دهێته‌ گۆتن پاره‌ نینه‌ و نه‌زڤریه‌.

گۆت ژی” پارێزگه‌رێ سلێمانیێ كه‌سه‌كه‌ ب رۆتین یێ ل پۆستێ خوه‌ و ده‌ستهه‌لات ل سه‌ر داهاتێ ناڤخوه‌یی نینه‌ و شیانێن گوهۆرینا رێڤه‌به‌رێ فه‌رمانگه‌هه‌كێ ژی نینن، چه‌ندین به‌رپرس و رێڤه‌به‌ر و قایمقام هاتنه‌ گوهارتن تنێ بۆ پارێزگه‌رێ هه‌بوو ئیمزا بكه‌ت و ئاگه‌ه ژ چو نه‌بوو و نه‌بوونا هه‌لویستی ل ده‌ف وی دزڤریت بۆ نه‌بوونا وی بۆ ده‌ستهه‌لاتان”.

سه‌لام كه‌ریم، چاڤدێرێ سیاسی بۆ (ئه‌ڤرۆ) دبێژیت” ئه‌ڤ ده‌ڤه‌ره‌ سنوورێ ده‌ستهه‌لاتا ئێكه‌تیێ یه‌ و د هه‌لبژارتنێن بۆری دا ژی بزاڤا گۆران و پاشی حزبێن دی ژی دروست بوون، نوكه‌ ئێكه‌تی هێزا ئێكێ یه‌ ل ڤێ ده‌ڤه‌رێ، به‌لێ كۆمه‌كا حزبان هه‌ژماره‌كا مه‌زن یا كورسیان بده‌ستڤه‌ئیناینه‌، ئه‌ڤ زۆنه‌ به‌رده‌وام زۆنه‌كه‌ پر ململانێ و كێشێن سیاسی یێن لێ هه‌ین و خه‌لكێ ڤێ زۆنێ دێ باجا ڤێ ململانێیا سیاسی ده‌ت”.

گۆت ژی” ئه‌و ململانێیا د ناڤبه‌را حزبان دا هه‌ی دێ كارتێكرنێ ل سێكته‌رێن دی یێن ژیانێ كه‌ت، پێدڤیه‌ بزاڤا گۆران ب خوه‌ به‌رسڤێ بده‌ت بۆچی ژ ڤێ ره‌وشێ یا بێ ده‌نگه‌ ؟ و حوكمه‌تێ ده‌ستهه‌لات ل سه‌ر هه‌موو مه‌رزێن بازرگانی نینه‌، ب دیتنا من هه‌كه‌ ئه‌ڤ ره‌وشه‌ ل زۆنا كه‌سك یا به‌رده‌وام بیت دێ بایكۆتا سه‌رانسه‌ری یا فه‌رمانبه‌ران په‌یدا بیت و نوكه‌ د هه‌یڤا نیسانێ داینه‌ لێ پشكه‌ك ژ فه‌رمانبه‌ران مووچێ هه‌یڤا شوباتێ وه‌رنه‌گرتیه‌”.

ناسح عه‌بدولره‌حمان، نڤیسه‌ر و ره‌خنه‌گر، دبێژیت” سروشتێ ئالیێن سیاسی ل سلێمانیێ ئه‌وه‌ كوخ ودانێن هیچ دیتنه‌كێ نینن، بزاڤا گۆران ژی وه‌كو هێزه‌كا كارڤه‌دان دروست بوو وژ ئه‌گه‌رێ كێشێن ناڤخوه‌ یێن دناڤ وێ بزاڤێ دا هه‌ین د ده‌مێ چه‌ند سالێن بۆری چه‌ندین بال دناڤ دا دروست بوون”.

دیاركر” بزاڤا گۆران و هه‌موو حزبێن سیاسی ل زۆنا سلێمانیێ ئاگاهدارن ژ وێ دزی و گه‌نده‌لی و تالانكرن و ده‌ست ب سه‌رداگرتن و مافیاگه‌ریا ل سلێمانیێ هه‌ی، به‌لێ ژ ئه‌گه‌رێ وێ چه‌ندێ كو هێزه‌كا چه‌كدار ده‌ستهه‌لاتدا ر یا هه‌ی هیچ ئالیه‌ك ژ وان وێره‌كیا وێ چه‌ندێ ناكه‌ن په‌ردێ ل سه‌ر وان كاران راكه‌ن و ل سه‌ر باخڤن و پشكه‌ك ژی په‌یوه‌ندی ب وێ ئێكێ ڤه‌ هه‌یه‌ كو ئه‌و دزی وتالانكرنا ل وێ زۆنیچ دهێته‌ كرن، هه‌ر حزبه‌ك ژوان پشكا خوه‌ هه‌یه‌ ب رێیێن جۆرا و جۆر”.

 

website security
WP Facebook Auto Publish Powered By : XYZScripts.com