ئەڤرۆ نیوز:
وه‌زاره‌تا ساخلەمیا هه‌رێما كوردستانێ راگەهاند: 11 كه‌سێن دی ب کۆرۆنایێ وەغەرکریە و 404 كه‌سێن دی تووشی كۆرۆنایێ بووینە، كو پرانیا وان ل هه‌ولێرێ و دهۆكێ نە.
دیسان گۆتیە: 2296 پشكنین هاتینە ئه‌نجامدان و تێدا، ده‌ركه‌فتیە کو 404 كه‌س تووشی كۆرۆنایێ بووینە، كو 218 ژ وان ل هه‌ولێرێ نە و 101 كه‌س ل دهۆكێ و 35 ل سلێمانیێ و 29 ل گه‌رمیان و 21 ل هه‌له‌بجه.
هه‌روه‌سا 160 كه‌سێن دیتر ژی باشبووینە.
ئەڤرۆ نیوز:
عەونی زیاب پەیڤدارێ وەزارەتا ژێدەرێن ئاڤێ ل عیراقێ راگەهاند: مستەفا کازمی سەرۆک وەزیرێ عیراقێ، مەهدی رەشید حەمدانی وەزیرێ ژێدەرێن ئاڤێ ل عیراقێ راستپاردیە ب سەرۆکاتیا شاندەکێ بۆ کۆمبوونەکێ ل گەل تورکیا ب مەرەما ئێکلاکرنا ئاریشێن ئاڤا رووبارێ دیجلە و فوراتی.
هەروەسا گوتیە ژی: عیراقێ گەلەک پێدڤی ب ئاڤێ هەیە، ژبەر وێ چەندێ نەگەهشتنا هەر رێککەفتنەکێ دێ گەلەک زیان گەهیتە عیراقێ.
ئەڤرۆ نیوز:
وەزارەتا ساخلەمی و ژینگەها عیراقێ راگەھاند: دو ھزار و ٤٧٧ حالەتێن نوویێن کۆرۆنایێ و دو ھزار و ٢٠١ حالەتێن باشبوونێ و ٦٥ حالەتێن وەغەرکرنێ ھاتینە تۆمار کرن.
هەتا نوکە ١٣٧ ھزار و ٥٥٦ کەس ل عیراقێ تووشی ڤایرۆسێ کۆرۆنایێ بووینە، ژ وێ ھژمارێ پێنج ھزار و ٩٤ کەسان وەغەرکریە، ٩٨ ھزار و ٤٤٢ کەس ژی ژ وێ نەخوشیێ باشبووینە.
ئەڤرۆ نیوز، زنار تۆڤی:
نوونەرێ خودانێن موەلیدان ل دھۆکێ راگەھاند: کو بھایێ ئەمپێرەکێ کارەبێ ل پارێزگەھا دھۆکێ بۆ هەیڤا حەفت نەھـ ھزار و ۲٥۰ دینارن.
ھەکار ھروری نوونەرێ خودانێن مووەلیدان د لژنا بلند یا سەرپەرشتیکرنا موەلیدێن دھۆکێ دا بۆ ئەڤرۆ نیوز راگەھاند: بریار ھاتیە دان بۆ ھەر ئەمپێرەکێ کارەبا مووەلیدان بۆ هەیڤا بوری ل دھۆکێ نەھـ ھزار و ۲٥۰ دینار دێ ھێنە وەرگرتن.
دیسان گۆتیە: ل هەیڤا بوری وان 260 دەمژمێران کارەب دایە وەلاتیان.
ئەڤرۆ نیوز:
رێڤەبەریا گشتی یا ساخلەمیا پارێزگەها دھۆکێ راگەھاند: چ ئاریشێن ئۆکسجینێ ل نەخۆشخانێ نینن و ژبەر تەمەن و نەخۆشیا دژوار، وێ ژنێ وەغەر کریە.
رێڤەبەریا گشتی یا ساخلەمیا پارێزگەھا دھۆکێ ل سەر وەغەرکرنا وێ ژنا ئەڤرۆ، یا توشبوویا کۆرۆنایێ راگەھاند: نەخۆشا ناڤبری ل روژا ٢٨/٧/٢٠٢٠ ل نەخۆشخانا کاڤین ھاتبوو نڤاندن و ژبەرکو ژیێ وێ ٦٥ سالبوون و ئێشێن دومدرێژ ھەبوون و رەوشا وێ یا دژوار بوو، لەوما ھاتە رەوانەکرن بو نەخۆشخانا تایبەت یا چارەسەریا تووشبوویێن کۆرۆنایێ و ھەموو کارێن پێدڤی بۆ ھاتینە کرن.
دیسان گۆتیە: ل رۆژا دویێ رەوشا وێ ب مەترسی کەفت و ل سەر ئوکسجینێ ھاتە دانان و چ ئاریشێن نەبوونا ئوکسجینێ ل نەخۆشخانێ نینن، لێ ژ ئەنجامێ دژواربوونا حالەتێ وێ ل سەر ئامیرێن ھەناسەدانا دەستکرد ل نەخۆشخانێ ھاتە دانان و ژبەر خرابیا رەوشا وێ وەغەرکریە.
ئەڤرۆ نیوز:
وەزارەتا ساخلەمیا ھەرێما کوردستانێ راگەھاند: ب فەرمانا سەرۆکێ حوکمەتا ھەرێما کوردستانێ ئێک ملیار دینار بۆ ساخلەمیا دھۆکێ ھاتنە تەرخانکرن.
هەروەسا وەزارەتا ساخلەمیا ھەرێما کوردستانێ راگەھاندنەک بەلاڤکریە و تێدا ھاتیە: ئەڤرۆ ب فەرمانا مەسرور بارزانی سەرۆکێ حوکمەتا ھەرێما کوردستانێ و د کڤانێ بزاڤێن رووب ب رووبوونا کۆرۆنایێ دا، گۆژمێ ئێک ملیار دینار بۆ ساخلەمیا دھۆکێ ھاتیە تەرخانکرن.
ئه‌ڤرۆ نیوز:
كارگێریا یانا چێلسى یا ئنگلیزى هزر ل فروتنا 9 یاریزانێن خوه كریه ل ڤه‌گوهاستنێن ڤێ هاڤینێ و ل جهێ ئه‌وان هه‌ڤبه‌ستێ ل گه‌ل چه‌ند یاریزانێن نوو ئیمزا بكه‌ن.
رۆژناما تایم”تایمز” یا بریتانى ئاشكراكریه راهێنه‌رێ یانا چێلسى فرانك لامبارد یانه ئاگاداركریه بوو وه‌رزێ نوو ئه‌وى پێدڤى ب شیانێن 9 یاریزانێن نوكه یێن یانێ نینه و هه‌كه یانه بخوازیت ماف هه‌یه بفروشیت كو دناڤا ئه‌وان یاریزانان دا چه‌ند ستێرێن به‌رنیاس یێن یانێ هه‌نه كو ژ یاریزانێن سه‌ره‌كى یێن یانێ بوون ل وه‌رزێ ئه‌ڤساله.
ئه‌و یاریزان ژى پێكهاتى نه هه‌ر ئێك ژ كیبا ئه‌ریزابالاگا گولچیێ تیمێ و ستێرا هێلا ناڤینا فره‌نسى ئه‌نگولو كانتى ، یێ ئیسپانى وماركوس ئه‌لونسو ومیتشی باتشوایی وروس باركلی وكورت زوما وی ئە‌ندریاس كریستنسن وێیمرسون بالمیری وتیمو باكایوكو.
هه‌ردیسان وێ رۆژنامێ ئاشكراكریه ژى راهێنه‌رێ چێلسى داخوازى ژ به‌رپرسێن وێ یانێ كریه هه‌ڤبه‌ستێ ل گه‌ل ستێرا بایرن لیڤه‌ركوزن یا ئه‌لمانى كای هافیرتس و هه‌ردیسان ل گه‌ل گولچیه‌كێ نوو ل گه‌ل به‌ره‌ڤانه‌كێ لایێ چه‌پى .
هه‌ژى گوتنێ یه یانا چێلسى ب فه‌رمى بوو وه‌رزێ نوو هه‌ڤبه‌ست ل گه‌ل دو یاریزانێن نوو ئیمزاكریه ل ماوێ بورى ئه‌وژى یێ مه‌غره‌بى و یانا ئه‌جاكس ئه‌مستردام حه‌كیم زیاش و هێرشبه‌رێ ئه‌لمانى و ستێرا یانا لایبزێگ تیمو فیرنر .
ئەڤرۆ نیوز:
پارێزگارێ بەیروتێ راگەهاند کو ژ بەر پەقینا دوهی یا ل بەیروتێ نێزیکی ٥ ملیارد دۆلاران زیان گەهشتیە لوبنانێ و ئەو یەک ژی دێ کارتێکرنا خوە ل هەموو ژیانا وەلاتیان ل لوبنانێ کەت.
مەروان عەبود ئەو یەک ژی دیار کر کو ژ بەر پەقینێ زیان گەهشتیە ٣٠٠ هزار مرۆڤان و جهێ ژیانا وان تێک چوویە و گەلەک ئاڤاهی ب تەمامی وێران بووینە، ب گشتی نێزیکی ٥ ملیارد دۆلاران زیان گەهشتیە لوبنانێ.
ئەڤرۆ نیوز، هۆشەنگ تاجر:
باوەر رۆژهەلاتی نوشدار ژ نەخوشخانا ئورمیێ بۆ ئەڤرۆ نیوز دیار کر کو رۆژانە پتر ژ دوسەد کەسان ل ناڤەندا ئورمیێ تووشی کۆرۆنایێ دبن و تنێ د ماوەیێ ٢٤ دەمژمێرێن بۆری دا ٨ تووشبوویێن کۆرۆنایێ جانێ خوە ژ دەست داینە و گۆت: (ل ئورمیێ رەوش گەلەک خرابە، وەلاتی وەکو پێدڤی پێگیریێ ب رێنمایان ناکەن و گەلەک کەس ژی ژ نەچاریێ و ژ بۆ پەیداکرنا نانێ رۆژانە دچنە سەر کاری و تووشی کۆرۆنایێ دبن).
ئه‌ڤرۆ نیۆز، سالار محه‌مه‌د دۆسكی:
سه‌رۆكێ سه‌ندیكا زێرنگرێن كوردستانێ تایێ دهۆكێ، پشتی نیڤرۆیا ئه‌ڤرۆ رۆژا چارشه‌مبی 5ی ته‌باخێ ئاشكراكر كو بهایێ غوراما زێری گه‌هشتیه 69 هزار و نیڤا و ژ دهی وه‌ره هزار و 500 دینار بۆ هه‌ر غورامێ چووینه سه‌ر بهایێ زێری و ئه‌ڤ بهایه دبلندبوونا به‌رده‌وام دایه.
شێخ عه‌بدوالسلام زێده‌تر بۆ ئه‌ڤرۆ نیۆز گۆت: (ئه‌ڤه 30 سالە زێرنگرم بۆ جارا ئێكێ یه بهایێ زێری دگه‌هیته ڤی ئاستی و ئه‌ڤه ب بازارێ جیهانی ڤه گرێدایه و به‌رامبه‌ر خه‌لك بتنێ یێ زێری دفرۆشن و كه‌سه‌ك ناكڕیت و ب تنێ حه‌لاقه دچن هه‌كه ئێكی نیشانیه‌ك هه‌بیت).
ناڤبری ئه‌و ژی گۆت: (ژ نه‌بوونا ده‌هواتا نوكه كه‌سه‌ك زێری ناكڕیت و هه‌ر هه‌موو دوكانێن زێری بێ كار ماینه و دوكاندار ژی سالانه كریێن خوه دده‌ن و هه‌ر هه‌موویان كریێن خوه داینه).
نيشاندان