ئەڤرۆ نیوز:
رێڤەبەریا گشتی یا ساخلەمیا پارێزگەها دهۆکێ راگەهاند: 8 تووشبوویێن دی یێن ڤایرۆسێ کۆرۆنایێ ل دهۆکێ کو د نەخۆشخانێدا بوون، پشتی هەموو پشکنین بۆ هاتینە کرن، دیاربوو کو ب تەمامی چارەسەربووینە و ب سلامەتی ژ نەخوەشخانێ دەرکەفتن و چوونە د ناڤ کەسوکارێن خوە دا.
ب ئه‌ڤێ چەندێ هژمارا چارەسەربوویان گەهشتنە 274 کەسان و ب تنێ 67 نەخۆش د نەخوەشخانێ دا ماینە.
ئەڤرۆ نیوز:
ئەزمان ئێکە ژ گرنگترین ئەندامێن لەشێ مرۆڤی، کو رۆژانە بێ راوەستیان و ب رەنگەکێ بەردەوام د دەمێ ئاخفتن و نانخوارنێ دا دهێتە بکارئینان، لێ کۆمەکا راستیان ل سەر ئەزمانی هەنە و دبیت گەلەک کەس ژی نەزانن.
مالپەرێ مسراوی ئاماژە ب چەندین راستیان دایە دەربارەی ئەزمانی، ژ وان ژی:
. ب چ رەنگان زمان ماندی نابیت.
. هەر ئەزمانەک ژ یێ دیتر یێ جۆدایە.
. زمان ماندی نابیت، لێ چێدبیت قەلە و ستور بیت و چەوری بکەڤیتە سەر.
. ل هەموو جهێن خوە دا هەست ب تامێن جۆدا ناکەت.
. برینێن ئەزمانی گەلەک بلەز چێدبن، هندەک جاران ژی چەند خولەکێن کێم دڤێت.
. رەنگێ ئەزمانێ تە گەلەک تشتان دەربارەی ساخلەمیا تە دبێژیت.
ئەڤرۆ نیوز:
ئەحمەد داود ئۆغلۆی دوبارە هێرش کرە سەر رەجەب تەیب ئەردۆگان و گۆتیە: ئەردۆگانی حزبا داد و گەشەپێدان کریە حزبەکا بنەمالی.
داود ئۆغلۆ سەرۆک وەزیرێ بەرێ یێ تورکیا و سەرۆکێ پارتیا داهاتیێ تورکیا ڕاگەهاند: ژبەر کو وی راستی دگوتن و بانگەشا ولاتەکێ نوو دکر، هندەک کەسایەتیێن ناڤ پارتیا داد و گەشەپێدانێ دخواستن تولا خوە ژ وی ڤەکەن، د دەمەکێدا ئەو نەدشیان بەرسڤا پرسیارێن من بدەن و ئەز رازی نەبووم کو ئەردۆگان دەستڤەدانێ د کاروبارێن من دا بکەت وەک سەرۆک وەزیر، ئەز هاتمە ئاگەهدارکرن کو ئەز ژ پارتیێ هاتیمە دوورخستن.
گۆتیە ژی: من دەست ژ وی بابەتی بەرنەدایە، کو ژبەر وی مە پارتیا داد و گەشەپێدان دروستکر، بەلکو من دەست ژ وان کەسان بەردا کو خۆ دەولەمەندکرن و کەسێن نێزیکێن خوە ئینانە د دەستهەلاتێ دا.
داود ئۆغلۆ ل سالا ٢٠٠٩ بوویە وەزیرێ دەرڤە یێ تورکیا، دەمێ ئەردۆگان ل سالا ٢٠١٤ بۆ سەرۆک کۆمار، ئەو بوویە سەرۆک وەزیرێ تورکیا، لێ ل سالا ٢٠١٦ ژبەر ناکۆکیێن ل گەل ئەردۆگان دەست ژ پۆستێ خوە بەردا.
ئەڤرۆ نیوز:
وەزارەتا ساخلەمیا هەرێما کوردستانێ تووشبوونا 258 کەسێن دی و وەغەرکرنا حەفت کەسێن دی ب ڤایرۆسێ کۆرۆنایێ د 24 دەمژمێرێن بوری راگەهاند، هەروەسا گۆتیه: ل هەولێرێ 162 تووشبووی، ل سلێمانیێ 50 تووشبووی، ل گەرمیان 34 تووشبووی، ل دهۆکێ دو تووشبووی، ل هەلەبجە 10 تووشبووی.
دیسان دیار کریە: کو د 24 دەمژمێرێن بوری دا 106 کەس چێبووینە، کو 61 کەس ژ وان ل هەولێرێ نە، 21 ل گەرمیان، هەشت کەس ل دهۆکێ و 16 کەس ژی ل هەلەبجە.
ئەڤرۆ نیوز:
ل ئێڤاریا ئەڤرۆ دوشەمبی هەیڤ ل لە سعودی نەهاتە دیتن، ب ڤی رەنگی هەکە سوبەهی سێشەمبی هەیڤ بهێته دیتن، دێ رۆژا چارشەمبی بیتە رۆژا ئێکێ ژ هەیڤا زیلحیجە و پشتی 10 رۆژان، ئانکو رۆژا ئەینی 31 تەموزێ دێ بیتە رۆژا ئێکێ یا جەژنا قوربانێ.
ئەڤرۆ دادگەها بلند یا سعودیێ داخواز کربوو چاڤدێریا ئەسمانی بهێتە كرن بۆ دیتنا هەیڤێ، د ئەنجامدا چ لایەنان دیتنا هەیڤێ رانەگەهاند، ب ڤی رەنگی دهێته چاڤەرێ کرن، سوبەهی هەیڤ بهێتە دیتن و رۆژا چارشەمبی ببیتە سەرێ هەیڤا كۆچی.
ئه‌ڤرۆ نیوز، بارزان مزوورى:
پیر ده‌یان جه‌عفه‌ر، به‌رپرسێ ئوفیسا شنگال یا ده‌زگه‌هێ خێرخازى بارزانى بۆ ئه‌ڤرۆ نیوز خویاكر: ل رێكه‌فتى 29/6/2020 هه‌تا نوکە 1500 خێزانێن ئاواره یێن ڤه‌گه‌ریاینه ل سه‌ر جهێن خۆ ل ده‌ڤه‌را شه‌نگال ل ده‌روازه‌یا سحێلا بۆ شه‌نگال به‌لێ ئه‌وێن ڤه‌گه‌ریاین د ره‌وشه‌كا خراپ دا دژین ژ نه‌بونا خزمه‌تگوزاریا ژلایێ وه‌زاره‌تا كوچ كوچبه‌ران یا حكومه‌تا عێراقێ و رێكخراوێن خێرخازى ڤه رۆژانه په‌یوه‌ندى ب مه‌ڤه دهێت كرن كۆ ره‌وشا وان یا خرابه نه ئاڤ و كاره‌ب و خزمه‌تگوزارى یێن رۆژانه پێتڤى نینن، پێشبینى ژى دهێت كرن زێده‌ترى 2 هزار خێزانێن دى ڤه‌گه‌رنه سه‌ر جهێن خۆ ژبه‌ركۆ وان هه‌موو كارۆبارێن خۆ رێڤه‌برینه بتنێ ماینه ڤه‌گه‌رنه سه‌ر جهێن خۆ،
ناڤهاتى خویاكر گه‌له‌ك ژوا خێزانا په‌شیمان بوینه به‌لێ ناچاربوینه ژبه‌ركۆ دناڤ رێزێن له‌شكه‌رێ عێراقێ و پولیس بوینه ژبه‌ر قه‌ده‌غه‌یا هاتن و چونێ بۆ وان ئاسته‌نگ دروست بون ده‌مێ ڤه‌دگه‌ریاین بۆ ده‌واما خۆ گه‌له‌ك ژوان ژى عه‌ردێ چاندنێ هه‌بویه ژبه‌ر وى عه‌ردى ڤه‌گه‌ریایه پتریا ئاوارێن ڤه‌دگه‌رێن دناڤ رێزێن پولیس و له‌شكه‌رێ عێراقێ نه،
ناڤهاتى گۆت:بۆ هه‌ر خێزانه‌كا ڤه‌دگه‌ریا بۆ سه‌ر جهێن خۆ ل ده‌روازه‌یا سحێلا ژلایێ ده‌زگه‌هى ڤه سندوقه‌كا ئاهێ خارنێ دگه‌ل دابین كرنا جلۆبه‌رگێن زارویان و خارنێن پێتڤى یێن رۆژانه بۆ دهاته دان به‌لێ ده‌مێ دگه‌هشتنه شه‌نگال نه وه‌زاره‌تا كوچ كوچبه‌ران و رێكخراوێن خێرخازى پێشوازیا وان نه‌كریه چ خزمه‌تگوزارى ژى بۆ نه‌گه‌هاندینه رۆژانه په‌یوه‌ندى ب مه دهێنە كرن پێدڤى ب هاریكاریێ نه .
ئەڤرۆ نیوز، عەلی حاجی :
بەری دەمەکێ کێم ژ ئەگەرێ شەرەکێ دناڤبەرا دو بنەمالان دا ل کومەلگەها هیزاوا یا سەر ب قەزا زاخۆ ڤە، سێ کەس بریندار بوون و هاتنە رەوانە کرن بۆ نەخوشخانا هەوار هاتنێ ل زاخۆ .
خەلات ئوسمان هاریکارێ رێڤەبەرێ نەخوشخانا هەوار هاتنێ ل زاخۆ بۆ ئەڤرۆ نیوز گۆت : ل ئێڤاریا ئەڤرۆ دوشەمبی ٢٠/٧/٢٠٢٠ ژ ئەگەرێ شەرەکێ ل کومەلگەها هیزاوا سێ کەسێن بریندار ئینانە نەخوشخانا هەوار هاتنێ ل زاخۆ، پشتی ئەو بریندار هاتینە نەخوشخانێ ئێکسەر نۆشداران ئەو بریندارە ئێخستنە د بن چاڤدێریێ دا کو دیار بوو ئێک ژ وان ب کێران بریندار بوویە و دو کەسێن دیتر ژی ب دار و بەران بریندار بووینە و برینێن وان هەر سێ کەسان ژی برینێن سڤکن و ل ژێر چاڤدێریا نۆشداران دانە.
ئەڤرۆ نیوز ، ئێقبال عومەر:
فروکێن شەرکەرێن سوپایێ تورکیا دوو جارا چیایێ لینکی ل زنجیرا چیایێ مەتینا سنورێ قەزا ئامێدیێ بوردومانکر .
پەیامنێرێ ئەڤرۆ نیوز ل ئامێدیێ ڕاگەھاند، ل دەمژمێر شەش ئێڤاری فروکێن شەرکەرێن سوپایێ تورکیا چەندین جاران دەرەجا ئێتیت ل چیایێ لینکی ل زنجیرا چیایێ مەتینا ل سنورێ قەزا ئامێدیێ بوردومان کر .
دیار کر ژی ، ئەو جھێ ھاتیە بوردومانکرن چیایێ لینکی یە دناڤبەرا ناحیا دێرەلوک و شێلادزێ و ژبەر کو بوردومان لسەرێ چیای بوویە و دوویری ناڤەندێن باژێرانە ناھێتە زانین زیانێن وان بوردومانان چبووینە .
ئەڤە د دەمەکێ دایە ، ب بهانەیا ھەبوونا بارەگەیێن چەکدارێن پەکەکێ بەردەوامی سنورێ قەزا ئامێدیێ دھێتە بوردومانکرن و ژبەر وێ سەدەمێ ژی چەندین وەلاتیێن سڤیل ل وێ دڤەرێ بوینە ئارمانجا فروکێن سوپایێ تورکیا و شەھیدبوونە و زەرەر و زیانێ مادی ل دیف خوە هێلاینە.
ئه‌ڤرۆ نیوز، مه‌حمود نهێلى:
پشتى گه‌هشتنا ده‌رامه‌تى جوتیارێن سنورێ ناحیا دێره‌لۆك ره‌ڤدێن به‌رازا ب شه‌ڤانه قه‌ستا چه‌مێن ده‌ڤه‌رێ دكه‌ن و زیانێن مالى دگه‌هیننێ.
ژ بۆ رێكگرتنێ ژ هاتنا به‌رازان و پاراستنا ده‌رامه‌تێ خوه، جوتیارێن ده‌ڤه‌رێ چه‌ندین رێكان بكار دئینن، مینا داڤان و ته‌قته‌قوشكان و ڤه‌دانا هه‌لامه‌تان و چه‌ندین رێیێن دى، لێ كارێ به‌ربه‌لاڤ ئه‌ڤه دو ساله جوتیارێن ده‌ڤه‌رێ ئه‌نجام دده‌ن، په‌رژانكرنا بیستان و زه‌ڤیانه ب نایلونێن ته‌یسوك و تێلێن قایم هه‌ر چه‌نده مه‌زاختنێن زۆر ژى دڤێن.
هاولاتیه‌ك بناڤێ نه‌عمان عمر دبێژیت: مه ئه‌ڤساله زه‌ڤیێن خوه یێن برنجى په‌رژانكرینه و هه‌روه‌سا گه‌له‌ك ژ جوتیارێن دن ژى هه‌لامه‌ت و ته‌قته‌قوشك، دناڤ زه‌ڤیێن خوه ڤه‌داینه و گۆت: (نوكه باشترین رێكە بۆ رێگرتنێ ژ به‌رازان په‌رژانكرنا زه‌ڤیانه و ب ڤێ یه‌كێ به‌راز خوه ل به‌رژانێن تێله‌كرى ناده‌ت و زه‌ڤیێن وانا ژ زیانێن به‌رازان دهێنه پاراستن).
و خویاكر، هنده‌ك جوتیاران ئه‌ڤساله رێیه‌كا دى ب كارئینایه بۆ دوورخستنا به‌رازان ل چه‌مى ئه‌و ژى ب رێیا به‌رژانكرنا بیستانا و زه‌ڤیێن برنجى ب نایلونێن ته‌یسوك و تێلێ یه و گۆت: (ئه‌ڤه ژى رێیه‌كا باشه بۆ دوورخستنا به‌رازان ل چه‌مى و ئه‌م شیانه مفایه‌كى باش ژى ژ ڤێ رێیى وه‌رگرین).
ئه‌ندازیار عسمه‌ت ئیبراهیم به‌رپرسێ هوبا چاندنێ ل دێره‌لوكێ دڤێ ده‌ربارێ دا دبێژیت: (ئه‌ڤساله هژمارەکا زۆرا جوتیاران برنج ل چه‌مێن سنورێ ده‌ڤه‌رێ چاندینه و ب ره‌نگه‌كى دیار ژى به‌راز حه‌ز ژ زه‌ڤیێن برنجى دكه‌ت بۆ دابینكرنا خارنا خوه، ژ به‌ر وێ یه‌كێ بارا پترێ ژ زه‌ڤیێ برنجى یێن ده‌ڤه‌رێ توشى ره‌ڤدێن به‌رازان دبن ب تایبه‌تى ژى ئه‌و زه‌ڤیێن نه‌هاتینه په‌رژانكرن و دیاركر، ئه‌ڤساله لایێ به‌روژى به‌راز قه‌ستا بیستان و زه‌ڤیان دكه‌ن و زیان گه‌هاندینێ).
نيشاندان