ئەڤرۆ نیوز:
سەرۆکێ پەرلەمانێ عیراقێ لژنەک بۆ گرێبەستێن کارەبێ پێکئینا، داکو پێداچوونێ د گرێبەستێن ١٥ سالێن وێ وەزارەتێ دا بهێنە کرن.
محەمەد حەلبوسی سەرۆکێ پەرلەمانێ عێراقێ، د راگەهاندنەکێ دا داخوازا هووربینیێ د جێبەجێکرنا پرۆژێن کارەبێ دا دکەت، ژ ئالیێ خوە ڤە وەزارەتا کارەبا عیراقێ هەڤکاریا خوە بۆ پەرلەمانی نیشاندا و راگەهاندیە: دێ وەزارەتا وان کارێن هەڤبەش ل گەل وێ لژنا پەرلەمانی کەت، دیسان گۆتیە: دەرگەهێن وان د ڤەکرینە بۆ هەر ڤەکۆلینەکا ل سەر وێ دوسیێ بهێتە کرن.
ئەڤرۆ نیوز:
شەر ل سەر سنۆرێ دناڤبەرا ئەرمینیا و ئازەربێجانێ دا روودا، دو سەربازێن ئازەربێجانی هاتنە کوشتن و 5 سەربازێن دیتر ژی برینداربوون.
وەزارەتا بەرگریا ئازەربێجانێ گۆتیە: سوپایێ ئەرمینیا ل هەرێما تاڤووشی، یا باکوورێ وی وەلاتی هێرشەک ئەنجامدایە، بەلێ ب تووندی بەرسڤا وان هاتیە دان.
ئەرمینیا رەخنێن تووند ل ئازەربێجانێ گرتینە و ب هۆکارێ دەستپێکرنا شەری ب ناڤکریە.
شوشان ستیپانیان، پەیڤدارێ وەزارەتا بەرگریا ئەرمینیا راگەهاند: سوپایێ ئازەربێجانێ هێرشەک ئەنجامدایە و مەبەستا وان ئەو بوو، چەند پێگەهێن مە کۆنترۆل بکەت، لێ سۆپایێ ئازەربێجانێ هاتە تێکشکاندن.
ئەڤرۆ نیوز:
وەزارەتا ساخلەمی و ژینگەها عیراقێ راگەھاند: د ٢٤ دەمژمێرێن بوری دا، دو ھزار و ٥٦٢ حالەتێن نوو یێن کۆرۆنایێ و دو ھزار و ٤٨ حالەتێن چێبوونێ و ٨٨ حالەتێن مرنێ ھاتینە تۆمار کرن.
ھەتا نوکە ٧٧ ھزار و ٥٠٦ کەس ل عیراقێ تووشی ڤایرۆسێ کۆرۆنایێ بووینە، ژ ڤێ ھژمارێ ژی ٣ ھزار و ١٥٠ کەسان وەغەر کریە، ٤٤ ھزار و ٧٢٤ کەس ژی ژ وێ نەخوشیێ چێبووینە.
ئەڤرۆ نیوز:
دادگەها ڤەكۆلینا هه‌ولێرێ یاداشتا ده‌ستگیركرنێ بۆ سۆران عومه‌ری ده‌ركر.
ده‌ركرنا وێ بریارا دادگەهێ پشتی هنگێ هات، دەمێ په‌رله‌مانی پارێزبه‌ندی ل سه‌ر په‌رله‌مانتارێ كۆمه‌لا ئیسلامی یا كوردستانێ، سۆران عومه‌ری هەلگرتی، داکو روو ب روو دادگەهێ ببیت.
لدووڤ وێ یاداشتا ده‌ستگیركرنێ، كو سه‌رۆكاتیا دادگەها تێهه‌لچوونا دەفەرا هه‌ولێرێ/ دادگەها ڤەكۆلینا هه‌ولێرێ ئاراسته‌ی هه‌موو ئه‌ندامێن دادوه‌ری و سه‌رجه‌م ئه‌ندامێن پۆلیسان كریە، ئه‌و هێزێن فه‌رمان پێ هاتیەدان، کو سۆران عومه‌ری وه‌ك تۆمه‌تبار ده‌ستگیر بكه‌ن و بده‌نە دادگەهێ، دیسان ل بنگەهێ پۆلیسێن خانه‌قا سكالا ل سه‌ر هاتیە تۆمار كرن.
سۆران عومه‌ر سه‌عید ئه‌حمه‌د ژ دایكبوویێ 12/ 12/ 1978 ل باژێرێ هه‌ولێرێ ل تاخێ نازستی ئاکنجی یە و ل سلێمانیێ ژی ل قه‌یوان ستی یه.
سۆران عومه‌ر، لدوڤ حوكمێن مادێ 433 ژ قانوونا سزادانا عیراقی یا ژماره 111 یا سالا 1969 دێ روو ب روو دادگەهێ بیت.
مادێ 433 ژ پشکا چارێ یا قانوونا سزادانێ یا تایبه‌ته ب جوین و سفکاتیێ، ئەو مادە ژ دو برگان پێكهاتیه، د یێ ئێکێ دا ئاماژه ب هندێ دایە، ئه‌و کەسێ جوینا ب هه‌ر كه‌سەکێ بدەت سزایێ وی یان گرتنە یان ژی غه‌رامه كرنه، دێ ب ئێك ژ وان سزایان هێتە سزا دان.
ئه‌ڤرۆ نیوز، مه‌حمود نهێلى:
پشتى كو دو پرێن سپنه ژ ئه‌نجامێ له‌هیێن ڤێ بهارێ ژناڤچووى ئێك ژ وان كو رێیا سه‌ره‌كى یا ه‌ژماره‌كا جوتیارێن ده‌ڤه‌رێ بوویه ژلایێ گه‌نجه‌كى ب داران هاته چێكرن لێ شڤێدى ژلایێ چه‌ند كه‌سه‌كێن نه نیاس ڤه هاته تێكدان.
كازم به‌رچى گه‌نجه‌كى خه‌لكێ ناحیا دێره‌لۆكێ كو چه‌ندین جاران ب كارێن خێرخوازى رابوویه بۆ ئه‌ڤرۆ نیوز دیاركر، ژ به‌ر كو ئه‌ڤ پره رێیا سه‌ره‌كى یا ه‌ژماره‌كا زۆرا جوتیار و خه‌لكێ ده‌ڤه‌رێ یه، وى فه‌ر دیت وه‌ك كاره‌كى خێرخوازى ڤێ پرا سپنه ب داران دروست بكه‌ته ڤه پشتى كو ژ ئه‌نجامێ بلندبوونا ئاڤا رووبارێ سپنه و دروستبوونا له‌هیان ژ ناڤچووى و گۆت: ( بۆ هه‌یاما چه‌ند هه‌یڤایه هاولاتیان ل سه‌ر ڤێ پرێ هاتن و چوون دكر، لێ ب مخابنى ڤه شڤێدى ژلایێ چه‌ند كه‌سه‌كێن نه نیاس ڤه هاتیه تێكدان و هاڤێژتیه د رووبارى دا).
ناڤهاتى داخاز ژلایه‌نێن په‌یوه‌ندیدار ژى كر، كو ئه‌ڤ كه‌سه بهێنه ئاشكراكرن و پێرابوون ل هه‌مبه‌ر بهێنه وه‌رگرتن.
و دیار كر كو نوكه جاره‌كا ب ره‌نگه‌كى ده‌مكى ئه‌ڤ پره چێكریه ڤه و هیڤى خواستن كو ئه‌ڤ كارێن ب ڤى ره‌نگى دوباره نه‌بنه ڤه.
ئەڤرۆ نیوز، عەلی حاجی :
بەرپرسێ راگەهاندن و پەیوەندیان ل رێڤەبەریا پاسەپورتێن دهوکێ دیار کر پشتی بەلاڤبوونا نووچەیەکێ ل تورێن جڤاکی ل دور دامەزراندنێ ل رێڤەبەریا پاسەپورتان ئەم ڤی نووچەیی رەت دکەین و چو راستیەک بۆ نینە .
زێدەتر نەقیبێ مافپەروەر سەعد ئیسماعیل گۆت: (دەمەکە ل تورێن جڤاکی بابەتەک بەلاڤ بوویە ل دور دامەزراندنا پولیسێن پاسەپورتان ل رێڤەبەریا پاسەپورتان و خەلکێ زۆر ژی بەلاڤ کری یە لەورا ل دور راستی و دروستیا بابەتی مە دیفچوونا بابەتی کریە دیار بوویە کو ڤی بابەتی چو راستییەک بۆ نینە و ئەڤ چەندە ژی ل جهێن بلند ژی هاتیە پشتراست کرن لەورا داخواز دکەین کو چو وەلاتی باوەر ژ وان گوت گوتکان نەکەت).
ئەڤرۆ نیوز، عەلی حاجی:
رێڤەبەرێ گشتیێ باژێرڤانیان ل پارێزگەها دهوکێ بۆ ئەڤرۆ نیوز دیار کر د چارچوڤەیێ پروژەێی چاکسازیێ دێ گوهورین د چەندین رێڤەبەرێن باژێرڤانیان دا ل سنورێ پارێزگەها دهوکێ دا هێنە کرن د دەمەکێ نێزیک دا .
زێدەتە ئەندازیار دیار بەحری گۆت: (پشتی سەرۆکێ حکومەتا هەرێما کوردستانێ پروژەیێ چاکسازیێ راگەهاندی بریارە ل سەر ئاستێ باژێرڤانیێن پارێزگەها دهوکی کو سەرجەمێ گشتی ٤٧ باژێرڤانی نە گوهورین ب سەر پرانیا سەرۆکێن باژێرڤانیان دا بهێتە کرن کو پشکەکا وان ژی سەروچاڤێن نوو نە و هندەک کەسێن دیتر ژی پێشتر شیاینە خزمەتەکا باش یا وەلاتیان بکەن ژ بەر وێ چەندێ دێ پوستێن سەرۆکێن باژێرڤانیان بەر ب وان کەڤیت و ئەڤ پروسەیە دێ د دەمەکێ نێزیک دا دەستپێکەت و ئەم ب وێ هێڤیێ نە کو پشتی ڤان گوهورینان خزمەتەکا باش یا وەلاتیان بهێتە کرن ژ بەر کو زێدەتری هەر دەمەکێ وەلاتی پێدڤی ب خزمەتگوزاریانە و ئارمانجا سەرەکی ژی ژ ڤان گوهورینان خزمەت کرنە پێخەمەتی وەلاتیان.
ئەڤرۆ نیوز:
وەزارەتا ساخلەمیا ئیرانێ راگەهاند کو د ماوەیێ ٢٤ دەمژمێرێن بۆری دا ١٩٤ کەس ل ئیرانێ ژ بەر ڤایرۆسێ کۆرۆنایێ مرینە و ب گشتی هەتا نها ١٢ هزار و ٨٢٩ کەس ل ئیرانێ ژ بەر کۆرۆنایێ مرینە.
ئەو یەک د دەمەکێ دایە کو بەری چەند رۆژان رێکخراوا ساخلەمیا جیهانێ دیار کربوو کو ئامارێن ئیران ل دۆر کۆرۆنایێ بەلاڤ دکەت راست نینن و ئیران گەلەک راستیان ژ رایا گشتی یا جیهانێ ڤەدشێریت.
ئەڤرۆ نیوز:
رێڤەبەرێ گشتی یێ گومرکێ ل هەرێما کوردستانێ راگەهاند کو بزاڤا بازرگانی ل گەل تورکیا، ئیران و سووریێ ٢٠% زێدە بوویە، چونکو مەها سێ یا ئەڤسالە بزاڤا بازرگانی ٤٥% کێم ببوو.
سامال عەبدولرەحمان ئەو یەک ژی دیار کر کو بەری نها ژ بەر کۆرۆنایێ بزاڤا بارزگانی گەلەک کێم ببوو لێ نها پێنگاڤ ب پێنگاڤ بزاڤا بازرگانی ل گەل هەر سێ وەلاتێن تورکیا، ئیران و سووریێ زێدەتر لێ دهێت.
نيشاندان