ئەڤرۆ نیوز، نەوزاد ھلۆری:
ل سنوورێ قەزا شێخان یا سەر ب پارێزگەھا دھۆک ئەڤ سالە نێزیکێ 50 دونەمێن عەردێ ب چاندنا کەلەمیان ھاتیە تەرخانکرن و بەلێ لاوازیا بازاری کارتێکرن ل کارێن جوتیاران کریە و زیان گەھاندیە وان.
ئەندازیار “ئەنوەر عەبدولرەحمان” بەرپرسێ بنگەھێ شیرەتکاریا چاندنێ ل قەسروکێ بۆ ئەڤرۆ نیوز گۆت: ل سنوورێ قەزا شێخان نێزیکێ 50 دونەمێن عەردی بو چاندنا کەلەمیان ھاتیە تەرخانکرن و رێژەیەکا باش یا کەلەمیان ھاتیە بەرھەمئینان).
زێدەتر گۆت: (ئەو جوتیارێن کو ل سنوورێ قەزا شێخان ب تایبەتی قەسروکێ کەلەمی چاندین پێکدھێن ژ نێزیکێ 20 جوتیاران ، و ھەتا نھا حوکمەتێ چوو ھاریکاری بو نەکرینە ، و ھەر چ نەبیت پێدڤی یە حوکمەت ھاریکاریا جوتیاران بکەت بو فروتنا بەرھەمێن وان و دابینکرنا بازارەکێ داکو زیاندار نەبن و بەرھەمێن وان نەمینن د دەستان دا).
بەرپرسێ بنگەھێ شیرەتکاریا چاندنێ ل قەسروکێ دیارکر ژی کو دوو جورێن کەلەمیان ل سنوورێ قەزا شێخان ھاتینە چاندن و گۆت ژی: (کەلەمێن سوور کیلو ب 300 دیناران و کەلەمیێن سپی ژی کیلو ب 250 دیناران دھێنە فروتن و ھەر ل بازارێن نافخوە و پارێزگەھێن دھۆک و ھەولێر دھێنە فروتن).
نوش نيوز:
پارێزەرەکێ دادگەھا دھۆکێ راگەھاند کو ئێکەم جارە دوسیەکا نوشدارەکێ ل دادگەھا دھۆکێ دھێتە ئێکلا کرن، پشتی کو وەلاتیەکێ سکالایەک ل سەر نوشدارەکێ تومار کری راببوو ب دروستکرنا دو راپورتێن پزیشکی یێن دەسپێکێ یێن نە دروست بۆ وی داکو ھەڤالەکێ خوە یێ نوشدار ژ ئاریشەکێ خلاس بکەت و گۆت: دادگەھێ ب سزایێ دو سالان ئەڤ نوشدارێ تاوانبار حوکم کر.
پارێزەر شاخەوان سەعید شنگاری ل دادگەھا دھۆکێ بۆ ئەڤرۆ دیار کر کو بۆ ئێکەم جار دوسیا نوشدارەکێ ل دادگەھا دھۆکێ ھاتە ئێکلاکرن و گۆت: پشتی کو وەلاتیەکی سکالایەک ل سەر تومار کری ئەڤ نوشدارە راببوو ب دروستکرنا دو راپورتێن پزیشکی یێن دەسپێکی یێن نە دروست ئانکو رەوشا وی نەخوشی دروست دیار نەکر بوو، بۆ ھەڤالێ خوە یێ نوشدار داکو وی ژ ئاریشەکێ خلاس کەت ئەڤە ژی دژی ئەرکێ وی یێ نوشداریی یە، نە وەکو نوشدارەک ل نەخوشخانێ و چاڤدێریا نەخوشان دکەت ئانکو مفای بگەھینتە کەسەکی ل سەر حسێبا کەسەکێ دیتر.
پارێزەری گۆتژی: د وێ راپورتێ دا دفنا نەخۆشی شکەست بوو وی نوشداری ب تنێ نڤێسی بۆ کو نەخۆش دبێژیت دفنا منا دئێشیت ئەگەر ژی ڤەدگەریت بۆ ھندێ کو شەرەدەڤ دناڤبەرا وی وەلاتی و نوشدارێ ھەڤالێ وی چێببوو نوشدارێ ھەڤالێ وی بوکسەک ل دفنا ڤی وەلاتیێ نەخۆش دا بوو، ئەڤ چەندە ببوو ئەگەرێ شکاندنا دفنا وی، لەورا ڤی نوشدارێ ھەڤالێ وی ڤیایە وی ب ڤێ راپورتا نە دروست رزگار بکەت ژ دادگەھێ ئەڤ داوایە گەلەک جارا دھاتە پاشخستن ئانکو نێزیکی حەفت روونشتان پێڤە چوون بۆ ماوێ (10) ھەیڤان ڤەکێشا و ئێک ژ داوایێن ب زەحمەت بوو ھەتا ھاتیە ئێکلا کرن ئەڤ داوایە ب شێوەکێ پاشمەلە ئانکو نوشدارێ تاوانبار یێ ئامادە نەبوو ل رۆژا دادگەھکرنا خوە چبۆ دەرڤەی وەلاتی.
پارێزەری ئەو چەندە ژی گۆت: پشتی قەناعەت بۆ دادگەھێ دروست بووی کو ئەو ھەموو گرۆڤێن ل بەر دەستێ وان تێرا سزادانا ڤی نوشدارێ تاوانبار ھەنە، ھەروەسا داگێران ژی د ڤێ داوایێ دا نەبوو دادوەری ل دووڤ بەندێ 331 ژ قانوونا سزایێن عیراقی یا سالا 1969 سزا دا ئەو ژی ب سزایێ دو سالان ھاتە حوکم کرن، دیسان دادگەھێ ماف دا ڤی وەلاتیێ سکالا کری داخازا قەرەبووکرنێ ژ دادگەھا مەدەنی بکەت ل سەر وێ زەرەرا ڤی نوشداری گەھاندیێ.
پارێزەری ئاشکرا کر ژی کو، ئەڤ نوشدارێ تاوانبار ب رەڤی دھێتە ھژمارتن ژ قانوونێ و ئەڤ بریارا دادگەھێ ل سەر وی ھاتیە گشتاندن ل سەر ھەموو زالگە ە و فروکخانا و دەزگەھێن سنووری ھەر وەختەکێ ھاتە ئاخا کوردستانێ ئێکسەر بھێتە دەستەسەر کرن.
شنگاری دا زانین ژی کو، گەلەک داوا ل سەر نوشداران ل دادگەھێ دھێنە تومارکرن بەلێ ناھێنە سزادان و حوکم کرن چۆنکی ئەو جھێ ئەو لێ کار دکەن ھەروەسا نوشدارێن ھەڤالێن وی گەلەک بەرەڤانیێ لێ دکەن، ئەڤە ژی دبیتە جھێ گازندێ کارێ خوە ب دروستی ناکەن نێزیکی 90% بەرەڤانیێ ژ ئێکدو دکەن و گۆت: ئەڤ داوایە ئێک ژ درێژترین داوایێن دادگەھا کەتنێ یا دھۆکێ بوو.
ئه‌ڤرۆ نيوز:
ئورسولا ڤۆن دێرلاين، وه‌زيرا به‌ره‌ڤانيا ئه‌لمانيا يا ل هه‌ولێر و ئه‌ڤرۆ دێ نه‌خۆشخانه‌كا تايبه‌ت ب پێشمه‌رگه‌يى ل هه‌ولێر ڤه‌كه‌ت.
ب گۆره‌ى پێزانينێن هاتينه به‌لاڤكرن د ڤێ سه‌ره‌دانا خوه دا، وه‌زيرا به‌ره‌ڤانيا ئه‌لمانيا بۆ هه‌ولێر، دێ نه‌خۆشخانه‌كا تايبه‌ت ب چاره‌كرن و دابينكرنا پێدڤيێن هێزێن پێشمه‌رگه‌يى ڤه‌كه‌ت، ل قووناغا ئێكێ كۆژمێ شه‌ش مليۆن يوريان بۆ هاتينه ته‌رخانكرن، پاشان دێ نه‌خۆشخانه هێته به‌رفره‌هكرن. ديسا دێ سه‌ره‌دانا راهێنه‌رێن ئه‌لمانى ژى كه‌ت كو 150 كه‌سن و مه‌شق و راهێنانان ب پێشمه‌رگه‌ى ل هه‌رێما كوردستانێ دكه‌ن.
ئه‌ڤرۆ نيوز:
دو پڕۆژە قانوون ھاتینە بەرھەڤکرن بۆ کۆنتڕۆلکرنا زێدەگاڤیێن ئەردێ چاندنێ و بڕیاردەرێ لیژنا چاندنێ ژی دبێژیت، ژ نوکە پێڤە دێ کرێ ل ڤێلا و مەزرەعا ھێتە وەرگرتن.
غەریب پێنجوینی، بڕیاردەرێ لیژنا چاندنێ ل پەرلەمانێ کوردستانێ بۆ رۆژناما ئەڤرۆ گۆت” دوپڕۆژە قانوون ھاتینە بەرھەڤکرن بۆ چارەسەرکرنا ئاریشەیێن ئەردێ چاندنێ و بڕیارە ژلایێ پەرلەمانێ کوردستانێ ڤە پڕۆژە بھێنە پەسەندکرن، ئێک ژوان پڕۆژەیان بۆ ڤێ چەندێ یە رێگری بھێتەکرن ل زێدەگاڤیێن سەر ئەردێ چاندنێ و ئیدی بۆ چو کەسەکی نابیت ئەردێ بۆ چاندنێ تێتە بکارئینان بۆ مەرەمێن دی وەکی چێکرنا ڤێلا و مەرەمێن بازرگانی وەکی چێکرنا عومبارا ل سەر ئەردێ چاندنێ و پەرژانکرنا ئەردی ژلایێ وەلاتیان ڤە.
غەریب پێنجوینی گۆتژی” پڕۆژەیەکێ دی بۆ رێکخستنا ئەردێ چاندنێ ھاتیە بەرھەڤکرن، کو ئەوژی دانانا سنوریەکیە بۆ ڤێلایێن ھاتینە چێکرن لسەر ئەردێ چاندنێ، ئەوژی بشێوەیەکی مفا ھەبیت بۆ بەرژەوەندیێن گشتی بۆ نموونە پێشنیار ھاتیەکرن، ئەو جھێن ھاتینە بکارئینان بۆ چێکرنا مەزرەعە و ڤێلا زەحمەتە بھێنە تێکدان بەلێ ناھێنە تاپۆکرن و دێ سالانە کرێ ھێتە وەرگرتن ژلایێ حوکمەتێ ڤە.
ئەڤرۆ نيوز:
ئەندامەکێ مەکتەبا سیاسی یا بەرەیێ تورکمانی کو ھەڤدەم ئەندامێ لیستا ھەمان پارتە ل پەرلەمانێ کوردستانێ دیارکر، پێشنیار ل سەر بەلاڤەکرنا بۆدجێ بۆ حوکمەتا عەبادی بلندکربوو و دیسا دیارکر کو پشکەکا ھەرە مەزنا بۆدجا عیراقێ بۆ وەقفا شیعی دھێتە تەرخانکرن.
ئایدن مەعروف ئەندامێ پەرلەمانێ کوردستانێ ژ فراکسیوونا بەرەیێ تورکمانی بۆ رۆژناما ئەڤرۆ گۆت: ل گەل وێ چەندێ نە کو بۆدجە بۆ ھەموو خەلکێ عیراقێ یە و دڤێت ب شێوازەکێ دادپەروەرانە بھێتە بەلاڤەکرن، ل دووڤ دەستورێ عیراقێ 17% پشکا ھەرێما کوردستانێ یە و دڤێت بێ گوھورین ئەڤ بەشە بۆدجە بۆ ھەرێما کوردستانێ بھێتە دابینکرن، مخابنی ڤە حوکمەتا عیراقێ ئەڤێ چەندێ بجە نائینت، وەک نەتەوەێ تورکمان ژ سالا 2003 وەرە ھەتا نوکە حوکمەتا عیراقێ بۆدجەکا تایبەت بۆ پێکھاتێن عیراقێ دابین نەکریە و گازندا ھەموو پێک ھاتا ل سەر ئەڤێ چەندێ یە، نەبتنێ بۆ تورکمان بەلکو بۆ ھەموو پێکھاتان ب کلدو ئاشور و ئەرمەن و شەبەک ڤە.
ئایدن مەعروف زێدەتر ژی گۆت: پشکەکا ھەرە مەزن یا بۆدجا عیراقێ بۆ وەقفێن ششیعە و سونە دھێتە دابینکرن و تایبەت بۆ وەقیفا شیعی و ئەڤە نابیت بڤی شێوازی بۆدجە بھێتە بەلاڤەکرن، دڤێت بێ جوداھی بۆدجە ل سەر ھەموویان بھێتە بەلاڤەکرن و ھەرێما کوردستانێ ژی تایبەتمەندیا خوە ھەیە و ئەڤە دەستورێ عیراقێ دا ھاتیە و حوکمەتا عیراقێ چ سەدەقا ل گەل گەلێ کوردستانێ ناکەت، چەند ژ رێژا 17% بھێتەکێمکرن ئەو زێدەگاڤی یە ل سەر دەستورێ عیراقێ و ئەڤە ژ دکەڤیتە بەندا نەبجھئینانا دەستورێ عیراقێ دا.
ئایدن مەعروف ئەو ژی ئاشکەراکر، پێشنیار وەک پێکھاتێن دناڤا عیراقێ دا دژین رادەستی حوکمەتا بەغدا کربوون ل سەر بەلاڤەکرنا بۆدجێ ب شێوازەکێ دا پەروەرانە.
ئه‌ڤرۆ نيوز:
بریارە ھەفتیا داھاتی وەزیرێ دەرڤە یێ ئەمریکا و شیرەتکارێ ئاسایشا نەتەوی یا وی وەلاتی سەرەدانا تورکیا بکەن، دەزگەھێن راگەھاندنا ئەمریکا ژی دیار دکەن کو ئارمانجا سەرەکی یا ڤێ سەرەدانێ ئەڤە کو ئەمریکا دێ داخواز ژ تورکیا کەت ئۆپەراسیۆنا ل سەر عەفرینێ بدەتە راگرتن و ژ بەر ھندێ دێ ئەرکێ ھەر دو بەرپرسێن ئەمریکی ڤێجارێ ب زەحمەت بیت.
کەنالێCNN یێ ئەمریکی دوھی د راپۆرتەکێ دا راگەھاند کو بریارە ناڤەراستا ھەفتیا بھێت ریکس تیلەرسۆن وەزیرێ دەرڤە یێ ئەمریکا ل گەل ماک ماستەر شیرەتکارێ ئاسایشا نەتەوی یا وی وەلاتی سەرەدانا تورکیا کەن، ئارمانجا سەرەکی یا ڤێ سەرەدانێ ل دۆر رەوشا سووریێ و باژێرێ عەفرینێ یە، ئەمریکا دێ داخواز ژ تورکیا کەت کو ئۆپەراسیۆنا ل سەر عەفرینێ بدەتە راگرتن و بزاڤێ بکەت پرسا ھەی ب رێیێن سیاسی چارە بکەت، لێ تشتێ ھەتا نھا ژ داخۆیانیێن بەرپرسێن تورکیا دیار دبیت ڤێ راستیێ نیشا ددەت کو ئەردۆگان و ھەڤالێن وی دێ داخوازا ئەمریکا رەت کەن، ژ بەر ھندێ ژی ئەرکێ ڤێجارێ یێن بەرپرسێن ئەمریکی ل تورکیا دێ یا ب زەحمەت بیت.
ل ئالیێ دی رۆژناما واشنتۆن پۆست ژی دیار کریە کو پەیوەندیێن ئەمریکا و تورکیا نھا د ئاستەکێ ھەری خراب دانە و ھەتا مرۆڤ دشێت بێژیت بەر ب نەمانێ ڤە دچن، ژ بەر ھندێ ژی تورکیا دخوازیت ھەموو کارتێن خوە ل دژی ئەمریکا بکار بینیت دا وی وەلاتی نەچار بکەت دەستان ژ پشتەڤانی کرنا یەپەگێ و ھێزێن سووریا دیموکراتیک بەردەت و ئێدی چەکان نەدەتە وان، لێ ئاشکرایە کو ئەمریکا بۆ مانا خوە ل سووریێ پێدڤی ب ھەبوونا ھێزێن سووریا دیموکراتیک و ب ھێزبوونا وانە، ژ بەر ھندێ ژی ئەمریکا وەسا ب رحەتی داخوازیا تورکیا قەبوول ناکەت، ژ بەر ھندێ ژی سەرەدانا ڤێجارێ یا وەزیرێ دەرڤە و شیرەتکارێ ئاسایشا نەتەوی یا ئەمریکا بۆ تورکیا دێ گەلەکێ ب زەحمەت بیت.
ھەر د ڤێ مژارێ دا دوھی وەزیرێ دەرڤە یێ ئەمریکا راگەھاند کو سەرەدانا ڤێجارێ بۆ تورکیا دێ گەلەکێ جودا بیت، چونکو گەلەک بابەتێن گرنگ و چارەنڤیساز ھەنە کو دڤێت ئەم د ناڤبەرا خوە دا چارە بکەین، ھەکە تورکیا ل سەر ھەلویستێ خوە یێ نھا بەردەوام بیت و ھاریکاریا وان گرۆپێن چەکداری ل سووریێ بکەت و وان ل دژی ھەڤپەیمانێن مە بکار بینیت دێ پەیوەندیێن مە خرابتر لێ ھێن، ژ بەر ھندێ ئەم ھێڤیدارین کو تورکیا ژی پێداچوونەکا تەمام د پەیوەندیێن خوە ل گەل ئەمریکا بکەت.
چاڤدێرێن سیاسی دیار دکەن کو ھەر دو بەرپرسێن ئەمریکا دێ ھۆشداریەکا توند بدەنە تورکیا کو نابیت خوە نێزیکی منبجێ بکەت و دێ داخوازا راگرتنا یان ژی سنوردارکرنا ئۆپەراسیۆنا عەفرینێ کەن، ھەروەسا دێ گەفا ھندێ ژی ل تورکیا کەن کو ھەکە تورکیا بەرژەوەندیێن ئەمریکا بەرچاڤ وەرنەگریت دێ ئەمریکا نەچار بیت د چەندین بیاڤان دا دەست ب سزادانا تورکیا بکەت.
ل ئالیێ دی جەنەرالەکێ ئەمریکی ژی راگەھاند کو تورکیا ئەو شیان نینن ل سووریێ شەرێ ھێزێ مە بکەت، ھەکە تورکیا ھێرشێ ھێزێن مە ل منبجێ بکەت دێ ب دژواری بەرسڤا وان دەین، چونکو مە بەری نھا ژی دیار کریە کو منبج بۆ مە ھێلا سورە و نابیت تورکیا ھێرشی وێ دەڤەرێ بکەت.
ئەڤرۆ نیوز، زنار تۆڤی:
چاڤدێرەکێ سیاسی ل دۆر ھەلبژارتنێن داھاتی و ھەلویستێ پارتێن کوردستانی و پشکداریا وان د پەرلەمانێ عێراقێ دا بۆ رۆژناما ئەڤرۆ راگەھاند، ھەتا نوکە حزبێن کوردستانی نەبووینە ئێک ھەلویست ل سەر پشکداریا وان د ھەلبژارتنێن داھاتی یێن پەرلەمانێ عێراقێ دا، لەورا د رەوشەکا وەکی نوکە یا ئالۆز دا پێدڤیە کورد ل دەڤەرێن کوردستانی یێن دەرڤەی ئیدارا ھەرێمێ دا ببنە ئێک لیست و دڤێت ل بەغدا ژی د ئێکگرتی بن، ھەروەسا پشکداریا کوردان ب ئێک لیست د وان دەڤەران دا دو تشتێن گەلەک ژێک جۆدا ھەنە، لەورا ھندەک ژ خەلکێ کەرکوکێ ب مۆسلێ بەراورد کەن، لێ ئەڤ چەندە یا ژێکجۆدایە، چونکی کەرکوک باژێرەکێ کوردستانیە،لێ مۆسل باژێرەکێ عێراقیە، ھەر چەندین دەڤەرێن کوردستانی سەر ب وی باژێری ڤە ھەنە و کوردان چەند کورسیێن پەرلەمانی ل ڤی باژێری ھەنە.
سیروان گەردی گۆت:کوردان ئاریشە د کورسیانێ دا نینە،لێ مە ئاریشە د ئێک ھەلویستی و ئێکرێزیا کوردان دا ھەیە، لەورا دڤێت ھەموو لایەن د کۆکبن ل سەر ھندێ کو ب ئێک لیست ل ڤان دەڤەران دا پشکداریێ د ھەلبژارتنێن پەرلەمانێ عێراقێ دا بکەن، ھەر چەندە ل پێش عەرەبان ڤە کوردان کورسیێن کێم ل بەغدا ھەنە،لێ ئێکرێزی و ئێک ھەلویستیا کوردان ل بەغدا دێ وە کەت،کو کورد دێ ھێزەکا مەزن نیشا عێراقێ و ھەموو جیھانێ دەن،ئەم دێ بۆ وان دیارکەین،کو کورد ئێک دەنگن، ب تایبەتی د وان پرسێن گرێدایی ب چارەنڤیسێ کوردان و ماددێ 140 ڤە، لێ مخابن ھێشتا ھندەک حزبێن کوردستانی رێگرن کو ئەڤ ئەجندایە سەر بگریت، ھەروەسا ھەردەم کورد پرت و بەلاڤە بووینە و ئێک ھەلویست نەبووینە د ئاستێن بلند دا.
چاڤدێرێ سیاسیە زێدەتر دبێژیت، نوکە ھەموو لایەنێن سیاسی یێن کوردستانی دڤێن خوە نێزیکی ھندەک لایەنێن عێراقی بکەن، داکو بشێن ھەڤپەیمانیان ل گەل وان لایەنێن عێراقی دروست بکەن، ژ پێخەمەت بشێن ھندەک دەستکەفتێن ماددی ب دەست خوەڤە بینن، ھەروەسا ھوکارێن ئێکنەگرتنا کوردان چو رێگری ل ھەمبەر نینن، ژبەرکو بریارەکە ھەموو لایەن دێ دەن ژبۆ بەرژەوەندا مللەتێ کوردستانێ،لەورا ھەکە ب ئێک دەنگ ئەم نەچینە بەغدا، دێ کورد پارچە پارچە بن و ب تایبەتی ل ڤان ھەلبژارتنێن داھاتی دا دێ پێکئینانا حوکمەتا عێراقێ گەلەک یا ب زەحمەت بیت، چونکی ھیچ لایەنەک و ھەڤپەیمانیەکا سیاسی ل عێراقێ 50 کورسیێن پەرلەمانی ب دەستڤە نائینیت.
ناڤھاتی ئەو ژی گوت: پێکئینانا حوکمەتا داھاتی ل بەغدا دێ گەلەک دەم پێڤە چیت،لەورا د نوکە دا ھەکە کورد ببنە ئێک لیست و پشکداریێ د ھەلبژارتنێن عێراقێ دا بکەن، دێ شێن ب ئێک پاکێج ھەموو داخوازیێن خوە ھەر ژ ماددێ 140 و مووچێ پێشمەرگەی و ھەموو پرسێن گرێدایی کوردستانێ ب رەنگەکێ ب ھێز ئاراستەی بەغدا کەن، چونکی ھەکە ئەو داخوازیێن کوردان نەھێنە بجھئینان، دێ پێکئینانا کابینا نوو یا حوکمەتا عێراقێ گەلەکا ب زەحمەت بیت، ھەکە کورد ئێک دەنگ و ئێک ھەلویست بن،لێ ھەکە ئێکرێز و ئێک ھەلویست نەبن،ھندەک لایەن بچنە بەغدا و ھندەک ژی نەچن،ل وی دەمی دێ حوکمەتا عێراقێ پێکھێت و کورد ژی نەشێن د دانوستاندنان دا چو ب دەستڤە بینن.
سیروان گەردی زێدەتر گۆت: پشتی کەرکوک و چەندین دەڤەرێن دیتر یێن کوردستانێ کەفتینە ژێر دەستێ حوکمەتا عێراقێ دا،ڤێ جارێ دێ رێژا کورسیێن کوردان ل پەرلەمانێ عێراقێ دا کێمبن، ھەر چەندە کورسیان ھند گرنگیا خوە نینە،لێ ھەکە کورد ڤێ جارێ ب ئێک دەنگ و ئێک ھەلویست و ئێک پاکێج نەچنە بەغدا،ئەو ھیڤیا کوردان ب ماددێ 140 ژی مایی ئێدی نامینیت و دەڤەرێن کوردستانی یێن دەرڤەی ھەرێمێ ژی دێ ھەموو ب تەمامی کەڤنە ژێر رکێفا بەغدا.
ئه‌ڤرۆ نیوز:
پشتى كو ئۆرسولا ڤون دێرلاین وه‌زیرا به‌ره‌ڤانیا ئه‌لمانیا رۆژا شه‌مبى سه‌ره‌دانا به‌غدا داى، بڕیاره سوبه سه‌ره‌دانا هه‌رێما كوردستانێ بده‌ت و ل گه‌ل به‌رپرسێن هه‌رێما كوردستانێ ژى كۆم ببیت.
ل دووڤ راگه‌هه‌هاندنا نڤیسینگه‌ها سه‌رۆك وه‌زیرێن عیراقێ، هه‌ردو ئالیان د دیداره‌كێ دا، به‌حسێ بیاڤێ ئێمناهیێ دا و ئاڤه‌دانكرنا ده‌ڤه‌رێن وێرانكرى كرینه و وه‌زیرا ده‌رڤه‌یا ئه‌لمانیا پشته‌ڤانیا خوه بۆ عیراقێ د هه‌موو بیاڤان دا ده‌ربرى ب تایبه‌ت ئاڤه‌دانكرنا ده‌ڤه‌رێن وێرانكرى.
ئەڤرو نیوز، نه‌وزاد هلوری:
ئێڤاریا ئەڤرو شه‌مبيێ 10/2/2018 ، ل سەنتەرێ قەزا بەردەرەش ب ئەگەرەکێ نەدیار گەنجەکى ب گوله‌يه‌‌كێ خوە کوشت.
عەقید (زەکی کوچەر) رێڤەبەرێ پۆلیسێن بەردەرەش بۆ ئەڤرۆ نیوز گۆت” ئێڤاریا ئەڤرۆ ل سەنتەرێ قەزا بەردەرەش گەنجەکێ دژیێ 14 سالیێ دانه‌هاتيه زانین، پۆليسان ژى دەست ب ڤەکۆلینێ کریە ل سەر ئەگەرێن خوەکوشتنا وی گەنجی”.
نيشاندان