ئەڤرۆ نیوز:
زور جار دناڤ جڤاکێ مەدا ئافرەت دھێتە سەردابرن ژلایێ زەلامی ڤە باوەریا خوە پێ دئینیت و پەیوەندیێن ئەڤینی دگەل گرێددەن ھەتا کو ھندەک ژ وان دگەھنە ئەنجامدانا کریارا سکسی، لێ زور جاران پشتی سەردابرنێ کور دەستا ژ ڤان پەیوەندییا بەردەت و پشتا خوە ددەتە ڤێ کچێ ئەو ژی دکەڤیتە ھندەک بارودوخێن نالەباردا، ئەڤ یەکە ژی ل دووڤ قانوونێ تاوانە چونکو یا ھاتیە سەردابرن ژلایێ زەلامی ڤە ب ھندەک رێیێن نە قانوونی.
پارێزەر جوتیار تارق بۆ ئەڤرو دیار دکەت کو ھەرکەسێ ڤی کاری بکەت و کچێ بو خوە نەخازیت وێ کچێ ماف ھەیە سکالایێ ل سەر توماربکەت و گۆت: ل دووڤ قانوونا سزادانا عێراقی و کوردستانێ ژی ژ دوو لایەناڤە کچ دێ سکالایێ بلندکەت یائێکێ ژلایێ سزایی ڤە ئەڤ کورە دێ ھێتە سزادان، یادویێ کچ دێ ھێتە قەرەبووکرن ژلایێ کوریڤە و قەرەبووکرن دێ ل دووڤ راپورتا شارەزایەکێ بیت کو ژلایێ دادوەری ئەڤ شارەزایە دھێتە دەست نیشانکرن، گۆتژی ل دووڤ قانوونێ رێ نەھاتیەدان ڤان ھەردوو کەسان ب زۆری لێک مەھرکەن چونکو قانوونا بارێ کەسایەتی پێدڤی ب رازیبوونا ھەردو لایەنانە ھەتا کو گرێبەستا ھەڤژینیێ پێک بھینن.
ھەر ل دۆر ڤی بابەتی پارێزەر سامی سدقی ژی دبێژیت: سەردابرنا ئافرەتێ ژلایێ زەلامی ڤە وئەنجامدانا کارێ سێکسی دگەل یاسا دانەری بو ھەر ژییەکی و بارەکێ سزایەک دارشتی یە، ھەرکارەکێ سێکسی دژی ھەر رەگەزەکێ بھێتە ئەنجامدان و تاوانلێکریا ژیێ 18سالیێ تمام نەکربیت دھێتەسزادان، گۆتژی ئەگەر ھاتوو ئافرەتێ ژیێ وێ 18سال بیت وھاتبیتە سەردابرن ژلایێ زەلامەکێڤە و کارێ سێکسی دگەلدا ئەنجامدابیت ب بھانەیا وێ چەندێ کو دێ ھەڤژینیێ دگەل پێک ئینیت وی دەمی ل گورەی بەندێ 395 تاوان کەتنە و دادگەە دشێت ھەتا پێنج سالان تاوانباری بەند بکەت ول گورەی قانوونێ ئافرەتێ مافێ ھەی داخازا قەرەبوویێ ژتاوانباری بکەتن، لێ ئەگەر ئافرەتێ ژیێ 18سالیێ تمام نەکربیت وی دەمی قانوون زۆر ب توندی سەرەدەری دگەل ڤی تاوانی کریە و سزایەک بوتاوانباری دانایە کو دگەھیتە بەندکرنا ھەتاھەتایی ل گورەی بەندێ 393 ل قانوونا سزایا عیراقێ یا ژمارە 111 یا سالا 1969 یا راستڤەکری.
زێدەتر گۆت: ڤان جورە تاوانا یاسا دانەری دەلیڤەک دایە تاوانباری ئەو ژی ئەگەر ھاتوو شیا گرێبەستەکا ھەڤژینیێ دگەل تاوانلێکریێ گرێبدەت ودادگەە وی دەمی ل گورەی بەندێ 130و131دێ ب چاڤێ دلوڤانیێ سەحکەتە تاوانباری و ب سڤکی سزادەت، لێ نابیت بوماوێ سێ سالان تاوانبار ببیتە ئەگەرێ ھەلوەشاندنا گرێبەستا ھەڤژینیێ نەکو وی دەمی جارەکا دیتر دێ دادگەھا وی ھێتەکرن.

ئه‌ڤرۆ نيوز:
ھەر سێ وەلاتێن جیرانێن عیراقێ ل گۆرەی رێکەفتنێن ھاتینەکرن، ئاڤێ بۆ عێراقێ بەرنادەن و ھەموو لایەکی ئاڤ ل سەر عیراقێ ڤەگرتیە. ئەندامەکێ لیژنا ئاڤێ ل جڤاتا نوونەرێن عێراقێ ئاشکرا کر، ئەگەر ژ بەر ڤان ژێدەرێن ناڤخۆیی نەبیت، دێ عیراق تووشی ئاریشەکا مەزن یا کێم ئاڤیێ بیت.
خۆشەڤی خەلیل، ئەندامێ لیژنا ئاڤێ ل پەرلەمانێ عێراقێ بۆ رۆژناما ئەڤرۆ دیار کر، ل ھەموو جیھانێ رێکەفتن ل دۆر ڤان ژێدەرێن ئاڤێ دھێنەکرن یێن دچنە ناڤا ئەردێ وەلاتێن دی، عێراقێ ژی رێکەفتن ل گەل ھەر ئێک ل سووریا و عێراق و تورکیا بۆ بەردانا ئاڤێ ھەبوویە، مخابن ئەڤ سالە ھەموویێ ل گورەی ئەڤ رێکەفتنا عێراق و تورکیا رێژا بەردانا ئاڤێ 40%ێ دەرباز نەبوویە، واتە تورکیا 60% ئاڤێ ل گۆرەی رێکەفتنێ بەرنادەت، ل سووریێ ژی ل ھاڤینا بۆری ھەموویێ ئاڤ ل سووریێ نەھاتیە، ژ بەرکو بەنداڤەک ل بن کۆنتڕۆلا داعش بوویە، ژ لایێ ئیرانێ ڤە ژی نوکە ئاڤ ل سەر رووبارێ سیروان ھاتیە گرتن و دچیتە سەر دەریا ئورمیێ، ھەروەسا رووبارێ کاروون رژییت باشوورێ عێراقێ و ئیرانێ ب تنێ 20% یا ئاڤێ بەردایە بۆ ڤی رووباری، ل ھەموو لایەکی ڤە رێکەفتنێن ل گەل عێراقێ ھاتینە کرن ل گۆرەی ڤان رێکەفتنان ئاڤ بۆ عێراقێ و ھەرێما کوردستانێ ناھێتە بەردان.
ئەندامێ لیژنا ئاڤێ گۆت ژی “ل سەر ڤەگرتنا ئاڤێ ل سەر عێراقێ، جڤاتا نوونەران پێشنیازکر کۆنگرەیەک بھێتە گرێدان، کۆنگرەی بڕیار دا سەرۆکایەتیا جڤاتا وەزیران لیژنەک پێکبینن بۆ ڤێ مەرەمێ، ئەندامێن پەرلەمانی ژی د ڤێ لیژنێ دا ئەندامن، لیژنە دێ سەرەدانا وەلاتێن جیران ل دۆر ڤەگرتنا ئاڤێ کەت، بەلێ ژبەر کاودانێن نوکە عێراق تێدا دەربازدبیت و تێکچوونا پەیوەندیێن دناڤبەرا عێراق و تورکیا دا سەرەدان ھاتیە پاشخستن بۆ دەمەکێ نەدیار، ئەڤ سەرەدانە ژی دێ ب سەرۆکاتیا وەزیرێ دەرڤە یێ عێراقێ بیت.
خۆشەڤی دیار کر “تورکیا پتر ئاڤ ل سەر رووبارێ فورات ڤەگرتبوو، ھەتا رادەیەکی ل دیجلە باشتربوو، ئەگەر ھندەک ژێدەرێن رووبارێ دیجلە ناڤخۆیا عێراقێ نەبانە، ئەڤە بێگومان دا عێراق ئەڤ سالە تووشی ئاریشەکا مەزنا ئاڤێ بیت، ژ بەر کاریگەریا تورکیا بۆ سەر رووبارێ خابووری پێشبینی دھێتەکرن ئاڤ کێم بھێتە بەردان، ژ بەر کو بەنداڤا ئەتاتورک مەزنترین بەنداڤە ل سەرانسەری تورکیا و دێ پتر کاریگەری ل سەر کێمیا ئاڤێ بۆ رووبارێ فورات ھەبیت”.

ئەڤرۆ نیوز:
رێڤەبەرێ ڤەکولینا دەست پاکیێ ل دھۆکێ راگەھاند، کارێ مە یێ سەرەکی نەھێلانا گەندەلیێ و دژی گەندەلیێ و وەرگرتنا سکالایانە و ھەر سکالایەکا دھێتە وەرگرتن رەوانەی دادوەرێ دەست پاکیێ دکەین ل دھۆکێ و گۆت: ھەتا نوکە سکالا نەھاتینە و ب تنێ ڤەگوھاستن دھێن ژ ھندەک جھێن دی وەک ب رێیا دادوەرێ گشتی، لێ دەنگ و باس و پێزانین دگەھنە مە، ئەم کار ل سەر ھەر سێ سەرۆکاتیان دکەین و ئەندام و کەس و کارێن لێ کار دکەن و کەرتێ تایبەت و رێکخراوێن نەحکومی و ب تنێ پارتێن سیاسی تێ نەبن ئەم مایتێکرنێ تێدا ناکەین.
ئەحمەد سالح رێڤەبەرێ ڤەکۆلینا دەستپاکیێ ل دھۆکێ بۆ رۆژناما ئەڤرۆ دیار کر، ل سەنتەرێ دھۆکێ رێڤەبەریا ڤەکۆلین و دەست پاکیێ ھەیە، ل قەزایێن زاخۆ و ئاکرێ نڤسینگەھێن دەست پاکیێ ھەنە و ڤەکۆلینێن دادوەری ل سەر کار دکەن و گۆت: ل پارێزگەھا دھۆک د ماوێ بۆری دا مە 19 پێزانین ھەبوون و 22 ھەوالدەر مە تۆمارکرینە و ژ ڤێ ھژمارێ ھەشت بووینە تاوانێن جەزائی و ھەتا نوکە نەشێین رابگەھین ھەتا دادگەە ب دووماھی بھێت و ھەتا نوکە نزانین رێژا گەندەلیێ ل پارێزگەھێ چەندە، چونکە کارێ مە دەست پێ کە.
ھەمبەر بەراوردی ل گەل ھەردو پارێزگەھێن دی ناڤبری گۆت: رێژا دھۆکێ کێمە، ھەولێرێ 64 کێشە ھەبوون و سلێمانیێ 80 کێشە ھەبوون و ھندەک رەوانەی دادگەھا تایبەتمەند بوون.
ھێشتا ژی گۆت: مە دو جۆرێن گەندەلیێ ھەنە، گەندەلیەک دبێژنێ گەندەلیا کارگێری و گەندەلیەک دبێژنێ گەندەلیا دارایی و کاری ل سەر ھەردویان دکەین، گەندەلیا کارگێری گرێدایی فەرمانبەر و رێڤەبەرانە، گەندەلیا دارایی و ئابووری گرێدایی مالێ حوکمەتێ یە و بارا پتر زێدەگاڤی نە و زیانێ دگەھیننە رێڤەبەری و مالێ گشتی و ھەنە گرێدای بەرتیلان ڤەیە.
ناڤبری ھێشتا ژی گۆت: ھەکە ل دووڤ پێزانینان بۆ مە دیاربوو کەسێ تۆمەتبارە ب کێشەکێ دێ پێشکێشی دادوەری کەین و دێ ھێتە تۆمارکەین وەک تاوان و ل دووڤ دا دێ ھێتە رەوانەکرن بۆ دادگەھا تایبەتمەند و ھەکە رەشوە بیت، دێ سزا کەفتیە سەر و ل دووڤ قانوونا عیراقێ یا ھژمارا 111 یا سالا 1969 دێ ھێتە زیندانکرن وەک تاوان ل گەل دەستگرتن ل پارە وەرگرتین.
دەرابەری ڤێ قانوونێ ژی خویا کر، ئەڤ قانوونە یا پری یە و ھەر جورە تاوانەکێ سزا بۆ ھاتیە دانان و ھەرێما کوردستانێ ژی کار ل سەر دھێتەکرن، راستەڤەکرن ھاتیە ل قانوونا ھەژمارە سێ ل سالا 2011 دیسان قانوونا ژمارە حەفت یا سالا 2014 ل مادا دو ھاتیە دیارکرن و گۆت: ھەتا نوکە کەسەک نەھاتیە زیندانکرن و ب تنێ ل تاوانا ھەژمارا دو کێشەک ھەیە و ھەتا رۆژا دادگەھێ و سزا ل سەر دھێتەدان.