ئه‌ڤرۆنیوز: كاروان باعه‌درى :
كۆڤان ریسان خانكى ماموستایێ زانكۆیا دهۆكێ بۆ ئه‌ڤرۆ نیوز دبیژیت : ئه‌ز پێشنیار دكه‌م كو لیژنه‌یه‌كا تایبه‌ت بهێته‌ به‌رهه‌ڤكرن كو هه‌موو كه‌سانێن ئه‌كادیمیى بن بۆ به‌رهه‌ڤكرنا ئینسكلۆپیدیا شنگالێ .
ڤى ماموستایێ زانینگه‌هێ پتر گۆت : پێدڤیه‌ ئه‌ڤ ئینسكلۆپێدا هه‌موو تشتێن كاره‌ساتا شنگالێ ب خۆڤه‌ بگریت مینا به‌رگه‌ك بۆ دیداران و به‌رگه‌گ بۆ وێنه‌یان و به‌رگه‌گ بۆ ئامارێن شه‌هید و وندانبوویان و به‌رگه‌گ بۆ كچان و تاوانێن سیكسى و به‌رگه‌گ بۆ زیانێن وان و به‌رگه‌گ بۆ ئاواره‌ و ژیانا وان و ئه‌ڤه‌ ژى دێ بیته‌ به‌لگه‌یه‌كه‌ مه‌زن كو كاره‌ساتا شنگالێ بهێته‌ دیكیومێنتكرن .

ئه‌ڤرۆ نيوز:
په‌یڤدارێ فه‌رمیێ سه‌رۆكایه‌تیا هه‌رێمێ د رۆنكرنه‌كێ دا دیاركریه‌ كو د كۆره‌كێ دا به‌رپرسێ ده‌سته‌سا كارگێرى یا مه‌كته‌با سیاسى یا ئێكه‌تیێ ل زانكۆیا سلێمانیێ سه‌باره‌ت هاتنا حه‌شد شه‌عبى چه‌ند ئاخفتن كربوون و ناڤێ سه‌رۆكێ هه‌رێمێ هاتیه‌ و د راگه‌هاندنان ژى خواندنێن جور ب جور بۆ هاتینه‌ كرن.
په‌یڤدارى دیاركریه‌” هه‌رێما كوردستانێ ل شكاندن و ژ ناڤبرنا تیرورستان ناكوكى ل گه‌ل حه‌شد شه‌عبى نینه‌ و هه‌ر ده‌مێ بۆ شه‌رى ل گه‌ل داعش پێدڤى بكه‌ت، هێزا پێشمه‌رگه‌ و حه‌شد شه‌عبى هاریكاریا ئێكدو بكه‌ن، به‌لێ ئه‌ڤه‌ وێ چه‌ندێ ناگه‌هینیت كو حه‌شد شه‌عبى بهێت دوزخورماتو داگیر بكه‌ت كو ئاخا كوردستانێ یه‌ و پێشمه‌رگه‌ى یێ د پارێزیت”
په‌یڤدارى دیسا دیاركریه‌” سه‌رۆك بارزانى رژدى ل سه‌ر وێ یه‌كێ كریه‌ كو جهێ حه‌شد شه‌عبى ل سه‌ر ئاخا كوردستانێ نینه‌، كوردستانێ پێشمه‌رگه‌ و هێزا خوه‌ یا ئاسایشێ هه‌یه‌ و پێدڤى ب چ هێزه‌كا دى ناكه‌ت، هاتنا حه‌شد شه‌عبى بۆ ناڤ ئاخا كوردستانێ نه‌ ب رازیبوونا سه‌رۆك بارزانى بوویه‌”.

ئه‌ڤرۆنیۆز، ئه‌یاد به‌رواری
شاره‌زایه‌كێ ئه‌منی یێ عیراقی ئاشكراكر كو (له‌شكرێ ئیسلامیێ نهێنی ل ئورۆپا) ئه‌وێ ژلایێ سه‌ركردێ رێكخستیا داعشێ، تیرۆرست (ئه‌بو به‌كر به‌غدادی) ڤه‌ هاتیه‌ پێكئینان، به‌رپرسیاره‌ ژ ئه‌نجامدانا هێرشێن تیرۆرستی ل پاریس پایته‌ختێ فره‌نسا و دیاركر كو ئه‌نجامده‌رێن وان هێرشان ل مووسلێ یێن هاتینه‌ مه‌شقدان.
حه‌مزه‌ ئه‌بولسوف شاره‌زایێ ئه‌منیێ عیراقی ل دووڤ (الاتجاه‌ پرێس) راگه‌هاند ” ئه‌وێن هێرشێن پاریس ئه‌نجامداین ئه‌ندامێن له‌شكرێ ئیسلامیێ نهێنی ل ئورۆپا نه‌ كو ل مووسلێ هاتیه‌ پێكئینان”.
خویاكر ژی” ئه‌ندامێن له‌شكرێ ناڤبری یێن هاتینه‌ هنارتن بۆ ئورۆپا ل گه‌ل په‌نابه‌رێن ژ سووریێ و عیراقێ و هنده‌ك وه‌لاتێن رۆژهه‌لاتا ناڤین به‌ر ب ئورۆپا ڤه‌ چووین” و گوت ژی” ب سه‌دان ئه‌ندامێن ڤی له‌شكری ل ئورۆپا یێن هه‌ین ب تایبه‌تی ل بریتانیا و فره‌نسا و سوید و ئیسپانیا و ئه‌لمانیا”.
گوت ژی” ئه‌و تیرۆرستێن هێرشێن پاریس ئه‌نجامداین، ل مووسل یێن هاتینه‌ مه‌شقدان و هه‌تا نوكه‌ ژی ب ده‌هان ژوان تیرۆرستان یێن ل فره‌نسا به‌لاڤ بووین و هه‌والگیریا فره‌نسی نه‌شێت بگه‌هیته‌ وان، چونكی هه‌موو هه‌لگرێن ره‌گه‌زناما فره‌نسی نه‌”.
ئه‌ڤ شاره‌زایێ ئه‌منیێ عیراقی پێشبینیا ئه‌نجامدانا هێرشێن تیرۆرستی یێن خویناوی ل باژێرێن ئورۆپی دكه‌ت سه‌ره‌رای هه‌بوونا پێرابوونین ئه‌منی ل وه‌لاتێن ئورۆپی.