ئەڤرۆ نیوز:
یانا یوڤانتوس بۆ جارا پێنجێ ل دیڤ ئێک و جارا ٣١  د دیروکا خوە دا شیا ناسناڤێ خولا کاتشیو یا ئیتالی ب دەستخوڤە بینت کو دبیتە یانا ئێکێ ل ئیتالیا بشێت پێنج جاران دیڤ ئێک ناسناڤی ب دەستخوڤە بینت پشتی ئەڤرۆ ھەڤرکا وێ یانا ناپولی توشی خوسارەتیێ بووی ل سەر دەستێ یانا روما ب گولەکێ بێ بەرامبەر و ب خوسارەتیا ناپولی یانا یوڤانتوس ب فەرمی بۆ قارەمانا خولا ئیتالیا یا وەرزێ ئەڤ سالە کو بەری ب دووماھی ھاتنا خولێ ب سێ حەفتیان .
ھەلویستێ خولێ ب ڤی رەنگی یە
یوڤانتوس رێزا ئێکێ ٨٥ خالان
ناپولی رێزا دوێ ٧٣ خالان
رۆما رێزا سیێ ٧١ خال
ئەنتر میلان رێزا چارێ ٦٤ خالان

ئەڤرۆ نیوز:
کارگێریا یانا زێرەڤانی ب فەرمی راگەھاند راھێنەرێ پێگەھشتێن تیما تەپا پێ یا زێرەڤانی دیندار فەیزی وەکو راھێنەرێ ئێکێ تیما زێرەڤانی یا کچان یا پشکدار دخولا عیراقێ یا تەپا پێ و ھاریکارێ وی عەلی سەعید راھێنەرێ بەری نوکە یێ تیما فوتسالا کچان ئەوێ بەری نوکە شیای ناسناڤێ فوتسالا کوردستانێ ب دەستخوڤە بینت و راھێنەرێ گولچیا دلوڤان تیجەر کو بەری نوکە ماوەکێ درێژ بەرەڤانی ژ گولا یانا پیرس و زێرەڤانی کری یە و سەرپەرشتا تیمێ دولڤا عارف.
ھەژی گوتنێ یە یانا زێرەڤانی بۆ جارا ئێکێ یە پشکداریێ دخولا عیراقێ دا کەت ل سەر ئاستێ کچان و د یاریا ئێکێ دا ھاتبو ھژمارتن سەرکەفتی ل سەر یانا ئەڤرۆدێت ئەوا ل یاریگەھێ ئامادەنەبووی و پێدڤی سەرکەفتنەکا دی یە دا دەربازبوونا خوە مسوگەر بکەت بۆ قوناغا چار گوشا زێرین خولا عیراقێ.

ئەڤرۆ نیوز:
ستێرا یانا بەرشەلۆنا و ھەلبژارتیێ ئەرژەنتین لیونێل مێسی یێ بەردەوامە ل سەر تومارکرنا نەمرێن پیڤای دخولا لالیگا یا ئیسپانی دا ل گەل یانا بەرشەلۆنا کو ژ سالا ٢٠٠٥ وەرە شیا چەندین نەمرێن پیڤای بشکێنت ل گەل بەرشەلۆنا و سەر ئاستێ خولێ.
مێسی پشتی دووماھی یاری دا ل گەل بەرشەلۆنا کو ب سەرکەفتنا بەرشەلۆنا ب دووماھی ھاتی د وێ یاریێ دا شیا دو گولان بەرھەڤبکەت بۆ ھەڤالێن خوە ب بەرھەڤکرنا ئەوان ھەردو گولان مێسی شیا نەمرا پیڤایی یا یاریکەرێ یانا ریال مەدرید خوسیە میگیل گونزالس مارتن یێ بەرنیاس میتشێل بشکێنت کو ھژمارە پاسێن خوە بۆ دروستکرنا گولا گەھاندنە ١٢١ کو میتشێل ١٢٠ گول بۆ ھەڤالێن خوە دروستکر بوون.
مێسی نوکە دھێتە ھژمارتن دخولا لالیگا دا وەکو باشترین گولکەر و باشترین بەرھەڤکەرێ گولان کو د ٣٤٤ یاریان دا شیا ٣١٠ گولان توماربکەت ھەر دیسان ١٢١ گولا بەرھەڤبکەت .
ھەژی گوتنێ یە ل وەرزێ ئەڤ سالە مێسی ل وەرزێ ئەڤ سالە شیای یە ١١ گولان بۆ ھەڤالێن خوە بەرھەڤبکەت و چار یاری ژ خولێ ماینە .

ئەڤرۆ نیوز:
راھێنەرێ ھەلبژارتیێ کوردستانێ خسرو گورون د داخویانیەکێ دا بۆ ئەڤرۆ نیوز دیارکر ئەو باش د زانیت ھژمارەکا مەزن یا یاریکەران ل کوردستانێ ھەژی پێکھاتیێ ھەلبژارتیێ کوردستانێ نە لێ ئەو یاریکەرێن ھاتینە ھەلبژارتن ئەو دبینت دێ شێن مفای گەھینە ئەوان ژبەرکو ئەوی باش دیڤچوونا ئەوان یاریکەران کری یە و گەلەک یاریکەرێن دی ژی ھەبوون ئاستێ ئەوان یێ باشە و ھەژی ھەلبژارتیێ کوردستانێ بوون .
زێدەتر ناڤبری دیارکر ئەگەر دیڤچوونەکێ ل سەر ھەمی یاریکەران بکەین پێدڤی یە زێدەتر ژ ٥٠ یاریکەران ئەو داخوازی ھەلبژارتیێ کوردستانێ بکەن چونکو ماڤێ ئەوانایە لێ ئەڤە ھەلبژارتیی یە و یاسایا ھەلبژارتیێن ھەمی دنیایێ ب ڤی رەنگی یە بتنێ ماڤێ پێکھاتی و پێکھاتیێ یەدەگ ھەیە و پێدڤی یە ھەمی کەس پشتەڤانیا ڤی ھەلبژارتی بکەت داکو بشێن ئەنجامەکێ باش ب دەستخوڤە بینت ژبەرکو ھەلبژارتیێ کوردستانێ مللکێ ھەمی کوردانە.