ئەڤرۆ نیوز:
وەزارەتا ساخلەمیا حکومەتا هەرێما کوردستانێ راگەهاند، تووشبوویەکێ دیتر یێ کۆرۆنا یێ هاتە تۆمار کرن، کو ل قەزا دەربەندیخانە، نوکە سەرجەمێ گشتی یێ تووشبوویێن کۆرۆنا یێ ل هەرێما کوردستانێ گەهشتە 335 کەسان.
هەروەسا گۆتیە، د بەردەوامیا پشکنین و لێگەریانێ لدووڤ گومانلێکریان، تووشبوویەکێ دیتر ب ڤایرۆسێ کۆرۆنا یێ ل سلێمانیێ هاتیە دەست نیشانکرن، کو زەلامەکێ د ژیێ 28 سالیێ دایە و خۆجهێ قەزا دەربەندیخانە بەرکەفتیێ تووشبوویەکێ بەرێ یە.
ئەڤرۆ نیوز:
لدووڤ زانیاریان چەندین پێشنیار بۆ ئاسایکرنا رەوشا باژێرێ دھۆکێ و ئاسانکاری بۆ برێڤەبرنا کارێن وەلاتیان هاتینە کرن و دێ بۆ وەزارەتا ناڤخۆ و لژنا بلند یا بەرهنگاربوونا کۆرۆنا یێ ل ھەرێمێ ھێنە بلند کرن.
ژ وان پێشنیاران ژی، ڤەکرنا سەرتراشخانان کو ب رێیا تەلەفونێ بھێنە رێکخستن بۆ دەمەکێ دیارکری، ھەروەسا ڤەکرنا پیشەسازیان بۆ چەند دەمژمێران و ڤەکرنا کارگەھێن دارتراشیێ و پلاستیکی و کارگەھێن ناڤخۆ بۆ دەمەکێ دیار کری.
ھەروەسا ڤەکرنا کۆمەلگەھێن نۆشداری بۆ دەمەکێ دیار کری، کارکرنا تەکسیان بۆ دەمەکێ دیارکری، خالێن پشکنینێ دناڤ باژێری دا بھێنە کێمکرن، قەدەغا ھاتنوچوونێ بھێتە رێکخسن و ھاتنوچوون د ناڤبەرا ناحیا و قەزا و پارێزگەھان دا دێ ھەر یا دژوار بیت.
ئه‌ڤرۆ نیۆز، سالار دۆسكى:
ئه‌ندامه‌كا په‌رله‌مانێ كوردستانێ، ئاشكرا كر، كو وه‌زاره‌تا په‌روه‌ردێ ل هه‌رێمێ ل گه‌ل وێ بۆچوونێ نینه هه‌موو قوتابى پشكدارى ئه‌زموونا بن و تایبه‌ت قوناغا 12 ب بۆچوونا وێ دێ ئه‌ڤ چه‌نده گرفت و قه‌یرانان بۆ حوكمه‌تێ دروست كه‌ت.
گولستان عه‌بدولباقى، ئه‌نداما لژنا په‌روه‌ردێ ل په‌رله‌مانێ كوردستانێ ئاشكرا كر، كو ل كومبوونا رۆژێن بورى یا وه‌زاره‌تا په‌روه‌ردێ پشكدار بووینه هه‌موو ئالى ل گه‌ل نه‌بوون كو هه‌موو قوتابیێن پولا نه‌هێ و دازدێ وه‌ك حوكمه‌تا به‌غدا پشكدارى ئه‌زموونا ببن.
هه‌مان ئه‌نداما لژنا په‌روه‌ردێ ئه‌و ژى دیار كر، كو هاریكاری دێ بۆ قوتابیێن پولا نه‌هێ هێته‌كرن كو ئه‌و ژى پشكدارى ئه‌زموونێن نشتیمانى نه‌بن، هه‌ر ل قوتابخانێن خوه ئه‌زموونا بكه‌ن و ئه‌ڤه دێ باشتر بیت، بۆ پولا دازدێ ژڤانه به‌رى 2/5/ وه‌زاره‌تا په‌روه‌ردێ بریاره‌كێ ل سه‌ر بده‌ت.
گولستانێ ئه‌و ژى گۆت: هه‌كه هه‌موو قوتابیێن پولا دازدێ پشكدار بن ل ئه‌زموونان دێ كێشه‌كا دى بۆ حوكمه‌تێ سه‌رهلده‌ت، وه‌رگرتنا وان ل زانكۆیێ، به‌لێ هنده‌ك رێكارێن دى مه گرتینه به‌ر ژڤانه نێزیك بهێنه راگه‌هاندن.
گولستانێ ئاشكراكر ژى كو پێشنیار هه‌یه پرۆسێسا خواندنێ بچیته وه‌رزێ هاڤینێ و ئه‌ڤه دهێنه‌كرن داقوتابی زه‌ره‌رمه‌ند نه‌بیت و ئه‌ڤه دێ ل كومبوونا داهاتى دا هێنه گه‌نگه‌شه‌كرن و دێ ئاسانكارى بۆ گشت قوتابیان هه‌بن.
ئه‌ڤرۆ نیۆز، سالار دۆسكى:
نوونه‌رێ حوكمه‌تا هه‌رێما كوردستانێ ل به‌غدا، ئاشكرا كر، كو دانوستاندن ل سه‌ر دروستكرنا كابینا نوو هاتینه‌كرن ل گه‌ل هه‌موو ئالیێن سیاسى ب كوردان ڤه، ژڤانه به‌رى هاتنا هه‌یڤا ره‌مه‌زانێ كابینه بۆ په‌رله‌مانى بهێته پێشكێشكرن.
فارس عیسا نوونه‌رێ حوكمه‌تا هه‌رێما كوردستانێ ل به‌غدا، بۆ مالپه‌رێ ئه‌ڤرۆ نیۆز ئاشكرا كر، كو مسته‌فا كازمى سه‌رۆك وه‌زیرێ داهاتى یێ حوكمه‌تا عیراقێ ل گه‌ل ئالیێن سیاسى كومبوون ئه‌نجامداینه و هه‌تا ل گه‌ل ئالیێن سیاسى ل كوردستانێ ژى گوتۆبێژ هاتینه‌كرن، كازمى دیاركریه به‌رى هاتنا هه‌یڤا ره‌مه‌زانێ دێ كابینا خوه پێشكێشى په‌رله‌مانى كه‌ت بۆ وه‌رگرتنا باوه‌ریێ.
هێشتا گۆت: كابینا كازمى دێ یا به‌روه‌خت بیت و بتنێ بۆ دروستكرنا سه‌قایه‌كێ یه، داکو هه‌لبژارتن بهێنه كرن، كازمى ئه‌و ده‌ست هه‌لات نینە رێكه‌فتنێن نوو بكه‌ت، ئاشكراكر ژى كو مووچێن هه‌رێما كوردستانێ دێ به‌رده‌وام ژ به‌غدا هێت.
نوونه‌رێ كوردان ئه‌و ژى خویا كر، كو پێگه‌هێ كوردان دێ هه‌مان پێگه‌هـ بیت ل كابینا مسته‌فا كازمى دا و هه‌لبه‌ت وه‌زاره‌تا سیادى وه‌ك دارایى بۆ كوردان گرنگه، وه‌زیرێن كوردان ل كابینا عەبدولمه‌هدى سه‌ركه‌فتیترین وه‌زیر بووینه و ئه‌گه‌ر كابینه هه‌موو هاته گوهورین هه‌لبه‌ت ئه‌و ژى دێ هێنه گوهۆرین.
ئه‌و ژى ئاشكراكر كو چ شاندێن هه‌رێما كوردستانێ ناهێنه به‌غدا چونكه چ حوكمه‌ت نینن و ئه‌و حوكمه‌تا نوکە بتنێ یا برێڤه‌برنا كارانه و چاره‌سه‌ركرنا ڤایرۆسێ كورونایێ.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند، دو توشبوویێن دیتر یێن کۆرۆنا یێ ل هەلەبجە هاتنە تۆمار کرن، کو بەرکەفتیێن توشبوویین بەری نوکە نە، سەرجەمێ گشتی یێ توشبوویێن کۆرۆنا یێ ل وێ پارێزگەهێ گەهشتە ٢٢ کەسان.
وەزارەتا ساخلەمیا ھەرێمێ ڕاگەھاند ، د بەردەوامیا پشکنین و لێگەریانێ دا دو توشبوویێن دی یێن کۆرۆنایێ ل ھەلەبجە ھاتنە دەست نیشانکرن، کو ھەردو توشبووی کچن و د ژیێ ۱٤ سال و ۱٨ سالیێ دانە، بەرکەفتیێن توشبوو یێن بەرێنە کو دەیکا وانە.
هەروەسا دیار کریە، ب تۆمارکرنا ڤان حالەتێن نوو ھژمارا توشبوویان ل ھەلەبجە گەھشتە ۲۲ توشبوویان ژ وان ژی ھەشت توشبوویی چێبوونە و بۆ مال ھاتینە رەوانەکرن.
ئەڤرۆ نیوز، عەلی حاجی:
ئەندامەکێ لژنا دووفچوونا بازاری ل زاخۆ د داخویانیەکێ دا بۆ ئەڤرۆ نیوز ئاشکرا کر، ئەڤرۆ چارشەمبی وان سەرەدانا ٣٧ جهێن جۆدا کرینە و ١١ جهـ ب کوژمەکێ پارەیی سزاداینە و نانپێژەک ژی هاتیە داخستن.
زێدەتر وەلات هەجەر گوت: لدووڤ فەرمانا قایمقامێ زاخۆ د سەرەدانا خوە یا ئەڤرۆ دا ب هەماهەنگی ل گەل لژنا هەڤپشک و پولیس و ئاسایش و چاڤدێریا بازرگانی ل زاخۆ مە سەرەدانا ٣٧ جهێن جۆدا ژ مارکێت و نانپێژی و جهێن فروتنا کەسکاتیان کر، ژبەر هەبوونا کەرەستێن ئێکسپایەر دناڤ مارکێتان دا و نەپێگیریا نانپێژان ب رێنمایێن ساخلەمیێ ١١ جهـ هاتنە سزادان ب کوژمەکێ پارەی و هەر دیسان دەست ب سەر ١٧٤ کێلو گرامێن کەرەستێن ئێکسپایەر دا هاتنە گرتن و د دەمەکێ دیتر دا دێ ژلایێ لژنەیەکا تایبەت دا هێتە ژناڤبرن، هەر دیسان د بەردەوامیا سەرەدانا مە یا ئەڤرۆ دا ژبەر نەپێگریا نانپێژەکێ ب رێنمایێن ساخلەمیێ ئەو جهە هاتە داخستن هەتا دەمەکێ نەدیار تا کو ئەو کەسە رێنمایێن ساخلەمیێ جێبەجێ دکەت.
ئەڤرۆ نیوز، عەلی حاجی :
بەرپرسێ راگەهاندنا بەرەڤانیا باژێری ل دهوکێ د داخویانیەکێ دا بۆ ئەڤرۆ نیوز دیار کر، تەرمەک ل گوندێ سمودێ ل دەردورێن ئاڤا دیجلەیی دا هاتیە دیتن و ژبەر ژ ناڤچونا پرانیا لەشێ وی کەسی هەتا نوکە ئەو کەسە نەهاتیە نیاسین.
زێدەتر رائید بێوار عەبدولعەزیز گوت: تیمێن نقومڤانی یێن سەر ب بەرەڤانیا باژێری ل زاخۆ ل دەمژمێر ١١ شیان تەرمەکێ دناڤ ئاڤا رووبارێ دیجلە دا ل گوندێ سمودێ ببینە دەر، بەلێ ژبەر ژناڤچوونا پرانیا لەشێ وی کەسێ خەندقی، هەتا نوکە نەهاتیە زانین ئەو کەسە کییە، لەشێ وی ل دەست پێکێ بۆ نۆشداریا داد ل نەخوشخانا تەنگاڤیان ل زاخۆ هاتە رەوانە کرن و لدووف دا بۆ نەخوشخانا دهوکێ هاتە رەوانە کرن دا کو پشکنین بۆ وی کەسی بهێنە ئەنجام دان بۆ نیاسینا وی کەسێ ئەڤرۆ ل روژا چارشەمبێ دناڤ ئاڤێ دا هاتیە دیتن، ئەم پێشبینی دکەین ئەڤ تەرمە زێدەتری شەش هەیڤایە مایە دناڤ ئاڤێ دا لەوما بتنێ پشکەک ژ لەشی وی کەسی مایە.
ئەڤرۆ نیوز:
پارتی دیموکراتی کوردستان راگەهاند، ئەو کەسێ ل لیبیا هاتیە گرتن ب ئاوایەکێ گومان ناسنامە بۆ دانایە، دوور و نێزیک پەیوەندی ب لەشکەرێ رۆژ ڤە نینە و بۆ ئێک خولەک ژى پێشمەرگە نەبوویە.
ژێدەرەکێ ژ دەزگەهێ رەوشەنبیرى و راگەهاندنا پارتی راگەهاندیە، ئەو شەر و کاڤلکاریا ل لیبیایێ روودایی ژ ئەنجامێ هەڤرکیێن نێڤدەولەتی یە و چ پەیوەندی ب ئارمانج و سیاسەتا پارتى دیموکراتی کوردستانێ ڤە نینە، شەرمەزاریە کو ب ناڤێ پێشمەرگەى و پارتی دەستی خۆ دبەنە تشتەکێ کو د بنەرەت دا چ پەیوەندی ب کوردان ڤە نینە، ئەو بخۆ نیشانا ئیفلاسا سیاسی و ئەخلاقی و فکری یە.
گۆتیە ژى، ئەگەر وەسا دانین کو ئەو پرۆپاگندین دەربارەى وی کەسی راست بووینە و پێشمەرگە بوویە، ئەو ئەم هەمی لایەک باش دزانین کو دیرۆکا شورەشێن کوردی روودایە کو هندەک کەس د ناڤ شورەشێ دابوون، لێ نەپاقژی کریە و ل ریزێن پێشمەرگاتیێ چووینە دەر و چووینە ناڤ ریزێن دوژمنی.
هەروەسا دیار کڕیە، ئەو کەسێ ب پارە بوویە مورتەزەق ل لیبیا کارەکێ نە ژ هەژی کریە، لێ ل گەل وێ چەندێ ژى دا ئەو نەپاقژی ب چ ئاوایەکێ ناهێتە هەڤبەرکرن ل گەل نەپاقژیا فرۆشتنا ئاخ و خەلکی و هندەک تاقم و ئالی ل سەر فێربووینە و د خوازن مەزنکرنا بابەتێ مورتەزەقەیی لیبیا خوە پاقژ بکەن.
دیار کریە ژی، ئەگەر مەرەم ژ ڤێ هەلمەتێ کێمکرنا پیشمەرگەى و مژوولکرنا خەلکی بیت دا کو نەپاقژیێن خۆ پێ بڤەشێرن، بلا هەموو ئالیەک پشتراست بیت کو ئەڤە نەحەقی و بلارێبرنا تاوانان و نەپاقژیێ چ جاران بەرزە نابیت و ناهێنە ڤەشارتن.
نيشاندان