ئەڤرۆ نیۆز، قائید میرۆ
ددەمێ دو رۆژاندا ھژمارەک حالەتێن ڤایرۆسا کۆرۆنا ل ناحیا خەلیفان یا سەر ب قەزا سۆرانڤە ھاتینە تۆمارکرن و رێڤەبەرێ ناحیێ ژی دبێژیت، قەدەغەیا ھاتن وچوونێ ھاتیە بجە ئینان و پشکنین بۆ وەلاتیان دھێتەکرن.
کاروان کەریم، رێڤەبەرێ ناحیا خەلیفان بۆ ئەڤرۆ نیۆز دیارکر” پشتی تۆمارکرنا ھژمارەک حالەتێن ڤایرۆسا کۆرۆنا دوھی بڕیار ھاتەدان باژێڕکێ خەلیفان بتەمامی بھێتە کەرەنتین کرن و ھاتن وچوون ب ھەموو شێوەیەکی دناڤا خەلیفانی ھاتیە قەدەغەکرن، ھێزێن ئەمنی ناڤا خەلیفانێ ھاتینە بەلافکرن و ھەر کەسەکێ پێگیر نەبیت دێ پێڕابوونێن قانوونی ھەمبەر ھێنە وەرگرتن.
کاروان کەریم ئاماژەکر” تیمێن ساخلەمیێ مژۆلی وەرگرتنا پشکنێن وەلاتیانن و ھەموو رێکێن پێدڤی دھێنە بجە ئینان بۆ کۆنتڕۆلکرنا رەوشێ، چونکە وەلاتیەکێ خەلیفانێ ل ئەورۆپا ڤەگەڕیایە و سەرەدانا زۆربەیا خەلکی کریە، لەوڕا داخوازێ ژ وەلاتیان دکەین پێگیریێ ب رێنمایان بکەن بۆ پاراستنا ژیانا خوە.
ئەڤرۆ نیوز:
ل گۆر راپۆرتەکا رۆژناما وول ستریت جۆرنال یا ئەمریکی دەزگەهێن ئێمناهیێ و ساخلەمیێ یێ چینێ پشتی ڤەکۆلینێن دەمدرێژ شیاینە ئێکەم کەس ل باژێرێ ووهان پەیدا بکەن کو تووشی ڤایرۆسێ کۆرۆنایێ ببوو.
ل گۆر رۆژنامێ ئێکەم کەسا تووشبوویا کۆرۆنا یێ ژنەکا باژێرێ ووهان یێ چینێ یە ب ناڤێ وی گویخیان کو ژنەکا ٥٧ سالیە و ل بازارێ بەرهەمێن دەریایی کار کریە و پشتی کو تووشی نەخوشیەکێ بوویە سەرەدانا نوشدارەکێ کریە و پاشی ژی ڤەگەریایە سەر کارێ خوە، هەر ئەو ژنک بوویە ئەگەرێ هندێ کو د رۆژەکێ دا ل هەمان جهێ کارێ وێ چەندین کەسێن دی تووشی نەخوشیێ ببن.
نوشدارێن چینی ژی پاشی ل سەر هندێ کار کرن کو دبیت ڤایرۆسێ کۆرۆنا ب رێیا هندەک گیانەوەرێن دەریایی دەربازی مرۆڤی ببیت و هەتا نها ژی ڤەکۆلێنێن وان د بەردەوامن.
ئەڤرۆ نیوز:
د. محەمەد قادر پەیڤدارێ وەزارەتا ساخلەمیێ یا هەرێما کوردستانێ دیار کر کو هەتا نها چو حالەتێن مەترسیدار یێن ڤایرۆسێ کۆرۆنایێ ل هەرێما کوردستانێ نینن و ٨٠% ئەوێن تووشی کۆرۆنایێ بووینە حالەتێ وان گەلەک سڤکن و پشتی دەمەکێ دی دێ ڤەگەرنە ڤە مالێن خوە.
ناڤهاتی ئەو یەک ژی دیار کر کو هەتا نها ٥٧ کەس ل هەرێما کوردستانێ ب تەمامی باش بووینە و ئەو یەک ژی نیشا ددەت کو یێن ل هەرێما کوردستانێ تووشی کۆرۆنایێ بووینە پرانیا وان ب سڤکی تووش بووینە و رەوشا وان یا باشە و بارێ ساخلەمیا وان ژی جێگرە.
پەیڤدارێ ساخلەمیا هەرێما کوردستانێ ئەو یەک ژی دیار کر کو هەتا نها چو نەخوشەک یێ کۆرۆنا ل هەرێما کوردستانێ پێدڤی ب ئامیرێ هەناسا دەستکر نەبوویە و ئەو یەک ژی جهێ دلخوشیێ یە.
ئه‌ڤرۆ نیوز،محه‌مه‌دعه‌لی نوری:
سكرتێرێ ئێكه‌تیا شه‌تره‌نجا پارێزگه‌ها دهۆكێ دیاركر كو ب دورشمێ خوه پارێزه وبمینه دمال دا چاڤه‌رێكریه ئه‌ڤرۆ قاره‌مانیه‌ك تایبه‌ت یا یاریا شه‌تره‌نجێ بۆره‌كه‌زێن كور و كچ ب شێوێ ئۆنلاین ل سه‌رئاستێ پارێزگه‌هێ و هه‌ڤركیێن وێ ل سایتێLi Chessیێ‌ده‌وله‌تیبهێته ئه‌نجامدان.
زێده‌تر سه‌رمه‌د قه‌سیم بۆ ئه‌ڤرۆ نیوز گۆت: بۆ جارا ئێكێ‌یه ل پارێزگه‌هێ ئه‌ڤ شێوێ قاره‌مانیێ بهێته ئه‌نجامدان و مه‌ره‌م ژی پێش ئێخستنا ئاستێ یاریزانێن مه‌یه و ب دروشمێ خوه پاراستن ژ ڤایرۆسێ كۆرۆنا و مانا خوه د مال دابمینن، قاره‌مانی ئه‌ڤرۆ ده‌مژمێر نه‌هی شه‌ڤ ل سه‌ر سایتێ ناڤهاتی ب شێوه‌یێ ئۆنلاین هێته‌كرن بۆ هه‌ریاریزانه‌كێ هه‌تا ئه‌ڤرۆ ناڤێ خوه بۆ ئێكه‌تیا پارێزگه‌هێ هنارتی و ژلایێ سایتێ ده‌وله‌تی ڤه هاتیه‌په‌سه‌ندكرن.
هه‌روه‌سا سكرتێرێ ئێكه‌تیا شه‌تره‌نجا پارێزگه‌هێ دیاركر كو قاره‌مانی دێ ل دویڤ سیسته‌مێ سویسری نه‌هگه‌ر و ژمارا یاریزانا هێته ئه‌نجامدان و ده‌مێ یاریێ سێ خوله‌كن دگه‌ل زێده‌كرنا ئێك چركه و گوت: ئه‌ڤه پێنگاڤا ئێكی دهێته هاڤێتن و دگه‌ل هه‌ڤكاریا یاریزانا گه‌شبینم دێ یا سه‌ركه‌فتی بیت و ده‌ستپێكه‌كا بۆ قاره‌مانیێن ده‌وله‌تی.
ئەڤرۆ نیوز:
کیانوش جەهانپور پەیڤدارێ وەزارەتا ساخلەمیێ یا ئیرانێ راگەهاند کو هەتا نها ٤٤ هزار و ٦٠٦ کەس ل ئیرانێ تووشی ڤایرۆسێ کۆرۆنایێ بووینە و ژ وان ١٤ هزار و ٦٥٦ کەس ب تەمامی باش بووینە.
ناڤهاتی راگەهاند کو هەتا نها ل ئیرانێ ٢ هزار و ٩٠٠ کەسان ژ بەر ڤایرۆسێ کۆرۆنایێ جانێ خوە ژ دەست داینە و بارێ ساخلەمیێ یێ سێ هزار و ٥١١ کەسان ژی جێگر نینە و ل ژێر چاڤدێریا توند دانە.
ئه‌ڤرۆ نیوز:
وه‌زاره‌تا ساخله‌میا حكومه‌تا هه‌رێما كوردستانێ د راگه‌هاندنه‌كێ دا به‌لاڤكر ل هه‌رێما كوردستانێ ئێك توشبوویا دی ب ڤایرۆسێ كورونایێ هاته توماركرن.
وه‌زاره‌تا ساخله‌میا حكومه‌تا هه‌رێما كوردستانێ د به‌یاننامه‌یه‌كێ دا به‌لاڤكر و تیدا هاتیه كۆ ل به‌رده‌وامیا پشكنین و لێگه‌ریانا گۆمانلێكریان، ئێك توشبوویا ب ڤایرۆسێ كورونا نو كۆڤید 19 ل باژێرێ هه‌ولێرێ هاتنه ده‌ست نیشانكرن، كۆ ئافره‌ته‌كه ژیێ وێ 22 ساله .
ئەڤرۆ نیوز:
ئێکەتیا نوشدارێن تورکیا بەری دەمەکێ راگەهاند کو هەتا نها ل باژێرێ ئامەدێ ١٥٠ کەس تووشی ڤایرۆسێ کۆرۆنایێ بووینە و ژ وان ٥ کەسان جانێ خوە ژ دەست داینە و بارێ ساخلەمیێ یا شەش کەسان ژی گەلەک خرابە و ل ژێر چاڤدێریا توند دانە.
ل ئالیێ دی نوشدارێن کورد ل باکورێ کوردستانێ دیار دکەن کو تورکیا گرنگیێ نادەتە ساخلەمیا باکورێ کوردستانێ و خەلک ژی وەکو پێدڤی پێگیریێ ب رێنمایێن ساخلەمیێ ناکەن.
ئه‌ڤرۆ نیوز:
وه‌زاره‌تا پترۆلا عیراقێ راگه‌هاند د ده‌مه‌كی دا وه‌زاره‌تا ساخله‌می و ژینگه‌هێ داخازا پێنج ملیۆن دۆلاران كربوو، لێ ئه‌وان حه‌فت ملیۆن دۆلار پێشكیشی ئه‌وێ وه‌زاره‌تێ كرینه ب مه‌به‌ستا به‌رهنگاربوونا ڤایرۆسێ كورونایێ.
عاسم جیهاد په‌یڤدارێ وه‌زاره‌تا پترۆلا عیراقێ راگه‌هاند وه‌زاره‌تا پترۆلێ حه‌فت ملیۆن دۆلار پێشكیشی وه‌زاره‌تا ساخله‌میێ كریه ب مه‌به‌ستا به‌رهنگاربوونا ڤایرۆسێ كورونایێ د ده‌مه‌كی دا به‌ریا نها وه‌زیرێ ساخله‌میێ داخازا پێنج ملیۆن دۆلاران كربوو، دانا ئه‌وی پاره‌یی ب وه‌زاره‌تا ساخله‌میێ د چارچوڤه‌یێ هه‌وه‌كا نیشتمانی بۆ به‌رهنگاربوونا ڤایرۆسێ كورونایێ بوویه.
عاسم جیهاد په‌یڤدارێ وه‌زاره‌تا پترۆلا عیراقێ ئه‌و چه‌نده ژی دیاركر كۆ پاره ب سه‌ر چه‌ند جهه‌كان دا پاره‌ڤه‌كرینه كۆ 2.4 ملیۆن دۆلار بۆ هوتێله‌كا تایبه‌ت ب توشبوویێن ڤایرۆسێ كورونایێ، دو ملیۆن دۆلار بۆ پشته‌ڤانیكرنا كه‌رتێ ساخله‌میێ ل پاریزگه‌ها میسان ، دۆ ملیۆن دۆلار بۆ سندوقا پشته‌ڤانیكرنا كه‌رتێ ساخله‌میێ ل پارێزگه‌ها زیقار هاتینه ته‌رخانكرن، ژبلی 200 ملیۆن دینار بۆ پارێزگه‌ها كه‌ركوكێ كۆ 50 ملیۆن دینار بۆ به‌ره‌ڤانیا باژێرێ كه‌ركوكێ.
ئه‌ڤرۆ نیۆز، عه‌زیز هه‌ورامی:
شاسوار عه‌بدولواحید سه‌رۆكی نه‌وه‌ی نوێ و كه‌ناڵه‌كانی ئێن ئاڕتی له كۆبونه‌وه‌یه‌كی له‌گه‌ڵ به‌رپرسان و كارمه‌ندانی ته‌له‌فزیۆنه‌كانی ئێن ئاڕتی، پێ ڕاگه‌یاندوون %25 موچه‌ی مانگانه‌یان ده‌بڕێت به‌هۆكاری ئه‌وه‌ی توشی قه‌یرانی دارایی بوون كارمه‌نده‌كانیش ڕه‌تیان كردووه‌ته‌وه هه‌ڕه‌شه‌ی وه‌ستاندنی په‌خشتی ته‌له‌فزیۆنه‌كه ده‌كه‌ن، له ڕێگه‌ی وه‌زهێنانی به‌كۆمه‌ڵ.
سه‌رچاوه‌یه‌كی تایبه‌ت له ئێن ئاڕتییه‌وه بۆ ئه‌ڤرۆ نیۆز، ڕاگه‌یاند:” شاسوار عه‌بدولواحید ده‌ست بۆ بڕینی قوتی كارمه‌ندانی كه‌ناڵه‌كه بردووه به‌رده‌وام به‌بیانوی جۆراوجۆر موچه‌ی مانگانه‌ی كارمه‌ندانی ته‌له‌فزیۆنی ئێن ئاڕتی كه‌م ده‌كاته‌وه، له‌م مانگه‌وه موچه‌ی كارمه‌ندانی ئێن ئاڕتی به‌بڕیاری شاسوار عه‌بدولواحید بڕدراوه بڕینه‌كه جیاوازه به‌شێكی كارمه‌نده‌كان %25 به‌شێكی تریشیان %50 موچه‌كانیان بڕدراوه.
سه‌رچاوه‌كه‌ی ئه‌ڤرۆ نیۆز وتیشی:” له كۆبوونه‌وه‌ی شاسوار عه‌بدولواحید و كارمه‌ندانی ئێن ئاڕتی بۆ كه‌مكردنه‌وه‌ی موچه‌ی كارمه‌ندانی كه‌ناڵه‌كه، گرژی زۆری لێ كه‌وتووه، زۆرینه‌یان وتویانه په‌خشی كه‌ناڵه ڕاده‌گرن كارناكه‌ن بێت و موچه‌كانیان كه‌م بكرێته‌وه، شاسوار عه‌بدولواحید له وه‌ڵامدا وتویه‌تی كێ پێ ناكرێت ئه‌توانێت ده‌ست له‌كاركێشانه‌وه بنوسێت.
هه‌ر به‌پێ سه‌رچاوه‌كه‌ی ئه‌ڤرۆ نیۆز، ئه‌و كه‌سانه‌ی زیاتر له گه‌ڵ شاسوار عه‌بدولواحید توند بون، پاش ڕۆشتنه وه‌ی له كۆبونه‌وه‌كه بڕیاری ده‌ركردنیانی داوه.
له ئێستادا وه‌ك گوشارێك بۆ سه‌ر بڕیاره‌كه‌ی شاسوار عه‌بدولواحید زۆرینه‌ی په‌یام نێر و كامیره مانه‌كانی ئێن ئاڕتی ئاماده‌نین ڕاپۆرت و هه‌واڵ، ئاماده‌بكه‌ن ئه‌وه‌ش وای كردووه كه‌ناڵه‌كه زیاتر هه‌واڵی جیهانی په‌خش بكات، باس له‌وه‌ده‌كرێت جگه له‌وانه‌ی ده‌ركراون 45 كارمه‌ندی تری كه‌ناڵه‌كه هه‌ڕه‌شه‌ی وه‌زا هێنانی به‌كۆمه‌ڵ ده‌كه‌ن.
شاسوار عه‌بدولواحید خاوه‌نی كه‌ناڵی ئێن ئاڕتی یه‌ك هه‌واڵ و دوو هونه‌ری سێ منداڵان چوار ئاینی پێنچ په‌روه‌رده‌ی، وه خاوه‌نی دوو ڕادۆیه له‌گه‌ڵ كۆمه‌ڵێك سایت و په‌یجی جۆراوجۆر،به‌رپرسان و كارمه‌ندانی نالیا ده‌ڵێن، شاسوار عه‌بدولواحید له كاتێكدا بۆ موزایده به‌رده‌وامه له كردنه‌وه‌ی كه‌ناڵ، به‌ڵام ناتوانێت موچه‌ی و شایسته‌ی دارایی مانگانه‌ی كارمه‌نده‌كان دابین بكات، له‌گه‌ڵ كردنه‌وه‌ی هه‌ر كه‌ناڵێك ده‌ست بۆ بڕینی قوتی كارمه‌نده‌كانی ئێن ئاڕتی ده‌بات.
نيشاندان