ئەڤرۆ نیوز:
سیروان رۆژبەیانی، جێگرێ پارێزگارێ مۆسل راگەهاند، کو 4 حالەتێن نوو یێن توشبوون ب ڤایرۆسێ كۆرۆنا ل سنوورێ پارێزگەها مۆسل هاتنە تۆمار كرن.
گۆت ژی، ئەو 4 حالەتێن ئەڤرۆ هاتینە تۆمار كرن، هەموو ئەندامێن ئێک خێزانن، کو دایك، باب و دو برایێن وی توشبوویێ بەری نوکە ل وی باژێری پێكهاتینە، کو توشبوویێ پێشی رۆژنامەنڤیسە و ژ وەلاتێ سعودی ڤەگەریایە.
ئەڤرۆ نیوز، زنار تۆڤی:
ئەڤرۆ ل سنۆرێ باژێرڤانیا فه‌یدیێ دەست ب ئاڤاکرنا نەخۆشخننەکا تایبەت ب کۆرۆنا یێ هاتە کرن، کو 63 هزار مه‌ترێن چار گۆشه یێن ئه‌ردی بۆ ساخله‌میا دهۆكێ هاتینە دابینكرن، ژ ڤی رووبه‌ری ژی نێزیكی 15 هزار مه‌ترێن چار گۆشه بۆ نه‌خۆشخانا كۆرۆنایێ یا 100 ته‌ختی هاتینه دابینكرن، كو ئەڤ نەخۆشخانە دێ ژ ئالیێ وه‌به‌رهێنه‌رێن دهۆكێ ڤه هێته ئاڤاكرن، رووبه‌رێ مایی ژی دێ ل ژێر كۆنترۆلا ساخله‌میا دهۆكێ دا بیت.
ئه‌ندازیار دیار به‌حری، رێڤه‌به‌رێ گشتی یێ باژێرڤانیان ل پارێزگه‌ها دهۆكێ بۆ ئەڤرۆ نیوز دیار كر، ئه‌ڤرۆ دوشه‌مبی 23/3/2020 ل سه‌ر رووبه‌رێ 63 هزار مه‌ترێن چار گۆشه كو ژ ڤی رووبه‌ری نێزیكی 15 هزار مه‌ترێن چار گۆشه بۆ نه‌خۆشخانەکا تایبەت ب كۆرۆنا یێ ڤە یا 100 ته‌ختی هاتینه دابینكرن و نوکە ده‌ست ب ئاڤاکرنا ڤێ نه‌خۆشخانێ هاتیه كرن و وه‌به‌رهێنه‌ره‌كێ دهۆكێ دێ وێ نه‌خۆشخانا تایبه‌ت بۆ نه‌خۆشێن كۆرۆنا یێ ئاڤا كه‌ت.
ناڤهاتی ئاشكرا كر ژی: كو ئه‌و ئه‌رده د ماسته‌ر پلانا باژێرڤانیا فه‌یدیێ دا، ئه‌ردێ نه‌خۆشخانێ یه و دكه‌ڤیته سه‌ر رێیا سه‌ره‌كی یا دهۆك دۆمیز.
ئەڤرۆ نیوز:
ئێكەتیا پیشەسازی یا ئیتالیا ئاشكرا كریە، کو ژ ئەگەرێ راگرتنا كەرتێن بەرهەم ئینانێ، ژ ئەگەرێ بەلڤبوونا ڤایرۆسێ كۆرۆنا یێ، هەیڤانە ب بهایێ 100 ملیار دۆلاران زیان دگەهنە ئابوورێ ئیتالیا.
فینسینزو بوكیا، سەرۆكێ ئێكەتی یا پیشەسازیا ئیتالیا دیار کریە: پشتی راگرتنا كەرت و سەكتەرێن بەرهەم ئینانێ، ئابوورێ ئیتالیا ژ ئابوورەكێ تەنگاڤیان بوویە ئابوورێ سەربازی، هەروەسا هەموو داهاتێ سالانە یێ ئابوورێ ئیتالیا دگەهیتە 1800 ملیار یۆرۆیان، دوپاتكریە كو ژ ئەگەرێ بەڵاڤبوونا كۆرۆنا یێ 70% ژ چالاكیێن بەرهەم ئینانێ راوەستاینە، كو هەیڤانە دبیتە بهایێ 100 ملیار دۆلاران.
ئەڤە د دەمەكێدایە كو حوکمەتا ئیتالیا بریار دا سەرجەم چالاكیێن بەرهەم ئینانێ ل ئیتالیا بهێنە راگرتن، ژ بلی كارێن ستراتیژی و گرنگ.
ئەڤرۆ نیوز:
د پرێس کۆنفرانسەکێ دا وەزارەتا ساخلەمیا ئیرانێ راگەهاند، د دەمێ ٢٤ دەمژمێرێن بوری دا، هزار و ٤١١ کەسێن دیتر توشی ڤایرۆسێ کۆرۆنا یێ بووینە و ١٢٧ کەسان ژی ژیانا خوە ژ دەستدایە.
وەزارەتا ساخلەمیا ئیرانێ گۆتیە ژی، هژمارا گشتی یا توشبوویان گەهشتیە ٢٣ هزار و ٤٩ کەسان، هژمارا گیان ژ دەستدانێ گەهشتیە هزار و ٨١٢ کەسان، هەروەسا هەتا نوکە هەشت هزار و ٣٧٦ کەسێن توشبوویی ژ کۆرۆنایێ چێبووینە.
هەتا نوکە ل جیهانێ پتری ٣٤٠ هزار کەسان توشی ۆرۆنا یێ بووینە و پتری ١٤ هزار کەسان گیانێ خوە ژ دەستدایە، هەروەسا ٩٩ هزار کەس ژی چێبووینە.
ئەڤرۆ نیوز:
دوهی ۲۲ ئادارا ۲۰۲۰ ل حەفت وەلاتێن ئورۆپا تاقیکرنا چار دەرمانان هاتیە پێشنیارکرن بۆ توشبوویێن ڤایرۆسێ کۆرۆنا یێ ل ژێر سەرپەرشتیا رێکخراوا ساخلەمیا جیهانی و ب پشکداریا ۳۲۰۰ نەخوشان دەستپێکریە.
دەزگەهێ ئینسیرم یێ فرەنسی بۆ ڤەکۆلینێن نۆشداری راگەهاندیە: کو دەرمانێن هاتینە پێشنیارکرن پێک دهێن ژ (هایدرۆکسی کلۆرۆکوین) کو بەری نوکە بۆ مەلاریێ هاتیە بکار ئینان، هەروەسا(ریمدیسیڤر) کو بەری نوکە بۆ ئیبۆلایێ هاتیە بکارئینان، (لوبنافیر) ب تێکەلکرنێ ل گەل(ریتوفانیر)، کو دشێن ل گەل دەرمانێ (ئینترفیون بیتا) ب نەخوشان یان بێ ئەو بهێتە دان.
ئەو جۆرێن دەرمانان ئەڤە گەلەک سالن ل بازار و نەخوشخانان دا هەنە، ژبەر وێ چەندێ هند مەترسیا زێدە ل سەر ساخلەمیا مرۆڤان نینە، هەکە ل ژێر رێنمایێن نۆشداری دا بهێنە بکارئینان، ژبەر وێ چەندێ دێ ل سەر وێ هژمارا زێدە یا نەخۆشان هێتە تاقیکرن،
ئەو ۳۲۰۰ نەخۆش ژی یێن وەلاتێن بەلچیکا، ئەلمانیا، بریتانیا ،فرەنسا، لوکسۆمبۆرگ، ئیسپانیا و هۆلەندا نە.
دۆهی ژی هەر ئێک ژ ولاتێن سوید و نەرویج دەستپێکرنا تاقیکرنا دەرمانێ (هایدرۆکسی کلۆرۆکوین) راگەهاند، ژبەر کو تاقیکرن ل،سەر توشبوویان هەیە، دبیت ئەنجامێ دووماهیێ یێ ڤەکۆلینێ دەمێ ئێک بۆ دو حەفتیان دەربچیت، ل سەر باندۆرا دەرمانان، هەموو تاقیکرنێن بەری نوکە سەر ڤان دەرمانان ئەنجامێن باش و دلخۆشکەر هەبووینە.
ئەڤ دەرمانە ڤاکسین نینن، بۆ کەسێن ساخلەم نینن، کەسێ ژ توشبوونێ ناپارێزیت، لێ ب تنێ چارەسەریا توشبوویان دکەت، دیسان بکارئینانا وان بێی رێنمایێن نۆشداران دێ مەترسیێ سەر ساخلەمیێ دروست کەت.
ئەڤرۆ نیوز:
مەریوان حەسەن پەیڤدارێ وەزارەتا ئاڤەدانی و ئاکنجیبوونێ راگەهاند کو ژ بەر قەدەغەیا هاتنوچوونێ هەتا نها چو پرۆژە نەهاتینە راگرتن و کارکرن ل پرۆژان بەردەوامە.
ناڤهاتی راگەهاند کو ژ بەر جەژنا نەورۆزێ چەند رۆژان کار ل هندەک پرۆژان هاتبوو راگرتن لێ نها کار بەردەوامە.
مەریوان حەسەن دیار کر کو نها کار ل چەندین پرۆژێن ستراتیژی بەردەوامە کو پرۆژێ جوتسایدێ هەولێر و دهۆکێ ئێکە ژ وان پرۆژێن گرنگ کو نها ژی کار ل وی پرۆژەی بەردەوامە و نەهاتیە راگرتن.
ئەڤرۆ نیوز:
پەیڤدارێ کۆچکا سەرۆکاتیا روسیا راگەهاند کو پشتی رێککەفتنا ل موسکو یا د ناڤبەرا پوتین و ئەردۆگانی دا هەتا نها روسیا چو چالاکیێن نوو یێن سەربازی ل ئدلبێ نەکرینە و جارێ رەوش ئاسایی یە.
دیمیتری پیسکۆڤ ئەو یەک ژی دیار کر کو تورکیا گەلەک سۆز داینە کو نەهێلیت گرۆپێن تیرۆرستی دەست ب کریارێن خوە بکەن، ژ بەر هندێ ژی وەکو روسیا ئەو چاڤەرێ نە کو گرۆپێن تیرۆرستی پێنگاڤ ب پێنگاڤ هەموو دەڤەرێن کو تێدا نە چۆل بکەن، روسیا ژی نها چو چالاکیان ناکەت و چاڤدێریا رەوشا ئدلبێ دکەت.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ د پەیامەکێ دا داخواز ژ هەموو وەلاتیان ل هەرێما کوردستانێ دکەت کو مەترسیا ڤایرۆسێ کۆرۆنا ب جدی وەربگرن و ل مالێن خوە بن و دەرنەکەڤن.
سەرۆکێ حوکمەتا هەرێما کوردستانێ دیار ژی دکەت کو یا پێدڤی ل خالێن سنوری و جهێ دی هاتیە کرن و داخواز ژ وەلاتیێن هەرێما کوردستانێ دکەت کو پێگیریێ ب رێنمایێن هەر دو وەزارەتێن ساخلەمیێ و ناڤخوە بکەن و ل مالێن خوە بن و نەچنە دەرڤە و هاریکاریا ئالیێن پەیوەندیدار بکەن.
سەرۆکێ حوکمەتێ دیار ژی دکەت کو هەکە وەلاتی هاریکاریا هەر دو وەزارەتان بکەن ئەو دێ شێن رێگریێ ل بەلاڤبوونا کۆرۆنایێ ل کوردستانێ بگرن.
نيشاندان