ئەڤرۆ نیوز:
دەزگەهێن راگەهاندنا ئەمریکا دیار دکەن کو کۆمپانیەکا ئەلمانی یا ب رژدی کار دکەت کو ڤاکسینا کۆرۆنا پەیدا بکەت و سەرۆکێ ئەمریکا دۆنالد ترامپ ژی دیار کریە ئەو بەرهەڤە بۆ وی کاری ئێک ملیارد دۆلار بدەتە کۆمپانیا ئەلمانی.
لێ دەزگەهێن راگەهاندنا ئەلمانیا دیار دکەن کو ترامپی دڤێت ب دانا وی پارەی مافێ ڤاکسینێ بۆ ئەمریکا بدەستڤە بینیت یان ژی وێ کۆمپانیا راکێشیتە ئەمریکا کو ئەو یەک ژی دهێتە رامانا شەرەکێ ئابووری د ناڤبەرا ئەلمانیا و ئەمریکا دا.
ئەڤرۆ نیوز:
سێ پارتێن کوردی یێن باکورێ کوردستانێ (پارتا ئازادی، پارتا سوسیالیست یا کوردستانێ و پارتا ماف و ئازادیان) د داخۆیانیەکا هەڤپشک دا دیار کرن کو وان هەموو بەرهەڤیێن خوە کربوون کو ژ بۆ سالیادا کیمیاباران باژێرێ هەلەبجە و هەروەسا ژ بەر جەژنا نەورۆزێ ژی چەندین چالاکیان ل ئامەدێ و ئستەنبولێ برێڤە ببەن، لێ ژ بەر مەترسیا ڤایرۆسێ کۆرۆنا وان بریار داینە کو هەموو چالاکیێن خوە رابگرن.
د داخۆیانیێ دا هاتیە دیار کرن کو ژ بۆ ساخلەمیا هەموو وەلاتیان گرنگە پێگیری ب رێنمایێن ساخلەمیێ بهێتە کرن.
ئه‌ڤرۆ نیوز، زنار تۆڤى:
پشتى ده‌ركه‌فتنا ڤایرۆسێ كورۆنا، خه‌لكێ جیهانێ هه‌موو خستیه د حاله‌ته‌كێ ده‌رووونى یێ ئالۆز دا و پێدڤیه ئه‌م هه‌موو د هاریكار بین، ژ پێخه‌مه‌ت بشێین رێگریێ ل ڤى ڤایرۆسى بكه‌ین.
د. عەبدولباقی مایی
د. عه‌بدولباقى مایى، تایبه‌تمه‌ندێ ساخله‌میا ده‌روونى یا زارۆك و گه‌نجان، بۆ ئه‌ڤرۆ نیوز دیار كر: باندۆرا ڤایرۆسێ كۆرۆنا ل سه‌ر هه‌موو جیهانێ هه‌یه، هه‌ر چه‌نده بسپۆرێن جیهانى و ده‌ستهه‌لات ژى، یێن د قه‌یرانه‌كێ دا، ژ پێخه‌مه‌ت بشێن چاره‌سه‌ریا ڤى ڤایرۆسى ب بینن و رابوه‌ستینن، له‌وما باندۆرا ڤى ڤایرۆسى یا گرێدایه ب بابه‌تێن ده‌روونى پتر ژ یێن له‌شى و گیانێ مرۆڤى، دیسان ئه‌ڤ بابه‌ته یێ گرێدایه ب ترسێ ڤه، ئه‌و ژى هه‌ستكرنا خه‌لكێ ب تشته‌كێ ڤه‌یه، كو ب قه‌ومیت و ترس د وى تشتى دا هه‌یه، هه‌ست ب ئارامیێ ناكه‌ت، چونكى چو سنۆر نینن د وى چارچۆڤه‌ى دا كو هه‌ست ب ئارامیێ بكه‌ت، له‌وما ترس دبیته ئه‌گه‌رێ هندێ كو مرۆڤ نه‌شێت ئارام روونیت و نه‌شێت كارێ خوه دروست بكه‌ت و ژیارا مرۆڤى یا نۆرمال وه‌كو به‌رێ برێڤه ناچیت، ژ ئالیێ ده‌روونیڤه ڤێ چه‌ندێ هند باندۆرا خوه ل سه‌ر زارۆیان نابیت، چونكى زارۆك به‌رێ خوه دده‌نه مه‌زنان كانێ چاوان ره‌فتارێ دكه‌ن و هه‌لویستێ وان یێ چاوایه ل هه‌مبه‌رى وان هه‌موو تشتێن كو جهێ گه‌فان بن، له‌وما زارۆك دێ هندێ ترسیت، ده‌مێ مرۆڤێن مه‌زن دترسن، چونكى ده‌مێ ئه‌و كه‌سێ گرنگ بۆ زارۆكى و وان گه‌له‌ك باوه‌رى پێ هه‌ى دترسن، هنگێ دێ جیهانا زارۆكى ژى تێكچیت و دیوارێ په‌یداكرنا باوه‌ریێ و ئارامیێ دێ ل ده‌ف وى هه‌رفن، ده‌مێ دبینیت ئه‌و مرۆڤێن ل ده‌ردورا وى یێن كه‌فتینه د ره‌وشه‌كا ئالۆز دا و نه‌شێن به‌رسڤا وى زارۆكى بده‌ن و ژ پرسیاران دره‌ڤن، زارۆكى پاشڤه دبه‌ت، هه‌كه د ڤى ده‌مى دا مه‌زنان ئاگه‌ه ژ خوه نه‌بیت، دێ گه‌له‌ك زیانێ گه‌هیننه زارۆیان، چونكى بابه‌تێن هوسا زارۆك گه‌له‌ك گرنگێ پێ ناده‌ت.
ناڤهاتى زێده‌تر گۆت: بابه‌تێ ترسێ نه یێ گرێدایه ب ته‌مه‌نى و ره‌گه‌زى ڤه، یا ب هندێ ڤه گرێدایه، كا هه‌یكه‌لێ په‌یداكرنا رحه‌تیێ دناڤا وى جڤاكى دا چیه، چونكى ئه‌ڤ بابه‌ته یێ گرێدایه ب ده‌روون جڤاكى ڤه، كانێ چاوا جڤاك میكانیزمێن ئارامیێ په‌یدا دكه‌ت، له‌وما جڤاك دشێت بریارێ بده‌ت، كانێ دێ چلێ هێت، د حاله‌تێن وه‌كو نوكه دا پتر كارێ ده‌ستهه‌لاتێ و بسپۆرایه، كانێ دێ چاوا ره‌فتارێ كه‌ن، ل هه‌مبه‌رى ڤێ روودانێ، هه‌روه‌سا ل كوردستانێ كانێ ده‌ستهه‌لات چو دكه‌ت و چاوا پێزانین و رێنمایان دده‌ته خه‌لكى، دیسان راگه‌هاندن چاوا پرسیارێن گرنگ ژ بسپۆرێن تایبه‌تمه‌ند دكه‌ت و ئه‌و ژى ڤى بابه‌تى هه‌لسه‌نگینیت و ب ره‌نگه‌كێ راست و دروست بێى ڤه‌شارتن و ترس دیار بكه‌ت، چونكى چه‌ند راستى بهێته گۆتن، دێ خه‌لك ب ساناهیتر وه‌رگریت و ئێدى خه‌لك سیناریۆیێن ترسناك د مه‌ژیێ خوه دا دروست ناكه‌ن، چونكى ده‌مێ تشت یێ سرۆشتى بیت و باش برێڤه بچیت و ل ده‌ردورا مرۆڤى هه‌موو تشت دێ د ئارام بن، دێ هزرێن مرۆڤى ژى هه‌موو د ئه‌رێنى و ئارام بن، لێ ده‌مێ قه‌یران په‌یدا دبن، دێ كاودانه‌كێ نه‌رێنى دروست بیت و دێ هزرێن مرۆڤى دناڤ جڤاكى دا د نه‌رێنى بن، له‌وما دڤێت هه‌رده‌م راستى بۆ خه‌لكێ بهێته گۆتن ژ ئالیێ ده‌ستهه‌لاتێ و كه‌سانێن بسپۆر ڤه، چونكى خه‌لك دێ هه‌ست ب دلرحه‌تیێ كه‌ت و دێ زڤریته ژیارا خوه یا نۆرمال.
د. عه‌بدولباقى هێشتا دبێژیت: ل كوردستانێ هنده‌ك فاكته‌رێن تایبه‌ت هه‌نه و جڤاكێ مه دناڤا قه‌یرانان دا دژیت، به‌رى قه‌یرانه‌ك ب دووماهى بهێت ئێكا دیتر دهێت، له‌وما ده‌مێ مرۆڤ د قه‌یرانان دا بیت، چو ل سه‌ر ئاستێ جڤاكى یان تاكه كه‌سى بیت، مرۆڤ یێ نازكتره و سترێس په‌یدا دبیت و زووتر مرۆڤ توشى ئاریشان دبیت و بریندار دبیت، دیسان نوكه ل هه‌ر چار ئالیێن كوردستانێ وه‌لاتێن داگیركه‌ر هه‌نه، له‌وما هه‌ر قه‌یرانه‌كا دروست دبیت، د بنه‌ره‌ت دا داگیركه‌رێن كوردستانێ یێن چێكرین و ڤرێكرینه دناڤ مه دا، یان ژى یێ كریه شه‌ره‌كێ ده‌روونى ل گه‌ل جڤاكێ مه، وان نیه‌تا خرابكرنا كوردستانێ هه‌یه و ب ڤێ چه‌ندێ شه‌رێ ده‌روونى یێ به‌رده‌وامه ل سه‌ر جڤاكێ مه، چونكى ئه‌و ژ كوردان دترسن، له‌وما ڤى شه‌رێ ده‌روونى ل گه‌ل جڤاكێ مه دكه‌ن، دیسان شه‌رێ شووشتنا مه ژى سه‌را كوردایه‌تیێ ل گه‌ل مه دكه‌ن، دێ بزاڤێ كه‌ن بسپۆر و شاره‌زا و ده‌ستهه‌لاتا مه خراب ده‌نه دیار كرن، ژ پێخه‌مه‌ت خه‌لكێ مه باوه‌رى پێ نه‌بیت و پتر بكه‌ڤنه ده‌ستێن داگیركه‌ران، له‌وما دۆژمن هه‌رده‌م شه‌رێ ده‌روونى و شووشتنا مه‌ژى ل گه‌ل مه ب كار دئینن.
هێشتا دبێژیت ژى: یاریكرن ب ڤى ڤایرۆسى جۆره بزاڤه‌كه، ژ پێخه‌مه‌ت مرۆڤ ده‌روونێ خوه پێ ئارام بكه‌ت، چونكى هه‌كه تشته‌كێ ب گه‌ف و گور بیت و مرۆڤى ده‌ستهه‌لات ل سه‌ر نه‌بیت، دێ كه‌ته یارى پێ كرن، داكو ژێ ده‌رباز ببیت، ئه‌ڤه تشته‌كێ سرۆشتیه، لێ هه‌ر قه‌یرانه‌كێ باشى و خرابیێن خوه هه‌نه، دیسان ده‌لیڤێن په‌یداكرنا میكانیزما نوو ژى بۆ مرۆڤى چێدبن، دڤێت مرۆڤ پێنگاڤێن نوو بهاڤێژیت، داكو بشێت خوه ل گه‌ل بگونجینیت، باشیێن ڤى ڤایرۆسى ئه‌وه، كو كۆمبوونێن مه یێن ته‌قلیدى یێن كێم بووین، ده‌لیڤه‌كا په‌یدابووى، كو ئه‌م خوه ژ وان تشتان قورتال كه‌ین، ده‌ستهه‌لات ژى یا رێنمایى و پێزانینێن جوان و ژ هه‌ژى به‌لاڤ دكه‌ت، هه‌روه‌سا د نوكه دا خه‌لكێ مه یێ به‌تاله و ناچنه ده‌وامان، له‌ونا نابیت هنده‌ك جۆرێن دیتر یێن كۆمبوونان په‌یدا بكه‌ن، چونكى ئه‌ڤه ڤایرۆسه‌كێ ترسناكه، ژبه‌ركو ده‌مێ ده‌ستهه‌لات و بسپۆر تشته‌كێ دبێژن، پێدڤیه هه‌موو خه‌لك پێگیریێ پێ بكه‌ن، چونكى خوه پاراستن چێتره ژ چاره‌سه‌ریێ، دیسان ژ ئالیێ ده‌روونى ڤه ده‌مێ مرۆڤ خوه دپارێزیت و گوهداریا جهێن شۆله‌ژێ دكه‌ت، ل وى ده‌مى دێ مرۆڤ هه‌ست ب ئارامیێ كه‌ت و چو ترس ل ده‌ف مرۆڤى نامینیت.
ئەڤرۆ نیوز:
ئەکرەم ئیمام ئوغلۆ سەرۆکێ باژێرڤانیا ئستەنبولێ راگەهاند کو کەس نەشێت ل تورکیا هەدەپێ و ئالیگرێن وێ وەکو تیرۆرست بناڤ بکەت و گۆت: (هەدەپە ل گۆر قانوونێن تورکیا کار دکەت و ب ملیۆنان دەنگدەرێن وێ هەنە و دڤێت هەموو کەس رێزێ ل وێ پارتێ بگرن و مافێ چو کەسەکێ نینە وەکو تیرۆرستان سەرەدەریێ ل گەل هەدەپێ و ئالیگرێن وێ بکەت).
هەژی ئاماژەپێدانێ یە کو رۆلێ کوردان ل ئستەنبولێ د سەرکەفتنا بەربژارێ پارتا کۆماریا گەل ئەکرەم ئیمام ئوغلۆی بۆ سەرۆکاتیا باژێرڤانیا ئستەنبولێ بەرچاڤ بوو.
ئەڤرۆ نیوز:
وەزارەتا ناڤخوە یا حوکمەتا هەرێما کوردستانێ قەدەغەیا هاتنوچوونێ ل هەر دو باژێرێن هەولێرێ و سلێمانی بۆ دەمێ ٧٢ دەمژمێران درێژکر کو هەر ژ دەمژمێر ١٢ ئەڤ شەڤە دێ دەستپێ کەت.
وەزارەتا ناڤخوە دیار کریە کو دەستهەلات ب پارێزگەهان هاتیە دان کو پێدڤیاتێن وەلاتیان دابین بکەن ب رەنگەکێ کو کارتێکرنێ ل قەدەغەیا هاتنوچوونێ نەکەت.
د داخۆیانیا وەزارەتا ناڤخوە دا ئاماژە ب هندێ ژی هاتیە کرن کو دڤێت هەتا شەڤا ١٦ ل سەر ١٧ هەموو وەلاتیێن هەرێمێ ڤەگەرنە ڤە هەرێما کوردستانێ و پشتی هندێ دێ هەموو دەرگەهێن سنوری بۆ هاتنا گەشتیاران هێنە داخستن، لێ کارێ بازرگانی دێ یا بەردەوام بیت ل گۆر وان رێنمایێن کو بەری نها هاتنە دەرخستن.
وەزارەتا ناڤخوە یا هەرێما کوردستانێ سوپاسیا هەموو وەلاتیان ژی دکەت کو پێگیریێ ب رێنمایێن وەزارەتا ساخلەمیێ دکەن و ل مالێن خوە دمینن دا ژ مەترسیا ڤایرۆسێ کۆرۆنایێ دوور بن.
ئەڤرۆ نیوز:
وەزارەتا ساخلەمیێ یا ئیرانێ ئەڤرۆ راگەهاند کو د ماوەیێ ٢٤ دەمژمێرێن بۆری دا ١١٣ کەسان ل ئیرانێ ژ بەر ڤایرۆسێ کۆرۆنا جانێ خوە ژ دەست داینە و ب گشتی هەتا نها ل وی وەلاتی ٧٢٤ کەسان جانێ خوە ژ دەست داینە.
ل گۆر وەزارەتا ساخلەمیێ یا ئیرانێ هەتا نها ١٣ هزار و ٩٣٨ کەس ل ئیرانێ تووشی ڤایرۆسێ کۆرۆنا بووینە.
بەری دەمەکێ حەسەن رۆحانی سەرۆک کۆمارێ ئیرانێ ژی راگەهاند کو ژ بەر سزایێن ئابووری یێن کو ئەمریکا ل سەر ئیرانێ سەپاندینە وەلاتێ وی نەشێت کۆنترۆلا کۆرۆنایێ بکەت و دڤێت نەتەوێن ئێکگرتی داخواز ژ ئەمریکا بکەت کو سزایێن ئابووری ل سەر ئیرانێ راکەت.
ئەڤرۆ نیوز:
دەزگەهێن راگەهاندنا ئۆپۆزسیۆنا تورکیا دیار دکەن کو پشتی رێککەفتنا ل روسیا کو ب تەمامی ل دژی بەرژەوەندیێن تورکیا دابوو، ئەردۆگانی گەلەک بزاڤکرن کو شکەستنا خوە ڤەشێریت و ژ بەر هندێ ژی دو پێشنیاز داینە پوتینی، لێ هەر دو پێشنیاز ژی ژ ئالیێ سەرۆکێ روسیا ڤە هاتینە رەتکرن.
ل دۆر هەر دو پێشنیازان ژی هاتیە دیار کرن کو ئەردۆگانی بۆ پوتینی دیار کریە ئەو دشێن پێکڤە پەترۆلا سووریێ بفرۆشن و هەروەسا دشێن پێکڤە ئاریشا ل سووریێ هەی چارەسەر بکەن، لێ پوتینی هەر دو پێشنیازێن ئەردۆگانی رەت کرینە و دیار کریە کو هەتا ئدلب و دەڤەرێن دی یێن سووریێ ژ تیرۆرستان نەهێتە پاقژکرن رەوشا وی وەلاتی ئارام نابیت.
ئەڤرۆ نیوز:
د. ڤیان سەبری سەرۆکا فراکسیۆنا پارتی ل پەرلەمانێ عیراقێ راگەهاند کو لایەنێن شیعە ل عیراقێ ب رێیا لیژنەکا حەفت کەسی کەسەک بۆ پۆستێ سەرۆک وەزیرێن عیراقێ دەستنیشان کرینە و رەنگە ئەڤ شەڤە ناڤێ وی بهێتە ئاشکرا کرن.
ڤیان سەبری ئەو یەک ژی دیار کر کو شیعە هەر کەسەکێ بۆ پۆستێ سەرۆک وەزیران دەستنیشان بکەن دڤێت ئەو کەسە ل گەل کوردان و سوننان دەست ب دانوستاندنان بکەت و بێی کوردان و سوننان چو کەسەک نەشێت وەکو سەرۆک وەزیر ل عیراقێ سەرکەفتی بیت.
ئەڤرۆ نیوز:
رێبەر ئەحمەد وەزیرێ ناڤخوە یێ حوکمەتا هەرێما کوردستانێ راگەهاند کو قەدەغەیا هاتنوچوونێ بۆ دەمێ ٤٨ دەمژمێران ئەنجامێن خوە یێن باش هەبووینە و دێ ل گەل پارێزگارێن هەرێما کوردستانێ دووچوونا رەوشا نها کەین و دێ ل گۆر هندێ ژی بریارێ دەین.
ناڤهاتی راگەهاند کو رەنگە قەدەغەیا هاتنووچونێ بهێتە درێژکرن لێ دێ ئاسانکاری بۆ وەلاتیان هێتە کرن دا چو ئاریشە بۆ ژیانا وان یا رۆژانە دروست نەبیت.
ئەڤرۆ نیوز،عەلی حاجی:
نوونەرێ قایمقامێ زاخۆ د لژنا دیفچوون دا بۆ ئەڤرۆ نیوز دیار کر پشتی بریارا بازارێن گرتی ژلایێ بلند یا روو ب روو بونا ڤایروسێ کورونایێ ل پارێزگەها دهۆکێ ئەڤرۆ روژا ئێک شەمبێ پرانیا وان جهان هاتنە دائێخستن.
زێدەتر خەلات ئوسمان گوت: ئێک ژ وان جهان بازارێ زاخۆیە دکەڤیتە دناڤ سەنتەرێ بازاری دا و ئێک ژ قەرەبالغترین بازارێن زاخۆیە ب تەمامی هاتە دائێخستن و نابیت ئەڤ بازارە بهێتە ڤەکرن هەتا دەمەکێ نەدەست نیشان کری و زێدەباری وێ چەندێ ژی چەندین نڤێسینگەهێن گەشتیاری و سەرتراشخانە هاتنە دائێخستن و هیڤی خازین هەمی جهەک پێگیر بیت ب ڤێ بریارێ و هەر جهەک ژی پێگیر نەبیت دێ ل گورەی یاسایێ سەرەدەری دگەل دا هێتە کرن،هەر دیسان هەمی خارنگەهـ و تەزیاتیان ژی بریارێن مە جێبەجێ کرینە کو ئەو ژی نابیت ب چو رەنگان کورسیان دناڤ جهێن خوە دانان.
نيشاندان