ئه‌ڤرۆ نیۆز، عه‌زیز هه‌ورامی:

لیژنه‌ی باڵای ئۆپڕاسیۆنه‌كانی پارێزگای سلێمانی چه‌ند بڕیارێكی نوێ بۆ ڕوبه‌ڕوبونه‌وه‌ی په‌تای كۆرۆنا ده‌ركرد، شوێنه‌ گه‌شتیاریه‌كان داده‌خرێن و گه‌شت و سه‌یران له‌ نه‌ورۆز قه‌ده‌غه‌یه‌.

له‌ ڕاگه‌یه‌ندراوێكدا، لیژنه‌ی باڵای ئۆپڕاسیۆنی پارێزگای سلێمانی بۆ ڕوبه‌ڕوبونه‌وه‌ی په‌تای كۆرۆنا، كۆپێكی ده‌ست ئه‌ڤرۆ نیۆز كه‌وتووه‌، لیژنه‌ی باڵای ئۆپڕاسیۆنه‌كانی پارێزگای سلێمانی كۆبوونه‌وه‌، له‌ گه‌ڵ قایمقامی قه‌زاكانی سه‌ر به‌پارێزگای سلێمانی، چه‌ندین بڕیاری نوێیاندا، له‌وانه‌ داخستنی شوێنه‌ گه‌شتیارییه‌كان و قه‌ده‌غه‌كردنی گه‌شت و سه‌یران.

هه‌روه‌ها له‌ ڕونكردنه‌وه‌كه‌ هاتووه‌، قه‌ده‌غه‌كردنی گه‌شت و سیرانی هاوڵاتیان بۆ شوێنه‌ گه‌شتیارییه‌كان له‌ ڕۆژانی جه‌ژنی نه‌ورۆز، وه‌ داخستنی ته‌واوی گوندی گه‌شتیاری و كابینه‌ و كه‌پر و یاریگا گه‌شتیارییه‌كان،ته‌واوی شوێنه‌ گه‌شتیارییه‌كان له‌ قه‌زا و ناحیه‌كان داده‌خرێن به‌ ڕوی گه‌شتیاراندا.

هه‌روه‌ها له‌ ڕونكردنه‌وه‌كه‌دا هاتووه‌، بڕیاره‌كان له‌ ڕۆژانی جه‌ژنی نه‌ورۆز جێبه‌جێ ده‌كرێت و ڕێگه‌ به‌ گه‌شت و سه‌یرانی هاوڵاتیان نادرێت بۆ پاراستنی هاوڵاتییه‌كانمان و بڵاو نه‌بونه‌وه‌ی ڤایرۆسی كۆرۆنا، تاكاتێكی نادیار بڕیاره‌كان كاریان پێ ده‌كرێت.