ئەڤرۆ نیوز:
فەهیم تاشتەکین بسپۆرێ کاروبارێ سیاسی یێ سووریێ راگەهاند کو تورکیا ل سووریێ تووشی شکەستنێ یا هاتی و رێککەفتنا ڤێ دووماهیێ یا ل موسکو ژی بۆ ڤەشارتنا شکەستنا تورکیا بوو.
ناڤهاتی دیار ژی دکەت کو زوو یان ژی درەنگ تورکیا دێ نەچار بیت هەموو هێزێن خوە ژ سووریێ ڤەکێشیت، چونکو شەرێ ل ئدلبێ و دەڤەرێن دی یێن سووریێ چو ئەنجامێن خوە بۆ تورکیا نابن و پشتەڤانیا ئەمریکا بۆ تورکیا ژی تنێ بۆ هندێ یە دا تورکیا پێگەهێ روسیا لاواز بکەت.
ئەڤرۆ نیوز:
محەمەد جەواد زەریف وەزیرێ دەرڤە یێ ئیرانێ راگەهاند کو پتر ژ ١٠ هزار کەس ل ئیرانێ تووشی ڤایرۆسێ کۆرۆنا بووینە و ژ بەر سزایێن ئەمریکا ئیران نەشێت پێدڤیاتێن نوشداری بۆ نەخوشان دابین بکەت.
وەزیرێ دەرڤە یێ ئیرانێ دیار کر کو ئەم داخوازا هاریکاریێ ژ جڤاکێ نێڤدوەلەتی دکەین و هەروەسا دڤێت ئەمریکا دەستان ژ سزادانا ئیرانێ ژی بەردەت دا بشێین کەرەستێن پێدڤی بۆ نەخوشێن کۆرۆنا ل ئیرانێ دابین بکەین.
ل گۆر وەزارەتا ساخلەمیێ یا ئیرانێ هەتا نها پتر ژ ٥٠٠ کەسان ژ بەر ڤایرۆسێ کۆرۆنا ل ئیرانێ جانێ خوە ژ دەست داینە.
ئەڤرۆ نیوز:
بوسەینا شەعبان شیرەتکارا سەرۆکێ سووریێ راگەهاند کو دڤێت ئەم سەربازێن ئەمریکا ژ سووریێ دەرخینین و پشتی کو رەوشا ئدلبێ ئارام بیت دێ بەرێ خوە دەینە رۆژهەلاتێ فراتێ و گۆت: (بێگومان دێ شەرێ ل رۆژهەلاتێ فراتێ وەکو یێ ئدلبێ ب زەحمەت بیت و دێ دەمدرێژ ژی بیت، لێ ئەم نەچارین سەربازێن ئەمریکا ژ سووریێ دەرخینین).
شیرەتکارا بەشاری ئەو یەک ژی دیار کر کو شامێ دڤێت هەموو ئاخا سووریێ وەکو بەرێ کۆنترۆل بکەت، ژ بەر هندێ ژی ئەم خوە بۆ شەرەکێ دەمدرێژ بەرهەڤ دکەین.
ئەڤرۆ نیوز:
فەرماندارەکێ ئۆپەراسیۆنێن هەڤپشک یێ عیراقێ راگەهاند کو د ئەنجاما هێرشێن شەڤا بۆری یێن فرۆکێن ئەمریکا سێ سەربازێن عیراقێ جانێ خوە ژ دەست داینە و چار سەرباز ژی بریندار بووینە کو برینا دو ژ وان یا گرانە.
بەرپرسێن عیراقێ ژی هێرشا ئەمریکا وەکو بنپێکرنا سەروەریا عیراقێ بناڤ دکەن و داخوازا دەرکرنا هێزێن ئەمریکا ل عیراقێ دکەن.
ئەو هێرشا ئەمریکا پشتی هندێ هات کو د ئەنجاما هێرشا چەند موشەکان ل سەر بنگەهێ سەربازی یێ تاجی دو سەربازێن ئەمریکا و ئێک ژی یێ بریتانیا جانێ خوە ژ دەست دابوون.
ئەڤرۆ نیوز:
هێرش سەلیم جێگرێ رێڤەبەرێ گشتی یێ ساخلەمیا سلێمانیێ راگەهاند کو دڤێت پشکنین بۆ وان کەسان بهێتە کرن کو پشکداری د تازیا وی ماموستایێ ئایینی دا کری کو بەری نها ژ بەر نەخوشیا کۆرۆنا جانێ خوە ژ دەست دابوو.
ناڤهاتی راگەهاند کو ئەو کەسێن نها ل سلێمانیێ تووشی کۆرۆنا بووینە ساخلەمیا هەموویان یا باشە و داخواز ژ هەموو وەلاتیان ژی کر کو پێگیریێ ب رێنمایان بکەن.
ئەڤرۆ نیوز:
ئەڤرۆ ئەینیێ وەزارەتا ساخلەمیا هەرێما کوردستانێ راگەهاند، حەفت حالەتێن دیتر یێن توشبوون ب کۆرۆنا یێ هاتنە تۆمارکرن کو شەش کەس ژ مالباتا وی مامۆستایێ ئاینی نە، یێ کو ل سلێمانیێ ژیانا خوە ژ دەستدای.
وەزارەتا ساخلەمیا حوکمەتا هەرێمێ دیار کر، د بەردەوامیا پشکنینان دا، حەفت گومانلێکریێن دیتر یێن توشبوون ب کۆرۆنایێ ل سلێمانیێ هاتنە دەست نیشانکرن.
گۆت ژی، شەش کەس ژ مالباتا وی ماموستایێ ئایینی نە، یێ کو ل سلێمانیێ ژبەر کۆرۆنایێ ژیانا خوە ژ دەستدای و ئێک ژی ژ ئیتالیا ڤەگەریایە.
ئەڤرۆ نیوز:
مالپەرێ (دی دەبلیو) د بابەتەکێ ساخلەمیێ دا نڤێسیە، نەخۆش دشێت بێ دەرمان باش ببیت، ھەرچەندە کۆرۆنا نەخوشیەکا مەترسیدارە، ژبەر درەنگ دەرکەفتنا نیشانێن وێ، لێ پرانیا نەخۆشان چێبووینە.
ژ 80% یا توشبوویێن ڤایرۆسێ کۆرۆنا بێ وەرگرتنا دەرمانان چێبووینە، رێژا مرنێ ژی ژ ۱٪ بۆ 5 بوویە، پرانیا وان کەسێن رزگاربووین ژ نەخوشیێ نیشانێن وان سڤکتربووینە، وەکو شێوی نەخوشیا پەرسیڤ و سەرما یێ بوویە، نیشانێن وێ تا رادەکێ ژ ھەڤدو نێزیکن.
ژ نیشانێن ڤی ڤایرۆسی، تا، کۆخکا ھشک و دژوار، بھێن تەنگی، دەرمانێ تایبەت ب کۆرۆنا یێ نینە ھەتا کو بۆ نەخۆشان بھێتە کارئینان.
ب ڤان رێیان دێ مرۆڤ خوە پارێزیت و بێ دەرمان:
. وەرگرتنا بھێنڤەدانێ بۆ دەمەکێ درێژ .
. ڤەخوارنا ئاڤێ و شلەمەنیان ب رادەکێ زێدە.
. بکارئینانا دەرمانێن نەھێلانا ئێشانێ.
. نەخوارنا دەرمانێن ئەنتی بایۆتیک.
ڤی ڤایرۆسی کێمتر باندۆر ل سەر ساخلەمیا زارۆیان ھەیە، زێدەتر بۆ کەسێن ب تەمەن یێ مەترسیدارە ژبەرکو وان ئاریشێن ھەناسەدانێ ھەنە.
ئەگەر مرۆڤ توش ببیت و چێببیتە ڤە، ئەرێ دێ دووبارە توشبیت؟.
ب دیتنا نۆشداران ئەڤ چەندە ب رادەکێ یا کێمە، نموونە ژی بۆ وێ ژنا ژاپۆنی، پشتی چێبوونێ دووبارە تووشی ڤایرۆسی بوویە ڤە.
ئەڤرۆ نیوز:
ئەڤرۆ پێنجشەمبی 12.3.2020 رەشید دینچ سەرۆکێ فیدراسیۆنا ساخلەمیا تورکیا راگەهاند، وان چارەسەریا کۆرۆنایێ دیتیە، کو ب چارەسەریا تیشکا تورکی بناڤ دکەت و دبێژیت، وێ تیشکێ د شیان دا هەیە د دەمێ سێ چرکان دا ب رەنگەکێ گشتی ڤایرۆسی ژناڤ ببەت.
هەروەسا گۆتیە ژی، چارەسەری پێک دهێت ژ بکارئینانا تشیکا سەر و وەنەوشەیی (UVA, UVB, UVC) کو د تیشکا رۆژێ دا هەیە بۆ ژناڤبرنا ڤایرۆسان، ب رێیا قەستەرێ دگەهیتە دەمار و سیهێن کەسێ توشبووی، هەروەسا هەر ولاتەکێ بخوازیت ژی بێ بەرامبەر دێ چارەسەریێ دەینێ و ب هەموو ئاوایان دێ هەڤکار بین.
دیار کر ژی، چارەسەری تنێ بۆ ڤایرۆسێ کۆرۆنا یێ نینە، بەلکو لدووڤ تاقیکرنێن وان بیت، ل سەر چەندین ڤایرۆس و میکرۆبێن دی باندۆریا وێ هاتیە سەلماندن.
ئەڤرۆ نیوز:
كه‌نالێ رووسیا ئەلیەوم بەلاڤە كریه، کو عه‌لی ئه‌كبه‌ر ویلایه‌تی، شیرەتکارێ عه‌لی خامنه‌یی، رێبه‌رێ كۆمارا ئیسلامیا ئیرانێ بۆ كاروبارێن نێڤده‌وله‌تی تووشی ڤایرۆسێ كۆرۆنا یێ بوویه.
هەروەسا گۆتیە، نوکە ویلایه‌تی ل جهەکێ تایبه‌ت هتیە گه‌ره‌نتی كرن و ل ژێر چاڤدێریا نۆشداران دایه
د هەمان دەمدا ئاژانسی فارس نیوز لیستا به‌رپرسێن تووشبوویێ یێن ئیرانێ ب ڤایرۆسێ كۆرۆنایێ بەلاڤكریه، كو دیارترینێن وان ئیسحاق جهانگیری، جێگرێ ئێکێ یێ سه‌رۆك كۆمارێ ئیرانێ، ره‌زا ره‌حمانی، وه‌زیرێ پیشه‌سازی و بازرگانی، عه‌لی ئه‌سغه‌ر مونسا، وه‌زیری رەوشەنبیری و گه‌شتوگوزارێ و هژماره‌کا به‌رپرسێن پله بلندێن وی وەلاتینە.
ئەڤرۆ نیوز:
نەهـ پەرلەمانتارێن هەفپەیمانیا نەسر، یاکو حەیدەر عەبادی سەرۆکاتیا وێ دکەت، خوە ڤەکێشان و پێكئینانا گرووپەکێ نوو راگەهاند و گۆتیە، ئارمانجا مە راستڤەکرنا خەلەتیێن بەری نوکە یە.
ئەڤرۆ پێنجشەمبی 12.3.2020 وان پەرلەمانتاران گۆتیە، ل سەر بنەمایێ وێ رەوشا سەخت یا عیراق تێدا دەرباز دبیت، ئەڤە ژی ژ ئەنجامێ خراب رێڤەبرنا وەلاتیە بۆ ماوێ زێدەتر ژ 17 سالان و خۆپێشاندانێن ئاشتییانە یێن گەنجان بۆ ئەنجامدانا چاكسازیێ كو چەندین كەس هاتنە كوشتن و بریندار کرن، نەخۆشی، قەیرانێن ئابووری، دەست ژ كاركێشانا حوکمەتێ لدووڤ دا هات.
لدووڤ وێ راگەهاندنێ، هەر ئێك ژ پەرلەمانتاران فەلاح خەفاجی، یوسف كیلابی، عەلا دلفی، ریاز تەمیمی، ئیحسان سەلەبی، تەها دیفاعی، فالح زیادی، خەلیل مەولا و هەنا توركی، ژ هەڤپەیمانیا نەسر جۆدا بووینە.
نيشاندان