ئه‌ڤرۆ نیوز:
رۆژناما زه‌سه‌ن یا برێتانى دیاركریه ل ماوێ چه‌ند رۆژێن بورى به‌رپرسێن یانا چێلسى ب فه‌رمى داخوازى ژ ستێرا خوه یا به‌رازیلى ویلیان كر بۆ درێژكرنا هه‌ڤبه‌ستا ئه‌وى بۆ دو سالێن دى لێ وى یاریزانى داخوازیا وێ یانێ ره‌تكر.
هه‌ردیسان وێ رۆژنامێ ئاشكراكریه ژى ولیان ب رێژه‌یا هه‌ره مه‌زن دێ ل ڤه‌گوهاستنێن هاڤینا بهێت په‌یوه‌ندى ب یانا توتنهام كه‌ت ژبه‌ركو په‌یوه‌ندیێن وى و راهێنه‌رێ نوكه یێ وێ یانێ گه‌له‌ك دخوشن و دخوازیت یاریێ ل بن سه‌رپه‌رشتیا مورینهوى بكه‌ت.
ئەڤرۆ نیوز:
وەزارەتا ساخلەمیێ یا ئیرانێ راگەهاند کو د ناڤا ٢٤ دەمژمێرێن بۆری دا ٥٤ کەسان ژ بەر کۆرۆنایێ ل ئیرانێ جانێ خوە ژ دەست داینە و هژمارا وان کەسێن کو ژ بەر کۆرۆنایێ هەتا نها ل ئیرانێ جانێ خوە ژ دەست داینە گەهشتیە ٢٩١ کەسان.
وەزارەتا ساخلەمیێ یا ئیرانێ ئەو یەک ژی دیار کریە کو هەتا نها ٨ هزار و ٤٢ کەس ل ئیرانێ تووشی ڤایرۆسێ کۆرۆنایێ بووینە.
ئەڤرۆ نیوز:
رۆژناما تایمز یا بریتانی راگەهاند کو کۆمبوونا سەرۆک کۆمارێ تورکیا رەجەب تەیب ئەردۆگان یا ل گەل بەرپرسێن ئێکەتیا ئورۆپا بێی ئەنجام ب دووماهی هات و ئەردۆگان بەری کو کۆمبوون ب دووماهی بهێت، توورە بوویە و کۆمبوون بجه هێلایە.
رۆژنامێ دیار کریە کو ئەردۆگانی ژ بۆ بابەتێ پەنابەران داخوازا پارەکێ زۆر ژ ئێکەتیا ئورۆپا کریە لێ ئەو یەک ژ ئالیێ بەرپرسێن ئێکەتیا ئورۆپا ڤە ب توندی هاتیە رەتکرن و ئەردۆگانی ژی دیار کریە کو دێ هەموو دەرگەهێن خوە یێن سنوری ل گەل یونانێ ڤەکەن دا پەنابەر بچنە ئورۆپا، بەرپرسێن ئێکەتیا ئورۆپا ژی نەرازیبوونا خوە ل هەمبەر هەلویستێ ئەردۆگانی دیار کرینە و ئەردۆگان ژی توورە بوویە و کۆمبوون بجه هێلایە.
ئەڤرۆ نیوز:
سەرۆکێ چینێ راگەهاند وان شیاینە کۆنترۆلێ ل سەر ڤایرۆسێ کۆرۆنا ل باژێرێ ووهان و دەوروبەرێن وێ بکەن و ئەو یەک ژی پێنگاڤەکا گرنگ و دلخوشکەرە.
شی جینج پینگ سەرۆکێ چینێ سەرەدانا باژێرێ ووهان کر کو وەکو ناڤەندا کۆرۆنایێ دهێتە نیاسن و راگەهاند کو وان شیاینە ب کریاری کۆنترۆلێ ل سەر ڤایرۆسێ کۆرۆنا بکەن.
ئەڤرۆ نیوز، هۆشەنگ تاجر:
خوەدانکارێن رۆژهەلاتێ کوردستانێ ژ بەر ڤایرۆسێ کۆرۆنا و مانا وەلاتیان ل مالێ کو ئەو یەک دێ کارتێکرنا خوە ل کارێ وان کەت بریار دانە کو ڤێ مەهێ کرێیا دوکان و مالان ژ وەلاتیان وەرنەگرن و ئەو یەک ژی بوویە جهێ دلخوەشیا وەلاتیان.
خالد محەمەد زادە رۆژنامەڤانێ رۆژهەلاتێ کوردستانێ بۆ ئەڤرۆ نیوز راگەهاند کو ل پرانیا باژێرێن رۆژهەلاتێ کوردستانێ دەست ب هەوا وەرنەگرتنا کرێ ل کرێچیان هاتیە کرن و هەتا نها گەلەک خوەدانکاران بریار داینە کرێ ژ وەلاتیان وەرنەگرن هەتا کو رەوش ئاسایی دبیت.
ئه‌ڤرۆ نیوز:
ستێرا هه‌لبژارتیێ مه‌غره‌ب و یاریزانێ یانا ریال مه‌درید ئه‌وێ نوكه ب شێوه‌یێ خواستن یاریێ ل یانا بوروسیا دورتموند یا ئه‌لمانى كه‌ت دیاركر ئه‌و یێ به‌رهه‌ڤه ب ڤه‌گه‌ریته ریال مه‌درید ڤه ل دووماهیا ڤى وه‌رزى.
زێده‌تر ئه‌شره‌ف حه‌كیمى بۆ كه‌نالێ نیلیفوت یێ ئه‌لمانى دیاركر هه‌كه یانا ریال مه‌درید داخوازى ژ وى كر ب ڤه‌گه‌ریته ناڤا پێكهاتیێ یانێ ڤه ئه‌و دێ ڤه‌گه‌ریت و یاریێ ل وێ یانێ كه‌ت و هه‌كه داخوازى ژ وى نه هاته‌كرن وى ده‌مى ئه‌و دێ په‌یوه‌ندى ب یانه‌كا دى كه‌ت .
حه‌كیمى ئه‌وێ ل وه‌رزێ ئه‌ڤ ساله ل گه‌ل یانا خوه بوروسیا دورتموند شیاى د 36 یاریان دا حه‌فت گولان توماربكه‌ت ل گه‌ل 10 گول ژى بۆ هه‌ڤالێن خوه به‌رهه‌ڤكرینه زێده‌تر دیاركر وه‌رزێ ئه‌ڤ ساله دبینت باشترین وه‌رزێ وى یى د ژیانا وى دا هه‌تا نوكه و ئه‌و گه‌له‌ك حه‌ش رولێ هێرشبه‌ریێ دكه‌ت .
ل دووماهیێ ناڤبرى سه‌باره‌ت زێدان دیاركر زێدان ئه‌و كه‌سه یێ باوه‌رى ب دروستى دایه وى بۆ كرنا یاریێ ل ئێك ژ مه‌زنترین یانێن جیهانێ ئه‌وژى ریال مه‌درید و هه‌كه وى ده‌مى ئه‌وى ئه‌و باوه‌رى نه دابایێ نوكه ئه‌و ل ڤى ئاستى نه‌بوو .
ئەڤرۆ نیوز:
ئەڤرۆ سەرۆکێ حوکمەتا هەرێما کوردستانێ سەرپەرشتیا کۆمبوونەکا تایبەت ل دۆر ڤایرۆسێ کۆرۆنایێ و کارتێکرنا وێ ل سەر بارێ ئابووری کر.
د کۆمبوونێ دا هاتە دیار کرن کو ڤایرۆسێ کۆرۆنایێ ژ بلی ساخلەمیێ کارتێکرنەکا گەلەک خراب ل بارێ ئابووری یێ عیراقێ و هەرێما کوردستانێ ژی کریە، چونکو بهایێ پەترۆلێ بلەز هاتیە خوارێ. ژ بەر هندێ ژی بریار هاتە دان کو مەزاختیێن نە پێدڤی یێن حوکمەتێ و دەزگەهێن سەر ب وێ بهێنە کێمکرن.
حوکمەتا هەرێما کوردستانێ بریار ژی دا کو ل گەل بەغدا د ناڤ هەماهەنگیێ دا بن دا کو بشێن پێکڤە ڤێ رەوشا خراب یا ئابووری دەرباز بکەن.
ئەڤرۆ نیوز، نەوزاد هلوری:
ب مەرەما پشکنینا وان رێڤینک و وەلاتیێن دناڤبەرا هەردوو پارێزگەهێن دهۆک و هەولێر ل خالا گەلیێ بالندا هاتن و چوونێ دکەن ژ ڤایرۆسا کۆرۆنایێ، باژێرڤانیا شێلادزێ خالەکا پشکنینا کۆرۆنایێ ل زالگەها گەلیێ بالندا دانا.
سەربەست مێزی، سەرۆکێ باژێرڤانیا شێلادزێ بۆ ئەڤرۆ نیوز گۆت: (ب مەرەما پشکنین و رێگرتن ژ بەلاڤبوونا ڤایرۆسا کۆرۆنا، ئەم وەک باژێرڤانیا شێڵادزێ رابین ب دانانا چەند کابینەیان وەکو خالەکا پشکنینیێ دناڤبەرا هەردوو پارێزگەهێن دهۆک و هەولێر ل خالا گەلیێ بالندا، ژبەرکو هاتن و چوونەکا زۆر ل سەر هەیە).
زێدەتر گۆت: (ئەڤ خالە ب هەڤکاری و چاڤدێریا قایمقامیا ئامێدیێ و ناحیا شێلادزێ هاتیەدانان، دێ د دەما 24 دەمژمێرا پشکنینا گەشتیار و وەلاتیان هێتەکرن داکو د پاراستی بن ژ ڤایرۆسا کۆرۆنایێ، ئومیدەوارین خەلک و گەشتیارێن دەڤەرێ هەموو د پااستی بن و پێگیریێ ب ڕێنمایێن ساخلەمیێ و خوەپاراستن ژ ڤایرۆسا کۆرۆنایێ بکەن).
ئەڤرۆ نیوز:
د. دلۆڤان محەمەد رێڤەبەرێ گشتی یێ ساخلەمیا هەولێرێ راگەهاند کو ل هەولێرێ چارەسەریا پێدڤی بۆ نەخوشێن کۆرۆنایێ دهێتە کرن و داخواز ژ وەلاتیان ژی کر کو پێگیریێ ب رێنمایان بکەن و ل مالان خوە بن دا، چونکو وەسا دێ پتر د پاراستی بن.
رێڤەبەرێ گشتی یێ ساخلەمیا هەولێرێ ئەو یەک ژی دیار کر کو باشترە خەلک ل مالێن خوە بن، داخواز دکەین وەلاتی خوە ژ جهێن گشتی و قەرەبالغێ دوور بکەن، چونکو ئەو یەک د بەرژەوەندیا هەموو وەلاتیان دایە.
ئەڤرۆ نیۆز، قائید میرۆ:
رۆژا شەمبی دوکانەکا زێڕی ل بازاڕێ قەزا سۆران بتەمامی ھاتە شەلاندن و قایمقامێ سۆرانژی دبێژیت، ڤەکۆلین ھاتینە دەستپێکرن ھێشتا تاوانبار نەھاتینەگرتن.
کرمانج عزەت، قایمقامێ قەزا سۆران بۆ ئەڤرۆ نیۆز دیارکر” کەسێن رۆژا شەمبی دووکانەکا زێڕی ل سەنتەرێ بازاڕێ سۆران شەلاندی باندەک بوویە و شارەزایی ھەبوویە ل کۆلینا تۆنێلان، لەوڕاژی شیاینە چەندین مەتران بکۆلن و بگەھنە ناڤا دووکانا زێڕی ل بازاڕێ سۆران.
قایمقامێ سۆران گۆتژی” دەزگەھێن ئەمنی و نەھێلانا گونەھباریان دەست ب ڤەکۆلینان کریە و ھەموو بزاڤەک یا دھێتەکرن ئەنجامدەرێن ئەڤێ تاوانێ بھێنە ئاشکراکرن و سزادان.
کرمانج عزەت ئاماژەکر” ئەف روویدانا دزیێ ئەم ھەموو ئێشاندی، چونکە شیاینە نێزیکی ٤٠ کیلۆیێن زێڕی ٣٠ دەفتەرێن دۆلاری بدزن دناڤا دوکانێ دا ئەڤەژی تاوانەکا مەترسیدارە.
نيشاندان