ئەڤرۆ نیوز:
پەیڤدارێ وەزارەتا خواندنا بلند یا حوکمەتا هەرێما کوردستانێ راگەهاند، سوبەهی و دوسبە دێ ئەنجامێن بەراهیێ یێن ئەزموونێن خواندنا بلند هێنە راگەهاندن.
عەباس ئەکرەم پەیڤدارێ وەزارەتا خواندنا بلند و ڤەکولینێن زانستی راگەهاند، سوبەهی و دوسبە دێ ئەنجامێن بەراهیێ یێن ئەزمونێن خواندنا بلند ل هەرێما کوردستانێ هێنە راگەهاندن.
ئەڤرۆ نیوز، عەلی حاجی :
وەلات هەجەر ژ قائیمقامیا زاخۆ بۆ ئەڤرۆ نیوز دیار کر: لدووڤ فەرمانا قایممقامێ زاخۆ جهێن دومبەلێ و هولێن داوەتان و پەیمانگەهێن فێرکرنا قوتابیان و دانانا بەهیان ل مزگەفتان ل سنورێ دەڤەرا زاخۆ هاتنە قەدەغە کرن.
زێدەتر ناڤهاتی گوت: ئەڤ بریارە پشتی وێ یەکێ هات کو ب هاریکاریا رێڤەبەریا ئەوقافا زاخۆ و رێڤەبەریا گەشت و گوزار و ئاسایش و پولیسێن زاخۆ، ئەو جهە هەموو هاتینە ئاگەهدار کرن و هەموو هاتینە داخستن، هەر دیسان نابیت ب چو شێوەیەکێ بەهی ل مزگەفتان بهێنە دانان و دانانا چادران ژی دناڤ تاخان دا ناهێتە قەبوول کرن بتنێ هەکە بەهی د مالان دا بهێتە دانان دێ رێک پێ هێتە دان و ئەڤ پێنگاڤە ژبەر وێ یەکێ نە دا کو رێکارێن حوکمەتا هەرێما کوردستانێ توندتر بن ب مەرەما خوە پاراستن ژ ڤایروسێ کورونایێ و دێ ب رێیا پولیس و ئاسایشا زاخۆ بەردەوام چاڤدێریا ڤان جهان کەین دا کو بمیننە دائێخستی و ئەڤ بریارە دێ بۆ هەتا دەمەکێ نەدیار بیت و پێدڤی یە هەموو کەس پێگیریێ ب ڤان فەرمانان بکەن.
ئەڤرۆ نیوز، رەزوان رۆژبەیانی:
ل سنوورێ قەزا بەردەرەش ٣٥ جهێن گشتی و فرۆشگەهان ژ ئەگەرێ کەل و پەلێن دەم بسەرڤە چووی هاتنە گرتن و خودانێ وان ژی هاتنە سزادان.
کامیران بەرزنجی بەرپرسێ چاڤدیری و بازرگانی لە قەزا بەردەرەش بۆ ئەڤرۆنیوز خویاکر: ل ماوی دو هەیڤان دا ئەم شیاینە ل سنوورێ قەزا بەردەرەش دو تەنێن خوارن و ڤەخوارنێن ئێکسپایەر دەست ب سەردا بگرین و ژ ناڤ ببەین ، گۆت ژی ٣٥ دوکان هاتینە دائێخستن و خودانێن وان ژی هاتینە سزادان و ١١٥ بەلێن نامە ژی هاتینە پرکرن ، وەک هۆشداریەک کو ئەڤان کاران دوبارە نەکەن ب تایبەتی کەل و پەلێن ئێکسپایەر.
ئاشکرا ژی کر، کو سەرەدانا هەموو دەرمانخانان هاتیە کرن ژبۆ هندێ کو کەمامە ب گرانی نەهێتە فرۆتن لدووڤ وان رێنما و بهایان بهێتە فرۆتن یێن کو ژلایێ وەزارەتا ساخلەمیێ ڤە هاتینە دیار کرن.
ئەڤرۆ نیوز:
عادل عەبدولمەهدی د گۆتارەکێ دا دیار کر: پێدڤیە پەرلەمانێ عیراقێ بهێتە هەلوەشاندن و هەلبژارتن بهێنە ئەنجامدان.
عادل عەبدولمەهدی سەرۆک وەزیرێ دەست ژ کار کێشایێ عێراقێ راگەهاندیە: ئێدی سەرۆکاتیا کۆمبوونێن جڤاتا وەزیرێن عیراقێ ناکەم و پێدڤیە جهگرەک بۆ سەرۆک وەزیرێ عیراقێ یان وەزیرەک برێڤەبرنا روونشتنێن جڤاتا وەزیران ب ستوویێ خوە ڤە بگریت و کاروبارێن رۆژانە برێڤە ببەت.
ناڤهاتی ئاشکرا کر ژی: لدووڤ مادێ ٧٦ یێ دەستورێ عیراقێ، ب زووترین دەم داخوازا پێکئینانا حکومەتا نوو دکەم و حوکمەتا کار برێکەر چارەسەریەکا گونجای نینە بۆ عیراقێ، چونکی نوکە عیراق د رەوشەکا ئالۆز و هەستیار دایە.
عەبدولمەهدی ئەو ژی گۆتیە، پێشنیار دکەم پەرلەمانێ عیراقێ خوە هەلوەشینیت و ٤ کانوونا ئێکێ ٢٠٢٠ بۆ هەلبژارتنێن گشتى دیار بکەت و کۆمسیۆن ٦٠ رۆژان بەرى وێ چەندێ بەرهەڤیان بکەت ژ بۆ ئەنجامدانا هەلبژارتنان، هەروەسا راگەهاند ژى: داخوازێ ژ پەرلەمانی دکەم د روونشتنەکا نە ئاسایی دا قانوونا هەلبژارتنان و بازنێن هەلبژارتنان و کومسیۆنا بلندا هەلبژارتنان ئێکلا بکەن.
ئەڤرۆ نیوز:
ئەڤ شەڤە وەزیرێ ساخلەمیا هەرێمێ سامان بەرزنجی د پرێس کۆنفرانسەکێ دا راگەهاند، کو حالەتەکێ دیتر یێ توشبوویێن ڤایرۆسێ کۆرۆنا ل سلێمانیێ هاتیە تۆمار کرن، نوکە پێنج کەس ل سلێمانیێ تۆشی ڤایرۆسێ کۆرۆنا یێ بووینە، لێ حالەتێ وان یێ جێگێرە، هەروەسا هەتا نوکە کەسێ ژ وان گیانێ خوە ژ دەست نەدایە.
ناڤهاتی گۆت ژی: مە هەما هەنگیەکا باش ل گەل رێکخراوا ساخلەمیا جیهانی هەیە و دیسان مە هژمارەکا دیتر یا دەزگەهێن پشکنینیا کۆرۆنایێ گەهاندینە نەخۆشخانێن هەرێما کوردستانێ.
ئه‌ڤرۆ نیوز:
سه‌رۆك بارزانى په‌یامه‌ك بۆ رایا گشتى دیار كریه، د پشكه‌كا وێ دا هاتیه” پر ژ دل سوپاسیا هه‌موو لایه‌نێن سیاسى یێن كوردستانى دكه‌م كو سه‌ره‌راى هه‌بوونا بۆچوونێن جودا یێن سیاسى د بابه‌تێ پێدان و نه پێدانێ باوه‌ریێ ب حوكمه‌تا نوو یا عیراقێ د ئێكرێزبوون و ئه‌ڤ ئێكهه‌لویستیا وان ده‌ستكه‌فته‌كێ دیرۆكى یه بۆ گه‌لێ كوردستانێ و جهێ رێزگرتنێ یه”
هه‌روه‌سا دیاركریه”سوپاسیا هه‌موو وان هێزێن سیاسى یێن نیشتیمانپه‌روه‌ر یێن عیراقى دكه‌م كو ب هه‌لویستێن خوه یێن راست و لۆژیكى بووینه رێگر كو قه‌یرانێن عیراقێ كوورتر لێ بهێت و عیراق به‌ره‌ڤ كاره‌ساته‌كا دى بچیت، ئه‌ڤ هه‌لویستێ وان رێزگرتنه ل بنه‌مایێن دیموكراسیێ و هه‌روه‌سا به‌رچاڤكرنا خواستا هه‌موو پێكهاتێن عیراقێ یه”.
ئەڤرۆ نیوز:
لدووڤ نووترین ئامارێن جیهانی، هەتا نوکە ژ ئەگەڕێ ڤایرۆسێ کۆرۆنایێ سێ هزار و ٦٠ کەسان ژیانا خوە ژ دەست دایە، هەروەسا ٨٩ هزار و ٧٧٨ کەسێن دیتر ژی توشبووینە، دیسان هەتا ئەڤرۆ ٤٤ هزار و ٩٠٣ کەس ژ وێ نەخوشیێ چاکبووینە.
ئاژانسا رۆیتەرز بەلاڤکریە، هەتا نوکە ل وەلاتێ چینێ ٨٠ هزار و ٢٦ کەس توشی ڤایرۆسێ کۆرۆنا بووینە و دو هزار و ٩١٢ کەسان ژی ژیانا خۆ ژدەست دایە کو پتریا وان ل باژارێ ووهان بووینە، دیسان هەتانۆکە ئەڤ ڤایرۆسە ل چەندین وەلاتێن جیهانی بەلاڤبوویە.
ئەڤرۆ نیوز:
سەرۆکێ ئێکەتیا زانایێن جیهانا ئیسلامی راگەهاند، بوسولمان دشێن ژبەر مەترسیا بەلاڤبوونا کۆرۆنایێ نەچنە نڤێژێن بکۆم ل مزگەفتان و دشێن د مالێن خۆ دا ئەرکێن ئایینی ب جهـ بینن.
عەلی قەرەداغی سەرۆکێ ئێکەتیا زانایێن جیهانا ئیسلامی، ئەڤرۆ دوشەمبیێ فەتوایەک دەربارەی بەلاڤبوونا ڤایرۆسێ کۆرۆنایێ دەرکریە و راگەهاندیە، لگورەی شڕۆڤەیا دەقێن قورئانا پیرۆز، د نوکە دا مەترسیا بەلاڤبوونا ڤایرۆسێ کۆرۆنایێ هەیە، بوسولمان دشێن نەچنە نڤێژێن بکۆم د مزگەفتان دا و هەتا رێ ژی هاتیە دان کو مەراسیما نڤێژا ئەینیێ ژی د مزگەفتان دا نەهێتە ئەنجام دان و ل مال بهێنە کرن.
ناڤهاتی ژ بۆ روونکرن و پشتراستکرنا فەتوایا خوە، ئاماژە ب چەند دەقێن قورئانا پیرۆز و فەرموودەیان کریە، د ناڤ وان دا ژی ئایەتا هژمار ٧٨ ژ سۆرەتا حەج و ئایەتا هژمار ١٨٥ ژ سۆرەتا بەقەرە.
ئەڤرۆ نیوز :
ئەڤرۆ 2.3.2020 ب فەرمانا ویزاری یا ژمارە ۱۹۱۱ یا وەزارەتا پەروەردێ یا حوکمەتا هەرێما کوردستانێ بریارەک بۆ بەرژەوەندیا ئەڤان قوتابیان هاتیە دان و تێدا هاتیە:
ژبەر بەرژەوەندیا گشتیی و ب مەرەما ئاسانکاریێ بۆ ۱۰٨٦٤ ، قوتابی و خویندکارێن دەرەکی، کو مافێ پشکداریکرنێ وەرگرتیە د تاقیکرنێن گشتی یێن قۆناغا ۱۲ ئامادیی زانستی و وێژەیی و پیشەیی و خواندنا ئیسلامی بۆ سالا خواندنا ۲۰۱۹ ـ ۲۰۲۰ ، بریار هاتیە دان کو تاقیکرنێن گشتی ل سنوورێ جوگرافیی و جهێ ئاکنجیبوونا خوە ل قەزاو ناحیان ئەنجام بدەن ، هەموو مامەلە و کارێن وا دێ ل رێڤەبەریێن پەروەردێن قەزایێن پەیوەندیدار ڤە هێنە برێڤە برن.
ئەڤرۆ نیۆز، قائید میرۆ:
لھەرێما کوردستانێ نێزیکی ٣٠٠ ھزار خانیێن زێدەگاڤی ھەنە و بڕیارە گورەی قانوونا ھژمارە سێ یا پەرلەمانێ کوردستانێ بھێنە تاپۆکرن، ئەندامەکا لیژنا باژێڕڤانیانژی ئاشکراکر، دێ رێنمایی بۆ پڕۆسا تاپۆکرنا خانیان ژلایێ وەزارەتا باژێڕڤانی بھێنە دەرکرن.
نەجات ئامێدی، ئەنداما لیژنا باژێڕڤانیان لپەرلەمانێ کوردستانێ بۆ ئەڤرۆ نیۆز دیارکر” قانوونا تاپۆکرنا خانیێن زێدەگاڤی دێ ھێتە بجە ئینان، چونکە ژلایێ پەرلەمانی ڤە ھاتیە دەرکرن و ل رۆژناما فەرمیی ھاتیە بەلافکرن، لەوڕا پشتی ھاتیە بەلافکرن دێ وەک قانوون ھێتە ھژمارتن و بجە ئینان.
لدۆر رێکارێن بجە ئینانێ ئامێدی دبێژیت” بجهئینانا قانوونا تاپۆکرنا خانیێن زێدەگاڤی ئەرکێ وەزارەتا باژێڕڤانیێ یە و ئەز باوەرم دێ پڕۆسا تاپۆکرنێ بھێتە دەستپێکرن، بەلێ پشتی خوە بەرھەڤکرن و دەرکرنا رێنمایێن تایبەت ب تاپۆکرنا خانیان.
نيشاندان