ئەڤرۆ نیوز:
ل مزگه‌فتێن تەهرانێ و چه‌ند باژێرێن دیتر نڤێژا ئەینیێ ناهێتە كرن.
وەسا بریارە ئەڤرۆ ل مزگه‌فتێن تەهرانێ و هژماره‌کا باژێرێن دیتر مه‌راسیمێن نڤێژا ئه‌ینیێ نەهێنە ئه‌نجام دان.
وه‌زاره‌تا ساخلەمیا ئیرانێ د به‌یاننامه‌کێدا راگه‌هاند، کو بۆ ئێک ئەینی نڤێژ و گوتارا ئەینیێ ل وان باژێرێن کو ئالودە بووین ب ڤایرۆسێ کۆرۆنا ناهێتە پێشکێش کرن.
ئه‌ڤرۆ نیوز، بارزان مزوورى:
عوده‌ى عه‌بادى، رێڤه‌به‌رێ فیتێرنه‌ریا پارێزگه‌ها نه‌ینه‌وا بۆ ئه‌ڤرۆ نیوز گۆت: ل مه‌غره‌بیا رۆژا چارشه‌مبى 26/2/2020 كه‌سه‌كێ نه‌نیاس ترۆمبێله‌كا بارهه‌لگر یا ماسێن مرى به‌رلێڤێن رۆبارێ دیجله ل نێزیك پرا چارێ یێن به‌لاڤكرین مه‌ترسیا ژناڤ چوونا هزاره‌ها ماسیان یا كرى ئه‌وێن دناڤ روبارێ دیجله‌ی دا.
ناڤهاتى خۆیاكر پشکا سامانێن ماسیان ل رێڤه‌به‌ریا مه ل گه‌ل هێزێن ئه‌منى سه‌ره‌دانا وى جهى یاكرى پشكنین بۆ وان ماسیان یا ئه‌نجام داى ژبه‌ر گوماها ژه‌هراوى بونا وان ماسیان.
ناڤهاتى گۆت: بریارا ده‌سته‌سه‌ركرنێ بۆ وان کەسان دەرکەفتیە و هێزێن ئه‌منى یێ لدووڤ وان كه‌سا دگه‌رێن بۆ ده‌سته‌سه‌ركرنا وان ژبه‌ركو وان كه‌سا ژیانا هزاره‌ها ماسیان ئێخستیه مه‌ترسیێ دا.
ئەڤرۆ نیوز:
مەعسومە ئیبتیکار جێگرا حەسەن رۆحانی سەرۆک کۆمارێ ئیرانێ بۆ کاروبارێن ژنان تووشی ڤایرۆسێ کۆرۆنا یێ بوویە.
ئاژانسێن نووچەیان بەلاڤکرن، پشتی کو پشکینین بۆ هاتیە کرن دەرکەفتیە کو مەعسومە ئیبتیکار جێگرا حەسەن ڕۆحانی بۆ کاروبارێن ژنان تووشی ڤایرۆسێ کۆرۆنا یێ بوویە.
هەڤدەم، میدیایێن ناڤخۆیێن ئیرانێ ڕاگەهاندن، هادی خەسرەو شاهی بالیۆزێ بەرێ یێ وی ولاتی ل ڤاتیکان و بەرپرسێ بەرێ یێ نڤیسینگەها پاراستنا بەرژەوەندیێن ئیرانێ ئەڤرۆ پێنجشەمبیێ ژبەر ڤایرۆسێ کۆرۆنا ژیانا خوە ژ دەستدایە.
د هەمان دەمدا، پێشتر دەستهەلاتدارێن ئیرانێ راگەهاند بوو، کو ئیرەج حەریرچی جێگرێ وەزیرێ ساخلەمیا وی ولاتی تووشی ڤایرۆسێ بوویە.
ئه‌ڤرۆ نیوز:
جێگرێ وه‌زیرێ ده‌رڤه‌یێ ئه‌مریكا بۆ كارۆبارێن رۆژهه‌لاتا ناڤین راگه‌هاند: پێدڤیه عیراق به‌رژه‌وه‌ندیێن مه ب پارێزیت.
دیڤید شینكه‌ر جێگرێ وه‌زیرێ ده‌رڤه‌یێ ئه‌مریكا بۆ كارۆبارێن رۆژهه‌لاتا ناڤین د پڕێس كۆنفرانسه‌كی دا داخاز ژ حكومه‌تا عیراقێ كر كۆ به‌رژوه‌ندیێن وه‌لاتێن مه ب پارێزیت، عه‌سائیب ئه‌هل حه‌ق ب به‌رپرس دزانین ژ هێرشێن بۆ سه‌ر به‌رژه‌وه‌ندیێن مه هاتینه‌كرن.
دیڤید شینكه‌ر ئه‌و چه‌نده ژی دا زانین عه‌سائیب ئه‌هل حه‌ق ب به‌رپرس دزانین ژ ئه‌وان هێرشێن هاتینه كرن بۆ سه‌ر به‌رژه‌وه‌ندێن مه، هه‌روه‌سا نوكه حزبوللا عیراقێ گه‌فه بۆ سه‌ر هێزێن ئه‌مریكا د ناڤ ئاخا عیراقێ دا.
ئه‌ڤرۆ نیوز:
سوپایێ سوریا چه‌ندین گونده‌وارێن باشوورێ ئدلبێ كۆنترولكرن، كۆنترولكرنا باژێرێ سه‌راقب ژلایێ چه‌كداران ڤه هاته ره‌تكرن.
روانگه‌یا سوریا بۆ مافێن مرۆڤی به‌لاڤكر كۆ سوپایێ سوریا شیایه چه‌ندین گۆنده‌وارێن باشوورێ ئدلبێ ژ بن ده‌ستێ گرۆپێن چه‌كدار رزگار و كۆنترول بكه‌ت.
ژێده‌ره‌كی ژ سه‌ربازێن روسیا ل سوریا ره‌تكر كۆ گرۆپێن چه‌كدارێن ئوپوزسیونێ باژێرێ سه‌راقب یێ ئدلبێ كۆنترول كربیت، ئه‌ڤه‌ژی پشتێ ئه‌وێ چه‌ندێ هات كۆ گرۆپێن چه‌كدار ئه‌و باژێر ژ ده‌ست دایی.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونێ ل پارێزگەها دهۆکێ، بۆ ئەڤرۆ نیوز گۆت: د روودانەکا ترافیکێ دا دو وەلاتی بریندار بوون.
ناڤهاتی زێدەتر دیار کر: ئەڤرۆ پێنجشەمبی 2020/2/27 و ل دەمژمێر (8:00) شەڤ ل سەر جادا سـەرەکی یا دهۆك بۆ زاخو و ل نێزیک تۆنێلا گەلیێ زاخۆ دو ترومبێلان لێکدایە، کو ترومبێلەک ژ وان بارهەلگر تۆیۆتا پیک ئاب یا رەنگ سپی بوویە ل گەل ترۆمبێلەکا بارهەلگر ترێلە یا تورکی، د ڤێ روودانێ دا دو کەس بریندار بووینە و زیانێن مادی یێ مەزن ژی ب هەردو ترۆمبێلان کەفتینە.
ئه‌ڤرۆ نیوز:
ئه‌ندامه‌كێ جڤاتا نوونه‌رین عیراقێ ل لژنا دارایی راگه‌هاند: ل سه‌ر گیرۆكرنا موچه‌یێ فه‌رمانبه‌رێن كوردستانێ ل گه‌ل وه‌زیرێ دارایی كۆمبوون و رایا وه‌زیرێ داراییێ عیراقێ ئاشكراكر .
د.ئه‌حمه‌د سه‌فار ئه‌ندامێ لژنا دارایی یا جڤاتا نوونه‌رێن عیراقێ راگه‌هاند: رۆژا 27/2/2020 ل گه‌ل فوئاد حسێن وه‌زیرێ دارایی یێ عیراقێ كۆمبوون ل سه‌ر گیرۆكرنا موچه‌یێ فه‌رمانبه‌رێن هه‌رێمێ، ب ئه‌گه‌رێ ئاریشه‌یه‌كا ئیداری كۆ ب رێكا رێڤه‌به‌رێ گشتی دروست ب بوو، وه‌زیرێ دارایی ب مه راگه‌هاند فه‌رمان ده‌ركه‌تیه و ئاریشه چاره‌بوو و پشت راستی دا فه‌رمانبه‌ران بۆ هنارتنا موچه‌یێ وان.
ئه‌ندامێ جڤاتا نوونه‌رێن عیراقێ راگه‌هاندژی چ ئاریشه‌یێن سیاسی نه‌بوون به‌لكو ئاریشه‌یه‌كا هونه‌ری هه‌بوو، ب ئه‌گه‌رێ رۆژێن بهێنڤه‌دانێ بوون، بریاره فه‌رمانا مه‌زاختنا پاره‌یی هاتیه دان، داكو رۆژا ئێكشه‌مبا بهێت بۆ لقێ هه‌ولێرێ یا به‌نكا ناڤه‌ندیا عیراقێ بهێته ره‌وانه‌كرن بۆ پارڤه‌كرنا موچه‌یێ فه‌رمانبه‌ران.
ئەڤرۆ نیوز:
ئەڤرۆ بۆ ئێکەم جار سەنتەرێ نۆشداری یێ زانکۆیا نێبراسکا دەست ب تاقیکرنا دەرمانێ کۆرۆنا ل سەر مرۆڤان کریە.
مالپەرێ سی ئێن ئێن بەلاڤکریە، پەیمانگەها نیشتیمانیا ساخلەمیا ئەمریکا ڕاگەهاندیە، ئێکەم کەس کو دێ تاقیکرن ل سەر هێتە ئەنجام دان، سەرنشینەکێ گەشتیا شازادێ ئەلماسە، کو ژ بەندەرێن ژاپۆنێ ئێخستبوونە بن چاڤدێریێ.
گۆتیە ژی، بۆ پەتایا ئیبۆلا و سارس و مێرسی کۆرۆنا هاتیە تاقیکرن و سەرکەفتن ب دەست خستیە و هیڤیدارین ژی بۆ کۆڤید-١٩ ژی سەرکەفتنێ بدەستڤە بینیت.
ئاماژە ب هندێ دایە، ل دەستپێکێ دێ ٢٠٠ میلیگرام ل ب توشبوویان هێتە دان و ل دەمێ مانا وان ژی د نەخۆشخانێ دا، کو چێدبیت هەتا ١٠ ڕۆژان بیت، دێ ١٠٠ میلیگرامێن دیتر پێ هێتە دان.
ئەڤە د دەمەکێ دایە، کو حالەتێن توشبوونێ ب ڤایرۆسێ کۆرۆنا ل ئەمریکا بۆ ٦٠ کەسان بلند بوویە، کو هەری کێم ٤٢ ژ وانا سەرنشینێن کەشتیا شازادێ ئەلماسە، کو ل بەندەرەکێ وەلاتێ ژاپۆنێ بووینە.
ئەڤرۆ نیوز:
پشتی نیڤرۆیا ئەڤرۆ محەمەد تەوفیق عەلاوی گەهشتە پەڕلەمانێ عێراقێ و دهاتە چاڤەرێ کرن ژی دەنگ ل سەر بەربژارێن وەزارەتێن کابینا وی بهێتە دان، لێ ئەو کۆمبوونە بۆ دەمەکێ نەدیار هاتە پاشخستن.
هەروەسا هەر ل دەمێ گەهشتنا عەلاوی بۆ پەڕلەمانی، محەمەد حەلبوسی، سەرۆکێ پەرلەنانێ عێراقێ بەرهەڤ نەبوویە پێشوازیێ ل وی بکەت، لەوما حەسەن کەعبی، جێگرێ ئێکێ یێ سەرۆکێ پەڕلەمانی پێشوازی لێکریە، لەوما کۆمبوونا پەرلەمانی بۆ دەمەکێ دیتر هاتە پاشخستن.
ئەڤە د دەمەکێ دایە، کو پرانیا ئالیێن کوردی خوە ئێکلا کریە، کو د ژ حالەتێ برێڤەچوونا روونشتنا پەڕلەمانیدا، دەنگی ب کابینا عەلاوی نادەن، هەروەسا سونیان ژی ژ کۆما ٦٧ پەڕلەمانتاران تنێ ١٥ دێ بەرهەڤێ پڕۆسا دەنگدانێ بن ب کابینا نوو یا حکومەتێ، هەڤدەم د ناڤ شیعان ژی دا، هەر ئێک ژ فراکسیۆنا دەولەتا قانوونێ و عەسائیب ئەهلی حەق رەتکریە دەنگی ب کابینا نوویا عەلاوی بدەن.
نيشاندان