ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویا کرن: د روودانەکا ترافیکێ دا ترۆمبێلەک وەرگەریا.
ناڤهاتی زێدەتر دا دیار کرن: ئەڤرۆ پێنجشەمبی ۱۳/۲/۲۰۲۰ د دۆخەکێ بەفر و بارانی دا سەر رێیا سەرەکی یا دناڤبەرا دهۆک هەولێر دا و ل سنۆرێ ناحیا رووڤیا یا سەر ب قەزا بەردەرەش ڤە روودانەک ژ جۆرێ وەرگەریان روودایە و زیان گەهشتینە ترۆمبێلەکا تەکسی، لێ چ زیانێن گیانی نەبوون.
ئەڤرۆ نیوز:
ژ ئەگەرێ بارینا بەفرێ ل پارێزگەهێن وان، هه‌كاری، بدلیس و مووشێ ل باکورێ کوردستانێ رێکێن هزار و ٣٠٢ گوند و دەڤەرێن ئاکنجیبوونێ هاتینە گرتن.
باژێرڤانیا وانێ دیار کریە، ژبەر بەفر بارینێ رێکێن ٦٨۷دەڤەرێن ئاکنجیبوونێ ل ناڤەندا باژێڕ و باژێڕۆکێن وێ هاتینە گرتن، تیمێن ڕامالینا بەفرێ ژی بەردەوامن ل سەر کارێن خۆ بۆ ڤەکرنا رێکێن داخستی.
ل پارێزگەها هەکاری ژی رێک و پرێن ٣٧ گوند و ١١٣ دەڤەران هاتینە داخستن و ڕێژەکا زێدە یا بەفرێ باریە و تیمێن باژێڕڤانیێ ژی بزاڤێ دکەن بۆ ڤەکرنا ڕێیان.
هەروەسا ل پارێزگەها بدلیسێ رێکێن ٢٥٧ گوندان هاتنە داخستن و هاتنوچوون تێدا ناهێتە کرن، ل پارێزگەها مووشێ ژی رێکێن ٢٠٨ گوندان هاتنە گرتن.
ئەڤرۆ نیوز:
پشتی ناڤێ وی چوویه د كتێبا گینس دا، ب ته‌مه‌نترین زەلام د جیهانێدا نهێنیا درێژیا ژیێ خوە ئاشكرا دکەت.
چیتیتسۆ واتانابی، وەلاتیەکێ ژاپۆنیە، پشتی ژیێ وی گه‌هشتیه 112 سال و 345 رۆژان، ناڤێ وی چوویه د كتێبا گینس دا، بۆ هژمارا پیڤانەیی وه‌ك ب ته‌مه‌نترین زەلام د جیهانێدا.
لدووڤ رۆژناما USA TODAY واتانابی، د بەرسڤا پرسیارەکێ ده‌رباره‌ی نهێنیا درێژیا ژیێ خوە گوتیە، تۆره نەبه و دلخۆشی و پێكه‌نینا خوە بپارێزه.
واتانابی، ل 5 ئەیارا سالا 1907 ل شارێ نێگاتا ل کنارێن باكوورێ ژاپۆنێ ژ دایكبوویه، پرانیا ژیێ خوە ب کارێ جۆتیاریێ ڤە بوراندیه.
واتانابی، ده‌رچوویێ قوتابخانه‌‌كا چاندنێ یه، پاشی گه‌شت كریه تایوانێ و ل وێرێ بۆ ماوێ 18 سالان د وارێ چێکرنا شه‌كرێ دا كار كریه، پشتی شەرێ دویێ یێ جیهانی جارەکا دی ڤەگەریایە نێگاتا ل ژاپۆنێ.
ئەڤرۆ نیوز:
ئەڤرۆ ل باژێرێ قەرسێ یێ باکورێ کوردستانێ مەحمود ئالیناک ئەندامێ بەرێ یێ پەرلەمانێ تورکیا و سیاسەتمەدارێ کورد ژ ئالیێ هێزێن دەولەتا تورکیا ڤە هاتە دەستەسەر کرن.
مەحمود ئالیناک راگەهاند کو ئەوە جارا دەهێ یە ژ ئالیێ دەولەتا تورکیا ڤە دهێتە دەستەسەر کرن.
پۆلیسێن تورکیا ژی دیار کرینە کو ب تومەتا ئەندامەتیا پارتەکا سیاسی ل دژی تورکیا وان مەحمود ئالیناک دەستەسەر کرینە.
ئەڤرۆ نیوز:
دوهی ل قامشلۆ ئالۆزی د ناڤبەرا خەلکێ گوندەکێ ل گەل هێزێن ئەمریکا روو دان و د ئەنجام دا کەسەک هاتە کوشتن، پشتی رەوش ئالۆز بوو هێزێن روسیا هاتنە جهێ روودانێ و هاریکاریا سەربازێن ئەمریکا کرن دا ڤەگەرنە ڤە بنگەهێ خوە و ل هەمان دەمی هێزێن سووریێ ژی ل وێرێ بوون، ئانکۆ دوهی هێزێن سێ وەلاتان ل قامشلۆ بوون.
ئەڤرۆ نیوز:
ب فەرمانا حوکمەتا ئیرانێ رۆژا ئەڤینداران ل ئیرانێ هاتە قەدەغەکرن و داخواز ژ هەموو دکانان ل تەهرانێ و باژێرێن دی ژی هاتیە کرن کو دیاریێن تایبەت یێن گرێدای رۆژا جیهانی یا ئەڤینداران نەفرۆشن چونکو ئەو یەک کەلتورا رۆژئاڤایە و یێن سەرپێچیێ بکەن دێ هێنە سزادان.
سپێدێ ١٤ مەهێ رۆژا جیهانی یا ئەڤیندارانە و ل ئیرانێ ئەو رۆژە هاتیە قەدەغەکرن و نابیت چو چالاکی ژی برێڤە بچن.
ئه‌ڤرۆ نیوز:
بالیوزێ روسیا ل عیراقێ روونكر تانوكه حكومه‌تا عیراقێ ب فه‌رمی داخازا كرینا سیسته‌مێ به‌ره‌ڤانیا ئێس 400 ژ موسكویێ نه‌كریه.
ماكسیم ماكسموڤ بالیوزی روسیا ل عیراقێ راگه‌هاند: ب ئه‌گه‌ری روودانێن ئه‌ڤێ داویێ، خواست ل سه‌ر كرینا سیسته‌مێ به‌ره‌ڤانیا ئێس 400 ژلایێ حكومه‌تا عیراقێ هاتیه دیتن، لی تا نوكه به‌غدا ب فه‌رمی داخازا كرینا ئه‌وی جورێ سیسته‌می ژ موسكویێ نه‌كریه.
بالیوزی روسیا ل عیراقێ دیاركر ژی حكومه‌تا موسكویێ به‌رهه‌ڤه دبیاڤێ به‌ره‌ڤانیا ئاسمانی هه‌ڤكاریا سوپایێ عیراقێ بكه‌ت بۆ ئه‌ڤێ مه‌به‌ستێ چه‌ند بانگهێشتنامه بۆ به‌رپرسه‌كێن عیراقێ بۆ سه‌ره‌دانكرنا چه‌ند پێشانگه‌هه‌كێن چه‌كی یێن روسی كرینه.
نيشاندان