ئەڤرۆ نیوز:
چاڤدێرێن سیاسی و بسپۆرێن سەربازی دیار دکەن کو ژ بەر ڤالاهیا ئەمنی ل کەرکووکێ و دەڤەرێن کوردستانی یێن دەرڤەی ئیدارا هەرێما کوردستانێ سەرکردێن داعشێ ژ سووریێ و دەڤەرێن دی درەڤن و دهێنە کەرکووکێ.
ل ئالیێ دی بەرپرسێن سەربازی یێن عیراقێ ژی دیار کرن کو داعشێ شیایە ل کەرکووکێ و دەڤەرێن سەر ب وێ چەندین بنگەهێن سەربازی ئاڤا بکەت و رۆژ ب رۆژێ ژی کاریگەریا وان زێدەتر لێ دهێت و پێدڤیە دەست ب ئۆپەراسیۆنەکا مەزن ل دژی داعشێ ل کەرکووکێ و دەڤەرێن سەر ب وێ ڤە بهێتە کرن.
ئەڤرۆ نیوز:
ئەڤرۆ ل نێزیکی تل تەمرێ هێزێن ئەمریکا رێ نەدانە هێزێن روسیا کو دەربازی حەسەکێ ببن و ئاریشە د ناڤبەرا وان دا دروست بوو، پاشی ژی هێزێن ئەمریکا بەر ب حەسەکێ و هێزێن روسیا ژی بەر ب قامشلۆ ڤە چوون.
وەزارەتا بەرەڤانیێ یا ئەمریکا ژی بەری دەمەکێ راگەهاند کو نابیت هێزێن روسیا ئاریشان بۆ ئەمریکا ل باکورێ سووریێ دروست بکەن.
ئەڤرۆ نیوز:
پشتی بیڤەلەرزا ل باکورێ کوردستانێ ئەڤرۆ ناڤەندا ڤەکۆلینان یا جیولوجی ل ئەمریکا نەخشێ بیڤەلەرزا دوهی ل باکورێ کوردستانێ بەلاڤکر کو ل گۆر نەخشێ دیار دبیت کاریگەریا بیڤەلەرزا دوهی گەلەک زێدە بوویە و ل هەر سێ پارچێن دی یێن کوردستانێ ژی هەست ب بیڤەلەرزێ هاتیە کرن.
بەرپرسێن وەزارەتا ناڤخوە یا تورکیا دیار دکەن کو ژ بەر بیڤەلەرزێ پتر ژ ٢٠ کەسان جانێ خوە ژ دەست داینە و نێزیکی هزار کەسان ژی بریندار بووینە.
ئەڤرۆ نیوز:
محەمەد جەواد زەریف وەزیرێ دەرڤە یێ ئیرانێ راگەهاند کو پشتی کوشتنا قاسم سلێمانی ب دەستێ ئەمریکا دیسان ژی دەلیڤە بۆ دانوستاندنان ل گەل ئەمریکا یا هەی و ئیران وێ یەکێ رەت ناکەت.
ئەو یەک د دەمەکێ دایە کو بەری نها مایک پۆمپیۆ وەزیرێ دەرڤە یێ ئەمریکا ژی راگەهاند کو ئەمریکا دڤێت ل گەل ئیرانێ پرسێن نها چارەسەر بکەت و ژ بۆ هندێ ژی دهێتە خواستن کو ئیران هەلویستێ خوە ل هەمبەر ئەمریکا و هەڤپەیمانێن وێ ب گوهۆریت.
ئەڤرۆ نیوز:
دەزگەهێن راگەهاندنێ یێن سەر ب هەدەپێ دیار دکەن کو پارتیا دیموکراتی یا گەلان دێ ل رۆژا ٢٤/٢/٢٠٢٠ کۆنگرێ خوە یێ چارێ گێریت و دهێتە چاڤەرێکرن کو هەدەپە گەلەک گوهۆرینان د رێڤەبەراتیا خوە دا بکەت.
ل گۆر داخۆیانیێن هندەک ژ بەرپرسێن هەدەپێ دهێتە چاڤەرێکرن کو هەر دو هەڤسەرۆکێن نها ئانکۆ سەزایی تەمەللی و پەروین بولدان ل سەر کارێ خوە د بەردەوام بن.
ئەڤرۆ نیوز:
دەزگەهێن راگەهاندنا تورکیا دیار دکەن کو ژ بەر بیڤەلەرزا شەڤێ دی یا باژێرێ ئەلعەزیز یێ باکورێ کوردستانێ گوندێ چەڤریمتاش یێ سەر ب وی باژێری ب تەمامی خراب بوویە، پرانیا مالێن وەلاتیان خراب بووینە و گوند ب تەمامی وێران بوویە.
سەرۆک کۆمارێ تورکیا ژی ئەڤرۆکە راگەهاند کو دێ یا پێدڤی بۆ خەلکێ وی باژێری کەن.
ئەڤرۆ نیوز:
مەسرور بارزانی سەرۆکێ حوکمەتا هەرێما کوردستانێ پێشوازی ل نەجاح ئەلشەمەری وەزیرێ بەرەڤانیێ یێ عیراقێ کر.
د هەڤدیتنێ دا بەحسێ رەوشا ئالۆز یا عیراقێ هاتە کرن، ب تایبەتی ژی بەحسێ رەوشا دەڤەرێن کوردستانی یێن دەرڤەی ئیدارا هەرێما کوردستانێ و لڤینێن داعشێ ل وان دەڤەران هاتە کرن.
سەرۆکێ حوکمەتا هەرێما کوردستانێ دیار کر کو مەترسیا داعشێ ل سەر هەموو عیراقێ و کوردستانێ یا هەی و پێدڤیە هێزێن عیراقێ و پێشمەرگە پتر ژ هەر دەمەکێ بۆ ژناڤبرنا داعشێ هاریکاریا هەڤدو بکەن.
ئەڤرۆ نیۆز، رەمەزان هەرنی:
ئەڤرۆ پێنچ ساڵ ب سەر شەهید بۆنا شەهید هوجام سورچی دەربازبوون ،پشتی شەهید بۆنا هوجام سورچی دەنگڤەدانەكا مەزن دروستكر ل سەرئاستێ جیهانێ و چەند روژا پشتی شەهید بۆنا وی سەرۆك (مەسعود بارزانی ) سەرەدانا خێزانا شەهید هوجام سورچی كر .
شەهید هوجام سۆرچی ساڵا 1970 ێ هاتیە دوونیایێ و ل گوندێ بەردەسۆر ل سنورێ ناحیا روڤیا ل قەزا بەردەرەش , ساڵا 1991 ێ دبیتە پێشمەرگە , رۆژەكا وەك ئەڤرۆ 25/1/2015 ل گەرەكا عەرەبی ل پارێزگەها مووسڵ ب دەستێ كورەكێ چەكدارێ رێكخراوا تیرۆستیا داعش ب درەندەترین شێوە دهێتە شەهیدكرن .
پشتی چەند رۆژا ل شەهید كرنا وی ( سەرۆك مەسعود بارزانی) سەرەدانا خێزانا شەهید هۆجام سۆرچی كر ل گوندێ بەردەسۆر ل سنورێ قەزا بەردەرەش .
وەك رێزگرتن ل شەهیدبۆنا هوجام سۆرچی ل بەرامبەر دەرگەهێ ناحیا روڤیا پەیكەرەك بۆ شەهید هوجام سۆرچی هاتیە دروستكرن و دانان .
رۆژا 17/12/2019 وەك رێزگرتن ل خوینا شەهید هوجام سۆرچی مەسرور بارزانی سەرۆكێ حوكمەتا كوردستانێ كچەك و كورەكێ شەهید هوجام سۆرچی بانگهێشت دكەتە جڤاتا وەزیران و پێكڤە ئاڵایێ كوردستان بلندكر .
دەرهێنەر ماجد درەندەش ، پێشتر بۆ ئەڤرۆ راگەهاند بوو: شەهید ( هوجام سۆرچی ) كو ب دەستێ رێكخراوا تیرورستیا داعش هاتە شەهید كرن ب رەنگەكێ دور ل بهایێن مروڤایەیتێ ، شەهید هوجام ل دەمێ شەهیدكرنێ دا بۆ چۆ رەنگەكێ ل وان ئامێرا و چەكا نەترسیا كو لسەر سەرێ وی هاتبۆنە دانان هەتا كو چاڤێن خوەژی نەلڤاندن و ب سەربلندی هاتە شەهیدكرن پشتی شەهیدكرنێ ل راگەهاندنێ و سوشیال میدیایێ دەنگڤەدانێن مەزن دروستكرن ل جیهانێ دا بۆ پەیڤا سەر زمانێ خەلكی.
گوتژی ب درێژاهیا مێژوویێ مە پرتوك لسەر سمبولێن جیهانێ و قەهرەمانا خواندینە ،بەلێ لسەر قەهرەمانێن خوە مە نەنڤیسە و نەڤەخواندیە لەورا دێ ژیانناما شەهید هوجام دكومێنت كەم ، نوكە ئەو دەمە شەهیدێن خوە دكیومێنت بكەین كو ئەوان خوینا خوە كریە قوربان ژبۆی ئاشتی و ئارامیێ و بۆ وێ چەندێ ب خوشی و ڤیان بژین شەهید ( هوجام سورچی ) ئەو بۆ هێمایێ ئەفسانەیی و شەهید بوو , دێ هەموو ژیانناما شەهید هوجام سورچی دكیومێنت كەم .
ئه‌ڤرۆ نیۆز، قائید میرۆ:
بسپۆره‌كێ قانوونی ره‌تكر بڕیارێن دادگه‌ها فیدڕال د قانوونی بن و دبێژیت، حه‌فت ساله په‌رله‌مانێ عێراقێ نه‌شیایه پڕۆژه قانوونا دادگه‌ها فیدڕال ئێكلا بكه‌ت.
دكتۆر عه‌بدولڕه‌حمان زێباری بۆ ئه‌ڤرۆ نیۆز دیاركر” ئه‌ڤه حه‌فت ساله پڕۆژه قانوونا دادگه‌ها فیدڕال نه‌هاتیه په‌سه‌ندكرن ل عێراقێ و سه‌رۆكێ دادگه‌ها فیدڕال یێ خه‌مساره، چونكه دادوه‌ره‌كێ خانه‌نشین یێ كریه ئه‌ندامێ دادگه‌ها فیدڕال و بڕیارێن دادگه‌هێ قانوونی نینه.
زێباری گۆتژی” هه‌تا سه‌رده‌مێ ئوسامه نوجێفی ده‌مێ سه‌رۆكێ په‌رله‌مانێ عێراقێ مه پێشنیارێن خوه داینه په‌رله‌مانی و مخابن پشتی چه‌ندین سالان هێشتا نه‌هاتیه په‌سه‌ندكرن.
دكتۆر عه‌بدولڕه‌حمان زێباری ئاماژه‌كر” دادوه‌ره‌كێ نوو پێشنیار بكه‌ن بۆڤێ چه‌ندێ ببیته ئه‌ندامێ دادگه‌ها بلندا عێراقێ.
نيشاندان