ئه‌ڤرۆ نيوز:
ليزا فه‌له‌كه‌دين كاكه‌يى، ئه‌نداما لژنا دارايى ل په‌رله‌مانێ كوردستانێ بۆ كوردستان 24 راگه‌هاند كو ل سالێن بۆرى حوكمه‌ت د پێناڤى ڤه‌ژاندنێ، حوكمه‌تا هه‌رێمێ بره‌كا پاره‌ى دايه هنده‌ك كۆمپانيا و وه‌به‌رهێنه‌ران، به‌لێ پشتى چه‌ندين سالان هه‌تا نها پاره بۆ حوكمه‌تێ نه‌ڤه‌گه‌رانديه.
ئاشكه‌را ژى كر كو ئه‌و كۆژمێ پاره‌ى نێزيكى 700 مليار دينارايه و پتريا وان ل لايێ شاسوار عه‌بدولواحده كو 42 مليار ديناره، دڤێت وى پاره‌ى بۆ حوكمه‌تێ ب ڤه‌گه‌رينيت.
نه‌ڤه‌شارت ژى كو شاسوار نها سه‌رۆكێ خزبه‌كێ يه و به‌حس ل گه‌نده‌لى و چاكسازيێ دكه‌ت، “ل ده‌ستپێكێ پێدڤيه ئه‌و ب خوه قه‌رزێ حوكمه‌تێ بده‌ت، دا كو حوكمه‌ت بشێت ب وێ چه‌ندێ كێماسيه‌كێ ب وى پاره‌ى پڕ بكه‌ت”.
ئەڤرۆ نیوز، زنار تۆڤی:
د. هه‌ڤین که‌مال شاهـ محەمەد بسپۆر د زانستێ ئازار و به‌نجێ دا، بۆ ئەڤرۆ نیوز دیار کر: دەمێ زەبلەکێن ملی رەق دبن، دڤێت مرۆڤ چارەسەر کەت و ب ڤی رەنگی زەبلەک دهێنە چارەسەر کرن، ئەو ژی ب رێیا وه‌رزشکرنێ و هندەک وه‌رزشێن تایبه‌ت هه‌نه بۆ خافکرن و نه‌رمکرنا زەبلەکان ژ وان ژی:
ده‌ستێ راستێ دانە سه‌ر ناڤچاڤێن خوە، ب هێمنی سه‌رێ خوە رابکێشه بۆ لایێ راستێ یێ سینگێ خۆ، پاشی دووباره بکه، بۆ لایێ چه‌پێ، سێ جاران ڤێ وه‌رزشێ ئه‌نجام بده.
ژ پێرڤە راوەستە و ده‌ستێ راستێ ژ پشتێ ڤە ب ده‌ستێ چه‌پێ بگره و مل و ده‌ستێ راستێ یێ خوە رابکێشه بۆ خوارێ، پاشی بەرۆڤاژی ئه‌نجام بده، سێ جاران ڤێ وه‌رزشێ دووباره بکه.
ب کارئینانا جەمەدێ: ئه‌و ژی ب رێیا جەمەدێ یان ژی به‌فرێ بکە دناڤا خاولیه‌کێ دا و دانە سەر وی جهێ د ئێشیت و ب کارئینانا ئاڤا گەرم و تهێن شیر.
مه‌ساج کرن ب هشکی بیت، یان ژی ب کارئینانا زه‌یتا تایبه‌ت بیت، وه‌کو زه‌یتا نه‌عنایێ یان ده‌رمانێن تایبه‌ت یێن ئازارشکاندنێ، کو ئه‌ڤە ژی دڤێت ب شێوه‌کێ ل سه‌رخۆ وهێدی و بازنه‌ی بیت بۆ وان زەبلەکێن د ئێشن، نه‌خۆش بخۆ یان کەسەکێ دیتر دشێت مه‌ساجێ بکەت.
ب کارئینانا ده‌رمانێن ئازارشکێن: کو ئەڤە ژی نابیت ب رێژه‌کا زۆر ب کاربهێت، ب تنێ ل دەمێ پێدڤی دا و بۆ ماوه‌کێ کێم، وه‌ک ئه‌سپرین، پاڕاسیتۆل، پڕۆڤین، ناپڕۆکسین.
یۆگا: کاریگه‌ریه‌کا زۆر باش هه‌یه ل سه‌ر خافکرنا زەبلەکان.
ده‌رزیا چینی، پێدڤیە ژ ئالیێ نۆشدارێن تایبەت ڤە بهێنە دانان.
کێم کرنا فشارا جه‌سته‌یی و ده‌روونی، ب رێیا بهێنڤەدانێ بۆ ماوه‌کێ کێم ل دەمێ کار کرنێ دا.
ئه‌ڤرۆ نیوز ، زنار تۆڤی:
ئەڤرۆ سێشەمبی 10/12/2019 پێله‌كا سه‌رمایێ ده‌ڤه‌را به‌رواری بالا ڤه‌گرت و د ئه‌نجامدا رێژه‌كا باش یا به‌فرێ ل چیایێن ڤێ ده‌ڤه‌رێ و دەرگەهێ سەرزێری و هندەک گوندان باریە.
رێبه‌ر ئیبراهیم وه‌لاتیه‌كێ ناحیا كانی ماسێ یه بۆ ئه‌ڤرۆ نیوز دبێژیت: ل سپێدەهیا ئەڤرۆ ل سەنتەرێ ناحیا کانی ماسێ شلۆڤە و باران دبارین ل ل دەروازێ نێڤدەولەتی یێ سەرزێری ژی نێزیکی پێنج سەنتیمێن بەفرێ بارینە، ل چیایێن دەور و بەران بەفر یا دباریت.
ئەڤرۆ نیوز ، زنار تۆڤی:
پێگەهێ بولد سكای یێ هندی بەلاڤکریە، کو مۆز پێكهاتیە ژ رێژەکا زۆر یا ڤیتامین و كانزا و پرۆتین و دژی ئۆكسید و ژێدەرەکێ زۆر باشە بۆ كاربوهیدراتی و ساخلەمیێ و دێ بیتە خوارنەکا سڤك و خۆش و پر ژ وزێ.
هەروەسا وی پێگەهی بەلاڤکریە، ئەو ریشالێن دناڤ مۆزێ دا هەین رێژا شەكرێ دناڤ خوینێ دا كێم دكەت و دێ بیتە چارەسەر بۆ نەخۆشیا شەكرێ ژ جۆرێ دویێ.
هەروەسا هاریکاریا چارەسەریێ بۆ نەخۆشیێن كۆئەندامێ هێرانێ دکەت و كۆنترۆلا كێشێ دکەت و چارەسەریا لاوازیا گولچیسکا و جگەرێ دکەت و رێگریێ ل نەخۆشیێن دلی و خوینبەران و چەند نەخۆشیێن دیتر یێن درێژخایەن دکەت.
هەروەسا خوارنا مۆزێ بۆ نەخۆشیا شەكرێ یا ب مفایە، هەکە ئەو رێژە بهێتە خوارن یا کو هاتیە دەست نیشانكرن، چونكی ریشالێن خوارنێ تێدا هەنە و هەلمژینا كاربوهیدراتی ژ ئالیێ جەستەی ڤە خاڤ دکەت، كو دبیتە ئەگەرێ خافكرنا پرۆسا هێرانێ، ئەڤە دێ بیتە رێگرتن ژ بلندبوونا وێ رێژا کلوكوزی د خوینێ دا و دێ كۆنترۆلا شەكرێ کەت.
ئه‌ڤرۆ نيوز، نيوار محه‌مه‌د سه‌ليم:
ئه‌ڤر رۆژا سێشه‌مبى روونشتنا ژماره 9 يا ئاسايى يا په‌رله‌مانێ كوردستانێ دێ هێته كرن و دو پرۆژێن قانوونان و پرسا كاره‌با نشتيمانى و به‌لاڤكرنا گازێ ل سه‌ر وه‌لاتيان دێ هێته گه‌نگه‌شه كرن.
پێشتر سه‌رۆكاتيا په‌رله‌مانى راگه‌هاندبوو كو د روونشتنا ئه‌ڤرۆ دا دێ خواندنا دويێ بۆ پێشنيازا قانوونا (ريكلاما بازرگانى ل هه‌رێما كوردستانێ – عيراق) هێته كرن و خواندنا ئێكێ ژى بۆ پێشنيازا بڕيارا (رۆژێن هه‌لكه‌فتێن نه‌ته‌وا توركمان) هێته كرن.
دوهى سه‌رۆكاتيا په‌رله‌مانى د به‌ياننامه‌كێ دا، ئه‌ندامێن په‌رله‌مانێ كوردستانێ ئاگه‌هداركرن كو خاله‌كا دى بۆ به‌رنامێ كارێ روونشتنا ئه‌ڤرۆ رۆژا سێشه‌مبى 10ى كانوونا ئێكێ 2019 زێده كريه كو ئه‌و ژى به‌حسكرنه ل سه‌ر گه‌نگه‌شه‌كرنا پرسا كێشا كاره‌با نشتيمانى و به‌لاڤكرنا سۆته‌مه‌نيێ ل ڤى وه‌رزێ سه‌رمايێ ب سه‌ر وه‌لاتيان دا.
ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا چارشه‌مبى دهێته پێشبينيكرن ئه‌سمان ئه‌ورێ ته‌مام بيت ل سپێدێ زوو دێ بارانه‌كا كێم باريت و ل دانێ نيڤرۆ دێ ئه‌سمان به‌ر ب ساهياتيێ ڤه چيت.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك ب ده‌ست ئه‌ڤرۆ نيوز كه‌فتيه راگه‌هاند كو سوبه‌هى رۆژا چارشه‌مبى رێكه‌فتى 11ى كانوونا ئێكێ 2019 دهێته پێشبينيكرن ئه‌سمان ئه‌ورێ ته‌مام بيت ل سپێدێ زوو دێ بارانه‌كا كێم باريت و ل دانێ نيڤرۆ دێ ئه‌سمان به‌ر ب ساهياتيێ ڤه چيت.
پشكا پێشبينيان ئاشكه‌را ژى كر كو له‌زاتيا بايى دێ ب ره‌نگێ ل سه‌رخوه و ناڤه‌ندى بيت ناڤبه‌را 5 بۆ 15كم بيت و مه‌ودايێ ديتنێ ژى دێ 9 بۆ 10كم بيت. نزمترين پلا گه‌رماتيێ دێ 7 پله بيت و بلندترين پله ژى دێ 10 بيت.
ئه‌ڤرۆ نيوز:
برياره سوباهى سێشه‌مبى ل به‌غدا خوه‌نيشادانه‌كا مليۆنى بهێته ئه‌نجامدان و فه‌رماندێ گشتيێ هێزێن چه‌كدار ل عيراقێ ژى بريارێ دده‌ت كو نابيت حه‌شدا شه‌عبى ده‌ستێوه‌ردانێ د كاروبارێن ئه‌منى دا بكه‌ت، سه‌ركرده‌كێ حه‌شدا شه‌عبى ژى خوه‌نيشادانا سوباهى ب تێكده‌ر د هه‌ژمێريت.
عه‌بدولكه‌ريم خه‌له‌ف، په‌يڤدارێ فه‌رماندێ گشتيێ هێزێن چه‌كگدارێن عيراقێ دووپات دكه‌ت كو سه‌رۆك وه‌زيرێن عيراقێ فه‌رمان دايه كو نابيت حه‌شدا شه‌عبى ده‌ستێوه‌ردانێ د كاروبارێ ئه‌منى دا بكه‌ت.
هه‌ر ل دۆر خوه‌نيشادانا سوباهى، قه‌يس خه‌زعه‌لى، سه‌رۆكێ گرۆپا عه‌سائيب ئه‌هلولحه‌ق يا سه‌ر ب حه‌شدا شه‌عبى ڤه راگه‌هاند” ئه‌وا دێ سوباهى هێته كرن، كاره‌كێ تێكده‌رانه‌يه”.
هه‌ڤده‌م ل هنده‌ك پارێزگه‌هێن عيراقێ بارێ نه‌ئاسايى هاته راگه‌هاندن و باليۆزخانا ئه‌مريكى ل عيراقێ ژى هوشدارى ل دۆر خوه‌نيشادانێن سوباهى ل باژێرێ به‌غدا دده‌ت.
ئه‌ڤرۆ نيوز:
ئه‌ڤرو ب شه‌ڤ 9/ 12/2019 رێبه‌ر احمد وه‌زیرێ نافخو یێ حكومه‌تا هه‌رێما كوردستانێ وشاندێ وه‌زاره‌تێ سه‌را پارێزگه‌ها دهوكێ دا ول كوچكا مێهڤانداریا ژلایێ فه‌رهاد ئه‌مین ئه‌تروشى پارێزگه‌رێ دهوكێ وجێگرێن پارێزگه‌رى وقایمقامێن قه‌زایێن پارێزگه‌هێ ورێڤه‌به‌رێن دام وده‌زگه‌هێن په‌یوه‌ندیدار پێشوازى لێ هاته كرن .
دهه‌ڤدیتنه‌كێدا به‌حسێ ره‌وشا خه‌لكێ پارێزگه‌هێ وره‌وشا دام وده‌زگه‌هێن خزمه‌تكارى یێن سه‌ر ب وه‌زاره‌تا نافخویى وئه‌و خزمه‌تا پێشكێشى خه‌لكێ ده‌ڤه‌رێ دكه‌ن هاته كرن.
پارێزگه‌رێ دهوكێ خوشحالیا خو ب سه‌ره‌دانا وه‌زیرێ نافخو وشاندێ دگه‌لدا دیاركر وخواست كو ئه‌ڤ سه‌ره‌دانه ببیته هوكاره‌ك بونه‌هێلانا ئاریشێن رێڤه‌به‌ریێن په‌یوه‌ندیدار وپێش ئێخستنا كارێ وان رێڤه‌به‌ریا وپشته‌ڤانیا پارێزگه‌هێ نیشان دا بو هه‌ر هاریكاریه‌كێ .
پاش به‌رێز وه‌زیرێ نافخو ب ئاماده‌بونا پارێزگه‌رێ دهوكێ كومبونه‌ك دگه‌ل قایمقامێن سنورێ پارێزگه‌هێ ورێڤه‌به‌رێن فه‌رمانگه‌هێن سه‌رب وه‌زاره‌تێ ورێڤه‌به‌رێن ناحیا ئه‌نجامدا وب تێر وته‌سه‌لى به‌حسێ به‌رنامێن كابینا نوو یا حكومه‌تا كوردستانێ كر بو وێ یه‌كێ كو باشتر خزمه‌تا وه‌لاتیێن پارێزگه‌هێ بهێته كرن وروتین دكارێ روژانه‌دا بهێته كێمكرن وكێم وكاسى وپێدڤیێن هه‌ر رێڤه‌به‌ریه‌كێ بهێنه زانین ویا دشیان دا بهێنه چاره‌سه‌ركرن.
ل دور ئارمانجێن سه‌ره‌دانێ وه‌زیرێ نافخو گوت:ئه‌م هاتینه دا ژنێزیك دگه‌ل جه‌نابێ پارێزگه‌رى وبه‌رپرسێن ئیدارى وپولیسان كومببین وژنێزیك سه‌حكه‌ینه كار وخزمه‌تا ئه‌و پێشكێش دكه‌ن ، هه‌روه‌سا په‌یاما كابینا نوو یا حكومه‌تێ بگه‌هینه هه‌ڤالا وگه‌نگه‌شێ ل سه‌ر كار وخزمه‌تكاریا بكه‌ین وكا چ پێدڤى یه ئه‌م وه‌كو حكومه‌ت و وه‌زاره‌ت بكه‌ین كو كار وخزمه‌تا روژانه یا وه‌لاتییان باشتر لێ بكه‌ین .
هه‌روه‌سا گوت: سوبه دێ سه‌ره‌دانا هنده‌ك رێڤه‌به‌ریێن دن كه‌ین ودگه‌ل كومبین هه‌روه‌سا دێ سه‌را زاخو ژى ده‌ین ئو ل وێرێ دێ فه‌رمانگه‌ها نوو یا پاسه‌پورتا ڤه‌كه‌ین .
سه‌باره‌ت به‌رنامێ حكومه‌تا نوو یا هه‌رێما كوردستانێ گوت:كابینا نوو په‌یامه‌كا رون وئاشكرا هه‌یه وهه‌رده‌م جه‌نابێ سه‌روكێ حكومه‌تێ ته‌كه‌زیێ دكه‌ت كو ئه‌م خو ب خزمه‌تكارێ ملله‌تى دزانین وئه‌م ئاماده‌ینه وێ په‌یامێ بكه‌ینه كریار وپتر خزمه‌تا وه‌لاتییان بكه‌ین ویا فه‌ر ئه‌وه دام وده‌زگه‌هێن مه یێن حكومه‌تێ ب شێوه‌كێ رێك وپێكتر وب رێزگرتن ماملێن وه‌لاتییان جێ به‌جێبكه‌ن وچ گێروكرن وروتین نه‌هێلنه دكارى دا وب خوشحالیڤه گه‌له‌ك رێڤه‌به‌ریێن مه ل سنورێ پارێزگه‌ها دهوكێ ب له‌زاتییه‌كا به‌رچاڤ ماملێن وه‌لاتییان چێدكه‌ن بو نمونه نوكه فه‌رمانگه‌ها پاسه‌پورتا ل دهوكێ دشێت دماوێ 72ده‌م ژمێرا دا پاسه‌پورتێ بو هاولاتى به‌رده‌ستكه‌ت وڤه‌كرنا نڤێسینگه‌ها ده‌رئێخستنا پاسه‌پورتا ل زاخو ژى دێ بیته هاریكاره‌ك بو زوتر ده‌رئیخستنا پاسه‌پورتا وخه‌لكێ زاخو پێدڤى ناكه‌ت بهێته دهوكێ ودێ هه‌ولده‌ین خزمه‌تكاریێن هاتن وچونێ ژى ل قه‌زا زاخو دابینكه‌ین هه‌روه‌سا فه‌رمانگه‌ها پاسه‌پورتا ل قه‌زا ئاكرێ ژى ڤه‌كین وهه‌ر خزمه‌تكاریه‌كا پێدڤى بیت دێ بو خه‌لكێ پارێزگه‌هێ دابینكه‌ین.
نيشاندان