ئه‌ڤرۆ نيوز، نيوار محه‌مه‌د سه‌ليم:
ژێده‌ره‌كێ ئاگه‌هدار ئه‌ڤرۆ رۆژا ئێكشه‌مبى راگه‌هاند كو پارێزگاره‌كێ نوو بۆ نه‌ينه‌وا هاته هه‌لبژارتن.
ئه‌وى ژێده‌رى بۆ ئه‌ڤرۆ نيوز ئاشكه‌را كر كو جڤاتا پارێزگه‌ها نه‌ينه‌وا كۆمبوونا خوه ئه‌ڤرۆ رۆژا ئێكشه‌مبى ئه‌نجام دا و تێدا نه‌جم جبۆرى وه‌كو پارێزگارێ نه‌ينه‌وا ب 23 ده‌نگێن ئه‌ندامێن جڤاتێ هاته هه‌لبژارتن.
پێشتر نه‌جم جبۆرى فه‌رماندێ ئۆپه‌راسيۆنێن نه‌ينه‌وا بوو.
ئەڤرۆ نیوز، عەلی حاجی :
د داخویانیەکێ دا رێڤەبەرێ ناحیا دەرکارێ بۆ ئەڤرۆ نیوز دیار کر ئەڤرۆ ل روژا ئێک شەمبێ ٢٤/١١/٢٠١٩ دەست ب هەوا بەلاڤکرنا گازا سپی ل سنورێ ناحیا مە هاتە کرن و دێ هەمی هاولاتیێن ناحیێ بەهرا خوە یا گازا سپی وەرگرن.
زێدەتر زێرەڤان موسا گوت : ئەڤرۆ ل روژا ئێک شەمبێ رێکەڤتی ٢٤/١١/٢٠١٩ ل دوف پلانا ئەنجومەنێ وەزیران دەست ب هەوا بەلاڤ کرنا گازا سپی ل سنورێ ناحیا دەرکارێ هاتە کرن و ئەڤرۆ ئێکەم روژا دەست پێکرنا وێ هەوێ هەبوو و بۆ ڤێ چەندێ ٣٦٧٤ پلێتێن گازا سپی ل سەر هاولاتیێن ناحیێ هاتینە بەلاڤ کرن و هەر هاولاتیەکێ ل دووف پشکا خوە یا گازێ پلێتەک وەرگرتی یە و ل دووف وێ پشکا دگەهیتە دەستێ مە ئێکسەر دهێتە بەلاڤ کرن و هەکە رەوش ب ڤی رەنگی بیت دبیت دماوەیێ حەفتیەکێ دا هەتا ١٠ روژان ئەڤ هەوە ب دوماهی بهێت و هەمی هاولاتی بەهرا خوە یا گازا سپی یا ئەڤ سالە وەربگرن .
ناڤهاتی گوت ژی : پشکەکا هاولاتیان ل سەنتەرێ زاخۆ خوە جهـ بوینە بەلێ پشکا ئازوقەیێ خوە ل ناحیا دەرکارێ دوەرگرن وان ژی ماف هەیە پەیوەندیێ ب مە بکەن و ل سەر ناحیا مە پشکا خوە یا گازا سپی وەربگرن و ئەو هاولاتیێن ل ناحیێ خوە جهـ و ئازوقەیێ ل زاخۆ وەردگریت ئەو دێ دگەل هەوا دەست پێکرنا گازا سپی ل زاخۆ پشکا خوە وەرگریت .
ئه‌ڤرۆ نيوز:
كچه‌كا 20 سالی دلێ خوه بو ئه‌ڤرۆ ڤه‌دكه‌ت و دبێژیت: د ژیێ 15 سالیێ دا من و كوره‌كی حه‌ز ژ ئێكدو دكر بو ماوێ سێ سالا په‌یوه‌ندیا مه یا ئه‌ڤینداریێ یا به‌رده‌وام بو، خێزانا من و هه‌ڤالێن من هه‌موویان دزانی كو ئه‌م حه‌ز ژ ئێكدو دكه‌ین، پشتی هینگێ وی غه‌دره ل من كر و ئه‌ز هێلام.
ئه‌ز گه‌له‌ك نه‌خوش بووم هه‌تا نها ژی من ژبیر نه‌كریه و گوهداریا سترانێن ئه‌ڤینیێ و خه‌مگین دكه‌م و به‌ر را دكه‌مه گری و عاجز دبم، ژبه‌ركو وه‌سا هزر دكه‌م ئه‌و خه‌له‌تی بو من كری و خوه تاوانبار دكه‌م كو من حه‌ز ژێ كری گه‌له‌ك جارا هزرا خوه كوشتنێ خوه ل سه‌رێ من دده‌ت ئه‌ز هه‌رده‌م یا توره‌مه ل گه‌ل كه‌سێن ده‌وروبه‌رێن خوه.
ئه‌ڤه دو ساله ئه‌ز هێلایم لێ هه‌ر دكه‌مه گری بو وی من دڤێت ژبیر كه‌م لێ نزا چاوا دێ ژبیر كه‌م، گه‌له‌ك گه‌نجا داخوازا ئه‌ڤینیێ و هه‌ڤژینیێ ژ من كریه لێ ئه‌ز ترانا پێ دكه‌م و هزر دكه‌م دره‌وا دكه‌ن ئه‌ز وه‌سا هزر دكه‌م هه‌موو كور غائین و دره‌وینن و من دڤێت ئه‌ز تولێن خوه ژ كوڕا ڤه‌كه‌م، ئه‌رێ ما ئه‌ڤه خه‌له‌تیه ئه‌ز دكه‌م من دڤێت ترانا ب كوركا بكه‌م كا چاوا ئه‌و ترانا ب كچكا دكه‌ن، ژلایه‌كێ دیڤه نوكه ئاریشا من ئه‌وه ئه‌ز نزانم چاوا كه‌سه‌كێ هه‌لبژێرم كو یێ باش بیت و حه‌ز ژ من بكه‌ت و ژیانا من خوش كه‌ت ؟
كچا هێژا:
ده‌مێ ته ئه‌ڤینی كری تو گه‌له‌كا بچوك بووی، بزانه حه‌زژێكرنا د ڤی ژی دا حه‌زژێكرن نینه و د ڤی ژی دا ته گه‌له‌ك تشتێن دی هه‌نه بكه‌ی، ژبه‌ركو هێشتا تو یا د ژیه‌كێ بچووك دا و تو نه‌گه‌هشتیه ژیێ گه‌نجاتیێ، ئه‌ڤه ژیێ زارۆینیێ یه و دڤێت تو خوشیێ ب ژیانا خوه ببه‌ی و كه‌یفێ بكه‌ی، چونكی ژیێ ته یێ زارۆیانه نه‌ك یێ مه‌زنایه كو تو ئه‌ڤینیێ بكه‌ی و خه‌مان ل سه‌ر بخوی و گوهداریا سترانێن خه‌مگین بكه‌ی، ئه‌ڤه دو ساله ئه‌ڤیندارێ ته تو هێلای و ته خوه ئێخستیه د ڤێ خه‌مێ دائه‌ڤه كاره‌ساته.
ئه‌ڤ ئاخفتنێن تو دبێژی كو هه‌موو كورك خاین و دره‌وینن ئه‌ڤه چیروكێن ته نینن و یێن د ژیێ ته دا نینن، تو یا غه‌درێ ل خو و ژیێ خوه و ل ده‌مێ خوه دكه‌ی و ئه‌ڤ ده‌مێ زێرین ب هه‌روه دبورینی كو گرنگه د ڤی ژیی دا بو خوه دنیایێ ببینی و فێری زانستی ببی و ته‌ركیزێ ل سه‌ر خواندنا خوه بكه‌ی و خلاس كه‌ی، په‌رتوكا بخوینه و خوه ب تشتێ مفادار ڤه مژوول كه، ده‌مێ تو تێگه‌هشتی و پێگه‌هشتی هینگێ دێ زانی كه‌سه‌كێ چاوا هه‌لبژێری، حه‌ز ژ خوه بكه و ل هیڤیێ نه‌به كه‌س بهێت ته به‌خته‌وه‌ر بكه‌ت تو خوه به‌خته‌وه‌ر بكه.
نابیت هه‌موو ته‌ركیزا ته ل سه‌ر ڤان تشتا بیت ده‌ستا ژ ڤان خه‌له‌تیا به‌رده و كه‌سێ نه‌كه قوربانی ترانێن خوه نه‌هێله فێری ڤی كارێ نه‌ره‌وا ببی، ژبه‌ركو ئه‌وان چ گونه‌ها خوه نینه و نابیت تو زمانێ گشتاندنێ بكار بینی و بێژی هه‌موو كور د خاین و دروینن.
به‌رسڤدان: ده‌روونناس ئاواز
ئه‌ڤرۆ نيوز:
گه‌له‌ك كه‌سێن فه‌رمانبه‌ر حه‌ز دكه‌ن ده‌مێ دچنه سه‌ر كارێ خوه هه‌ول بده‌ن رۆژه‌كا خوش و تژی سه‌ركه‌فتن بورین نبو ئه‌ڤێ چه‌ندێ ژی تو پێدڤی هنده‌ك رێكانی هه‌تا بشێی ئه‌ڤێ ب ده‌ست خوه‌ڤه بینی.
گرنگه ده‌ستپێكا ته ب رۆژه‌كا نوی یا ب گرنژین و هزر دئه‌رێنی و رۆژه‌كا گه‌ش و خوش دا بكه‌ی، هه‌ر وه‌سا ئارامی دكاری دا گه‌له‌ك یا گرنگه پێدڤی یه ژی مرۆڤ خودان پاشه‌رۆژه‌كا دارێشتی بیت نه‌ك ب كوره‌یی بده‌ته رێ، ئانكو ده‌ست پێكێ پێگیری ب رێنمایێن كاری هه‌بیت، به‌رانبه‌ر هه‌می فه‌رمانبه‌ران ته گه‌شبینیه‌كا مه‌زن هه‌بیت و تو جهێ بێ گێولی و بێ زه‌وقیا كاری و هه‌ڤالا نه‌بی، ره‌فتاركرن د تشتێ نوودا هه‌بیت، ره‌فتاركرن ب شێوازه‌كێ جوان و نه‌رم و رێك و پێك بیت و رێز و بها بو هه‌ڤالا بلا ئێك ژ سالوخێن ته یێن سه‌ره‌كی بن، به‌رده‌وام هه‌ول بده به‌رپرس و رێڤه‌به‌رێ ته چ ل سه‌ر ته دبێژیت ئه‌و كێماسیێن هه‌ین پربكه‌ت به‌لێ بلا ب نه‌رێنی كارتێكرنێ ل ته نه‌كه‌ن، باشتره ته سلاف دگه‌ل هه‌میا هه‌بیت و رویێ خوه ل كه‌سێ نه‌كه ره‌شه،گه‌له‌ك هزرێ، خوه به‌ری باخڤی و هه‌تا ل ده‌مێ به‌شداری كومبونا بی مرۆڤه‌كێ بێ شیا نخوه نه‌ده‌ته نیاسین و بلا ده‌نگێ ته ژ هه‌میا جیاواز تربیت،چوجار كاری بتنێ نه‌كه بلكو بو هه‌ر پرۆژه‌كێ هزران وه‌رگره و رۆلی بده هه‌ڤالا، به‌رده‌وام بزانه چه‌وا سه‌نگا ته هه‌یه، سكالا ل سه‌ر كه‌سێ بلند نه‌كه و به‌حسا چ ره‌فتارێن هه‌ڤالا نه‌كه ئه‌ڤه ئه‌و خالێن سه‌ره‌كی نه یێن كو تو پتر به‌ره‌ڤ سه‌ركه‌فتنێ ڤه بچی.
ئه‌ڤرۆ نيوز:
ل ڤی دوماهیێ ژن پتری زه‌لامان گازندێ ژ ساخله‌میا خوه دكه‌ن و ژبه‌ر هندێ ئه‌و حه‌ز ژ خارنا ده‌رمانێن دختورا ژی ناكه‌ن چونكی دبێژن رۆژه‌ك و دوو نینن، به‌لێ خارنا گیزێ دبیته هوكاره‌كێ باش یێ به‌رگریێ ژ له‌شی دكه‌ت بو گه‌له‌ك نه‌ساخیا و ئه‌و كیماسیێن دكه‌ڤنه دره‌وشا ژنێ دا بو نمونه ده‌مێ پرچا وێ یا كێم بیت و لاوازیا له‌شی هه‌بیت، هه‌تا بو په‌نشیرێ ژی گله‌ك یا باشه و مرۆڤی ژێ دپارێزیت چونكی مه‌عنه‌ویاتێن ژنێ ب هێز دئێخیت و به‌ره‌ڤ ئه‌رێنی ڤه دبه‌ت، به‌لكو گیز بو ڤیتامینی گه‌له‌ك یا زه‌نگینه و تاییه‌ت ڤیتامین B،هه‌ر وه‌سا مفایه‌كێ مه‌زن بو دلی دكه‌ت و ده‌مێ كولسترۆل یێ زێده بیت ئه‌و ناهَلیت كارتێكرنێ ل دلی بكه‌ت، به‌لكو تشتێ گه‌له‌ك مفایی ژی دكه‌ت ئه‌و ژی مفایه‌كێ مه‌زنه بو هه‌ڤژینا ژلایێ سكسی ڤه ئه‌وان ب هێز دئێخیت و حه‌زا وان پتر لێ دكه‌ت.
ئه‌ڤرۆ نيوز:
ل به‌رێ چ خوارنێن قودیككری و پیتزا و صاص و كه‌تشه‌پ، فۆل بیبه‌ر و بوره‌ك و گوشتێ قیمه‌كری … و هتد نه‌بوون، باب و باپیرێن مه ژیانا خوه نورمال و ساخله‌متر ژ مه دبره سه‌ری، هه‌كه ئه‌م به‌راوه‌ردیه‌كێ دناڤبه‌را نفشێ نها و یێ به‌رێ دا بكه‌ین، راسته كو داتا و پێزانین ل به‌ر ده‌ستێ مه نینن، به‌لێ ژمارا كه‌سێن گیانێ خوه ژده‌ست ددان ژ نوكه پێهه‌لتربوون! ئه‌گه‌رێن وێ چه‌ندێ گه‌له‌كن و ڤه‌گه‌ریان بۆ خوارنا سڤك یا جاران دێ بیته ئه‌گه‌رێ چاره‌كرن و كونترولكرنا گه‌له‌ك ئاریشه‌یێن ساخله‌میێ ئه‌وێن ل ڤی سه‌رده‌می به‌لاڤه‌دبن.
ل چه‌ند سالێن دووماهیێ ڤه‌كولین دیاردكه‌ن كو ب هزاره‌ها جورێن خوارنێ ده‌رچووینه و هه‌ر جوره‌ك یێ پێكهاتیه ژ چه‌ندین كه‌رسته‌یێن زیانبه‌خش وه‌كو یێن كیمیاوی كو به‌ری نوكه مرۆڤی مرۆڤ فێری وان خوارنا نه‌بوون.
خوارنێن قودیككری د پێكهاتینه ژ تێكه‌له‌یه‌كێ شه‌كرێ و خوێ و روین بۆ خوشكرنا تام و بێهنا وان، ئه‌و هه‌رسێ كه‌رسته ژی دبنه ئه‌گه‌رێ قه‌له‌ویێ و ئیدمانێ ژی بۆ مرۆڤی په‌یدادكه‌ن و ئه‌و كه‌رسته دناڤ خوارنا باب و باپیرێن مه‌دا دكێمبوون یان هه‌ر نه‌بوون و كێمبوونا وان دبوو ئه‌گه‌ر كو كه‌سێن قه‌له‌و ژی دناڤ جڤاكی دا دكێمبوون و هه‌ڤسه‌نگیا له‌شی دهاته پاراستن و ژمارا نه‌خوشیان ژی یا كێمبوو.
ئه‌م ناڤێ گه‌له‌ك كه‌رسته‌یێن كیمیاوی ل سه‌ر هنده‌ك جورێن خوارنێ دبینین وه‌كو ( گلیسریدات بۆ نه‌هێلانا ژه‌نگارێ و ئه‌كزاناتان و بربیوناتێن كالسیومی و كپریتێن ئه‌مونیومی) و ب سه‌ده‌هان ناڤێن وه‌كی ڤان كو پتریا وان دهێه ب كارئینان داكو كه‌رسته پتر به‌رگریا خراببوونێ بكه‌ن، هه‌لبه‌ت چو جارا مه‌گوه لیً نه‌بوویه، مرۆڤان د به‌رێ دا ب كارئینابن و هه‌تا نوكه ژی زیانێن وان ل سه‌ر ساخله‌میێ د دیارنینن و پرسیار ئه‌ڤه‌یه: بۆچی كارگه‌هێن خوارنێ ل سه‌ر خوارنێ زێده دكه‌ن؟
كلوكوز و فركتوز و ..هتد، ئه‌ڤه ژ شه‌كرێن چر ژی خرابترن و هه‌بوونا وان دناڤ خوارنێ دا، رامانا وێ چه‌ندێ دده‌ت كو ئه‌و خوارن یا هاتیه چاره‌كرن ب رێیا گه‌رماتیێ، ئه‌و رێك ژی كونترولێ ل سه‌ر پتریا ڤیتامین و كانزایێن دناڤ خوارنێ دا دكه‌ت، له‌ورا خوه دوور بێخن ژ كه‌رسته‌یێن ب ڤی ره‌نگی و هه‌ر خوارنه‌كا كه‌رستێ شه‌كرێ ئێك ژ سێ كه‌رسته‌یێن ئێكێ بیت، وێ خوارنێ نه‌خوه، چونكو دیاره رێژا شه‌كرێ یا دناڤدا یا زوره له‌ورا ژ سێ كه‌رسته‌یێن سه‌ره‌كی هاتیه دانان، پێدڤیه بزانین كو دورێن 40 جورێن شه‌كرێ دناڤ خوارنێن قودیككری دا دهێنه ب كارئینان، وه‌كو مالتی جه‌ه و خوشاڤا شه‌كرێ و شه‌كرا دناڤ مه‌یێ دا و خوشاڤا شه‌كرا ره‌ش و دكسترین و سكروز و فركتو و خوشاڤا فێقی یا تووركری و گلوكوز و شه‌كرێن دهێنه گوهارتن و ..هتد، هنده‌ك جورێن شه‌كرێ ژی هه‌نه دبێژن بۆ خوه زه‌عیفكرنێ دباشن، به‌لێ ڤه‌كولینان دیاركریه ئه‌و مرۆڤی زه‌عیف ناكه‌ن، به‌لكو مێشكی پال دده‌ن كو هێشتا داخوازا شه‌كرێ بكه‌ت.
ئه‌ڤجا ژبۆ ژیانه‌كا ساخله‌م.. راسته نوكه ل جیهانێ چه‌ندین جورێن خوارنێ هه‌نه و ئه‌م دهێینه پالدان كو ب كاربینین، به‌لێ باب و باپیرێن مه ئه‌و خوارن نه‌دخوارن و نه‌دزانین چ جورێن خوارنێ نه و ساخله‌میا وان ب ره‌نگه‌كێ سروشتی ب رێڤه‌دچوو و كێمتر ل نه‌خوشخانه‌یان دهاتنه نڤاندن.
ئه‌ڤرۆ نيوز، نيوار محه‌مه‌د سه‌ليم:
ب گۆره‌ى پێزانينێن ل به‌ر ده‌ست، بڕياره ئه‌ڤرۆ مه‌سرور بارزانى، سه‌رۆك وه‌زيرێن هه‌رێما كوردستانێ و قوباد ته‌له‌بانى، جێگرێ سه‌رۆك وه‌زيران ل گه‌ل وى شاندێ حوكمه‌تێ يێ هه‌رێما كوردستانێ كۆم ببيت كو دوهى سه‌ره‌دانا به‌غدا كربوو و ل گه‌ل سه‌رۆك وه‌زيرێن عيراقێ و وه‌زيرێ په‌ترۆلێ كۆم ببوو.
بڕياره ژى پشتى كۆمبوونێ، شاند د كۆنفرانسه‌كێ رۆژنامه‌ڤانى دا، ئه‌نجامێن سه‌ره‌دانێ بۆ به‌غدا به‌رچاڤ بكه‌ن.
ئه‌ڤرۆ، سه‌باح زوهێر زێباری:
راگرێ كۆلیژا كارگێری و ئابووری یا زانكۆیا دهۆك دیاركر كو پێدڤیه هه‌رێما كوردستانێ هه‌می ده‌ما په‌یوه‌ندیێن خوه دگه‌ل عێراقێ خوش بكه‌ت، چونكی هه‌ردوو پێدڤی ئێكن، هه‌كه هه‌رێم و به‌غدا ل سه‌ر بودجا سالا نووی ژی رێكه‌فتن دێ گه‌له‌ك باش بیت و ره‌وشا هه‌رێما كوردستانێ ژی ژلایێ ئابووری ڤه باشتر بیت.
د.رێبه‌ر فه‌تاح راگرێ كۆلیژا كارگێری و ئابووری ل زانكۆیا دهۆك دیاركر سیاسه‌ت و ئابوور دپێكڤه گرێداینه،چونكی سیاسه‌ت سه‌ر بنه‌مایێ به‌رژه‌وه‌ندیا دهێته‌كرن و به‌رژه‌وه‌ندیێن ئابووری سیاسه‌تێ رێڤه‌دبه‌ن،ل وه‌لاتێن پاشكه‌فتی سیاسه‌ت ئابوورێ رێڤه‌دبه‌ت،لێ ل وه‌لاتێن پێش كه‌فتی ئابوور و به‌رژه‌وه‌ندیێن ئابووری سیاسه‌تێ رێڤه‌دبه‌ن،له‌وما وه‌كو دبینین هه‌روه‌لاته‌كێ سیاسه‌ت ئابوورێ رێڤه‌به‌ت و دویف به‌رژه‌وه‌ندیا خوه یا ساسی كاركربیت یا بوویه ئه‌گه‌ر كو كاودانێن خراب ب سه‌ردا بهێن و به‌روڤاژی هه‌روه‌لاتێ ئابوور سیاسه‌تێ رێڤه‌به‌ت گه‌شه‌یه‌كا ئابوریا باش بخۆڤه دیتی یه.
مامۆستایێ زانكۆیا دهۆك زێده‌تر خویاكر كو ل عێراقێ دا ل ده‌مێ حوكمه‌تا ئه‌یاد علاوی ل سالا 2004 عێراقێ پاره‌كێ خه‌یالی ده‌ستاندا هه‌بوو و به‌ری خه‌لكی هه‌میا دا مووچه خوریێ،مووچێن مه‌زن دانان و هه‌ر ئالیه‌كێ سیاسی ئه‌ڤ چه‌نده لایێ خودا راكێشا، له‌وما نوكه ئه‌ڤ به‌ره‌لای و نه‌دادی یا زۆر یا هه‌ی، ئه‌م وه‌كو ئابووریناس ئه‌ڤێ چه‌ندێ ب خه‌له‌تیه‌كا مه‌زن یا ئابووری دبینین،ئه‌ڤ سیسته‌مه هه‌تا نوكه یێ به‌رده‌وامه و عێراق و كوردستان پێكڤه دڤی ده‌ردی دا دنالن و سیسته‌مێ ئابووری هاتیه تێكدان، به‌ر ڤێ چه‌ندێ ژی سیسته‌مێ سیاسی ژی ل عێراقێ هاتیه تێكدان،ئه‌ڤه بوو ئه‌ڤه‌ر گه‌نده‌لی د عێراقێ و كوردستانێ دا دروست بیت، ئه‌ڤه ژی هه‌می ژ ئه‌گه‌رێ نه‌بوونا سیسته‌مه‌كێ دروستێ ئابووری یه كو ره‌وش گه‌هاندیه ڤی ئاسته‌ی.
دكتور رێبه‌ر ئاماژه دا وێ ئێكێ كو ل سالا 2004 هه‌تا 2014ێ عێراق پشكه‌كا زۆر یا پاره‌ی ل كوردستانی خه‌رج دكر،چونكی ئێمناهیا هه‌رێما كوردستانێ یا گونجای بوو كو كار ب پاره‌یبهێته‌كرن و ژینگه‌ها وه‌به‌رهێنانێ یا گونجای بوو،له‌وما ئه‌و پارێ زێده هه‌می ل كوردستانێ دهاته خه‌رجكرن، به‌رهندێ ژی ئه‌و ره‌وشا باش یا كوردستانێ پشتی سالا 2004ێ هه‌تا 2014ێ ئێك ژئه‌گه‌رێن ئابووریه‌كا باش كو هه‌مو داهاتێ زێده یێ عێراقێ دهاته هه‌رێما كوردستانێ.
د به‌رده‌وامیا ئاخفتنێن خوه‌دا راگرێ كۆلێژا كارگێری و ئابووری ل زانكۆیا دهۆك گۆت كو ب دیتنا من جیوپولوتیكا هه‌رێما كوردستانێ یا به‌رهه‌ڤی نینه كو سه‌ربوخوویا خوه وه‌ربگریت،لێ جیوئابوورا هه‌رێما كوردستانێ گه‌له‌ك یا باره كو سه‌رخووبیت، بۆ هندێ كو مه روله‌كێ مه‌زن هه‌بیت د ده‌ڤه‌رێ دا،له‌وما فه‌ره ئه‌م ل سه‌رڤێ كاركه‌ین كا چاوا جهێ خۆ یێ ئابووری دروست كه‌ین و ستراتیژیه‌تا خوه وه‌رگرین بۆ وێ چه‌ندێ بگه‌هینیه ستراتیژیه‌تا سیاسی،له‌وما ژی هه‌ردوو حوكمه‌تێن بزاڤێن باش كارینه كو وه‌به‌رهێنانێ بكه‌ن و ره‌وشا خه‌لكی خوشتر لێ بكه‌ن،چونكی ئه‌ڤ چه‌نده پێنگاڤه‌كا باشه بۆ هندێ هێدی هێدی بگه‌هیه سه‌رخووبوونا ئابووری.
زێده‌تر گۆت: مه چه‌ند كه‌رتێن ئه‌كتیف ل هه‌رێما كوردستانێ هه‌نه ژ وان كه‌رتێ گه‌شت و گوزاری یه دڤێت ئه‌م ڤی كه‌رتی به‌رفره‌هتر بكه‌ین ده‌رگه‌هێ مه یێ ڤه‌كری بیت بۆ گه‌شتیارێن ده‌رڤه و وان بخۆ رابكێشین،هه‌روه‌سا كه‌رتێ چاندنێ ژی ئه‌كتیف كه‌ین و پشته‌ڤانیا جۆتیاری بكه‌ین بازاری پێش بێخین،هه‌روه‌سا كه‌رتی پیشه‌سازی و ئه‌ڤ هه‌ڤركیا ئیرانێ و عێراقێ ژی ئه‌م مفای لێ وه‌ربگرین، یا گرنگ دڤێت په‌یوه‌ندیێن مه هه‌می ده‌ما دگه‌ل عێراقێ دباش بن،چونكی هه‌رده‌ما په‌یوه‌ندیێن مه تێكچوون گه‌ل عێراقێ دێ ره‌وشا ئابووری گه‌هیته ئاسته‌كێ خراب.
ل دور بارودوخێ نها ژی دكتور رێبه‌ر فه‌تاح دبێژیت كوئه‌ڤا عادل عه‌بدلمه‌هدی بۆ كوردان دكه‌ت به‌رامبه‌ر وی یه یا كوردان بۆ وی كری درابوردووی دا، ب دیتنا من كا چاوا عێراق بۆ كوردستانێ یا گرنگه وه‌سا كوردستان ژی بۆ عێراقێ یا گرنگه، به‌رهندێ هه‌می ده‌ما عێراق نه دگه‌ل جودابوونا كوردستانێ یه،چونكی دێ هه‌ڤسه‌نگیا وێ ل ده‌ڤه‌رێ دا تیك چیت و سه‌نگا خوه نامینیت،هه‌كه پێكهاتنه‌ك بهێته‌كرن و ئه‌و ماوێ حوكمه‌تا عێراقێ بۆ خونیشانده‌را دانای و خونیشانده‌ر به‌ره‌ف ئێمناهیێ بچن و پیكهاتنه‌ك هه‌بیت دناڤ ئالیێن سیاسی دێ دبه‌رژه‌وه‌ندی هه‌میاندا بیت،ڤه‌گه‌راندنه بۆ ئابوره‌كا باشتر،ئه‌ڤه ژی ئێك ژ پیشبینیایه، لێ سیناریوویا دووێ هه‌كه ل عێراقێ و ئیرانێ فه‌وزا چێبوو و كارتێكرنا خوه ل سه‌ر بهایێ پترولێ كر وی ده‌می دێ گه‌له‌ك پێش بین و سیناریوویێن دی هێنه پێش كا كورد چ بكه‌ن د ڤێ ره‌وشێ دا.
ئه‌ڤرۆ نيوز، قائید میرۆ:
پشتی زێده‌كرنا خویكێ ل سه‌ر كۆمپانیان بهایێ كارتێن مۆبایلێ ل سه‌ر وه‌لاتیان هاته زێده‌كرن و په‌یڤدارێ وه‌زاره‌تا گه‌هاندنێ ژی ئاماژه‌كر، بفه‌رمی مه داخوازا ئه‌رزانكرنا بهایێ كارتێن مۆبایلێ كریه و دبێژیت، پێدڤیه په‌رله‌مانێ عێراقێ بڕیارێ ل سه‌ر راكرنا باجێ بده‌ت.
ئومێد محه‌مه‌د سالح، په‌یڤدارێ وه‌زاره‌تا ڤه‌گۆهاستن و گه‌هاندنێ بۆ رۆژناما ئه‌ڤرۆ گۆت” مه وه‌كی وه‌زاره‌تا گه‌هاندنێ ژ مێژه وه‌ره بزاڤێن خوه كرینه بۆ ئه‌رزانكرنا بهایێ كارتێن مۆبایلێ، دڤی چوارچوڤه‌یدا مه چه‌ندین جاران دانوستان دگه‌ل وه‌زاره‌تا گه‌هاندنا عێراقێ و ده‌سته‌یا گه‌هاندنێ كریه، به‌ری نوكه‌ژی مه ب نڤیساره‌كا فه‌رمی داخوازا كێمكرنا بهایێ كارتێن مۆبایلێ كریه، چونكه بهایێ كارتێن مۆبایلێ وی ده‌می زێده‌بو، كو عێراقێ رێژا 20%ێ خویكێ ل سه‌ر كۆمپانیێن گه‌هاندنێ زێده‌كری، به‌لێ مخابن زێده‌كرنا خویكێ وه‌لاتی دده‌ن نه‌ك كۆمپانیا، چونكه بهایێ كارتا هه‌مبه‌ر زێده‌كرنا خوكێ هاته زێده‌كرن.
وه‌لاتی به‌رۆژ ته‌ها لدۆر بهایێ كارتێن مۆبایلێ بۆ رۆژناما ئه‌ڤرۆ گۆت” بهایێ كارتێن مۆبایلێ ل هه‌رێما كوردستانێ زۆره و ل چ وه‌لاته‌كی هه‌بوویه كارتا پێنج هزاری ب شه‌ش هزار دیناران بیت، پێدڤیه چاره‌سه‌ریه‌ك بۆ بهێته‌دیتن، راسته هنده‌ك جاران ئوڤه‌ر هه‌نه بۆ پشكداران، به‌لێ لڤێ چه‌ندێ ژی بۆ هه‌موو كه‌سه‌كی نینه، پاره‌یه‌كێ زۆر هه‌یڤانه وه‌لاتی بۆ كارتێن مۆبایلێ د مه‌زێخن، داهاتێ تاكێ مه به‌هرا ڤان هه‌موو مه‌زاختی و پێدڤیێن رۆژانه یێن ژیانێ نینه، بدیتنامن بۆ ره‌وشا ئه‌ڤرۆ ئه‌م تێدا بهایێ وان یێ بلنده، كۆمپانی تنێ به‌رژه‌وه‌ندیێن خوه لبه‌ر چاف دگرن، چو كه‌سه‌ك نینه به‌رژه‌وه‌ندیا وه‌لاتیانژی به‌رچاف بگریت، راسته كه‌رتێ بازرگانیه و بۆ مفایێ خوه كاردكه‌ن، به‌لێ د هه‌مان ده‌مدا كه‌رته‌كێ گشتیه و رۆژانه وه‌لاتی یێ نه‌چاره بكار بینیت، كارتا مۆبایلێ تشته‌ك نینه مرۆڤ بێژیت دێ كێمتر بكار ئینم یان یێ زه‌رۆر نینه جارێ ناكڕم هه‌ما وه‌ك خوارنێ یه و مرۆڤ نه‌چار بكڕیت.
ئومێد محه‌مه‌د سالح دبێژیت” تنێ چاره‌سه‌ر ئه‌ڤه‌یه خویك ل سه‌ر كۆمپانیێن مۆبایلا بهێته راكرن ئه‌ڤا د شه‌ڕێ داعشدا هاتیه زێده‌كرن ژلایێ به‌غداڤه، بتایبه‌تی نوكه ده‌مێ ئێكلاكرنا پڕۆژه قانوونا بودجێ گشتیێ عێراقێ یه بدیتنامه پێدڤیه ئیدی بڕیار لسه‌ر راكرنا ئه‌ڤێ رێژا 20%ێ بهێته دان و بهایێ كارتا بهێته كێمكرن، یانژی كۆمپانیا بهێنه نه‌چاركرن ئه‌و بخوه باجێ بده‌ن نه‌ك پێخن سه‌ر وه‌لاتیان.
ئه‌ڤرۆ، رێوار محه‌مه‌د ره‌شید:
سه‌ندیكا پارێزه‌رێن كوردستانێ ناڤێ لیستێن پشكداربووی د هه‌لبژارتنێن سه‌ندیكایێ دا و ناڤێن به‌ربژاران بۆ وه‌رگرتنا پۆستێ نه‌قیبێ سه‌ندیكایێ ئاشكرا كرن.
ل رۆژا پێنجشه‌مبیا بۆری ب ئاماده‌بوونا نوونه‌رێن لیستێن هه‌لبژارتنێن پارێزه‌ران تیرۆپشك بۆ دانانا هژمارێن لیستێن هه‌لبژارتنێن سه‌ندیكا پارێزه‌رێن كوردستانێ هاته ئه‌نجامدان، دووڤ دا ناڤێن لیستێن پشكدار د هه‌لبژارتنان دا هاتنه ئاشكرا كرن كو پێكهاتینه ژ لیستا سه‌ربه‌خوه‌یی یا پارێزه‌ران، لیستا ئاینده یا پارێزه‌ران، لیستا پارێزه‌رێن راپه‌رین، لیستا برایه‌تی، لیستا پیشه‌یبوونا پارێزه‌ران.
د هه‌مان رۆژ دا ب رێیا لاپه‌رێ فه‌رمیێ سه‌ندیكا پارێزره‌رێن كوردستانێ د تۆرا جڤاكی یا فه‌یسبووكی دا ناڤێن وان پارێزه‌ران هاتنه به‌لاڤكرن یێن كو خوه به‌ربژاركرین بۆ پۆستێ نه‌قیبێ سه‌ندیكا پارێزه‌رێن كوردستانێ كو هژمارا وان 19 پارێزه‌رن.
هه‌ژی گۆتنێ یه كو ل رۆژا 28/11/2019 هه‌لبژارتنێن سه‌ندیكا پارێزه‌رێن كوردستانێ دێ هێنه ئه‌نجامدان و سێ رۆژان به‌ری ده‌مێ هاتیه دیاركرن دێ بانگه‌شا هه‌لبژارتنان ده‌ستپێكه‌ت.
نيشاندان