هه‌ولێر، قائید میرۆ:

سه‌ركرده‌یه‌كێ ئه‌نه‌كه‌سێ لهه‌رێما كوردستانێ ئاماژه‌كر، كو سه‌رۆك بارزانی رۆله‌كێ به‌رچاڤ هه‌بوویه‌ لپشته‌ڤانی كرنا كوردێن رۆژئاڤایێ كوردستانێ و دبێژیت، هه‌کە  سه‌رۆك بارزانی نه‌بایه‌ ئه‌ڤه‌ به‌ری چه‌ند سالان باژێڕێ كۆبانێ ژی دابكه‌ڤیته‌ ده‌ست چه‌كدارێن تیرۆرستێن داعش.

عه‌بدولكه‌ریم میرانی، نوێنه‌رێ ئه‌نجوومه‌نێ نیشتیمانیێ كورد ئه‌نه‌كه‌سێ ل هه‌رێما كوردستانێ بۆ رۆژناما ئه‌ڤرۆ دیاركر” هه‌موو ئه‌و رێكکه‌فتنێن لدۆر ره‌وشا رۆژئاڤایێ كوردستانێ هاتینه‌ ئه‌نجامدان بێ بنه‌مانه‌ و ولاتێن جیهانێ بازاڕێ ب ملله‌تێ كورد ل سووریێ دكه‌ن و كڕین و فرۆتن ب كوردان دهێته‌كرن، ژ به‌ر كو هه‌ر ل ده‌ستپێكا شۆڕه‌شا گه‌لێن سووریێ ولاتێن زلهێز یێ بازاڕی ب ملله‌تێ مه‌ دكه‌ن ب كورد و عه‌ره‌بڤه‌، له‌وڕا ژی هه‌ر رێكکه‌فتنه‌كا بهێته‌كرن د به‌رژه‌وه‌ندیا ولاتێن ده‌ڤه‌رێ و جیهانێ دایه‌  نه‌ك د به‌رژه‌وه‌ندا گه‌لێ مه‌، به‌لێ تنێ سه‌رۆك بارزانی هه‌ر ل ده‌ستپێكێ پشته‌ڤانێ رۆژئاڤایێ كوردستانێ كریه‌، هه‌تا ملله‌تێ كورد بگه‌هیتە ئارمانجێن خوه‌ و هه‌موو جاره‌كێ سه‌رۆك بارزانی ئێك ئاخفتن دگوته‌ لایه‌نێن سیاسی یێن رۆژئاڤایێ كوردستانێ ئه‌و ژی دگۆت لایه‌نێن كوردی ئێكگرتی بن ئه‌ز پشته‌ڤانێ هەوه‌ مه‌.

 عه‌بدولكه‌ریم میرانی خویاژیكر” گوره‌ی پێشنیازێن سه‌رۆك بارزانی سێ رێكکه‌فتن دناڤبه‌را لایه‌نێن رۆژئاڤایێ كوردستانێ هاتینه‌ كرن، دووماهی رێكکه‌فتن ژی ل باژێڕێ دهۆكێ هات ئه‌نجامدان بۆ ئاشتبوونا لایه‌نێن كوردی، به‌لێ مخابن لایه‌نێ په‌یه‌دێ یێ پێگیر نه‌بوو ب چو رێكکه‌فتنان، تنێ مه‌ به‌رهه‌مێ رێكکه‌فتنا دهۆكێ دیت ده‌مێ بڕیار هاتیه‌ ده‌ركرن هێزێن پێشمه‌رگه‌ی بهێنه‌ شاندن بۆ باژێڕێ كۆبانێ، كو د ئه‌نجامدا كاریگه‌ری په‌یداكر ل سه‌ر شه‌ڕێ به‌رهنگاریا تیرۆرستێن داعش و شیان به‌ڕه‌ڤانیێ ل كۆبانێ بكه‌ن، پیشمه‌رگه‌ی ب فه‌رمانا سه‌رۆك بارزانی سنورێ سێ ده‌وله‌تان ده‌ربازكر و شیان خوه‌ بگه‌هینن كۆبانێ، نوكه ‌ژی ده‌مێ مه‌ترسی كه‌فتیه‌ سه‌ر رۆژئاڤایێ كوردستانێ سه‌رۆك بارزانی هه‌ر د ئێكه‌م ده‌قیقه‌ لسه‌ر خه‌ت بوویه‌ و هاریكار بوویه‌ بۆ پشته‌ڤانیكرنا رۆژئاڤایێ كوردستانێ، له‌و رۆلێ سه‌رۆك بارزانی قه‌ت ناهێتە ژبیر كرن و د ده‌مێ به‌رته‌نگدا رۆل هه‌بوویه‌ بۆ پشته‌ڤانیكرنا هه‌ر پارچه‌یه‌كا كوردستانێ.