ئەڤرۆ نیوز، زنار تۆڤی:
رێکخراوا (UPP) یا ئیتالی ب رێیا پرۆژێ پێکڤە بۆ ئاشتیێ دێ کۆنسێرتەکێ بۆ گرۆپێ مشەخت سازکەت ل شانۆیا رۆمانی یا ڤەکری ل رووبارێ دهۆکی ل رۆژا شەمبی 26.10.2019 ل دەمژمێر 4 ئێڤاری.
قرین عەجۆ، ئەندامێ گرۆپێ مشەخت بۆ ئەڤرۆ نیوز گۆت: گرۆپێ مشەخت نێزیکی 50 کەسانە، د ڤێ کۆنسێرتا پاییزێ دا دێ نێزیکی 20 كەسان ژ گروپێ وان پشكداریێ تێدا کەن، هەروەسا 10 کەس دێ ژ گرۆپێ وان ل ژ مۆسلێ ژی پشكدار بن، هەروەسا گرۆپێ مشەخت ئەڤە سێ سالە هاتيه دامەزراندن، ئەندامێن ڤی گرۆپی ژ گەلەک دەڤەرێن وەکو دهۆك و روژئاڤا و هەولێرێ و سليمانيێ و بەغدا و مۆسلێ پێک دهێن.
ناڤهاتیێ گۆت ژی: ئەڤ گرۆپە ژ ئالیێ سامان و لوكا، کو خەلکێ ئیتالیانە هاتيە چێکرن، نوکە ئەڤ گرۆپە بۆ ئاشتیێ و پێکڤە ژیانێ ناما خوە بەلاڤ دکەت، ئەڤ كونسێرتە بۆ پاييزێ هاتيە دامەزراندن، چونکی نوکە وەرزێ پاییزێ یە، دیسان هەتانوکە وان پتری 50 كونسێرتان ئەنجامداینە، ل گەلەک جهێن جۆدا، ل سەرانسەری عێراقێ و كوردستانێ.
ئه‌ڤرۆ نيوز:
لژنا دووڤچوونا جوانكارى و سه‌نته‌رێن جوانكاريێ ل قايمقاميا قه‌زا دهۆكێ، ژ ئه‌گه‌رێ پێگيرى نه‌كرنێ ب رێنمايێن وێ، هژماره‌كا جوانكارى و سه‌نته‌رێن جوانكاريێ ل باژێرێ دهۆكێ سزادان.
هه‌يفا سه‌ديق، سه‌رۆكا لژنا دووڤچوونا جوانكارى و سه‌نته‌رێن جوانكاريێ راگه‌هاند” مه سه‌ره‌دانا چه‌ندين جوانكارى و سه‌نته‌رێن جوانكاريێ ل باژيرێ دهۆكێ كر و د ئه‌نجامدا ئه‌ڤ برياره هاتنه دان:
١-سەنتەرێ (شیان) ژبەر نەبوونا مۆلەتا ساخلەمیێ ونەپێگری ب رێنمایان ب گۆژمه‌كێ پاره‌ى هاته سزادان.
٢-جوانکاریا(بێست) ھوشداری بۆ هاتە دان، کو ئامیرێ لێزەری د ده‌مێ سێ رۆژان دا نه‌هێلن.
٣- جوانکاریا(راکان ریتا )ھاتە سزادان ب گوژمەکێ پارەی ژبەر ھەبوونا چەند بویاغێن نینوکا یێن ب سەرڤەچوی.
٤- سەنتەرێ جوانکاریا( سیوان) چو تێبینی ل سەر نەبوون.
٥- سەنتەرێ (واو بیوتی ) دەستخوه‌شی لێ هاتە کرن ژبەر رێک وپێکیا وان.
ئەڤرۆ نیۆز:
بریارە ئەڤرۆ ل دەمژمێر چارێ ئێڤارێ، جادا کەمەری ل نرارکێ، ب بەرهەڤبوونا پارێزگەرێ دهۆکێ بهێتە ڤەکرن.
ل دویڤ گۆتنا ئەندازیار کانیوار جبرائیل، ئەندازیارێ پرۆژەی، ل کۆمپانیا کاڤین گرۆپ، جادا کەمەری ل پشت پێشانگەهێن ترۆمبێلان ب درێژاهیا کیلومترەک و نیڤان و فرەهیا 30 متران، دێ هێتە ڤەکرن.
رۆژا 17 ڤێ هەیڤێ ل ژێرچاڤدێریا مه‌سرور بارزانى سه‌روكێ حكومه‌تا هه‌رێما كوردستانێ وب ئاماده‌بونا وه‌زیرێ باژێرڤانى وگه‌شت وگوزار و فه‌رهاد ئه‌مین ئه‌تروشى پارێزگه‌رێ دهوكێ وچه‌ند به‌رپرسێن حزبى وئیدارى به‌رێ بنیاتى بو ئه‌نده‌رپاس وجادێن كه‌مه‌رى و خزمه‌تكارى ل باژێرێ دهوكێ هاته دانان.
ئەڤرۆ نیوز، نەوزاد هلۆرى:
ب مەرەما كومكرنا پیێزانین و بەلگەنامە و دیكیومێنتكرنا تاوانیێن داعشىێ، ل سەر راسپاردەیا سەرۆكاتیا هەرێما كوردستانێ، ب نڤیسارا حوكمەتا هەرێما كوردستانێ، ب بریارا جڤاتا ئاسایشا نیڤدەولەتى، UNITAD دێ ڤەكولینێ ل تاوانێن داعشێ كەت.
ب گورەى نڤیسارەكا سەرۆكاتیا هەرێما كوردستانێ و ژبەر گرنگى یا كارێن UNITAD كو ب بریارا جڤاتا ئاسایشا نیڤدەولەتى هاتیە راسپاردن بۆ ڤەكولین و دووڤچوونێ ل سەر تاوانێن ژلایێ داعشێ هاتینە ئەنجام دان، حوكمەتا هەرێما كوردستانێ نڤیسارەكا گشتاندنێ رەوانەیێ هەموو وەزارەتان دكەت ب مەرەما هاریكاریكرن بۆ تیما ناڤهاتى.
دنڤیسارێ دا هاتیە ژى، هەموو لایەك دڤێت پابەندێ وان خالان بیت كو د نڤیسارێ دا هاتىن، ژ گرنگترین وان خالان، هەڤكاریكرنا تیما UNITAD بو كومكرن و پاراستن و هەلگرتنا بەلگەنامێن تایبەت ب كریارێن داعشێ كو دژى مرۆڤایەتى هاتینە ئەنجامدان و دگەهیتە ئاستێ جینوسایدێ، هەرلایەك ژى هاریكاریا وێ تیمێ بكەت بێ ئاستەنگ، گەرنتیكرنا UNITAD داكو ل سەرانسەرێ هەرێما كوردستانێ ڤەكولینێ بكەت، هەڤكاریكرنا تیما UNITAD دا كو ژ نێزیك سەرەدانا وان زیندانان بكەن ب مەرەما چاڤپێكەفتن ل گەل داعشێن گرتى بهێتەكرن، ئەگەر پێدڤى بیت فەرمانبەرێن فەرمانگەهان ژى ژ نێزیك هەڤكاریا وێ تیمێ بكەن.
ئەڤرۆ نیوز، نەوزاد هلوری:
هونەرمەندەکێ نابینا ل گوندێ بارزان بناڤێ مەمەد بەرۆژی، زێدەباری ب هەردو چاڤان نابینایە و ب چوو رەنگان نابینیت، بەلێ ئەڤە 17 سالە سترانان دبێژیت و خودان دو کلیپە، دیسان موزیکێ دژەنیتیت و کارێ دەنگی بۆ هونەرمەند و سترانێن خوە دکەت، زێدەباری کو ئوازان ژی ددانیت، هەردیسان ب رێیا موبایلەکا تایبەت تورێن جڤاکی بکاردئینیت و پەرتوکێن دەنگی ژی دخوینیت. ب مەرەما درۆستکرنا کلیپەکێ، نوکە ل دهۆکێ یە و ئەڤرۆ نیوز چەند پارچە ژ کلیپا وی بەلاڤ دکەت.
ئه‌ڤرۆ نيوز:
د راگه‌هاندنه‌كێ سۆپايێ توركيا ئاماژه ب وێ چه‌ندێ دكه‌ت كو ئامانجه‌كا پارتيا كرێكارێن كوردستانێ – په‌كه‌كه ل چيايێ گاره‌يى ل نێزيك ئامێديێ كريه ئارمانج و دو سه‌ركردێن وێ پارتيێ كوشتينه.
ب گۆره‌ى راگه‌هاندنه‌كا سۆپايێ توركيا، ئه‌و دو سه‌ركرده د ليستا سۆر يا داخوازكريان دا بووينه ب ناڤێن سێرڤه‌ت ئايدن و سۆلمه‌ز يه‌شار.
هه‌تا نها په‌كه‌كێ چو داخۆيانيه‌ك د ده‌رباره‌ى وێ هێرشا له‌شكرێ توركيا و ب ئارمانج گه‌هاندنا دو سه‌ركردێن خوه به‌لاڤ نه‌كريه.
ئه‌ڤرۆ نیوز:
په‌یڤدارێ وه‌زاره‌تا بازرگانى و پیشه‌سازى ل هه‌رێما كوردستانێ راگه‌هاند، ل هه‌رێما كوردستانێ سالانه دشێین زێده‌تر ژ 540 هزار ته‌نێن گه‌نمى عمبار كه‌ین و مه خواست یا هه‌ى بگه‌هینینه ملیۆن ته‌نان، هه‌روه‌سا ئاشكراكر كو بریاره پێنج سایلۆیێن نوو ل هه‌رێما كوردستانێ بهێنه دروستكرن.
فه‌تحى مه‌جید، په‌یڤدارێ وه‌زاره‌تا بازرگانى و پیشه‌سازى ل هه‌رێما كوردستانێ گۆت” ل دووڤ وێ پلانا هاتیه دانان، بریاره پێنج سایلۆیێن دى ل هه‌ولێرێ و دهۆكێ و سلێمانیێ بهێنه دروستكرن، كو هه‌ر سایلۆیه‌ك بشێت 40 هزار ته‌نێن گه‌نمى عمبار بكه‌ت، چونكى به‌رهه‌مێ چاندنێ ل هه‌رێما كوردستانێ زۆره و جهێن مه د كێم، له‌وما ئه‌و سایلۆ دێ هێنه دروستكرن بۆ وێ چه‌ندێ مه كێشه د وى بیاڤى دا نه‌مینن”.
ناڤبرى زێده‌تر بۆ مالپه‌رێ فه‌رمى یێ پارتى دیموكراتى كوردستان گۆت” ئه‌م پشكه‌كین ژ ئاسایشا خۆراكى و دخوازین پشكداریێ د وى بوارى دا بكه‌ین، د نوكه دا ل هه‌رێما كوردستانێ شه‌ش سایلۆ یێن هه‌ین و 540 هزار ته‌نێن گه‌نمى ب خوه‌ڤه دگرن، به‌لێ مه خواست یا هه‌ى بگه‌هینینه ملیۆن ته‌نان، وى ده‌مى مه كێشا گه‌نمى نامینیت، كو خواستا ئێكێ یا وه‌لاتیانه، له‌وما هه‌مه هه‌ر گرفته‌ك ژى روو بده‌ت، وى ده‌مى دى بۆ ده‌مێ چه‌ندین سالان ب وى گه‌نمێ عمباركرى خوه راگرین ئه‌ڤه ژى گاڤه‌كا گرنگه”.
نيشاندان