ئه‌ڤرۆ نیوز، نه‌وزاد هلۆری:
وه‌لاتیه‌كێ شێلادزێ لسه‌ر كیسێ خوه رابویه ب دروستكرنا هوله‌كا مه‌زن و مودرێن، وه‌كو خزمه‌ت بو به‌هیێن ده‌ڤه‌را شێلادزێ، د نوكه دا به‌رده‌وام كار لسه‌ر هولێ دهێته‌كرن و دهێته پێشبینیكرن ناڤه‌راستا سالا داهاتی بكه‌ڤیته د خزمه‌تا وه‌لاتیان دا، ئه‌ندازیارێ سه‌رپه‌رشتێ پرۆژه‌ی ژی بۆ ئه‌ڤرۆ نیوز دیاركر كو به‌هی دێ بێ به‌رامبه‌ر هێنه وه‌رگرتن.
بێوار رێكانی، ئه‌ندازیارێ سه‌رپه‌رشتێ پرۆژه‌ی بۆ ئه‌ڤرۆ نیوز گۆت: (ب مه‌ره‌ما خزمه‌تكرنا خه‌لكێ ده‌ڤه‌را شێلادزێ و دێره‌لووك و بالندا و ده‌وروبه‌ر، به‌نگین رێكانی ده‌ست ب دروستكرنا هوله‌كا مه‌زن بو پێشوازیكرنا به‌هیان و كومبوون و سمیناران كریه، هه‌موو خزمه‌تگوزاریێن هولێ دێ بێ به‌رامبه‌ر بن بو خه‌لكی).
زێده‌تر گۆت: (ده‌ما پرۆژه‌ی هه‌شت هه‌یڤ ماینه و پشتی دوماهی هاتنا پرۆژه‌ی، ئێكسه‌ر دێ ده‌ست ب خزمه‌تكرنا خه‌لكێ ده‌ڤه‌رێ هێته‌كرن و هه‌ر چه‌نده خه‌لك ئازاده ل كیڤه به‌هیان بكه‌ت، به‌لێ ب تمام بوونا ئه‌ڤێ هولێ ئێدی به‌هی ل مزگه‌فتان ناهێنه‌كرن ژبه‌ركو ئه‌ڤ هوله دكه‌ڤیته جهه‌كێ ستراتیجی و گرنگ و لسه‌ر رێیا گشتی و ب گوره‌ی ستاندارێن جیهانی و رێك و پێك هاتیه دروستكرن و سیسته‌مێ گه‌رمێ و سه‌رمایێ بخوڤه دگریت، پێشتر لسه‌ر ئه‌ركێ مالا به‌هیان گه‌رم و ته‌زیكرنا هولێن به‌هیان لسه‌ر خه‌لكی بو و زور مه‌زاختن دچون، رێك و پێكی نه‌بو، دیسان ل هولا شێلادزێ بهایێ كاره‌ب، ئاڤ، هه‌مو لسه‌ر ئه‌ركێ هولێ یه، ئه‌ڤه زێده‌باری كو خه‌لك دشێن كومبوون و سمینارێن خوه ژی ل هولێ بكه‌ن و هه‌ر بێ به‌رامبه‌ره).
ناڤبری دیاركر ژی كو ژبلی هولێ، دهه‌مان ده‌م دا پاركه‌كا راوستاندنا ترومبێلان ژی هاتیه دروستكرن و زێده‌تر گۆت: (ل هولا به‌هیان ل شێلادزێ جهێ نڤێژ و شوتنا مری و چه‌ند خزمه‌ته‌كێن دن ژی هه‌نه).
نيشاندان
