ئه‌ڤرۆ نیوز ، عه‌لى حاجى :

د هه‌وه‌كا به‌رفره‌ه یا پاقژكرنێ دا ژلایێ قایممقامیا زاخۆ و سه‌روكاتیا باژێرڤانیا زاخۆ و ب پشكداریا 12 كومپانیا ل زاخۆ پشكه‌كا ئاڤه‌ روویێن زاخۆ دهێنه‌ پاقژكرن و بریاره‌ ب درێژاهیا 38 كێلومه‌تران ئه‌و ئاڤه‌روو بهێنه‌ پاقژ كرن .

بوتان محسن، قایممقامێ زاخۆ بۆ ئه‌ڤرۆ نیوز دیار كر ئه‌ڤ هه‌وه‌ ب هاریكاریا باژێرڤانیا زاخۆ و چه‌ند كومپانیه‌كان ل باژێرێ ده‌ست پێكرى یه‌ و ئه‌ڤ هه‌وه‌ دێ یا به‌رده‌وام بیت هه‌تا كو ب درێژاهیا ڤان ئاڤه‌ روویان دناڤ باژێرێ زاخۆ دا ، ژبه‌ر كو دنوكه‌ نه‌خوه‌شى زێده‌ بوینه‌ و ب تایبه‌تى ژى نه‌خوه‌شیا كولێرایێ،دقوناغا ده‌ست پێكێ دا مه‌ دناڤ مالان دا پاقژ كرن،ژبه‌ر كو بێهنه‌كا نه‌خوه‌ش ژ وان ئاڤه‌ روویان دهات، هه‌ر دیسان هنده‌ك جه هه‌نه‌ شه‌فه‌ل و حه‌فاره‌ ناگه‌هنه‌ وان جهان ،له‌ورا ئه‌و جهه‌ دێ ب هنده‌ك رێكێن دیتر هێنه‌ پاقژكرن، ئه‌ڤرۆ هه‌مى ناهێته‌ پاقژكرن ژبه‌ر كو ب درێژاهیا 38 كێلومه‌تران ئه‌ڤ ئاڤه‌ روویه‌ دناڤ زاخۆ دا ده‌رباز بیت،زێده‌بارى وێ چه‌ندێ ژى ئه‌و مالێن ل نێزیك ڤان ئاڤه‌روویان ئاكنجى ئه‌و ب خوه‌ ژى نه‌هاریكارن و گلێش و به‌رمایكێن خوه‌ دهاڤێژنه‌ به‌ر لێڤێن ئاڤه‌روویان.

ناڤهاتى گوت ژى : ئه‌ڤ پاقژكرنه‌ یا ده‌مكى یه‌،ژبه‌ر كو ئه‌ڤ ئاڤه‌ روویه‌ پێدڤى ب سندوق كرنێ نه‌ دا كو ئه‌ڤ ئاڤه‌ روویه‌ ژ ڤێ پیساتیێ و بێهنا نه‌خوه‌ش خلاس ببیت ،سندوق كرنا ڤان ئاڤه‌ روویان ژى بویه‌ پێشنیار ژلایێ باژێرڤانیا زاخۆ ڤه‌ به‌لێ پێدڤى ب كوژمه‌یه‌كێ مه‌زن یێ پاره‌یى هه‌یه‌،به‌لێ هه‌كه‌ دماوه‌یێ سالێن چوویى دا سالانه‌ كێلومه‌تره‌ك ژى هاتبایه‌ دروست كرن ،دنوكه‌ دا پرانیا ڤان ئاڤه‌روویان دا یا سندوق كرى بیت و ئه‌ڤ كێشه‌یێن نوكه‌ بۆ هاولاتیان ژى دروست نه‌دبون .

ل دووڤ زانیاریێن ئه‌ڤرۆ نیوز ب گوره‌ى ته‌خمینكرنا باژێرڤانیا زاخۆ بۆ سندوق كرنا ئاڤه‌ روویێن زاخۆ،پێدڤى ب 270 ملیون دولارایه‌ هه‌تا ب درێژاهیا 38 كێلومه‌تران ئه‌و ئاڤه‌روو بهێنه‌ سندوق كرن

ئه‌ڤرۆ نیوز، عه‌لى حاجى :

به‌رپرسێ راگه‌هاندنا ساخله‌میا زاخۆ بۆ ئه‌ڤرۆ نیوز دیاركر پشتى سالا 2015 پشكا قه‌سته‌را دلى ل نه‌خوشخانه‌یا زاخو هاتیه‌ ڤه‌ كرن، دوى ده‌مى دا ل سه‌ر ده‌ستێ نوشدارێن تایبه‌تمه‌ند، زێده‌ترى هزار نه‌خوه‌شێن ڤێ نه‌خوه‌شیێ هاتنه‌ ده‌ست نیشان كرن.

ئه‌میر عه‌لى گوت ژى : ل سالا 2015 بۆ ئێكه‌م جار پشكا قه‌سته‌را دلى ل نه‌خوشخانه‌یا زاخۆ یا گشتى هاته‌ ڤه‌كرن و تیمه‌كا نوشدارى و ساخله‌میێ ل وێ پشكێ ده‌ست ب كار بوون و دماوێ چار سالان دا شیان زێده‌ترى هزار كه‌سان ژ هه‌لگرێن نه‌خوه‌شیێن بوریێن خوینێ ده‌ست نیشان بكه‌ن، ئه‌ڤرۆ بۆ ئێكه‌م جار ل سه‌ر ده‌ستێ سێ نوشدارێن تایبه‌تمه‌ند ب نه‌خوه‌شیێن دلى چاره‌سه‌ریا شه‌ش هه‌لگرێن وێ نه‌خوه‌شیێ هاته‌ كرن ب دانانا شه‌به‌كا بالون بۆ وان نه‌خوشان و ژ ئه‌ڤرۆ پیێڤه‌ دێ ئه‌ڤ پشكه‌ ل نه‌خوشخانه‌یا زاخۆ یا گشتى ڤه‌كرى بیت و دێ چاره‌سه‌ریا وان نه‌خوه‌شێن دیتر ژى هێته‌ كرن كو ئه‌وێن ژبه‌ریا نوكه‌ هاتینه‌ ده‌ست نیشان كرن ب رێیا وێ تیما نوشدارى و ساخله‌میێ .

و گوت ژى : ئه‌ڤ پشكه‌ دێ خزمه‌ته‌كا مه‌زن گه‌هینیته‌ هاولاتیێن زاخۆ ژبه‌ر كو ژبه‌ریا نوكه‌ ئه‌ڤ پشكه‌ ل زاخۆ نه‌بویه‌ ، پشتى ڤه‌كرنا ڤێ پشكێ نوشدارێن تایبه‌تمه‌ند دێ به‌رده‌وام چاره‌سه‌ریا نه‌خوشان كه‌ن و ئێدى پێدڤى ناكه‌ت هه‌لگرێن وێ نه‌خوه‌شیێ قه‌ستا نه‌خوشخانه‌یێن دیتر بكه‌ت .