ئه‌ڤرۆ نیوز، نه‌وزاد هلۆرى:
وه‌لاتیه‌كێ كومه‌لگه‌ها سیریێ یا سه‌ر ب ناحیا شێلادزێ ب ناڤێ (سه‌عید شاجى) ئه‌ڤه پترى 14 سالایه ب رێیا تانكه‌رێ ئاڤێ و تراكتورێ ئاڤێ بۆ خه‌لكى دابیت دكه‌ت، بڤى ره‌نگى زاروكێن خوه خودان دكه‌ت، سه‌عید مال ب مالێن هه‌موو ناحیا شێلادزێ و ده‌ڤه‌رێ دزانیت و خه‌لك ژى هه‌موو وى دنیاسن، ژبلى كارێ ئاڤێ ب رێیا تانكه‌رێ تراكتورێ چو كارێن دی ناكه‌ت و دخوازیت وه‌لاتى و حوكمه‌ت و جهێن شوله‌ژێ ده‌ست ب ئاڤاكرنا پرۆژه و خزمه‌تگوزاریان و خانيان بكه‌ن داكو كارێ وى ژى ڤه‌بیت.
ئه‌ڤرۆ نیوز:
وه‌زاره‌تا ئه‌وقاف وكاروبارێن ئایینى ل هه‌رێما كوردستانێ ئاشكراكر ئه‌و پارێ ئه‌ڤ ساله وه‌لاتیێن حه‌جیێن هه‌رێما كوردستانێ بۆ ئه‌نجامدانا رێ وره‌سمێن حه‌جێ مه‌زاختین زێده‌تره ژ 31 ملیۆن دۆلاران.
نه‌به‌ز ئیسماعیل، په‌یڤدارێ وه‌زاره‌تا ئه‌وقاف وكاروبارێن ئایینى ل هه‌رێما كوردستانێ د داخۆیانیه‌كا رۆژنامه‌ڤانى دا گۆت” ئه‌ڤ ساله ب هه‌ردو شێوێن تیرۆپشك وبازرگانى حه‌فت هزار و130 كه‌س ژ هه‌رێما كوردستانێ ب مه‌ره‌ما ئه‌نجامدانا رێ وره‌سمێن حه‌جێ چووینه وه‌لاتێ سعودیێ، ئه‌وێن ب شێوێ تیروپشكێ چووین گۆژمێ چار هزار و 200 دۆلار وئه‌وێن ب شێوێ بازرگانی ژى گۆژمێ شه‌ش هزار و 300 دۆلار ژێ هاتینه ستاندن، ب ڤێ چه‌ندێ ژى ئه‌و پارێ بۆ وێ مه‌ره‌مێ ژێ هاتیه وه‌رگرتن دبیته 31 ملیۆن و 630 هزار و 200 دۆلار”.
گۆت ژى” ب وى پاره‌ى خزمه‌تگوزاریێن خوارنێ ومانێ وپێدڤیێن دى بۆ حه‌جیان هاتینه دابینكرن، به‌لێ كرینا دیاریان ل سه‌ر حه‌جیان ب خوه بوو”.
ئه‌ڤرۆ نیۆز، محه‌مه‌د عه‌لی نوری:
كارگێریا یانا دهۆك یا وه‌رزشی ب فه‌رمی هه‌ڤبه‌ستا پێنچ یاریزانێن خوه یێن یاریا باسكت بۆلێ بۆ ده‌مێ ئێك وه‌رز نوو كر ژبۆ خوه به‌رهه‌ڤكرنێ بۆ وه‌رزێ نوو یێ هه‌ردو خولێن عیراقێ و كوردستانێ بۆ یانێن پلا نایاب.
قاسم سالح، سه‌رپه‌رشتێ تیما باسكت بۆلا یانا دهۆك بۆ ئه‌ڤرۆ نیوز دیاركر كو ب فه‌رمی هه‌ڤبه‌ستا هه‌ر پێنچ یاریزانێن خوه، وارشین لوتفی، عه‌بدوللا محه‌مه‌دعه‌لی، ئاراز مشیر ئلیاس، بۆتان خورشید و عه‌بدولرحمان محه‌مه‌دعه‌لی نوو كر بۆ خوه به‌رهه‌ڤكرنێ بۆ وه‌رزێ نوو یێ هه‌ردو خولێن عیراقێ و كوردستانێ و گوت: دێ هه‌موو بزاڤا كه‌ین تیما خوه ب شێوه‌كێ بهێز ڤه‌گه‌رێته خولا عیراقێ له‌ورا دێ چه‌ند یاریزانه‌كێن پیشه‌كار دگه‌ل یاریزانێن پارێزگه‌هێ ل سه‌ر تیمێ زێده‌كه‌ین ژبۆ به‌رهه‌ڤیه‌كا باشتر ب مه‌ره‌ما مه ڤه‌گه‌راندنا یانا دهۆك د چالاكیێن وه‌رزشی یێن عیراقێ وده‌ڤه‌رێ دا.
ئه‌ڤرۆ نیوز:
لژنا دووڤچوونا بازارى ل قایمقامیا قه‌زا دهۆكێ ئه‌ڤرۆ دوشه‌مبى 21/8/2019 سه‌ره‌دانا هژماره‌كا نانپێژیا وكافیا وخوانگه‌هان كر.
عادل ئەنوەر، ئەندامێ لژنا دووڤچوونێ راگه‌هاند” د ڤێ سەرەدانێ دا، ژنێزیک ل سەر رەوشا لێنانگەهێن ڤان جهان وپێگیریا وان ب رێنمایێن لژنێ ئاگەهداربوو، هه‌روه‌سا بریار هاته دان ب سزادانا خوارنگەها (کەباب بوهار) و (نانپێژیا دیندار) ب گوژمەکێ پارەی ژبەر نەپێگیریكرنا وان ب رێنمایێن ساخلەمیێ.
گۆت ژى” هندەك جهان ژی هوشداری بۆ هاتنە دان کو رێنمایان بجهبینن”.
بۆ هه‌ر گازنده‌كێ ژى، وه‌لاتى دشێن ب رێیا ڤێ هژمارا ته‌له‌فۆنێ (۰۷٥۰۱٦۱۲٦۲۲) په‌یوه‌ندیێ ب لژنا دووڤچوونا بازارى بكه‌ن.
ئه‌ڤرۆ نيوز:
رێڤه‌به‌ريا گشتى يا كه‌شناسيێ ل هه‌رێما كوردستانێ راگه‌هاند كو پلا گه‌رمێ ل پارێزگه‌ها دهۆكێ سوباهى پێنجشه‌مبى 22/8/2019 دێ نزمتر بيت هه‌ڤبه‌ركرن دگه‌ل يا ئه‌ڤرۆ.
كه‌شناسيا هه‌رێمێ دياركر كو پلا گه‌رمێ ئه‌ڤرۆ ل پارێزگه‌ها دهۆكێ 41 پله بوو، به‌لێ پلا گه‌رمێ سوباهى پێنجشه‌مبى دێ هێته خوار وبيته 39.
ئه‌ڤرۆ نيوز:
برياره ل حه‌فتيا داهاتى چه‌ند وه‌زيرێن حوكمه‌تا هه‌رێما كوردستانێ كو وه‌ك لژنا چاكسازيێ وپێداچوونێ ب پرۆژێ قانوونا چاكسازيێ د مووچه‌ى دا هاتينه دياركرن، كۆمببن.
ل دووڤ پێزانينان، ب برياره‌كا مه‌سرور بارزانى سه‌رۆك وه‌زيرێن هه‌رێما كوردستانێ، ل ناڤه‌راستا حه‌فتيا داهاتى كۆمبوونا وێ لژنێ دێ هێته ئه‌نجامدان ل دۆر پرۆژێ قاوونا چاكسازيێ د مووچێ پلێن بلند وخانه‌نشينيێ.
لژنا ناڤبرى پێكدهێت ژ وه‌زيرێن داد ودارايى وئابوورى وپلاندانان و وه‌زيرێ هه‌رێمێ بۆ كاروبارێن په‌رله‌مانى وسه‌رۆكێ ديوانا چاڤدێريا دارايى ل هه‌رێمێ وسه‌رۆكێ ده‌سته‌يا ده‌ستپاكيێ وسكرتێرێ جڤاتا وه‌زيران وسه‌رۆكێ ديوانا جڤاتا وه‌زيران و رێڤه‌به‌رێ گشتيێ ژمێركاريێ ل وه‌زاره‌تا دارايى وئابوورى ونوونه‌رێ تۆمارا بايۆمه‌تريا مووچه‌خۆرێن هه‌رێما كوردستانێ.
ئه‌ڤرۆ نيوز:
وه‌زيرێ باژێرڤانيان وگه‌شتوگوزارێ ل هه‌رێما كوردستانێ، ساسان عه‌ونى ب برياره‌كێ هه‌موو كارێن جڤاتێن باژێرڤانيان بۆ ده‌مێ هه‌يڤه‌كێ راگرتن ب مه‌ره‌ما پێداچوونێ وهه‌لسه‌نگاندنا كارێن وان جڤاتان.
ئه‌و برياره ئاراسته‌ى رێڤه‌به‌ريێن گشتى يێن باژێرڤانيێن هه‌ولێرێ وسلێمانيێ ودهۆكێ وهه‌له‌بجه وگه‌رميان وراپه‌رين وسۆران هاتيه كرن كو داخواز ژێ هاتيه كرن كارێن جڤاتێن باژێرڤانيان بهێنه راگرتن.
وێ بريارێ دياركريه كو راگرتنا كارێن جڤاتێن باژێرڤانيان دێ بۆ ده‌مێ هه‌يڤه‌كێ بيت ژ رۆژا 18/8/2019 هه‌تا 22/9/2019.
ئه‌ڤرۆ نیوز، عه‌لى حاجى :
پشتى چار گه‌نجێن زاخۆ شیاین پله‌یێن ئێكێ ب ده‌ست خوه‌ڤه بینن ل سه‌ر ئاستێ عێراقێ و وه‌لاتێن ده‌وروبه‌را دا، ناڤه‌ندا بالا ل زاخۆ یا ئێكه‌تیا لاوێن دیموكراتى كوردستانێ خه‌لات كرن وه‌كو پشته‌ڤانى بۆ وان یاریزان و راهێنه‌ران.
حكمه‌ت محه‌مه‌د، به‌رپرسێ ناڤه‌ندا بالا ل زاخۆ یا ئێكه‌تیا لاوێن دیموكراتى كوردستان بۆ ئه‌ڤرۆ نیوز ئاشكه‌را كر پشتى هه‌ر ئێك ژ یاریزانان ئه‌یمه‌ن عه‌دنان و محه‌مه‌د وه‌سفى و دلێر محه‌مه‌د یاریزانێن خوه لێكدانا زاخۆ شیاین د یاریایێن ڤاڤارتنان دا ل سه‌ر ئاستێ عێراقێ پلێن ئێكێ ب ده‌ست خوه‌ڤه ئیناین و غه‌ریب حه‌سه‌ن ب یاریا هونه‌رێ به‌ره‌ڤانى كرنێ شیایى ل سه‌ر ئاستێ سێ وه‌لاتان وه‌كو راهێنه‌ر رێزا ئێكێ ب ده‌ست خوه‌ڤه بینیت،له‌ورا وه‌كو پشته‌ڤانى بو وه‌رزشێن تاك ، مه خه‌لاتێ رێزلێنانێ پێشكێشى وان كرن ، ئه‌م دخازین زێده‌تر پشته‌ڤانى ل وه‌رزشا تاك بهێته كرن.
ناڤهتى گوت ژى: ئه‌ڤه وه‌كو پشته‌ڤانى بوو بۆ ڤان یاریزانا و ئه‌م دخازین دئاینده‌یى دا پشته‌ڤانیا ماددى یا ڤان وه‌رزشڤانان ژى بكه‌ین ،ژبه‌ر كو ده‌ست كه‌ڤتیێن وان ژ چوو یاریه‌كا دیتر كێمتر نینه و ئه‌م كێمتر نابینن ،زێده‌بارى وێ چه‌ندێ ژى ئه‌ڤ چه‌نده دێ بیته پشته‌ڤانیه‌ك بۆ ڤان یاریزانان ده‌ست كه‌ڤتیێن باشتر ب ده‌ست خوه‌ڤه بینن.
ئەڤرۆ نیوز:
چاڤدێرێن سیاسی دیار دکەن کو پشتی رێککەفتنا تورکیا و ئەمریکا ل دۆر دەڤەرا ئارام ل باکورێ سووریێ، ئەو یەک بوویە جهێ نەرازیبوونا روسیا و ژ بەر هندێ ژی هێزێن ئەسمانی یێن روسیا هاریکاریا لەشکرێن سووریێ دکەن و شیاینە ل ئدلبێ چەندین دەڤەرێن ستراتیژی کۆنترۆل بکەن.
ل گۆر چاڤدێران ئەو پێنگاڤا روسیا وەکو بەرسڤدانەکێ یە بۆ رێککەفتنا ئەمریکا و تورکیا ل دۆر دەڤەرا ئارام ل باکورێ سووریێ.
ئه‌ڤرۆ نیوز، عه‌لى حاجى :
وه‌به‌رهێنه‌ره‌كێ ده‌ڤه‌را باتیڤا ، ب مه‌ره‌ما باشتركرنا كه‌رتێ گه‌شتیارى ل ناحیا باتیفا، مژوولى دروست كرنا دو پروژه‌ێن مه‌زنێن گه‌شتیارى یه ل وێ ناحیێ و دنوكه دا كار ل سه‌ر دروست كرنا وان پروژه‌یان دهێته كرن.
محه‌مه‌د موراد به‌رپرسێ لژنا باتیفا یا پارتى دیموكراتى كوردستان بۆ ئه‌ڤرۆ نیوز ئاشكه‌را كر ئێك ژ وه‌به‌رهێنه‌رێن ده‌ڤه‌رێ د نوكه دا مژوولى دروستكرنا دو پروژه‌یێن گه‌شتیارى یه ل ناحیا باتیفا، پروژى ئێكێ بناڤێ زه‌مبیل فروشه و دنوكه دا پشكه‌كا وێ ب دوماهى هاتیه و بریاره ل ده‌ست پێكا سالا بهێت ئه‌ڤ پروژه‌یه ب دوماهى بهێت،كو دناڤ وى پروژه‌ى دا ، موتێل و هوتێل و خانیێن بچیك و یاریێن زاروكا هه‌نه ل سه‌ر روبه‌رێ 40 دونه‌مێن عه‌ردى ، ئه‌ڤه دبیته بو ئێكه‌م جار هوتێل و موتێل ل باتیفا بهێنه ئاڤا كرن.
ناڤهاتى گوتژ ى : پروژه‌یێ دویێ د نوكه دا كار ل سه‌ر دهێته كرن ل سه‌ر زێده‌تر 600 دونه‌مێن عه‌ردى دهێته ئاڤا كرن ، پێك دهێت ژئاڤا كرنا مه‌له‌ڤانگه‌ه و كافى و سیلاڤ و چاندنا ب هزاره‌ها داروبارى دناڤ سروشتێ كوردستانێ دا ل نزارا ده‌ڤه‌را باتیفا،ئه‌ڤ كارێ دێ دماوه‌یێ ساله‌كێ داب دوماهى هێت ، زێده‌بارى هندێ دێ ده‌لیڤه‌ێن كارى په‌یدا بن، دێ بیته ئه‌گه‌ر ژى رێژه‌یه‌كا زورتر یا گه‌شتیاران قه‌ستا وان جهێن گه‌شت و گوزارى بكه‌ن ل ده‌ڤه‌رێ و ئێدى گه‌شتیار قه‌ستا هوتێلان نه‌كه‌ن ناڤ سه‌نته‌رێ باژێرێ زاخۆ دا.
نيشاندان