ئه‌ڤرۆ نيوز:
چەندین سالە قەلەبالغەکا مەزن یا ترۆمبێلان ل جادێن ناڤخۆیی یێن قەزا سێمێلێ ھەنە، بەلێ ل گۆرەی بریارەکا ئەنجوومەنێ وەزیران، بریارە دوو ئۆڤەرپاس ل قەزا سێمێلێ بھێنە چێکرن و ئەڤ یەکە ژی دێ بیتە ئەگەر کو روودانێن ترۆمبێلان کێمتر لێ بھێن و قەلەبالغ ل سەر جادێن سێمێلێ و دھۆکێ کێمتر لێ بھێت.
رێڤەبەرێ گشتیێ باژێرڤانیان ل پارێزگەھا دھۆکێ راگەھاند، بریارا چێکرنا دوو ئۆڤەرپاسان ل قەزا سێمێلێ دەرچوویە و رەنگە د ماوێ ھەیڤەک ھەتا دوو ھەیڤێن دی دا ئەڤ پرۆژە بکەڤنە د بوارێ جێبەجێکرنێ دا.
ئەندازیار دیار بەحری رەسول، رێڤەبەرێ گشتیێ باژێرڤانیان ل پارێزگەھا دھۆکێ بۆ ئەڤرۆ دیار کر، ئێک ژ وان ئۆڤەرپاسان دێ ل جھێ (فلکا مرنێ) بیت و ئۆڤەرپاسا دی دێ ل نێزیک کۆلیژا چاندنێ بیت و گۆت: کۆژمێ نێزیکی شەش ملیار دیناران بۆ ئەنجامدانا ڤان ھەردوو پرۆژەیان ھاتینە تەرخانکرن.
خویاژی کر، ئێک ژ وان ئۆڤەرپاسان دێ ل جھێ (فلکا مرنێ) بیت کو جھەکێ گەلەک ستراتیژیە و قەلەبالغەکا مەزن ل سەر وێ رێیێ ھەیە و پارێزگەھا دھۆکێ و ئەنجوومەنێ وەزیران گەلەک دوپاتی ل سەر ھندێ کریە ئەو ئاریشە بھێتە چارەسەرکرن.
دیار بەحری زێدەتر دبێژیت: راگەھاندنا بابەتی گیرۆ بوو، چونکو ل وی دەمی مە داخواز ژ رێڤەبەریا گشتیا رێک و پرا کر ژ بەر کو ئەو تایبەتمەندن د چێکرنا پران دا، ئەو ڤی پرۆژەی ب رێڤە ببەن و ژ بەر ھندێ بابەتێ چێکرنا وان دوو ئۆڤەرپاسان گیروو ببوو.
خویاژی کر کو نھا بریار و نڤیسارا چێکرنا دوو ئۆڤەرپاسان ل قەزا سێمێلێ بۆ وەزارەتا پلاندانانێ چوویە دا کو ڤی پرۆژەی کۆد بکەت و کۆژمێ سالانە بۆ بھێتە دانان و ئەم چاڤەرێ دکەین ل دەمەکێ نێزیک پرۆژە بکەڤیتە د وارێ جێبەجێکرنێ دا و ڤێ مزگینیێ ددەمە خەلکێ خوە ئەڤ پرۆژە دێ ھێتە بجھئینان و پرۆژەیەکێ گەلەک گرنگ و ستراتیژی یە.
نيشاندان
