ئەڤرۆ نیوز، نەوزاد ھلۆری:

پشکەک ژ ھاڤینگەھێن دەڤەرا ئامێدیێ ب تایبەتی ل دێرلووک و شێلادزێ ژ ئەگەری َنەبوونا ئوتێل و موتێلان، ب شەڤ دھاتنە گرتن و گەشتیاران قەستا دھۆک و ھەولێرێ دکر، بەلێ نوکە بزاڤ دھێتەکرن کو ھاڤینگەھێن دەڤەرێ ب شەڤ ژی پێشوازیا گەشتیاران بکەن.

ھەرمان سدقی، سەرپەرشتیارێ ھاڤینگەھا گەلیێ شێرانە ل دێرەلووک بۆ ئەڤرۆ نیوز گۆت: (گەلیێ شێرانە دنوکە دا بویە ئێک ژ سەرنجراکێش و خوشترین و ناسیارترین جھێ گەشتوگۆزاری ل ھەرێما کوردستان و عیراقێ ئەو ژی ژبەر ھەبوونا چەند سالوخەتەنێن سرۆشتی، دنوکە دا ھاڤینگەە ب تەمامی ھاتیە نوژەنکرن و چەندین گورانکاری تێدا ھاتینەکرن، لسەر داخوازیا پشکەک ژ گەشتیاران مە بریاردا ئەڤرۆ وێڤە ھاڤینگەھا گەلیێ شێرانە ب شەڤ ژی ڤەکەین، نوکە خێزان و گەنج ژی دشێن ب شەڤ ل گەلیێ شێرانە بمینن).

ھەوار رێکانی، خودانێ ھاڤینگەھا ڤین ل شێلادزێ بۆ ئەڤرۆ نیوز گۆت: (ھاڤینگەھا ڤین ل شێلادزێ ب ئێک ژ قەرەبالغترین جھێن گەشتوگۆزاری ل پارێزگەھا دھۆک دھێتە نیاسین ب تایبەتی ل روژانێن بێھنڤەدان، ژبەرڤێ مە بریاردا کو ب شەڤ ژی پێشوازیا گەشتیار و خەلکێ دەڤەرێ بکەین، بۆ ڤێ مەرەمێ ژی مە ھەموو بەرھەڤی کرینە و ھاڤینگەە رونکریە، دیسان ل شێلادزێ ژی ئوتێل ھاتینە چێکرن و گەشتیار دشێن ھەر ل شێلادزێ بمینن).

ژبلی ھاڤینگەھێن شێلادزێ و دێرەلووک، ھاڤینگەھا سیلاڤێ ژی ب شەڤ پێشوازیا گەشتیاران دکەت، بەلێ ژسەرجەمێ 35 ھاڤینگەھان، پرانیا وان ب شەڤ دھێنەگرتن و پێشوازیا گەشتیار و خەلکی ناکەن، پشکەک ژ وان ژی ژ ئەگەرێ لەھی و بارانان ب روژ ژی نەشێن پێشوازیا گەشتیاران بکەن.