ئەڤرۆ نیوز:
مەولود چاڤوش ئوگلۆ وەزیرێ دەرڤە یێ تورکیا راگەهاند کو رێكکەفتنا مە و روسیا ل دۆر کڕینا مۆشەکێن س٤٠٠ یێن روسیا ب دووماهی هاتیە و ئەم ب چو رەنگەکێ وێ رێککەفتنێ گیرو ناکەین و دێ مۆشەکان ژ روسیا کڕین.
ئەو یەک د دەمەکێ دایە کو بەری نها وەزیرێ دەرڤە یێ ئەمریکا دیار کربوو کو نە ئەمریکا و نە ژی ناتۆ قەبوول ناکەن وەلاتەکێ ئەندامێ ناتۆ مۆشەکێن روسی بکڕیت.
ئەڤرۆ نیوز:
وەزارەتا ناڤخوە یا حوکمەتا هەرێما کوردستانێ بریار دا کو مۆلەتا هاژۆتنا تەکسیێ بۆ فەرمانبەران هەتا مەها ئیلۆنێ یا ئەڤسالە بهێتە درێژکرن.
ئەو یەک د دەمەکێ دایە کو بەری نها ب فەرمانا وەزارەتا ناڤخوە بریار هاتبوو دان کو فەرمانبەرێن گەلەک وەزارەتان نابیت شوفێریا تەکسیان بکەن، لێ پشتی گەلەک شوفێران گازندێن خوە گەهاندینە پەرلەمانێ کوردستانێ و پەرلەمانی ژی دووڤچوونا بابەتی کری ئەڤرۆکە وەزارەتا ناڤخوە مۆلەتا هاژۆتنا تەکسیان بۆ فەرمانبەران هەتا مەها ئیلۆنێ یا ئەڤسالە درێژ کریە.
ئەڤرۆ نیوز:
جەبار یاوەر ئەمیندارێ گشتی یێ وەزارەتا پێشمەرگی راگەهاند کو ژ بەر رەوشا نوو یا ل دەڤەرێ هەر دو وەلاتێن ئەلمانیا و ئەمریکا مەشقدانا ب هێزێن پێشمەرگێن کوردستانێ و سەربازێن عیراقێ راگرتینە.
ناڤهاتی ئەو یەک ژی دیار کر کو ژ بەر ئالۆزیێن نوو یێن ل دەڤەرێ ئەو بریارە هاتیە دان لێ مامۆستایێن دی د ناڤ پێشمەرگەی دا هەنە کو نها ئەو ب وی ئەرکی رادبن و مەشقدانا پێشمەرگەی بەردەوامە.
ئەڤرۆ نیوز:
چاڤەرێ دھێتەکرن ل ھاڤینا بھێت یانا مانچێستەر یوناید ب ھێز بھێتە دناڤ ھەڤرکیا بازارێ ڤەگوھاستنێن یاریزانان دا کو نوکە چەندین ستێرێن خولێ ئورۆپی دەست نیشانکرینە بوو دانوستاندنان ل گەل ئەوان یاریزان و ئیمزاکرنا ھەڤبەستا ئەوان.
مالپەرێ کاتشیو مێرکاتو یێ ئیتالی دیارکریە یانا مانچێستەر یوناید کوژمەکێ مەزن یێ پارەی تەرخان کریە بوو ڤەگوھاستنێن ھاڤینا ئەڤ سالە کو ئێک ژ ئارمانجێن وێ یێن سەرەکی ئیمزاکرنا بەرەڤانێ سنگالی و یانا ناپولی کولیبالی یە کو نوکە دھێتە ھژمارتن ئێک ژ بەرنیاسترین بەرەڤانێن جیھانێ .
ھەردیسان ئەوی مالپەری دیارکریە ژی دبیت بھایێ ھەلوەشاندنا ئەوی یاریزانی بیتە رێگر د رێیا ڤەگوھاستنا ئەوی دا ژبەرکو کوژمێ ھەلوەشاندنا ھەڤبەستا ئەوی بەرەڤانێ یانا ناپولی ١٥٠ ملیون یورۆنە لێ یانا مانچێستەر دەست ب لڤینا کریە بوو دانوستاندنان ل گەل بریکارێ وی یاریزانی و بەرپرسێن یانا ناپولی .
ئەڤرۆ نیوز:
ئەڤرۆکە رێککەفتنێ ١٥/٥/٢٠١٩ سەرۆک مەسعود بارزانی پێشوازی ل جۆن ویلکس بالیۆزێ بریتانیا ل عیراقێ کر و د هەڤدیتنەکێ دا بەحسێ رەوشا سیاسی یا عیراقێ و گوهۆرینێن ل دەڤەرێ هاتە کرن و جەخت ل هندێ ژی هاتە کرن کو نابیت ژ بەر ئالۆزیێن نوو ل دەڤەرێ شەرێ ل دژی داعشێ لاواز بیت.
د پشکەکا دی یا هەڤدیتنێ دا بەحسێ پەیوەندیێن هەولێرێ و بەغدایێ هاتە کرن و بالیۆزێ بریتانیا پشتەڤانیا خوە بۆ باشبوونا پەیوەندیێن د ناڤبەرا هەولێرێ و بەغدایێ دا دیار کر و هەروەسا د ڤێ هەڤدیتنێ دا بەحسێ رەوشا ئاوارێن نەینەوا یێن ل هەرێما کوردستانێ ژی هاتە کرن.
ئەڤرۆ نیوز، نەوزاد ھلۆری:
چەند روژێن بوری ژ ئەگەرێ بارانان ستونەکا کارەبا نیشتمانی یا ھێلا سەرەکی یا گەھشتنا کارەبێ بۆ چەند گوندەکێن سنورێ ناحیا شێروان مەزن خوار بوویە، مەترسی ل سەر کارەبا وان دروستکریە.
جیھاد حەمید وەلاتیەکێ گوندێ لیرەی یا سەر ب ناحیا شێروان مەزن بۆ ئەڤرۆ نیوز گۆت: (ژ ئەگەرێ بارانێن زۆر ستونەکا کارەبا نیشتمانی ل سەر رێیا گشتی یا گەھشتنا چەند گوندان خوار بوویە و چ نەمایە بکەڤیت، کارەبا ھەر ئێک ژ گوندێن لیرە، گوندێ سێلکێ، مێرۆز، بەرکەلی، بارەگایێن ھێزێن پێشمەرگەی، ل گەل سێ گوندێن دی دکەڤیتە سەرێ).
زێدەتر گۆت: (خواربوونا ئەوێ ستوونێ کارتێکرن ل راکێشانا تورا کارەبێ کریە و رەنگە ستونێن تەنشت ژی خوار ببن ئەگەر زوو نەھێتە چێکرن، دخوازێ ژ جھێن شولەژێ دکەین ب زووترین دەم کار ل سەر راستکرنا وان بکەن ئەگەر دێ بیتە ئەگەرێ بڕینا کارەبا نیشتمانی ل وان گوندان).
ئەڤرۆ نیوز، مەحمود نھێلی:
پشتی کو فرۆکەکا سیخوری یا تورکیا ل ھنداڤا گوندێ بەرێ کەڕ ل دەڤەرا ئامێدیێ سپێدەھیا ئەڤرۆ ١٥/٥/٢٠١٩ دکەڤیتە خوارێ ئەو دەڤەر ب دژواری ژلایێ فرۆکەیێن لەشکەری یێن تورکیا ڤە ھاتە بوردومانکرن .
نەشوان حسنی رێڤەبەرێ ناحیا سەرنکی بۆ ئەڤرۆ نیوز دیارکر، کو سپێدەھا ئەڤرۆ فرۆکەکا سیخوری یا تورکیا کەفتیە ئاقارێ گوندێ بەرێ کەڕ یێ سەر ب ناحیا سەرسنکێ و گۆت: (چێدبیت ئەڤ فرۆکە ژلایێ پەکەکی ڤە ئێخسبیتە خوارێ چونکە گەریلایێن پەکەکی بزاڤ دکرن بچنە سەر جهێ فرۆکەیێ لێ ژلایێ فرۆکەیێن لەشکەرێ یێن تورکیا ڤە ھاتە بودورمانکرن بۆ وێ یەکێ پارچێن فرۆکەیێ نەکەڤنە دەستێ وان).
ناڤھاتی ئاشکرا کر، کو ئەڤ دەڤەرا فرۆکە کەفتیێ و ھاتیە بوردومانکرن کێمتر ژ کیلومەترەکی نێزیکێ گوندێ بەرێ کەڕ و جادا سەرەکی یا ئامێدیێ دھوک بوویە، ژ ژبەر وێ یەکێ ترس و دو دلیەکا زۆر ئێخستیە دلێ خەلکێ وێ دەڤەرێ و گۆت:( سوپاس بو خودێ کو چ زیانێن گیانێ ل پەی ڤێ بوردومانێ نەبوویە لێ زیان گەشیتە جام و دەرگەھێن ھند خانیان دناڤ گوندی دا).
ناڤھاتی داخواز ژ ئاکنجیێن دەڤەرێ ژی کر، کو دڤان چەند رۆژان خوە دوور بکەن ژ ئاقاری و دەرڤەی گوندان چونکو چێدبیت رەوش نە ھند یا ئارام بیت و نە کو بکەڤنە بەر بوردومانان و زیان بگەھنێ.
ئەڤرو نیوز:
ئه‌ڤرۆ 15-5-2019 به‌هزاد عەلى ئاده‌م جێگرێ پارێزگه‌رێ دهوكێ سه‌رپه‌رشتیا كومبونا لیژنا كونترولكرنا رودانێن ئاگرى وپاراستنا ژینگه‌هێ كر.
دكومبونێدا به‌حسێ هاتنا وه‌رزێ هاڤینێ ومه‌ترسیا په‌یدابونا رودانێن ئاگربه‌ربونێ وچاوانیا ئاماده‌كرنا پلانه‌كا رێكخستى دناڤبه‌را فه‌رمانگه‌هێن په‌یوه‌ندیدار وجوتیاران وخه‌لكێ پارێزگه‌هێ دا بو وێ یه‌كێ سه‌ره‌ده‌ریه‌كا بله‌ز دگه‌ل هه‌ر رودانه‌كا ئاگر به‌ربونێ بهێته كرن وئاگر بهێته كونترولكرن و زیان ل سه‌ر به‌رهه‌مێ جوتیاران وژینگه‌ها پارێزگه‌هێ نه‌خاسمه دارستانێ بهێته كێمكرن.
هه‌ر دكومبونێدا بریار هاته دان كو لیژنێن لایه‌كى ل سه‌ر ئاستێ هه‌موو قه‌زا وناحیان ژى بهێنه دورستكرن بو دوڤ چونا بابه‌تێ كونترولكرنا ئاگرى وپاراستنا ژینگه‌هێ .
جێگرێ پارێزگه‌رێ دهوكێ داخاز ژفه‌رمانگه‌هێن په‌یوه‌ندیدار وئه‌ندامێن لیژنێ كر كو هه‌موو دهه‌ڤكاربن و هه‌ر ئێك ل دوڤ تایبه‌تمه‌ندیا خو هه‌ر ژسوبه رێكه‌فتى 16-5-2019 ده‌ست بجهئینانا به‌رنامێن كومبونێ وكارێن پێ هاتینه راسپاردن بكه‌ن تایبه‌تى چێكرنا هێلێن ئاگرى ل جهێن گشتى ودارستانا وزه‌ڤیێن چاندنێ هه‌روه‌سا ته‌كه‌زى ل سه‌ر رولێ راگه‌هاندنێ وماموستایێن ئاینى ویێن په‌روه‌ردێ ژى كر كو رولێ خو ببینن وهشیاریێ دناڤ خه‌لكیدا به‌لافكه‌ن بو وێ یه‌كێ رودانێن ئاگر به‌ر پونێ په‌یدانه‌بن تایبه‌ت ل ده‌مێ ئه‌نجامدان سه‌یران وگه‌شتا وبه‌رهه‌ڤیا كارگێریا پارێزگه‌ها دهوكێ نیشان دا بو پشته‌ڤانیكرنا به‌رنامێ لیژنێ.
ل دوماهیێ گه‌نگه‌شه ب تێروته‌سه‌لى ل سه‌ر بابه‌تێن كومبونێ هاتنه كرن وچه‌ندین بوچون وپێشنیار هاتنه ئاراسته‌كرن بو كاراكرنا به‌رنامێ لیژنێ وبریار هاته دان هه‌ر دوو حه‌فتیا جاره‌كێ لیژنا ناڤبرى كومببیت ودوڤ چونا بجهئینانا به‌رنامێن خو بكه‌ت.
ئەڤرۆ نیوز ، مەحمود نھێلی
فرۆکەیەکا سیخوری یا تورکیا ل ھنداڤا دەڤەرا ئامێدیێ دەوروبەرێن دەمژمێر 11 سپێدەھیا ئەڤرۆ 15ی گۆلانا 2019 دکەڤیتە خوارێ .
ل گور شاھد حالەکێ ئەڤ فرۆکەیە ل ھندەڤا چیایی مەتینی ل دەڤەرا ئامێدیێ دکەڤیتە پشتا گوندێ بەرێ کەر نێزیک کومەلگەھا قەدشێ یا سەر ب ناحیا سەرسنکی و هەتا ئامادەکرنا ڤی پەیامی ئاگر پێڤە بوویە، لێ هەتا نوکە ئەگەرێ کەفتنا وێ فرۆکەیێ نەھاتیە زانین و چ کەس و لایەنەکی بەرپرساتیا ئێخستنا وێ نە ئێخستیە ستوویێ خوە.
دھەمان دەمێ دا ھەژمارەکا دی یا فرۆکەیێن سیخوری و یێن کەشفێ ل ھنداڤا دەڤەرێ ھاتن و چونێ دکەن.
ئه‌ڤرۆ نیوز:
شه‌ڤا بورى ژ ئه‌نجامێ شه‌ره‌كێ دناڤبه‌را سوپایێ توركیا و گه‌ریلایێن په‌كه‌كێ ل سنوورێ ده‌ڤه‌را بارزان، ل ئێك ژ چیایێن ده‌ڤه‌رێ گه‌نجه‌ك هاته برینداركرن، ده‌مه‌كێ كێم به‌رى نوكه كه‌سوكارێن وى چوونه چیایى داكو بزڤرینن به‌لێ ژبه‌ر گرانیا برینا وى گیانێ خوه ژ ده‌ست دابوو.
عادل شێروانى، وه‌لاتیه‌كێ ده‌ڤه‌رێ یه بۆ ئه‌ڤرۆ نیوز گۆت: (دوهى ب مه‌ره‌ما كومكرنا گژوگیایێ بوهارى وه‌لاتیه‌ك ب ناڤێ لازم عه‌لى خه‌لكێ گوندێ پێندرو دچیته چیایێ بوتین ل مزورى بالا یا سه‌ر ب ده‌ڤه‌را بارزان، به‌لێ ب مخابنی ڤه هه‌ر ل وى ده‌مى شه‌ر دناڤبه‌را سوپایێ توركیا و گه‌ریلایێن په‌كه‌كێ دروست دبیت و د ئه‌نجام دا ئه‌و ژى بریندار دبیت و دمینیته چیایى هه‌تا ئه‌ڤرۆ سپێدێ).
زێده‌تر گۆت: (ئه‌ڤرۆ سپێدێ خه‌لكێ گوندى چوینه جهێ روودانێ، به‌لێ ب مخابنی ڤه ئه‌وى وه‌لاتى گیانێ خوه ژ ده‌ست دابوو، ئه‌م دخوازین كو خه‌لكێ مه بهێته پاراستن ژ شه‌ر و ئالوزیێن دناڤبه‌را توركیا و په‌كه‌كێ).
نيشاندان