ئه‌ڤرۆنيوز:
هه‌ردو يانێن جه‌ويه يا عيراقى وئه‌لتين ئه‌سير يا توركمانستانى سوباهى شه‌مبيێ 27/10/2018 دێ ياريا دووماهيێ ژ قاره‌مانيا ئێكه‌تيا ئاسيا يا ته‌پا پێ ل ياريگه‌ها به‌سرا ئه‌نجام ده‌ن.
يانا جه‌ويه يا عيراقى هه‌لگرا هه‌ردو ناسناڤێن دووماهيێ يێن وێ قاره‌مانيێ يه ويانا ئه‌لتين ئه‌سير يا توركمانستانى بۆ جارا ئێكێ يه دگه‌هيته دووماهيا وێ قاره‌مانيێ.
ئه‌ڤرۆنيوز:
وه‌زيرێ دارايى وئابوورى ل هه‌رێما كوردستانێ راگه‌هاند، ب رازيبوونا نێچيرڤان بارزانى سه‌رۆك وه‌زيرێن هه‌رێما كوردستانێ ل حه‌فتيا بهێت وژداهاتيا په‌ترۆلێ دێ ده‌ست ب به‌لاڤكرنا گۆژمێ 100 مليۆن دۆلاران بۆ هه‌موو قونته‌رچيێن ل هه‌رێما كوردستانێ كاركرى هێته كرن.
رێباز حه‌ملان، وه‌زيرێ دارايى ل هه‌رێمێ دبه‌ياننامه‌كێ دياركر كو ب هه‌ماهه‌نگى ل گه‌ل هه‌ردو وه‌زاره‌تێن دارايى وپلاندانانێ وئێكه‌تيا قونته‌رچيێن كوردستانێ ئه‌و پاره دێ هێته به‌لاڤكرن.
حه‌ملانى سوپاسيا خۆراگرى وهه‌لويست وكارێ به‌رده‌وامێ هه‌موو قونته‌رچيان كو مل ب ملێ مووچه‌خۆران ملێ خوه دايه به‌ر هه‌موو بارگرانى وقه‌يرانان.
وه‌زيرێ دارايى هه‌موو وه‌لاتيێن هه‌رێما كوردستانێ پشت راستكرن كو ئێدى رۆژێن دژوار به‌ر ب دووماهيێ دچن.
ئه‌ڤرۆنيوز:
رێڤه‌به‌رێ فه‌رمانگه‌ها دووڤچوونا پرۆژان ل جڤاتا وه‌زيرێن هه‌رێما كوردستانێ راگه‌هاند، بازارێ له‌نگه ل هه‌ولێرێ ناهێته تێكدان وئه‌و دوكانێن زيان گه‌هشتينێ ژ ئه‌گه‌رێ ئاگربه‌ربوونێ دێ بزاڤا چێكرنا وان هێته كرن.
هشيار قادر، رێڤه‌به‌رێ رێڤه‌به‌رێ فه‌رمانگه‌ها دووڤچوونا پرۆژان ل جڤاتا وه‌زيرێن هه‌رێما كوردستانێ دياركر كو ب چو شێوه‌كى بازارێ له‌نگه ل هه‌ولێرێ ناهێته تێكدان وده‌ستكارى د دوكانێن وى بازارى دا ناهێته كرن، به‌لێ ئه‌و دوكانێن زيان گه‌هشتينێ دێ بزاڤا چێكرنا وان هێته كرن ودێ سيسته‌مێ كاره‌بێ يێ سه‌رده‌م بۆ بازاى هێته دابينكرن.
گۆت ژى” لژنه‌كا تايبه‌ت ب قه‌ره‌بووكرنا زيانداران دێ ده‌ست بكاربيت وقه‌ره‌بووكرن ژى ل سه‌ر شيانێن دارايى يێن حوكمه‌تا هه‌رێما كوردستانێ رادوه‌ستيت”.
سپێده‌يا زوو يا رۆژا پێنجشه‌مبى 25/10/2018 ئاگر به‌ربوو پشكه‌كا مه‌زن ژ بازارێ له‌نگه ل هه‌ولێرێ وپتر ژ نيڤا دوكانێن وى بازارى سوتن وزيانه‌كا مه‌زن يا دارايى ل دووڤ خوه هێلا.
ئه‌ڤرۆنيوز:
سه‌رۆك وه‌زيرێن ئيسرائيل بنيامين ناتانياهۆ سه‌ره‌دانا وه‌لاتێ عومانێ دكه‌ت وژلايێ سولتانێ عومانێ (قابوس بن سه‌عيد) دهێته پێشوازيكرن.
ل دووڤ ديوانا سه‌رۆكاتيا وه‌زيرێن ئيسرائيلێ، ئه‌ڤرۆ ئه‌ينيێ 26/10/2018 ناتانياهوى سه‌ره‌دانا عومانێ كريه پشتى چه‌ندين په‌يوه‌نديێن به‌رده‌وام دناڤبه‌را هه‌ردو وه‌لاتان دا كو ل دووماهيێ سولتانێ عومانێ داخوازنامه‌كا فه‌رمى ئاراسته‌ى ناتاياهۆى كربوو بۆ سه‌ره‌دانا عومان.
ته‌له‌ڤزيۆنا عومان يا فه‌رمى ژى ده‌نگوباسێ پێشوازيا سه‌رۆك وه‌زيرێن ئيسرائيلێ ژلايێ سولتانێ عومانێ ڤه به‌لاڤكر.
دهێته زانين په‌يوه‌نديێن فه‌رمى دناڤبه‌را ئيسرائيل وعومان دا نينن، به‌لێ پشتى ئيمزاكرنا رێككه‌فتنێن ئوسلۆ دناڤبه‌را ئيسرائيل وفلستينيان دا ل سالا 1993، په‌يوه‌نديێن ئيسرائيل وعومان به‌ر ب باشيێ چووينه.
ئه‌ڤرۆ نیوز، نه‌وزاد هلۆرى:
درۆستبوونا له‌هى و بلندبوونا ئاستێ ئاڤا رووباران ب تنێ زیان نینن به‌لكو هنده‌ك مفا ژى يێن هه‌ين، ئه‌ڤرۆ ئێڤارى هژماره‌كا زۆر یا خه‌لكى قه‌ستا سه‌ر رووبارێ شین كریه بۆ ڤه‌گرتنا داران، وه‌لاتيه‌كى دياركر كو ئێك ژ وه‌لاتیێن سیریێ ژبلى داران 70 جه‌لیكانه و دولكێن گازێ ل گه‌ل پێنج به‌رمیلێن تژى پانزین د رووبارى دا ڤه‌گرتینه.
ب گۆره‌ى ئاخڤتنێن وه‌لاتیان رابوونا ئاستێ ئاڤێ ده‌لیڤه‌كا باش بۆ وه‌لاتیان درۆستكریه كو داران كۆم بكه‌ن بۆ وه‌رزێ زڤستانێ ب تایبه‌تى پشتى كو برينا داران هاتیه قه‌ده‌غه‌كرن و به‌لاڤكرنا گازێ گیروبوى.
ئه‌ڤرۆ نیوز، نه‌وزاد هلۆرى:
ژئه‌گه‌رێ بارینا بارانه‌كا زۆر و رابوونا له‌هیان، شه‌ڤا بورى و سپێده‌یا ئه‌ڤرۆ هژماره‌كا رێێن سه‌ره‌كى و لاوه‌كى و پرێن ده‌ڤه‌را چومان هه‌رفینه و هاتینه‌گرتن، دیسان نێزیكێ 50 خێزانێن ده‌ڤه‌رێ ئاواره بوینه و رێیا 14 گوندان ژى هاتیه گرتن.
ئه‌حمه‌د قادر، قایمقامێ قه‌زا چومان بۆ ئه‌ڤرۆ نیوز گۆت: (ژئه‌گه‌رێ بارینا بارانه‌كا زۆر و رابوونا له‌هیان ل سنوورێ قه‌زا چومان ب تایبه‌تى هه‌ردو ناحیێن سیده‌كان و حاجى ئومه‌ران، ب تایبه‌تى شه‌ڤا بۆرى و سپێده‌یا ئه‌ڤرۆ هژماره‌كا زۆر یا رێێن سه‌ره‌كى و لاوه‌كى و دو پرێن ده‌ڤه‌را چومان هه‌رفینه و هاتینه داخستن و تیمێن مه مژوولێ ڤه‌كرنا رێیێن سه‌ره‌كى نه داكو هاتنوچون نه‌هێته برین).
زێده‌تر گۆت: (ب گۆره‌ى پێزانينێن ده‌ستپێكى، زیانێن باران و له‌هیێن شه‌ڤا بۆرى و سپێده‌یا ئه‌ڤرۆ زێده‌تره ژ ملیۆن دۆلارانه و پێدڤیه لایه‌نێن شوله‌ژێ هه‌ڤكاریا خه‌لكى بكه‌ن).
ب گۆره‌ى پێزانينان ژ ئه‌نجامێ باران و له‌هیان رێیا 14 گوندان هاتیه گرتن و هه‌شت دوكان و بازارێن وه‌لاتیان بن ئاڤبووینه و 50 خێزانێن باله‌كایه‌تى و دولا روستێ ئاواره بووینه ، دیسان هه‌ردو پرێن سه‌ره‌كیێن ناحیا سییده‌كان هه‌رفینه و رێیا حه‌فت گوندان ژى هاتیه برین.
ئه‌ڤرۆنیۆز، سالار دۆسكى:
قائیمقامێ قه‌زا دهۆكێ ئاشكراكر كو مه‌ترسى ل سه‌ر ئه‌وا خێزانا نینه ئه‌وێن سالا بوورى ژ ئه‌گه‌رێ لافا ل سه‌نته‌رێ قه‌زا دهۆك زیان ڤێ كه‌فتین و ئه‌ڤ ساله چه‌ندین پێنگاڤ بۆ رێگریكرن ل لافاوا هاتیه هاڤێتن.
جه‌هوه‌ر عه‌زیز، قائیمقامێ قه‌زا دهۆكێ، ئه‌ڤرۆ رۆژا ئه‌ینى 26/10/2018 بۆ ئه‌ڤرۆ نیۆز گۆت: هه‌تا ده‌مژمێر دو پشتى نیڤرۆ یا ئه‌ڤرۆ هه‌ر چ روودانێن لافا وا ل سه‌نته‌رێ پارێزگه‌ها دهۆك دروست نه‌بووینه، جهێن سالا بورى روودان لێ دروست بووین ئه‌ڤ ساله هاتینه دیواركرن، تایبه‌ت دناڤبه‌را مزگه‌ڤتا صه‌لاحه‌دین و پرا نێزیك ناوچا شورش و مه‌ترسیا سالا بورى ئه ساله دروست نابیت، دیسا ل تاخێ شێلێ ژى كارێ به‌رده‌وام ل سه‌ر وى جهێ سالا بورى روودان لێ دروست بووى كو ئه‌ڤ ساله دروست نه‌بیت.
جه‌هوه‌ر عه‌لى، ئه‌ڤ جهێن هاتینه دروستكرن هه‌ر سال روودان لێ دروست بوون تایبه‌ت ده‌مێ ئاڤ رابوونان، سالا بوورى جه‌نابێ پارێزگه‌رێ و نێچیرڤان بارزانى سه‌رۆكێ حوكمه‌تێ سه‌ردانا ڤى جهى كربوو، ب وێ مه‌ره‌مێ كو مه‌ترسى ل ئه‌ڤان خێزانا نه‌مینت، هه‌ر سالا بوورى ئه‌و خه‌لك هاتنه قه‌ره‌بووكرن ئه‌وێن زیان ژ ئه‌گه‌رێ لاوفا وا گه‌هشتینێ.
ناڤبرى ئه‌و ژى ئاشكراكر كو بتنێ چاره‌سه‌رى بۆ ئه‌وان جهان هاتیه‌كرن ئه‌وێن سالا بورى لافاو لێ دروست بووین، لێ هه‌موو ریبارێ هشكه روو ره‌نگ ئه‌ڤ ساله مه‌ترسى ل سه‌ر هه‌بن، هه‌ر جهه‌كێ پێشبینیا دروست وبوونا لافاوا دهێـه‌كرن كه‌فتیه پلانا مه‌دا، لێ باشتر ئه‌وه ئه‌و پلانا بۆ هشك رووى هاتیه‌دانان و پشكه‌ك ژوێ هاتیه جێبه‌جێكرن و وێ كومپانیێ ژ به‌ر قه‌یرانا دارایى بجه هێلایى هیڤدارین ئه‌و پلان بكه‌ڤیته دبیاڤێ بجهئینانێ دا و مه‌ترسیا هشك روو ب ته‌مامى ل سه‌ر وه‌لاتیێن ده‌ر دورى خوه نه‌مینت.
قائیمقامێ دهۆكى، ئاماژه كره وێ چه‌ندێ كو باران بارینا به‌رده‌وامه لێ هه‌تا نوكه چ رودان دروست نه‌بووینه، به‌رامبه‌ر هه‌موو فه‌رمانگه‌هێن حوكمه‌تێ د ئاماده‌باشیێ دانه بۆ هه‌ر روودانه‌كا نه چاڤه‌رێكرى.هه‌ڤده‌م بێوار عه‌بدوالعزیز، رێڤه‌به‌رێ په‌یوه‌ندى و راگه‌هاندنێ ل رێڤه‌به‌ریا به‌رگێریا شترستانى بۆ ئه‌ڤرۆ ئاشكراكر كو ژ ئه‌گه‌رێ هاتنا بارانا ل شه‌ڤا بورى هه‌تا نوكه چ روودان و لافاو سه‌نته‌رێ دهۆك دروست نه‌بووینه.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ ئه‌ينيێ 26/10/2018 پيرۆزباهيا سالڤه‌گه‌را تۆماركرنا داستانێن سحێلا ومه‌حموديه دكه‌ت وب تۆماركرنا وان به‌رپه‌ره‌كى دى ل ديرۆكا به‌رگريێ وخوه نه‌چه‌ماندنێ دزانيت.
سەرۆک بارزانی ل به‌رپه‌رێ خوه ل سه‌ر تۆرا جڤاكى يا تويته‌رى ل دۆر ده‌ربازبوونا ساله‌كێ ل سه‌ر تۆماركرنا داستانێن سحێلا ومه‌حموديه، گۆت” ئه‌ڤرۆ 26 ئوكتۆبه‌رێ ساليادا ئێكێ يا داستانا مه‌زن يا سحێلا ومه‌حموديه يه كو تێدا پێشمه‌رگه‌ى ديرۆكه‌كا نوو ژ به‌رگريێ وخوه نه‌چاماندنێ تۆماركر”.
سه‌رۆك بارزانى گۆت ژى” سوپاس بۆ وان قه‌هره‌مانێن پشكدارى دوێ داستانێ دا كرين، هزار سلاڤ بۆ وان شه‌هيدێن دوێ داستانێ دا خوينا خوه پێشكێشى گه‌ل ونيشتمانى كرين”.
ئه‌ڤرۆنيوز:
ل شه‌ڤا بۆرى ژبه‌ر بارانێن زۆر ودروستبوونا له‌هيان ل ده‌ڤه‌را سيميلان ل قه‌زا چۆمان، رێيا 14 گوندان هاته داخستن.
سلێمان سادق وه‌لاتيه‌كێ قه‌زا چۆمانه بۆ ئه‌ڤرۆنيوز گۆت” شڤێدى ل ده‌مژمێر 10:30 شه‌ڤ بارانه‌كا زۆر ل ناحيا سيميلان ده‌ستپێكر وژبه‌ر دروستبوونا له‌هيان زيان گه‌هشته هنده‌ك خانيان ومزگه‌فتێ كو ئاڤ چوويه دناڤدا، زێده‌بارى گه‌هاندنا زيانان ب چه‌ندين ره‌زێن وه‌لاتيێن وێ ناحيێ”.
گۆت ژى” ئه‌و له‌هى ژ لايێ چيايێ هه‌لگوردى ڤه دهات وچه‌ندين به‌رێن مه‌زن ژى دگه‌ل خوه ئينابوون وژئه‌گه‌رێ ڤێ چه‌ندێ پرا ل ناڤ ناحيێ هاته تێكدان ودئه‌گه‌ر دا رێيا 14 گوندان ل گه‌ل ناحيێ هاته برين”.
دياركر ژى” چه‌ندين وه‌لاتيان ل ناحيێ وگوندان مالێن خوه بجه هێلاينه”.
ئاماژه كر ژى” هه‌ر شڤێدى ل گه‌ل بارانێن زۆر قايمقامێ چۆمان ورێڤه‌به‌رێ ناحيا سيميلان وبه‌رپرسێن ئيدارى وحزبى وهاوارا خه‌لكى هاتبوون، خوه‌شبه‌ختانه ژه چو زيانێن گيانى نه‌بوون”.
نيشاندان