ئه‌ڤرۆ نيوز:

رێڤەبەرێ گشتیێ کاروبارێن ئێزدیان ل وەزارەتا ئەوقاف و کاروبارێن ئاینی ل حوکمەتا ھەرێما کوردستانێ دیارکر کو بەرھەڤی هاتينه‌ کرن سوبه‌هى ته‌رمێ میرێ ئێزدیان میر تەحسین سەعید بەگ بگەھيتە ھەرێما کوردستانێ.

خەیری بۆزانی، رێڤەبەرێ گشتیێ کاروبارێن ئێزدیان ل وەزارەتا ئەوقاف و کاروبارێن ئاینی ل حوکمەتا ھەرێما کوردستانێ بۆ ئەڤرۆ نيوز دیارکر کو هه‌موو رێكارێن قانوونى ب دووماهى هاتينه‌ و بڕياره‌ سوبه‌هى ته‌رمێ مير ته‌حسين به‌گ ب ریێا فرۆکەيه‌کا تایبەت ل سه‌ر ئه‌ركێ نێچيرڤان بارزانى سه‌رۆكێ حوكمه‌تا هه‌رێما كوردستانێ ژ ئەلمانیا بھێتە ڤەگوھاستن بۆ ھەرێما کوردستانێ.

کەریم سلێمان شیرەتکارێ جڤاتا روحانیا ئێزدیان بۆ دەزگەھێن راگەھاندنێ دیار کر کو پشتی وەکیلێ میرێ ئێزدیان میرحازم تەحسین بەگ گەھشتیە ھەرێما کوردستانێ ئەڤرۆ دەمژمێر١٠ سپێدێ رێککەفتی ٢/٢/٢٠١٩ کۆمبوونەک ھات ئەنجام دان ژلایێ وەکیلێ میری ڤە دگەل جڤاتا روحانیا ئێزدیان ل دور دانانا بەرنامێ پێشوازی کرنا تەرمێ میر تەحسین بەگ ھەر ژ فروکەخانا ھەولێرێ هەتا دگەھیتە دناڤ سەنتەرێ باژێرێ شێخان.

ناڤهاتی ئەو یەک ژی دیار کو تەرمێ میری  دھێتە ڤەگوھاستن بۆ قەزا شێخان دەسپێکا گەھشتنا بۆ قەزا شێخان دێ ل کومەلگەھا مەھەت را بوریت ژ بەر کو ھندەک رێورەسمێن تایبەت ل وێ کومەلگەھێ ھاتینە بەرھەڤ کرن دیسان ل چار ریانا شێخان پێشوازی ب رێورەسم لێ ھێتە کرن ژلایێ جەماوەرێ قەزایێ ڤە دیسان دناڤ سەنتەرێ شێخان ل نێزیک ھولا لالش دێ تەرمێ وی ھێتە ڤەگوھاستن بۆ قەسرا میری بریار ژی ھاتە دان کو دناڤ قەسرا میری بھێتە ڤەشارتن دناڤ سەنتەرێ شێخان دا. تازی دێ ل رۆژا سێ شەمبی بیت بۆ ماوێ حەفت رۆژان یا بەردەوام بیت دێ ڤان ھەر حەفت رۆژا رێورەسمێن ئایینی دێ بەردەوام بن.

پشتی تێکچوونا رەوشا ساخلەمیا میر تەحسین سەعید بەگ، میرێ ئێزدیان ل کوردستانێ و جیھانێ ل سپێدەھیا رۆژا دوشەمبوویا 28ى كانوونا دويێ 2019 ل ئێک ژنەخۆشخانێن ئەلمانیا وەغەرا داویێ کر.

ئەڤرۆ نیوز:

ئەڤرۆ سەرۆک مەسعود بارزانی پێشوازی ل شاندێ دانوستاندنکار یێ ئۆپۆزسیۆنا سووریێ کر و د هەڤدیتنێ دا شاندێ ئۆپۆزسیۆنێ داخواز ژ سەرۆک بارزانی کرن کو رۆلەکێ گرنگ ژ بۆ چارەکرنا قەیرانا سووریێ و پرسا کوردی بگێریت.

شاندێ ئۆپۆزسیۆنا سووریێ ب سەرۆکاتیا د. نەسر حەریری داخواز ژ سەرۆک بارزانی کرن کو ژ بۆ چارەسەریا ئاشتیانە ل سووریێ و گەرەنتیکرنا مافێن گەلێ کورد ل وی وەلاتی خوەدان رۆل بیت، چونکو سەرۆک بارزانی هەتا نها ژی گەلەک بزاڤ بۆ ئاشتیێ و چارەسەریا سیاسی و هەروەسا بۆ بدەستڤەئینانا مافێ گەلێ کورد ل سووریێ کریە.

هەروەسا د دیدارا سەرۆک بارزانی ل گەل شاندێ ئۆپۆزسیۆنا سووریێ دا بەحسێ ڤەکێشانا هێزێن ئەمریکا ژ سووریێ و بزاڤێن جودا جودا یێن بۆ چارەکرنا قەیرانا وی وەلاتی و مافێ کوردان هاتە کرن.

ئەڤرۆ نیوز، هۆشەنگ تاجر:

فەیسەل ئیسماعیل ئەندامێ سەرکردایەتیا پارتی دیموکراتی کوردستان/ سووریا بۆ ئەڤرۆ نیوز دیار کر کو ئەمریکا بۆ پاراستنا کوردان ل سووریێ ل سەر پرۆژەکێ کار دکەت کو دێ چەندین وەلاتێن جیهانێ ژی تێدا خوەدان رۆل بن و گۆت: (لێ هەتا نها ناڤەرۆکێ پرۆژێ ئەمریکا ب تەمامی دیار نینە و هەڤدیتن ل دۆر پرۆژێ ئەمریکا ژی د بەردەوامن).

ناڤهاتی هەروەسا راگەهاند کو شاندەکێ ئۆپۆزسیۆنا سووریێ نها ل گەل سەرۆک بارزانی ژی ل دۆر ڤی بابەتی دانوستاندنان دکەن و دهێتە خواستن کو پێشمەرگێن رۆژ ل گەل هندەک ژ هێزێن ئۆپۆزسیۆنا سووریێ ل گەل هندەک هێزێن سووریا دیموکرات پێکڤە وێ دەڤەرێ بپارێزن کو ئەمریکا دخوازیت بۆ کوردان ئاڤا کەت، لێ وەکو من گۆتی هەتا نها ژی بابەت ب تەمامی ئاشکرا نەبوویە و دانوستاندن ژی د بەردەوامن.