ئەڤرۆ نیوز:
نەفتێ د بازارێن جیهانیدا رێژا 7% ژ بھایێ خوە ژ دەستدا و مەزنترین داکەفتن د ڤان سێ سالان دا تۆمارکر.
لدووڤ بازارێ ئەڤرۆ چارشەمبی ئێک بەرمیلێ نەفتا برێنت ب 65 دۆلار و 11 سەنتان ھاتیە فرۆشتن، هەروەسا خاڤا ئەمریکی ژی ب 55 دۆلار و 26 سەنتان هاتیه فرۆشتن، دیسا قەبارێ داکەفتنێ ب رێژا 7% دھێتە تەخمین کرن و ئەگەرێ ڤێ چەندی بۆ زێدەبوونا بەرھەمی دناڤا بازاری دا ڤەدگەرن.
ئەڤرۆنیوز ، سەباح زوھێر:
ئدریس ھەرکی سەروکێ لیژنا قانوونێ و ھێزێن نافخۆ ل جڤاتا پارێزگەھا دھۆکێ بۆ ئەڤرۆ نیوز دا دیارکرن کو سیستەمێ ھاتنوچوونێ یێ ئەلکترونی ل ھەولێر و سلێمایێ ھاتیە جێبەجێکرن، ل پارێزگەھا دھوکێ ژی دێ ھێتە دروستکرن و تشتێ باشتر دێ ھێتە تێدا،ئەڤ سیستەمە ژی ھەمی وان کاران ڤەدگریت کو گرێدای ھاتنوچوونێ ڤەبن، ئەڤ چەندە ژی پێنگاڤەکا باشە ب زوو ب رێڤەبرنا کاروبارێن وەلاتیان دناڤ رێڤەبەریا ھاتنوچوونێ دا و دیسا دێ خەجکرن ژی ل سەر وەلاتیان کێمتر بیت.
ئدریس ھەرکی زێدەتر دبێژیت، کو پشتی ئەڤ سیستەمە دھێتە جێبەجێکرن دێ سیستەمێ تومارکرنا ترومبێلا ب ساناھی تر لێ ھێت و دێ ھەمی ب ئێک بھابن بێ جیاوازی و کاروبارێ وەلاتیان ب پێنج ھزارا دێ ھێتە دروستکرن و دەمەکێ کێمتردا دێ ھەمو کارێن وی د رێڤەبەریێ دا ھێنەدروستکرن بێ کو ئەو سەرەدانا چو جھێن دی ل دەرڤە بکەت، ئەڤ سیستەمە دێ پێکڤە ھێتە گرێدان، ب ڤی شێوەی دێ کاروبارێن خەلکی بلەزتر ب رێڤەچن و ئەڤە تاکە سیستەمە کو دێ ل بەرژەوەندیا خەلکی دا بیت، ژبەرکو بھایێ کاروبارێن وی دێ کێمتر بیت و زوتر دێ ب داوی ھێن.
ئه‌ڤرۆ، وارهێل نێروه‌ى:
تایبەتمەندەکێ نشتەرگەریا گشتی ئاماژە ب وێ چەندێ دایە کو ئێک ژ وان نەخوشیێن نوکە بەربەلاڤ ھاتنا خوینێیە دگەل پیساتیێ ل جھێ دەستئاڤا ستور، گەلەک جاران کەسێ تووشی ڤێ نەخوشیێ دبیت ژبەر شەرمێ نەڤێت سەرەدانا نوشداری بکەت لەورا گەلەکا پێدڤیە ب ھەبوونا ڤی حالەتی زووترین دەم سەرەدانا نوشدارێ تایبەتمەند بکەت دا کو چارەسەری بۆ بھێتە کرن.
د. سەردار حەسەن عارف، تایبەتمەندێ نیشتەرگەریا گشتی دیار کر: گەلەک ئەگەر ھەنە بۆ تووشبوون بڤێ نەخوشیێ ، پرانیا جاران ژ بەر باوەسیرێ یان ژی برینەکێ (فتریات)ل جھێ دەستئاڤا ستور ڤێ حالەتی دروست دکەت کو خوین بھێت.
گوت ژی: گەلەکا گرنگ ل دەمێ پەیدابوونا خوینێ ئەو کەس سەرەدانا نوشداری بکەت دا کو ژێدەرێ وێ خوینێ بزانیت کا ل کیڤە دھێت، گەلەک جاران چێ دبیت ھاتنا وێ خوینێ پەیوەندی ب پەنجەشێرا قولونێ یان رووڤیکا ھەبیت. دیار کرژی: ھندەک نیشان ھەنە کو بۆ نەخوشی و نوشداران دیار دکەت کو ھاتنا وێ خوینێ نە ژبەر نەخوشیا باوەسیرێیە، بەری کو نوشدار پشکنینا بۆ نەخوشی بکەت بگەھیتە ئەنجامەکێ ژ ھەبوونا ڤێ خوینێ ئەو ژی: ئەگەر دگەل دەستئاڤا ستور خوین ھەبیت و ئێشانەک ل زکی و بتایبەتی بنێ زکی ھەبیت، دڤێت نەخوش ئێکسەر بزانیت ئەو خوین ژ ئەگەرێ باوەسیرێ نینە، ژبەرکو باوەسیرێ زکئیشان دگەل نینە.
ناڤھاتی گوت ژی: گەلەک جاران نەخوش ھەست دکەت کو دەستئاڤا وی تمام نەبوویە، پیساتیێ نەخوشی ھەمی نادەرکەڤیت دمینیتە د رووڤیکادا و خوینێ دبینیت دگەل پیستایێ ھاتی ئەڤە ژی ئێک نیشان کو نەخوشیەکا دی بیت.و زێدەتر دووڤچوونا ڤی حالەتی بکەت ژلایێ نوشدارێ تایبەتمەندڤە و گەلەک جاران نەخوش دەستئاڤا ستور پیساتیێ وی زراڤ دبیت وەک پیساتیێ زارۆیەکێ ساڤایە، ئەڤە ژی چێ دبیت وەرەمەک ھەبیت ئەڤە ھەمی ئەو نیشانن بەری پشکنینا بۆ نەخوش و نوشداری دیار دبیت کو ئەڤە نەخوشیا باوەسیرێ نینە و گەلەکا پێدڤیە نوشدارێ تایبەتمەند پشکنینا نەخوشی بکەت، ئەگەر نەخوش نەھێلیت پشکنینێ بۆ بکەت، ژبەرکو نەخوش ژبەر شەرمێ کو بێژیت ئەڤە نەخوشیا باوەسیرێیە و نوشدار گرنگی بڤی حالەتی بدەت.
نابیت نوشدار چاڤەرێ وێ چەندێ بیت کو ئەگەر نەخوش زەعیف بوو کێشا وی ھاتە خوار پاشی بێژیت ئەڤە نەخوشیا پەنجەشێرێیە، ژبەر کو ئەگەر گەھشتە ڤی ئاستی ئەو نەخوشیا وی یا بەلاڤ بوویە لەشێ وی نەخوشیدا، چ مفا دچارەسەریا ڤی حالەتی دا نینە، تشتەکێ بەربەلاڤ ھەیە دناڤ خەلکێ مە دەمێ دبێژن ئەو کەس زەعیف نەبوویە و کێشا وی کێم نەبوویە ، “دەمێ دبێژن چاوا دبیت ئەڤە نەخوشیا پەنجەشێرێ بیت؟ ئەڤە گوتنەکا گەلەک خەلەتە دناڤ خەلکی دا ھەیە”، لەورا د ھەبوونا وان نیشانا گەلەکا فەرە نەخوش سەرەدانا نوشداری بکەت دا کو چارەسەری وەرگریت بەری بەربەلاڤ بیت.
گوت ژی: پێنگاڤێن پشتی ڤان نیشانا پێدڤیە نوشدار پشکنینا بۆ نەخوشی بکەت ئەو ژی دەستی پشکنینێ بکەت و دێ بینیت کا ھاتنا ڤێ خوینێ ژ ئەگەرێ باوەسیرێیە یان فتریاتن ئەگەر نوشداری چ تشت نەدیتن و ئەو خوین ھەر دھێت، ئەڤە وێ چەندێ گەھینیت کو ئەڤ خوینە ژ سەراڤا دەستئاڤا ستور(کماخێ) دھێت.
نوشدار دشێت برێکا تبلێ یان دوربین (نازوور)ێ بۆ دھێتە کرن دا کو بزانین ئەڤ خوینێ ژ کیڤە دھێت.
گوت ژی: گەلەک جاران خەلکێ مە ھزر دکەن کو (باوەسیر یان فتریات) دبیتە ئەگەرێ پەنجەشێرێ ئەڤێ چو راستی بۆ نینە، “ئەڤ ئاخفتنە ژ وێ چەندێ ھاتی کو گەلەک نەخوشا پەنجەشێرا ریڤیکێ یان پەنجەشێرا بنێ ریڤکا ستور دگەل ھندێ ژی باوەسیر یا ھەی ئەڤە ژی دبیتە ئەگەرێ خوینێ خەلکێ مە ھزر دکەت پەنجەشیرێ باوەسیرێ یا ھەی”لەورا باوەسیر نابیتە نەخوشیا پەنجەشێرێ، ھندەک جارا دوماھیا ریڤیکا ستور کو دبێژنێ (پەنجەشێرا مستقیمی) ھەبیت گڤاشتنێ لسەر دەمارێن خوینێ دکەت دبیتە ئەگەر نەخوشیا باوەسیر پەیدا بیت.
گوت ژی: ھندەک جاران نوشدار گرێیەکێ زکێ نەخوشی دا سەرڤە دبینیت ئەڤە دڤێت ھزر بکە تکو دبیتە ئەگەرێ ھاتنا خوینێ، پاشان گرتنا سونەرێ یان تیشکا میفراسێ و پشکنینا ، پشتی کو ھاتیە دەستنیشانکرن و پارچەکا گوشتی ژێ ھاتیە چاندن(زرع) کرن و دا دیار بیت کا ئەڤ نەخوشیە چەند بەربەلاڤ بوویە د مێلاکێ ، سینگی، خوینێ دا ئەڤە ھەمی پشکنین بۆ دھێنە کرن ودا بزانین ئەو پەنجەشێر چ قوناغ دایە، دەمێ بەلاڤ بیت لەشی دا تنێ چارەسەری نینە، بەلکو پێدڤیە چارەسەریا کیمیاوی و کەووی (داخکرن) وەرگریت پاشان نشتەرگەری بۆ بھێتە کرن، لەورا پێدڤیە قوناغا پەنجەشێرێ بزانی گەلەک باشترە کو ئێکسەر نشتەرگەری بۆ بھێتە کرن کو دێ بیتە ئەگەر نەخوشیا وی زێدەتر بەربەلاڤ بیت.
گوت ژی: پشتی پشکنینا کو دیار بیت نەخوشیا بەربەلاڤ نەبوویە باشتر ئەوە زوو نوشدار نشتەرگەریێ بۆ بکەت ئەو ژی چارەسەریا وێ ئەوە پارچەکا قولونێ لای راست یان چەپێ یان ھندەک جاران پێدڤی کەت قولونێ ھەمی دھێتە راکرن ل دووف حالەتێ وێ نەخوشیێ دمینیت کا چ بۆ بھێتە کرن.
ئه‌ڤرۆ نيوز، نيوار محه‌مه‌د سه‌ليم:
سه‌رۆكێ فراكسيۆنا گۆڕان ل په‌رله‌مانێ كوردستانێ راگه‌هاند كو هێشتا گۆڕان چو بڕيارێن ئێكلاكه‌ر د ده‌رباره‌يى پشكدارى كرن يان نه‌كرن د حوكمه‌تێ دا نه‌داينه و ئه‌ڤ بڕياره دێ بۆ جڤاتا نشتيمانى بيت.
عه‌لى حه‌مه سالح، سه‌رۆكێ فراكسيۆنا گۆڕان ل په‌رله‌مانێ كوردستانێ، د داخۆيانيه‌كێ دا بۆ ئه‌ڤرۆ نيوز ئاشكه‌را كر كو هێشتا گۆڕان چو بڕيار ل دۆر پشكداريكرن يان نه‌كرن د كابينا نوو يا هه‌رێما كوردستانێ دا نه‌داينه و گۆت: “ئه‌و بڕيار دێ بۆ جڤاتا نشتيمانى بيت و ئه‌و دێ بڕيارێ ل دۆر پشكداريكرن يان نه‌كرنێ ده‌ت”.
ده‌رياره‌ى وێ چه‌ندێ كا هه‌كه پشكدارى كر دێ داخوازا چو پۆست كه‌ن، عه‌لى حه‌مه سالح گۆت: “ئه‌و هه‌موو پرسێن گرێدايى پشكداريكرن و نه‌كرن و وه‌رگرتنا پۆستا و هه‌بوونا دو جێگران بۆ سه‌رۆكێ حوكمه‌تێ د كۆمبوونا جڤاتا نشتيمانى دا هێنه گه‌نگه‌شه‌كرن”.
ئه‌ڤرۆ نيوز:
سه‌فين دزه‌ى، ئاخفتنكه‌رێ ب ناڤێ حوكمه‌تا هه‌رێما كوردستانێ ته‌كست ل سه‌ر وێ چه‌ندێ كر كو دێ ده‌سپێكا كارێ حوكمه‌تا داهاتى يا هه‌رێما كوردستانێ نه‌هێلانا پاشكه‌فتێ مووچێ فه‌رمانبه‌ران بيت.
ئاشكه‌ر ژى كر كو سه‌رۆك وه‌زيرێن هه‌رێما كوردستانێ ته‌كست ل سه‌ر وێ چه‌ندێ كريه كو دێ هه‌موو بزاڤان كه‌ن د كابينا داهاتى دا پاشكه‌فتێ مووچه‌ى ب ئێكجارى نه‌مينيت، بێگۆمان بزاڤ و كارێن هه‌رێما كوردستانێ دێ ل سه‌ر وى لايى بن كو پاشكه‌فتێ مووچه‌ى نه‌مينيت. “نها هه‌ر 30 رۆژان جاره‌كێ مووچێ فه‌رمانبه‌ران دهێته به‌لاڤكرن”.
ده‌رباره‌ى هنارتنا په‌ترۆلێ كه‌ركووكێ د رێيا بۆريێن هه‌رێما كوردستانێ را، سه‌فين دزه‌ى گۆت: “به‌غدا ب گه‌رمى پێشوازى ل هزرێ كريه، به‌لێ پێنگاڤێن كريارى بۆ نه‌هاڤێتينه”.
ئه‌ڤه د ده‌مه‌كى دايه، به‌رى نوكه به‌رپرسێن حوكمه‌تا هه‌رێمێ ئاشكه‌را كربوو كو دانوستاندن د ناڤبه‌را هه‌ولێر و به‌غدا دا يێن هه‌ين، بۆ وێ چه‌ندێ جاره‌كا دى په‌ترۆلا كه‌ركووك ب رێيا بۆريێن هه‌رێما كوردستانێ بۆ به‌نده‌رێ جيهان يێ توركى ڤه‌گوهێزن.
ئه‌ڤرۆ نيوز:
ب مه‌ره‌ما بهێزكرنا بزاڤا بازرگانى و ئابوورى شانده‌كێ وه‌لاتێ توركيا سه‌ره‌دانا كۆمه‌لگه‌ها ده‌رگه‌هێ نڤێده‌وله‌تى يێ ئيبراهيم خه‌ليل كر و ژ لايێ حه‌ميد عه‌لى رێڤه‌به‌رێ كۆمه‌لگه‌هێ ڤه هاتنه پێشوازيكرن.
د راگه‌هاندنه‌كێ، كۆمه‌لگه‌ها ده‌رگه‌هێ نێڤده‌وله‌تى يێ ئيبراهيم خه‌ليل راگه‌هاند كو سپێده‌هيا ئه‌ڤرۆ 13ى چريا دويێ 2018 شانده‌كێ گۆمركا خابۆر سه‌ره‌دانا كۆمه‌لگه‌ها ده‌رگه‌هێ نێڤده‌وله‌تى يێ ده‌رگه‌هێ ئيبراهيم خه‌ليل كر و ژ لايێ حه‌ميد عه‌لى سه‌رپه‌رشتێ كۆمه‌لگه‌هێ ڤه هاته پێشوازيكرن.
د ڤێ سه‌ره‌دانه‌كێ دا كۆمبوونه‌ك هاته كرن ب مه‌ره‌ما ره‌وشا ده‌رگه‌هى و بۆ بهێزكرنا بزاڤا بازرگانى و ئابوورى ژ لايێ هه‌ردو لايان ڤه و ب ساناهيكرنا هاتنوچوونا رێڤينگان و ترۆمبێلێن بارهه‌لگر.
ئه‌ڤرۆ نيوز:
چه‌كدارێن داعش ئه‌ڤرۆ رۆژا چارشه‌مبى هێرش كره سه‌ر هێزێن پۆليسێن فيدرال ل لايێن تاخێ پێشه‌سازى ل پارێزگه‌ها كه‌ركووك.
ئه‌وى ژێده‌رى بۆ شه‌فه‌ق نيوز گۆت: “هنده‌ك ژ چه‌كدارێن داعش ل سپێده‌هيا زوو يا ئه‌ڤرۆ شه‌ر ل گه‌ل هێزێن پۆليسێن فيدرال كريه ل تاخێ پێشه‌سازى ل كه‌ركووك”.
دا زانين ژى كو هێزێن پۆليسێن فيدرال ل كه‌ركووك داخوازا هاريكاريا زێده‌تر كريه بۆ روو ب رووبوونا ڤان ره‌نگه هێرشان و پێزانينێن زێده‌تر ئاشكه‌را نه‌كرن.
ئه‌ڤرۆ نيوز:
ئاخفتنكه‌رێ ب ناڤێ پۆليسێن هه‌ولێر راگه‌هاند كو شه‌ڤا بۆرى ل تاخێ هه‌ڤالان بابه‌كى كورێ خوه دا به‌ر گۆللا و كوشت وهه‌تا نوكه تۆمه‌تبارێ سه‌ره‌كى ژى نه‌هاتيه گرتن.
هۆگر عه‌زيز، ئاخفتنكه‌رێ ب ناڤێ پۆليسێن هه‌ولێر گۆت: “ده‌مژمێر 11:15 ده‌قيقه يا شه‌ڤا بۆرى 13ى چريا دويێ 2018 ل تاخێ هه‌ڤالان ل هه‌ولێر بابه‌كى ته‌قه ل كوڕێ خوه كريه و پشتى ب بريندارى گه‌هانديه نه‌خۆشخانێ، گيانێ خوه ژ ده‌ست دا”.
ئاخفتنكه‌رێ ب ناڤێ پۆليسێن هه‌ولێر گۆت: “ئه‌و كوڕێ هاتيه كوشتن ب ناڤێ (محه‌مه‌د)ه، به‌لێ ئه‌گه‌رێ كوشتنا وى نه‌هاتيه زانين و ڤه‌كۆلين د به‌رده‌وامن”.
ب گۆره‌يى پێزانينان ئه‌ڤ تۆمه‌تباره پێشتر ب حه‌فت سالان هاتبوو گرتن، به‌لێ ژ ئه‌گه‌رێ لێبۆرينا گشتى هاتبوو ئازادكرن.
ھەر ئاکنجیەکێ ھەرێمێ رۆژانە پێدڤی ب لیترەکا پانزینێ یە مانشێتێن فرعی:
ئه‌ڤرۆ، قائید میرۆ:
شارەزایەکێ بەرھەمێن پترۆلێ ئاشکراکر، پانزین ئەگەرەکە بۆ پەیدابوونا چەندین نەخۆشیێن کوژەک مینا پەنجەشیرێ و ل زۆربەیا وەلاتێن جیھانێ ب شێوەیەکێ ھەستیار سەرەدەری دگەل پانزینێ دھێتەکرن. دیار کر ژی، ھەرێما کوردستانێ نەشێت بەرھەمێ نافخۆ دابین بکەت ژ پانزینێ و بلندبوونا بھای ژی پەیوەندی ب بۆرسا جیھانی ڤە ھەیە. ل دۆر داھاتیێ پانزینێ ل ھەرێما کوردستانێ دبێژیت: ھەتا ھەشت سالێن دی دێ تێھنا کارەبێ و رۆژێ و غاز جھێ پانزینێ گریت و مە پێدڤی ب ڤێ رێژا نوکە یا پانزینێ نابیت، بەلێ دڤێت خەلکی باوەری ھەبیت تڕۆمبێل ب کارەبێ ژی کار دکەت نەک تنێ پانزینێ.
ھێژا شێخ تەھا، شارازە و بازرگانێ پانزین و نەفتێ بۆ رۆژناما ئەڤرۆ گۆت “چەند ئەگەرەک بۆ بلندبوونا بھایێ پانزینێ ھەنە، ئێک ژ وان نەبوونا نەفتا خاڤە ژ بەرھەمێ نافخۆ، چەندی بەرھەمێ نافخۆ بەرەف کێمبوونێ دچیت کارتێکرن ھەیە ل سەر نەمانا پانزین و بلندبوونا بھای، ھەروەسا بلندبوونا بھایێ نەفتا خاڤا جیھانی راستەوخۆ کاریگەری ل سەر بلندبوونا بھایێ پانزینێ ھەیە ل ھەرێما کوردستانێ، چونکو بھایێ نەفتا خاف ب تنێ دۆلار بلندبیت و دێ بھایێ پانزینێ بلندبیت، بۆ نموونە دەمێ بھایێ ئێک بەرمیلا نەفتێ ل بازاڕێن جیھانێ داکەفتی بۆ 26 دۆلاران مە ل ھەرێما کوردستانێ ب کۆم ئێک لیترا پانزینێ ب 380 دیناران ددا بازاڕی، ئەڤە ل ھەموو جیھانێ ب ڤی شێوەیە دەمێ بھایێ نەفتا خاف بلند بیت بھایێ ھەموو بەرھەمێن نەفتێ بلند دبیت، واتە ھەردەمێ گۆھۆڕین بکەڤیتە بازاڕێ نەفتێ ل بازاڕێن جیھانێ دێ گۆھڕین کەڤیتە بھایێ ھەموو بەرھەمێن نەفتێ مینا گاز و گازا سپی و پانزین بلند دبیت.
ڤی شارەزا و بازرگانێ پانزینێ دیار کر” ئەف پانزینا نوکە ب رێیا ئیرانێ دھێتە ناڤا ھەرێما کوردستانێ پشکەک بەرھەمێ نافخۆیا ئیرانێ یە و پانزینا سۆپەڕە، پشکەکا دی ل وەلاتێن دی دھێتە ئیرانێ و وەک ترانزێت دگەھیتە ھەرێما کوردستانێ، بۆ نموونە پانزین ل رۆسیا دھێتە بەندەرێن ئیرانێ و دھێتە ھەرێما کوردستانێ، ئەڤە وەکی ئیران ل تورکیا ژی پانزین ل رۆمانیا دھێتە تورکیا و ب رێیا مێرسینێ دگەھیتە ھەرێما کوردستانێ، چونکە تورکیا ب خوە چو بەرھەمێ پانزینێ نینە بدەتە ھەرێما کوردستانێ، ل دەڤەرێن ناڤین و باشوورێ عێراقێ ژی ھندەک پانزین دھێتە ھەرێما کوردستانێ، بەلێ ئەڤە ب رێیا قاچاخ دھێت و ب فەرمی بەغدا رێیێ نادەت بھێتە ھەرێما کوردستانێ.
ل دۆر ئەف زانیاریێن دھێنە بەلافکرن کو پەنجە شیر ژ پانزینێ چێدبیت و کاریگەریێن خراپ ل سەر ساخلەمیا مرۆڤان ھەیە ھێژا شێخ تەھای گۆت” راستیەک ھەیە ناھێتە ڤەشارتن ئەز وەلاتێن ئورۆپا وەک نموونە نابێژم، بەلێ ھەر وەلاتێن دەرووبەر جھەکێ وەکی دوبەی، ھەر کەسێ پانزینێ بکار د ئینیت دەست کێشا بکار دئینیت، ژ بەر کو پانزین چەند ب شێوەیەکێ ستاندارد بھێتە چێکرن ئەڤە ئەگەرەکە بۆ بەلافبوونا چەندین نەساخیێن کوژەک مینا پەنجەشیرێ، پانزین ئەگەرەکە بۆ پەیدابوونا ھەموو نەساخیێن پێستی و حەساسیا چاڤا، چونکە ل ھەر لیترەکا پانزینێ نەە کیلۆیێن دویەم ئوکسجین کاربوونێ بەرھەم دئینیت نێزیکی 500 ھەتا 600 مادێن دی ل گزۆزێ تڕۆمبێلا دەردکەڤیت، ھەروەسا بۆ سۆتنا ئێک لیترا پانزینێ پێدڤی ب دو کیلۆیێن ئوکسجینێ ھەیە، واتە رێژا زیانێن ڤێ ھندا بلندە تشتەک نینە جھێ ئەڤان زیانان بگریت بۆسەر مرۆڤی و ژینگەھێ، ئەڤە ھەموو خرابیێن پانزینەکێ ن کو ب شێوەیێ ستاندەرد بەرھەم ئینابیت، بەرۆڤاژی ھەگەر پانزینەک ب ستاندەرد نەھاتبیتە چیکرن کۆمەکا مادا ھەنە تێدا شاخدارنینە و چوونا وان بۆ ناڤا لەشێ مرۆڤی زۆر ب ساناھیە دەمێ دگەھنە پیستێ مرۆڤی ئێکسەر دگەھنە خوینا مرۆڤی ئەڤەیە دەمێ دبێژن پانزین ئەگەرە بۆ چێکرنا پەنجەشیرێ، زۆر مادە ھەنە رێژە بۆھاتیە دیارکرن ھەتا پانزین بھێتە چێکرن دەمێ ئەف رێژە دھێتە بلندکرن یان گۆھۆڕین تێدا دھێتەکرن ئێکسەر کاریگەریێ دکەتە سەرۆ مرۆڤان.
ھێژا شێخ تەھا دبێژیت “ھەرێما کوردستانێ رۆژانە پێدڤی ب پێنج ھەتا حەفت ملیۆن لیترێن پانزینێ ھەیە ئەف رێژە گۆرەی وەرزێن سالێ دھێنە گۆھۆڕین، واتە ھەر ئاکنجیەکێ ھەرێما کوردستانێ رۆژانە پێدڤی ب ئێک لیترا پانزینێ یە، د دەمێ نوکە دا بەرھەمێ نافخۆ نەشێت پێدڤیێن بازاڕی دابین بکەت، ب تنێ ب مەرجەکی حکوومەت پشتەڤانی و ھاریکاریا کەرتێ تایبەت بکەت ب دانانا پارزینگەھێن بەرھەم ئینانا پانزینێ، ب دیتنا من د دەمێ ھەشت سالێن بھێت مە ئاریشەیا کێمیا پانزینێ نامینیت ڤێ چەندێ ژی پەیوەندی ب ڤێ چەندێ نینە ھەرێما کوردستانێ بەرھەمێ پانزینێ زێدە بکەت، بەلکو ئەڤرۆ جیھان یا بەرەف ھندێ دچیت پێگوھۆر بۆ پانزینێ پەیداببن مینا بکارئینانا کارەبێ و غازێ ل جھێ پانزینێ، ھەتا تێھنا رۆژێ دێ مفا لێ بھێتە وەرگرتن و پێگوھۆر دێ ھەبن بۆ جھێ پانزینێ بھایێ وانژی کێمترە ل پانزینێ، بەلێ دڤێت باوەری ب خەلکی بینین تشتەکێ دی ھەیە ل جھێ پانزینێ، چونکە نوکە وەلاتیا ئەڤ باوەری نینە تڕۆمبێلەک ب پانزینێ کار نەکەت بکاربینن، دھێتە پێشبینیکرن ھەشت سالێن داھاتی بگەھیتە ئاستەکی مە پێدڤی ب ڤێ رێژا پانزینێ نەبیت.
ئەڤرۆ، سالار دۆسکی:
سەرۆکێ لقێ دھۆکێ یێ ئێکەتیا مامۆستایێن کوردستانێ ئاشکرا کر کو کۆمپانیەکێ دەستێ خوە دانایە سەر عەردێ مامۆستایان و دبێژیت: ئێکەتیا مامۆستایێن کوردستانێ گەلەک بزاڤ کرینە بۆ زڤڕاندنا وی عەردی، لێ چ ژ وان بزاڤان سەر نەگرتینە.
وەھبی یونس، سەرۆکێ لقێ دھۆکێ یێ ئێکەتیا مامۆستایێن کوردستانێ بۆ رۆژناما ئەڤرۆ خویا کر کو کۆمپانیەکێ عەردێ مامۆستایان ل سەر ناڤێ خوە دروستکریە و ب ناڤێ ئێکەتیا مامۆستایان 40 دۆنەمێن عەردی وەرگرتینە و گۆت: “چەندین بزاڤ ب رێکا سکرتاریەتا مامۆستایان، رێڤەبەریا وەبەرھێنانێ و کارگێڕیا پارێزگەھا دھۆکێ و جڤاتا وەزیران کرینە بۆ زڤڕاندنا وی عەردی بۆ مامۆستایان، لێ ھەموو بزاڤان سەر نەگرتیە و ئەو عەرد ل سەر ناڤێ وێ کۆمپانیێ مایە، ھەکە عەردی بۆ مە ڤەگەڕینن، دبیت کۆمپانیەکا دی ھەبیت ب بھایەکێ گونجای یەکێن ئاکنجیبوونێ بۆ مامۆستایان دروست بکەت”.
سەرۆکێ لقێ دھۆکێ یێ ئێکەتیا مامۆستایان گۆتژی: “ئەڤ ئاریشە بۆ وێ چەندێ ڤەدگەڕیت کو کۆمپانیێ گەلەک ماندیبوون پێڤە دیتی یە ھەتا عەرد ل جڤاتا وەزیران وەرگرتی، لەوما یا بەرھەڤ نینە وی عەردی رادەستی ئێکەتیا مامۆستایان بکەت کو ئەم ژی بۆ مامۆستایان رادەستی کۆمپانیەکا دی بکەین و یەکێن ئاکنجیبوونێ بۆ مامۆستایان ل سەر بھێنە ئاڤاکرن”.
ناڤبری ئاشکرا ژی کر، ئەو خواستا کۆمپانیێ دڤێت ئەم وەکو ئێکەتیا مامۆستایان رازی نینین کو ب بھایەکێ گران ل سەر مامۆستان ب راوەستیت و ل دووڤ بازارێ نوکە ناگونجیت، ئەڤ کۆمپانیە ب ناڤێ (رەسەن)ە ل ھەر دو پارێزگەھێن ھەولێر و سلێمانیێ ژی یەکێن ئاکنجیبوونێ بۆمامۆستایان دروست کرینە و ئەڤ عەردێ مامۆستایان دکەڤیتە پشتا کۆمەلگەھا تەناھی.
وەھبی یونس تێلی، سەرۆکێَ لقێ دھۆکێ یێ ئێکەتیا مامۆستایێن کوردستانێ ئاشکرا کر کو وان رێکەفتن ل گەل ھەشت کۆمپانیان ئەنجام دابوو بۆ دروستکرنا یەکێن ئاکنجیبوونێ بۆ مامۆستایان، لێ ژ بەر کو بازارێ نوکە نە وەکو بازارێ بەری نوکەیە و ل دووڤ حەزا ئێکەتیا مامۆستایان کو ئەو یەکێن ئاکنجیبوونێ ل دووڤ بازارێ نوکە بھێنە کڕین دروست نەبوو، ئەو رێکەفتن ھەموو ھاتینە ھەلوەشاندن، ئەڤ کۆمپانیە ل سەرانسەری پارێزگەھێ بوون، ئانکو ب ھەموو قەزاڤە.
وەھبی یونس گۆت: “ئەم داخواز دکەین ھەر کۆمپانیەکا بەرھەڤ بیت یەکێن ئاکنجیبوونێ بۆ مامۆستایان دروست بکەت، ب مەرجەکی ل دووڤ بازارێ نوکە کو ل گەل مووچێ مامۆستایان ب گونجن، ئەم د بەرھەڤین رێکەفتنێ د گەل دا ئەنجام بدەین”.
ئاماژە ب وێ چەندێ ژی کر کو ھەر کۆمپانیەکا بەرھەڤیا خوە دیار بکەت بۆ دروستکرنا یەکێن ئاکنجیبونێ بۆ مامۆستایان، دڤێت عەرد ھەبیت بۆ ئاڤاکرنێ، چونکو مامۆستایان عەرد نینە و عەردێ مامۆستایان ل سەر ناڤێ کۆمپانیا (رەسەن)ە و ئەو ژی وی عەردی رادەستی ئێکەتیا مامۆستایان ناکەت.
جھێ ئاماژەکرنێ یە کو ل ھەر دو پارێزگەھێن ھەولێرێ و سلێمانیێ یەکێن ئاکنجیبوونێ بۆ مامۆستایان ھاتینە دروستکرن و ب تنێ بۆ مامۆستایێن پارێزگەھا دھۆکێ نەھاتینە ئاڤاکرن.
نيشاندان