ئه‌ڤرۆنيوز:
سه‌رۆك مه‌سعود بارزانى ئه‌ڤرۆ ئێكشه‌مبى 14/10/2018 پێشوازى ل عه‌مار حه‌كيم وشانده‌كێ بلند يێ هه‌ڤپه‌يمانيا ئيسلاح كر.
دديداره‌كێ دا شاندێ مێهڤان، رۆل وپێگه‌هێ سه‌رۆك بارزانى وپارتى ديموكراتى كوردستان دديرۆك ونوكه وپاشه‌رۆژا كوردستانێ وعيراقێ بلند نرخاند ودووپاتكر كو عيراق يا پێدڤى ڤه‌كرنا به‌رپه‌ره‌كێ نوويه ژ په‌يوه‌نديێن دۆستانه دناڤبه‌را هه‌رێمێ وبه‌غدا وپێدڤيه كێشێن دناڤبه‌را هه‌رێمێ وبه‌غدا بهێنه چاره‌سه‌ركرن.
هه‌روه‌سا راگه‌هاند كو وان پێشتر ژى ته‌ئكيد كريه كو پشته‌ڤانيێ ل وان سێ بنه‌مايان دكه‌ن كو سه‌رۆك بارزانى وه‌كو بناغێ په‌يوه‌نديان ناڤبه‌را هه‌رێمێ وبه‌غدا دياركرين كو پێك دهێن ژ ته‌وافوقێ وهه‌ڤپشكيێ وهه‌ڤسه‌نگيێ.
سه‌رۆك بارزانى رۆناهى خسته سه‌ر په‌يوه‌نديێن هه‌رێمێ وبه‌غدا وب شاندێ مێهڤان راگه‌هاند كو گه‌لێ كوردستانێ خودان دۆزه‌كا ره‌وايه، ئه‌وا ل ده‌ف مه گرنگ دۆزا ره‌وا يا گه‌لێ مه وچاره‌سه‌ركرنا وان پێشێلكاريێن كو ل ده‌مێن بۆرى به‌رانبه‌ر مافێن ره‌وا يێن گه‌لێ مه هاتينه كرن، بۆ وێ چه‌ندێ ژى پێدڤيه ماكانيزمێن رۆهنوگره‌نتيا پێگيريبوونێ ب هه‌ڤپشكيا راسته‌قينه وته‌وافوقێ وهه‌ڤسه‌نگيێ هه‌بيت.
ئەڤرۆ نیۆز، قائید میرۆ:
سەرۆکێ جڤاتا کاروبارێن خانمان ئاشکراکر، مە داخوازەک ئاراستەی سەرۆک وەزیرێن راسپاردیێن عێراقێ کریە ئێک ژ پۆستێن بلندێن حوکمەتێ بدەتە ژنان و دبێژیت، ھژمارەکا بەرچاف یا ژنان سیڤیێن خوە بۆ وەرگرتنا وەزارەتێن حوکمەتێ پێَشکەشی عادل عەبدولمەھدی کریە.
پەخشان زەنگەنە، سەرۆکا جڤاتا بلندا کاروبارێن خانمان لھەرێما کوردستانێ بۆ ئەڤرۆ نیۆز دیارکر” پشتی عادل عەبدولمەھدی ھاتیە راسپاردن بۆ پێک ئینانا حوکمەتا نوویا عێراق بفەرمیی مە داخوازەک بۆ نافبری بلندکریە و تێدا مە سێ خال داخوازکرینە بۆ بجە ئینان، یا ئێکێ ھەگەر سەرۆک وەزیران دو جێگر ھەبن ئێک جێگر ژن بیت، ھەروەسا دەزگەھێن بلندێ ژنان ل عێراقێ گرێدایی نڤیسنگەھا سەرۆک وەزیران بیت راستەوخۆ.
سەرۆکا جڤاتا بلندا کاروبارێن خانمان ئاماژەکر” مە داخوازەکادیژی ل عادل عەبدولمەھدی کریە ئەوژی ل کارناما حوکمەتێ دا پرسا ژنان بشێوەیەکێ رۆھن بھێتە دیارکرن و بەرنامێ حوکمەتێ بۆ ژنان د چوار سالێن داھاتی یێ دیاربیت.
زەنگەنە گوتژی” رێژەیا بەرچاف یا ژنان سیڤیێن خوە پێشکەش کرینە بۆ وەرگرتنا پۆستێن حوکەتا نوویا عێراقێ و گورەی زانیاریێن نڤیسینگەھا مەھدی ١٥%ێ یا بەربژێران ژنن، کو ھیڤی دکەین بەرچاف بھێنە وەرگرتن و پۆستێن وەزارەتان وەربگرن، بێگومان چەندین ژنانژی لھەرێما کوردستانێ داخوازا پۆستێن وەزارەتان ل حوکمەتا نویا عێراقێ کرینە، بەلێ ھژمارا وان ناھێتە زانین.
ئەڤرۆ نیوز، نەوزاد ھلۆری:
دەمەکێ کێم بەری نوکە ب رێیا فروکخانا ھەولێر ، شاندەکا ھەڤپەیمانیا چاکسازی ب سەروکاتیا عەمار ئەلحەکیم گەھشتە ھەولێر و ژلایێ مەکتەبا سیاسیا پارتی دیموکراتی کوردستان ھاتە پێشوازیکرن ، و بریارە ل گەل ھەموو لایەنێن سیاسی کوم ببیت و ئێکەمجار ژی دێ ل گەل سەروک بارزانی کوم بن.
ب گورەی ئەوان زانیاریێن دەست ئەڤرۆ نیوز کەفتی، دەمەکێ کێم بەری نوکە ب رێیا فروکخانا ھەولێر ، شاندەکا ھەڤپەیمانیا چاکسازی ب سەروکاتیا عەمار ئەلحەکیم و ھژمارەکا سەرکردێن وێ ھەڤپەیمانیێ گەھشتە ھەولێر و ژلایێ فازل میرانی سکرتێرێ مەکتەبا سیاسیا پارتی دیموکراتی کوردستان و سیروان بارزانی ئەندامێ سەرکرداتیا پارتی دیموکراتی کوردستان و ھژمارەکا سەرکردەیێن دن یێن پارتی ھاتنە پێشوازیکرن.
شاندنا عەمار ئەحەکیم دێ ل گەل ھەموو ئالیێن سیاسێن ھەرێما کوردستانێ کوم بیت، و بریارە ئێکەم دیدار ژی ل گەل سەروک بارزانی کوم بنن و گوھداریا بارزانی بکەن ل بارا داخوازیێن کوردان د حوکمەتا داھاتیا عیراقێ دا.
نێزیکێ 10 روژایە عادل عەبدولمەھدی ھاتیە راسپاردن بو پێکئینانا حوکمەتا داھاتیا عیراقێ، و بو ڤێ مەرەمێ ژی رونشت و دانوستادن دناڤبەرا ھەموو لایەنێن سیاسیێن عیراقێ دەست پێ کرینە، و دھێتە چاڤەرێکرن کو حوکمەتا داھاتیا عیراقێ ژ 23 وەزارەتان پێکبھێن.
ئەڤرۆ نیوز ، زنار تۆڤی:
ئەڤرۆ ئێکشەمبی 14.10.2018 سه‌رۆك مه‌سعود بارزانی، د دو کۆمبوونێن جودا دا ل گه‌ل پارێزگارێ مۆسلێ و شانده‌كێ هه‌ڤپه‌یمانیا فه‌تح كۆمبوو، د وێ کۆمبوونێدا دیارکریه، کو ڤه‌كرنا لاپهرهكێ نوو ل گه‌ل به‌غدا، پێدڤی ب رێككه‌فتن و هه‌ڤپشكیێ هەیه.
سەرۆک بارزانی ل باره‌گایێ خوە پێشوازی ل شانده‌كێ هه‌ڤپه‌یمانیا فه‌تح كریه و وی شاندی، پەسنا رۆل و پێگه‌هێ پارتی دیموكراتی كوردستان، د دیرۆكێ دا و د نوکە و پاشه‌رۆژا عیراقێ و هه‌رێمێ دا كریه، هەروەسا جەخت ل چاره‌سەركرنا هه‌موو كێشێن دناڤبەرا هه‌ولێر و به‌غدا دا كریە و گۆتیە ژی: ڤه‌كرنا لاپهرهكێ نوو بۆ چاره‌كرنا هه‌موو كێشان، د به‌رژه‌وه‌ندیا هه‌ردو ئالیان دایه.
د هەمان دەمدا سه‌رۆك بارزانی ژی،جەخت ل دۆزا ره‌وا یا گه‌لێ كوردستانێ كریە و گۆتیە ژی: ڤه‌كرنا لاپهرهكێ نوو ل گه‌ل به‌غدا، پێدڤی ب رێككه‌فتن و هه‌ڤپشكیا راسته‌قینه هەیه.
هه‌روەسا لدووڤ مالپه‌رێ سه‌رۆك بارزانی، ئه‌ڤرۆ پارێزگارێ نه‌ینه‌وا نه‌وفه‌ل حه‌مادی، سه‌ره‌دانا باره‌گایێ بارزانی كریە و پرۆسا سیاسی یا عیراقێ ل گه‌ل سه‌رۆك بارزانی گۆتوبێژ كریە و دیسا بەحس ل ڤه‌گه‌ریانا ئاواران و پاشه‌رۆژا مۆسلێ كریە.
ئەڤرۆ نیوز، نەوزاد ھلۆری:
پشتی کو ئەڤرۆ سپێدێ ل بەرامبەر ئاڤاھیێ وەزارەتا خواندنا بلند و ڤەکولینێن زانستی و رێڤەبەریا گشتی یا تومارا قوتابیان ل زانکویا دھۆک خونیشاندانێن بەفرەھـ ژلایێ قوتابیێن زانکو و پەیمانگەھان ل بارا نەزڤرینا ناڤێت وان و ھەبوونا کێشەیان دناڤێت وان دا ھەیی ب رێڤەچووی، و وەزارەتا خواندنا بلند و ڤەکولینێن زانستی ژی دایە دیارکرن کو رۆژا چوارشەمبی سایتێ زانکولاین بو وەرگرتنا سکالا و نەرازیبوونێن قوتابیان دێ ھێتە کارانکرن.
عەباس ئەکرەم وەزارەتا خواندنا بلند و ڤەکولینێن زانستی یا ھەرێما کوردستانێ د پرێکسکونفرانسەکێ رۆژنامەڤانی دا دایە دیارکرن کو پرۆسەیا وەرگرتنا سکالا و نەرازیبوونێن قوتابیان دێ ب رێیا زانکولاین بیت و گۆت: (ھەر قوتابیەکێ کێشە ھەیی د زڤرینە ئەو جھێ کو لێ ھاتیە وەرگرتن یان ھەر کێشەیەکا دی ھەبیت، و یان ژی ناڤێت وان نەھاتینە ، دشێن سکالا و نەرازیبوونێ ب رێیا مالپەرێ سەرەکیێ زانکولاین ب ھەمان پەیڤا تێپەر و بەکارھێنەر ب ئولاین بو وەزارەتا خواندنا بلند و ڤەکولینێن زانستی بلند بکەت و بێگومان پێداچون دێ تێدا ھێتەکرن)
دھێتە زانین کو ئەڤرۆ سپێدێ ل بەرامبەر ئاڤاھیێ وەزارەتا خواندنا بلند و ڤەکولینێن زانستی و دیسان ل بەرامبەر ئاڤاھیێ رێڤەبەریا گشتی یا تومارا قوتابیان ل زانکویا دھۆک قوتابیان دەست ب خونیشاندان و نەرازیبوونان ئەنجام دا.
ئەڤرۆ نيوز:
رێکخراوا لێبۆرینا نێڤدەولەتی دوھی د راپۆرتەکێ دا ل دۆر رەوشا عەفرینێ دیار کر کو رۆژانە چەکدارێن سەر ب لەشکرێ ئازاد یێ سووریێ و گرۆپێن دی یێن کو تورکیا پشتەڤانیا وان دکەت ل عەفرینێ مافێ مرۆڤی بنپێ دکەن و رەوشا وەلاتیێن عەفرینێ رۆژ ب رۆژێ خرابتر لێ دھێت و ژ بەر ھندێ ژی دڤێت نەتەوێن ئێکگرتی و وەلاتێن ئێکەتیا ئورۆپا ل ھەمبەر رەوشا عەفرینێ بێدەنگ نەمینن و گۆت: (ب سەدان بەلگە ل بەر دەستێ مە ھەنە کو چەکدارێن سەر ب تورکیا ل عەفرینێ ژ بەر پاران خەلکێ سڤیل درەڤینن و ئەشکەنجە دکەن و دکوژن و ھەتا نھا ژی چو سازی و ھێزەک نینە بەرگیریێ ژ خەلکێ سڤیل ل عەفرینێ بکەت، ژ بەر ھندێ ژی دڤێت ھەموو گرۆپێن چەکدار یێن ل عەفرینێ دەرکەڤن).
رێکخراوا لێبۆرینا نێڤدەولەتی ئاماژە ب راپۆرتێن بەری نھا یێن سازیا مافێ مرۆڤی یا سەر ب نەتەوێن ئێکگرتی دکەت کو تێدا ھاتبوو دیار کرن چەکدارێن سەر ب تورکیا رۆژانە زۆرداریێ ل خەلکێ دکەن، پاران ژ وەلاتیان وەردگرن و ھەری دووماھیێ ژی بەرھەمێ گەلەک جۆتیارێن عەفرینێ ژ وان ھاتە وەرگرتن و رێ نەدان بەرھەمێن خوە بفرۆشن، ژ بەر ھندێ ژی رەوشا عەفرینێ گەلەکێ ئالۆز بوویە و دڤێت جڤاکێ نێڤدەولەتی ل دۆر رەوشا عەفرینێ بێدەنگ نەمینیت.
دیانا سامان ئێک ژ بەرپرسێن رێکخراوا لێبۆرینا نێڤدەولەتی ژی راگەھاند کو ھەتا نھا گەلەک راپۆرت گەھشتینە دەستێ مە و ل گۆر ڤان راپۆرتان و بەلگێن ل بەر دەستێ مە رەوشا عەفرینێ گەلەکێ خرابە، چەکدارێن سەر ب تورکیا تۆلا خوە ژ خەلکی رادکەن، وەکو چەکداران سەرەدەری ل گەل خەلکێ مەدەنی دکەن و رۆژانە وەلاتیێن سڤیل دھێنە کوشتن، ناھێلن سازیێن مافێ مرۆڤی سەرەدانا عەفرینێ بکەن، ئەو یەک ژی نیشا ددەت کو کارەساتێن مەزن یێن مرۆڤاتی ل وی باژێری روو ددەن، ژ بەر ھندێ ژی دڤێت یا پێدڤی بۆ عەفرینێ د ئاستێ جیھانی دا بھێتە کرن و مە دڤێت بلەز ھەموو گرۆپێن سەر ب لەشکرێ ئازاد و یێن تورکیا پشتەڤانیا وان دکەت ژ عەفرینێ دەرکەڤن.
ئەڤرۆ نیوز، زنار تۆڤی:
دوهی پەرلەمانێ عێراقێ كۆمبوو، روونشتنا خوە یا ژمارە حەفت یا خولا چارێ یا پەرلەمانێ عێراقێ دەستپێکر و ئەو روونشتن هێلایە ڤەکری بۆ رۆژا دووشەمبی.
پشتی کو پەرلەمانێ عێراقێ دەربارەی دەستنیشانكرنا لیژنێن هەمیشەیی یێن پەرلەمانی كۆمبووین، بەلێ ب ئەگەرێ هندێ کو كارێن وان تەمام نەبوون، ئەو كۆمبوونە هتینە داخستن بۆ سوبەهی.
لدوڤ ژێدەرێن نووچەیی ژمارا لیژنێن ناڤا پەرلەمانی بۆ 28 لیژنان هاتینە زێدەکرن کو پێشتر 26 لیژنە بوون، هەروەسا ئاماژە ب هندێ هاتیە کرن دناڤا وان لیژنان دا دێ سەرۆكاتیا 5 لیژنان دەنە فراكسیۆنێن كوردستانی.
ناڤێن لیژنان:
لیژنا پەیوەندیلن دەرڤە، لیژنا ئاسایش‌و بەرگریێ، لیژنا قانوونی، لیژنا نەفت‌و گازێ، لیژنا وزێ و كارەبێ، لیژنا دارایی، لیژنا دەستپاكیێ، لیژنا ئابووری، لیژنا پەروەردێ، لیژنا خواندنا بلند لیژنا ساخلەمیێ، لیژنا كارو كاروبارێن جڤاکی، لیژنا هەرێمان، لیژنا پارێزگەهان، لیژنا مافێ مرۆڤی، لیژنا گەشتوگوزاریو رەوشەنبیری، لیژنا ئەوقافێ، لیژنا ئاواران، لیژنا چاندنێ، لیژنا دادوەری، لیژنا شەهیدان، لیژنا گەنجان، لیژنا ژنان، لیژنا كۆمەلێن مەدەنی، لیژنا كاروبارێن عەشائیری، لیژنا سكالین وەلاتیان، لیژنا پلانا ستراتیژی.
ئه‌ڤرۆ نيوز:
ئه‌ڤرۆ ل هه‌ردو پارێزگه‌هێن دهۆك و هه‌ولێر وه‌كو نه‌رازيبوون ل هه‌مبه‌ر نه‌هاتنا ناڤێن وان، قوتابيێن پۆلێن 12 ئاماده‌يى (وێژه‌يى و زانستى) ل به‌ر ده‌رگه‌هێن تۆمارا زانكۆيێ ل پارێزگه‌ها دهۆكێ و وه‌زاره‌تا خواندنا بلند ل هه‌ولێر ده‌ست ب خوه‌نيشاندانان كر.
ئه‌ڤان قوتابيان وه‌كو نه‌رازيبوون هه‌مبه‌ر نه‌هاتنا ناڤێن وان و رێ نه‌دان ب تۆماركرنا سكالايێ ل سه‌ر نه‌هاتنا ناڤێن خوه ده‌ست ب خوه نيشاندانێ كريه، هه‌ر وه‌كو ئێك ژ خوه‌نيشانده‌ران بۆ ئه‌ڤرۆ نيوز گۆتى و دا زانين ژى كو ئه‌و وێرێ به‌رناده‌ن هه‌تا رێ نه‌ده‌نێ سكالايێ تۆمار بكه‌ن.
ئه‌ڤرۆ نيوز:
چاڤدێرەکێ سیاسی ل وەلاتێ بریتانیا دیار دکەت کو ب ئازادکرنا قەشەیێ ئەمریکی پەیوەندیێن تورکیا و ئەمریکا ئاسایی نابن، چونکو ناکۆکیێن ھەر دو وەلاتان ژ بابەتێ قەشەیی گەلەکێ مەزنترە، چەنکو ئازادکرنا قەشەیێ ئەمریکی ب فەرمانا ئەردۆگانی بوویە و ژ نەچاریێ ئەڤ بریارە ھاتیە دان.
ھێمن سەیدی چاڤدێرێ سیاسی ل وەلاتێ بریتانیا بۆ رۆژناما ئەڤرۆ دیار کر کو ئازادکرنا قەشەیێ ئەمریکا ژ بەر گەف و سزایێن ئەمریکا بوو کو بەری نھا ل سەر تورکیا ھاتبوو سەپاندن و ئەردۆگانی نەشیا خوە ل ھەمبەر ڤان سزایان رابگریت و ژ بەر ھندێ ژی ژ نەچاریێ بریارا ئازادکرنا قەشەیی ھاتە دان و گۆت: (رەنگە ھندەک کەس بێژن کو ل ھەمبەر ئازادکرنا قەشەیی دێ ئەمریکا ژی ل ھەمبەر تورکیا نەرم بیت، لێ ئەز باوەر ناکەم تشتەک وەسا ھەبیت، رەنگە ئەمریکا ھندەک سزایێن ل سەر تورکیا راکەت، لێ بۆ ھەموو کەسەکێ ئاشکرایە کو ئالۆزیێن د ناڤبەرا تورکیا و ئەمریکا تنێ گرێدایی قەشەیێ ئەمریکی نینن و ئالۆزی گەلەکێ ژ ھندێ مەزنترن).
ناڤھاتی ھەروەسا ئەو یەک ژی دیار کر کو بەری ھەر تشتەکێ نھا ل دۆر سووریێ و ھەروەسا پەیوەندیێن روسیا و تورکیا و بابەتێ کڕینا سیستەمێ موشەکی بووینە ئاریشێن مەزن د ناڤبەرا ئەمریکا و تورکیا دا، ئەمریکا ژی سزایێن گران ل سەر تورکیا سەپاندن و ئابوورێ تورکیا بەر ب ژناڤچوونێ ڤە دچوو، ئەردۆگانی ژی دیت کو نەشێت ل ھەمبەر ڤان سزایان خوە رابگریت و ژ نەچاریێ بریارا ئازادکرنا قەشەیی دایە و گۆت: (لێ ئەردۆگان دخوازیت ئەڤ بابەتە کارتێکرنێ ل رایا گشتی یا تورکیا نەکەت و ژ بەر ھندێ ژی دبێژیت دێ ھێرشی رۆژئاڤایێ کوردستانێ کەت، لێ ئەز باوەر ناکەم کو ئەمریکا بۆ بابەتێ ھێرشکرنا ل سەر رۆژئاڤایێ کوردستانێ ھاریکاریا تورکیا بکەت، چونکو ئەمریکا بەرنامەکێ خوە یێ دەمدرێژ بۆ سووریێ و رۆژئاڤایێ کوردستانێ ھەیە و ھەتا نھا گەلەک کار بۆ ھندێ ژی ھاتیە کرن و باوەر ناکەم ئەمریکا ل ھەمبەر ھەر ھێرشەکا تورکیا بۆ سەر رۆژئاڤایێ کوردستانێ بێدەنگ بیت).
چاڤدێرێ سیاسی یێ کورد کو نھا ل بریتانیا دژیت د پشکەکا دی یا ئاخڤتنا خوە دا ئەو یەک ژی دیار کر کو ئازادکرنا قەشەیی ب فەرمانا ئەردۆگانی بوویە، ئەردۆگانی نەشیا تشتێن ل دژی ئەمریکا دگۆت وەسا بکەت و د ئەنجام دا نەچار ما داخوازا ترامپی قەبوول کەت، ب گشتی سیاسەتێن شاش یێن ئەردۆگانی ب تایبەتی ژی بابەتێ پەیوەندیێن ل گەل روسیا وەسا کر ئەمریکا ب توندی تورکیا سزا بدەت، ژ بەر ھندێ ژی ئەز باوەر ناکەم ئازادیا قەشەیی ببیتە ئەگەرێ ھندێ کو پەیوەندیێن وان ھەر زوو ئاسایی ببن و گۆت: (ناکۆکیێن تورکیا و ئەمریکا ل سووریێ، عیراقێ و ب گشتی ل رۆژھەلاتا ناڤین مەزنن و تورکیا گەلەک زیان گەھاندینە ستراتیژیا ئەمریکا ل دەڤەرێ، ژ بەر ھندێ ژی زەحمەتە مرۆڤ بێژیت ئازادیا قەشەیی دێ بارگرانیا نھا ل سەر تورکیا کێم کەت، وەکو من بەری نھا دیار کری بابەت ژ ھندێ مەزنترە).
نيشاندان