ئەڤرۆ نيوز:

فڕکاسیۆنا پارتی دیموکراتی کوردستان ل روونشتنا جڤاتا نوونەرێن ‏عیراقێ ئاشکرا كر، دابڕینا فڕاکسیونا پارتی ژ کومبونێن پەرلەمانی ‏نە ب ئەگەرێ ھەلبژارتنا بەرھەم سالح بۆ پۆستێ سەرۆک ‏کۆماری بوویە.‏

ئەندامێ پەرلەمانێ عیراقێ یێ سەر ب لیستا پارتی ڤە بەیار ‏تاھر بۆ مالپەرێ شەفەق نیۆز راگەھاند، ئەو دەنگۆباسێن ل ‏دۆر نەپشکداریکرنا مە دروونشتنێن پەرلەمانی سەبارت ‏بەربژارکرنا دکتور بەرھەم سالح بۆ پۆستێ سەرۆک کۆماری ‏دوورن ژ راستیێ، چو ڤەمان بۆ ڤێ چەندێ نین. ‏

بەیار تاھر ھەروەسا گۆت: فڕاكسیۆنا پارتی دیموکراتی ‏کوردستان ل رۆژا سێشەمبی دێ ئامادەیی روونشتنا پەرلەمانی ‏بیت، بەلێ مە نەرازیبوونەک ل دۆر میکانیزما ھەلبژارتنا ‏سەرۆک کۆماری دەربڕی، چونکی ئەو پۆست مافێ پێکھاتەکی یە ‏نەک یێ حزبەکێ یە. ‏

 ‏ئه‌ڤرۆ نيوز:

سیاسەتمدارەکێ کورد دبێژیت، پێدڤیە کورد ڤێ جارەێ ب شێوەکێ ‏پشکداریێ د حوکمەتا نوویا عیراقێ دا بکەن، کو شەرێکێن ‏راستەقینەبن و ھەر بڕیارەکا بھێتە دان ب تەوافق بیت نەب ‏تاک لایانە بھێتە وەرگرتن، ئەڤە ژی دڤێت کورد ئێک ‏ھەلویست و ئێک دەنگ بن.‏

دیندار نەجمان دوسکی بۆ مالپەرێ پارتی دیموکراتی کوردستان ‏گۆت: حوکمەتا عیراقێ ھەر جارەکا دھێتە دروستکرن تووشی ‏کومەکا ئاریشان دبیت، ڤێ جارەێ ژی ب ھەمان رەنگ، بەلێ ھەر ‏حوکمەتەکا بھێتە دروستکرن دڤێت ھەموو پێکھاتێن عیراقێ ‏پشکداریێ تێدا بکەن، ئەو بەحس ھەیە کو دڤێت حوکمەتا نوویا ‏عیراقێ ئەوکەسانێن تەکنوقرات دروست بکەن گەلەک یا ‏بزحمەتە، چونکە ئەو کەس ھەموو د چارچوڤێ ئالیێن سیاسی دا ‏دیار دبن ئەڤەژی نابیتە تەکنوقراتی، چونکی دڤێت فەرمانێن خوە ‏ژوی ئالیێ سیاسی وەربگریت یێ پشتەڤانیا وی کری کو ببیتە ‏بەرپرس دناڤا حوکمەتێ دا. ‏

دیندار دوسکی گۆت: ھەر جارەکا کورد ل بەغدا ئێک دەنگ و ‏ئێک بڕیار و ئێک ھەلویست بن، رولێ کوردان ل بەغدا دێ یێ ‏گرنگ و کاریگەر بیت بۆ وەرگرتنا ھەر بڕیارەکا ل بەغدا ‏بھێتە دان، ھەروەسا دووپاتکر، راستە حوکمەتا نوویا عیراقێ ‏ھەرسێ پێکھاتێن عیراقێ دێ پشکداریێ تێدا کەن، بەلێ شیھە ‏ھەموو بزاڤان دکەن کو پێگەھێن سەرەکی یێن عیراقێ و خالێن ‏ھێزێ ب دەستخوڤە بینن و ددەستێن وانا دبیت، کو دڤێت ژبلی ‏کوردان ژی سوننە ژی گڤاشتنا ل سەر شیعان بکەن. ‏

‏ئه‌ڤرۆ نيوز: ‏

فەرماندەکێ وەزارەتا پێشمەرگەی ئاشکراکر، ب ئەگەرێ ڤالاھیەکا ‏زۆر یا ئەمنی د ناڤبەرا ھێزێن پێشمەرگە و ھێزێن عیراقێ رۆژ بۆ ‏رۆژێ چالاکیێن داعش زێدەتر دبن، و ھێزێن عیراقی رێکێ نادەن ‏بۆ ڤەگەڕیانا ھێزێن پێشمەرگەی وان بخۆژی شیانێن کۆنتڕۆلکرنا ‏رەوشا دەڤەرێن داعش تێدا نینە.‏

قارەمان شێخ کەمال، جێگرێ سوپا سالارێ وەزارەتا پێشمەرگەی بۆ ‏رۆژناما ئەڤرۆ گۆت: بەردەوام لڤینێن گروپا تیرۆرستێن داعش ل ‏دەڤەرێن جودایێن عیراقێ، ب تایبەتی چەکدارێن داعش ل دەڤەرێن ‏دکەڤنە ناڤبەرا ھێزێن پێشمەرگە و ھێزێن عیراقی ب ئاشکرا ھاتن ‏وچوونێ دکەن، ئەم وەک وەزارەتا پێشمەرگەی ئاگەھداری ھەموو ‏لڤینێن چەکدارێن داعشین، مخابن رۆژ بۆ رۆژێ چالاکیێن داعش ‏یێ زێدە دبن و ھێرشی سەر گوندان دکەن و خالێن پشکنینێ ل ‏دەڤەرێن عیراقێ ھەنە، ئەم پێشبینی دکەین رۆژ بۆ رۆژێ ھێشتا ‏چالاکیێن داعش زێدەببن، ھەتا ئەو ڤالاھیا ناڤبەرا ھێزێن ‏پێشمەرگە و ھێزێن عیراقی بمینیت دێ مەترسیا داعش زۆر ‏زێدەتربیت، ھێزێن عیراقی نەشێن ئەڤان دەڤەران کۆنتڕۆل بکەن، ‏و رێکێ ژی نادەن ھێزێن پێشمەرگەی ڤەگەڕن بۆ دەڤەرێن ‏کوردستانی ، ئەڤە ژی بۆیە مەترسی بۆسەر خەلکێ ئەڤان ‏دەڤەران، مە زانیاری لدۆر ھژمارا چەکدارێن داعش ھەیە ل ‏عیراقێ، بەلێ چو ئامارێن فەرمیی و دروست لبەردەست نینە.‏

ل دۆر بڕیارەکا حەیدەر عەبادی سەرۆک وەزیرێن عیراقێ بۆ ھنارتنا ‏ھێزێ ل ھەموو دەڤەرێن عیراقێ بن بناڤێ پاراستنا سەروەریا ‏عیراقێ قارەمان شێخ کەمال دیارکر، ئەو بڕیارا حەیدەر عەبادی د ‏کۆمبوونا جڤاتا ئاسایشا عیراقێ دا ھەیە، بەلێ نەشێت چو ‏پێنگاڤێن وەسا پاڤێت بۆ بەلاڤکرنا ھێزێ ل سەرانسەری عیراقێ، ‏ھەکە بابەت گەھشتێ ڤێ چەندێ بەغدا پیلانەکا وەسا بجە بینیت ‏و مەرەم ژێ خاکا ھەرێما کوردستانێ بیت، ئەڤە وی دەمی وەزارەتا ‏پێشمەرگە و حوکمەتا ھەرێما کوردستانێ یا بێدەنگ نابیت و دێ ‏ھەلویستەکێ ئێکگرتی ھەبیت، بەلێ دەمێ عەبادی یێ بەرب ‏دووماھیێ دچیت و یێ رۆژێن خوە تژمێریت باوەر ناکەین چو ‏پێنگاڤ و بڕیارێن وەسا بھێنە بجە ئینان، ھەکە مەرەم لێ دەڤەرێن ‏ناڤین و باشوورێ عیراقێ بن ئەڤە عیراق یا ئازادە ل سنورێ بن ‏دەستھەلاتا خوە چو پلانەکێ بجە بینیت.‏

ئەڤرۆ نيوز:‏

ل دووڤ ناڤەندا راگەھاندنا پەرلەمانێ عیراقێ، ئەڤرۆ پەرلەمان دێ روونشتنا خوە ‏یا ئاسایی یا ژمارە پێنج ئەنجام دەت و دانوستاندنا ل دۆر راستڤەکرنا پەیرەوێ ‏ناڤخوە و پێکئینانا لیژنێن بەردەوام یێن پەرلەمانی کەت‎.‎

پەرلەمانێ عیراقێ ل بەرە لیژنێن خوە یێن بەردەوام بەری پێکئینانا حوکمەتا نوو ‏دەست نیشان بکەت کو ژ 26 لیژنان پێکدھێت و گرنگترینێن وان لیژنان ژی ‏قانوونی، دارایی، ئاسایش، بەرگری و ھەرێم و پارێزگەھانە‎.‎