ئه‌ڤرۆ نيوز:
رێكخراوا NSA يا نه‌رويجى دو ته‌نده‌ران ژبۆ لايه‌نێن بازرگانى و كۆمپانيان رادگه‌هينيت كو هه‌ر لايه‌كێ حه‌زا كارى هه‌بيت دشێت بۆ ب ده‌ست ڤه ئينانا ڤان خزمه‌تان پێش كێشى رێكخراوا ناڤبرى بكه‌ت.
بۆ پێتر پێزانينان ڤان دو لينكان كليك بكه‌ن:
ته‌نده‌ر 1 TENDER 1
Construction and extension of water network for the WASH Program.
ته‌نده‌ر 2 TENDER 2
Construction of drinking water pipeline for the WASH Program
ئەڤرۆ نيوز:
بەرپرسەکێ بەنکا ناڤەندی یا عیراقێ ئاشکرا کر کو بڕیارە بەغدا ب رێیا بانکێن ئەھلی قەرەکێ بچووک بدەتە وەلاتیێن ھەرێما کوردستانێ.
عابد سالح، رێڤەبەرێ گشتیێ بانکا ناڤەندی ل ھەرێما کوردستانێ دیار کر کو بڕیارە ئاسانکاری بۆ پێدانا قەران ب وەلاتیێن ھەرێما کوردستانێ بھێنەکرن و بۆ باسنیۆز گۆت: ”رەنگە بەنکا ناڤەندی یا عیراقێ قەرزێن بچووک ب رێیا بەنکێن ئەھلی بدەتە وەلاتیێن ھەرێما کوردستانێ و بۆ چەوانیا پێدانا قەران پاش دێ بڕیار و رێنما ھێنە دەرکرن”.
ناڤھاتی ئاماژە دا وێ چەندێ کو دەرفەتەکا باش ھەیە بۆ وێ چەندێ کو ئەو قەرێن ل پارێزگەھێن دی یێن عیراقێ ب وەلاتیان دھێنە دان ل ھەرێما کوردستانێ ژی بھێنەدان و گۆت: “نوکە مامەلێن بەنکی دناڤبەرا ھەولێر و بەغدا دا گەلەک بەر ب پێشڤەچووینە و مە ھیڤیێن مەزن ھەنە ئەو قەرێن ل بەغدا دھێنەدان ژ ھەرێما کوردستانێ ژی بگرن”.
ئەڤرۆ نيوز:
سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا ئاشکرا کر کو حوکمەتا عیراقێ بڕیار یا دای ئەو قوتابیێن ل ھەرێما کوردستانێ د خوینن و خەلکێ مووسل بن، د دەمەکی دا ڤان قوتابیان نە جھێ ئاکنجیبوونێ و نە شیانێن ھاتنوچوونێ ھەنە ژ بەر ڤێ چەندێ مەترسی ھەیە ئەڤ سالە ژ خواندنێ بێ بەھر بن.
بەرەکات شەمۆ، سەرۆکێ لیستا برایەتی و پێکڤەژیانێ ل جڤاتا پارێزگەھا نەینەوا دیار کر کو جڤاتا وەزیران بریارەک دەرکریە بۆ وان نوونەراتیێن ل ھەرێما کوردستانێ ل پارێزگەھێن ھەولێر و دھۆکێ ھەین بۆ ب رێڤەبرنا کاروبارێن قوتابیێن ئاوارە یێن کو ل زانکۆ یێن ھەرێما کوردستانێ د خوینن، پێدڤیە بھێنە داخستن و مامۆستا و قوتابی ڤەگەڕنە مووسل و گۆت: “جڤاتا وەزیران داخواز ژ وەزارەتا خواندنا بلند و ڤەکۆلینێن زانستی یا حوکمەتا عیراقێ کریە ڤێ بڕیارێ بجە بینن”.
ناڤھاتی ئاماژە دا وێ چەندێ کو ئەو قوتابیێن ل زانکۆیێن ھەرێما کوردستانێ د خوینن بەھراپتریا وان کێم نەتەوەنە و پێکھاتن ئێزدی و مەسیحی نە وھەتا نوکە ژی خێزانێن وان ئاوارەنە یان ل دەشتا نەینەوا نە ژ بەر ڤێ چەندێ نەشێن بچنە مووسل و بەردەوامیێ ب خواندنا خوە بدەن، سەرەریی ڤێ چەندێ نەشێن ھاتنوچوونێ بکەن و پشکێن ناڤخۆ ژی نینن لێ بمینن و بۆ مالپەرێ فەرمیێ پارتی دیموکراتی کوردستان گۆت: “ئەڤ بڕیارە بھێتە بجە ئینان دێ قوتابی تووشی ئاستەنگێن مەزن بن و رەنگە ئەڤ سالە ژ خواندنێ بێ بەھر بن”.
ژ ئالیێ خوە ڤە فراکسیۆنێ پارتی دیموکراتی کوردستان ل پەرلەمانێ عیراقێ یاداشتەک دایە سەرۆکاتیا پەرلەمانێ عیراقێ بۆ وێ چەندێ ئەڤ بڕیارە نەھێتە بجە ئینان، چونکی قوتابی ژ ئەگەرێ نەبوونا شیانێن ماددی نەشێن ل مووسل بخوینن و سەرەرایی ڤێ چەندێ ئێمناھیا باژێری ژی نەدئاستێ پێدڤی دایە.
د ھەمان یاداشت دا ھاتیە کو ھژمارا وان قوتابیێن ل ھەرێما کوردستانێ درێژیێ ب خواندنا خوە ددەن دو ھزار و 200 قوتابی نە کو ھەموو ژ ترسێن تیرۆرستێن داعش دا ئاوارەبووینە.
ئەڤرۆ نيوز:
سەرپەشتیارێ گشتی یێ فیدراسیۆنا پەنابەرێن عیراقێ دیار کر کو د سێ سالێن بۆری دا 133 کەس د ریێا چوونە ژ دەرڤەی وەلاتی دا بێ سەروشوون بووینە و کۆچکرنا وەلاتیان ژی یا بەردەوامە.
ئاری جەلال، سەرپەشتیارێ گشتی یێ فیدراسیۆنا پەنابەرێن عیراقێ ئاشکرا کر کو دیاردا کۆچکرنێ بەرامبەر سالێن بۆری یا کێمبووی، پەنابەرێن بەری رێکەفتنا وەلاتێن ئورۆپا دگەل تورکیا بھێتە ب جھئینان ب رێژا 90% چووینە وەلاتێن ئورۆپی، ھەموویان ماف پێ ھاتینە دان، وەکو خواندن و دەلیڤێن کارکرنێ و گۆت: “رەوشا ژیانا وان ل وان وەلاتا یا باشە، بەلێ ئەو پەنابەرێن پشتی رێکەفتنێ چووینە ئورۆپا و ژ بەر دەستەسەرکرنا وان ب رێکی ڤە تووشی گەلەک ئاریشان بووینە”.
ئاشکرا ژی کر کو ھەر ژ 20-6-2017 ھەتا نوکە 59 کەسان ب رێڤە گیانێ خوە ژ دەستدایە و بێ سەروشوون بووینە و گۆت: “کۆچکرنا وەلاتیان یا بەردەوامە، د سێ سالێن بۆری دا 280 کەسێن عیراقی گیانێ خوە ژ دەستدایە و پتریا وان ژن و زارۆکن، سالا بۆری ژی 65 کەس مرینە و بێ سەروشوون بووینە و 31 تەرم یێن ھاتینە زڤڕاندن و 34 وەلاتی ژی بێ سەروشوونن، د سێ سالێن بۆری دا 133 کەس بێ سەروشوون بووینە”.
ئەڤرۆ نيوز:
ل چەندین باژێرێن مەزن یێن کەتەلۆنیا ب سەدھزاران وەلاتیان دەست ب خوەنیشادانێ کرن و داخوازا جودابوونێ ژ ئیسپانیا کرن و راگەھاندن کو دڤێت حوکمەتا نوو یا ئیسپانیا رێزێ ل مافێن مە بگریت و مە بەری نھا بریارا خوە یا دای و دڤێت وەلاتێن ئورۆپا ژی پشتەڤانیێ ل مافێن مە یێن رەوا بکەن، چونکو دیارکرنا مافێ چارەنڤیسێ مافەکێ رەوا یێ ھەموو گەلێ جیھانێ یە و ئەم ھەلویستێ حوکمەتا بەرێ یا ئیسپانیا ل دژی مافێن خوە یێن رەوا ب توندی شەرمزار دکەین.
دەزگەھێن راگەھاندنا ئورۆپا ژی دیار کرن کو ل گەلەک دەڤەران د ناڤبەرا خوەنیشادەران و ھێزێن ئێمناھیێ دا شەر دەرکەفت و چەندین کەس بریندار بوون و گەلەک کەس ژی ھاتنە دەستەسەر کرن، سەرۆکێ بەرێ یێ ھەرێما کەتەلۆنیا ژی راگەھاند کو چو ھێزەک نەشێت ب زۆرێ مە نەچار بکەت کو ل گەل ئیسپانیا بژین، ھەکە حوکمەتا ئیسپانیا رێزێ ل مافێن مە نەگریت ئەم ژی نەچار نینین کو ل گەل وەلاتەکێ بژین کو ب ھەموو رەنگەکێ زۆرداریێ ل دژی مە بکار دئینیت.
ل ئالیێ دی ھژمارەکا وەلاتیێن کەتەلۆنیا کو ل دژی سەرخوەبوونێ نە ژی دیار کرن کو ب توندوتیژیێ چو پرس ناھێنە چارەکرن و نھا دەمێ جودابوونا ژ ئیسپانیا نینە و ھەکە کەتەلۆنیا ل گەل ئیسپانیا بیت دێ بھێزتر بیت و ل ئالیێ دی دڤێت حوکمەتا ئیسپانیا ژی پتر گرنگیێ بدەتە ھەرێما کەتەلۆنیا و توندوتیژیێ ل دژی خەلکی و خوەنیشادەران بکار نەئینیت.
ئه‌ڤرۆ نيوز:
رەجەب تەیب ئەردۆگان سەرۆک کۆمارێ تورکیا راگەھاند سەرەدانا من یا بۆ ئەلمانیا گەلەکێ باش بوو و مە دەلیڤە دیت ل گەل بەرپرسێن ئەلمانیا ئالۆزیێن د ناڤبەرا خوە دا گەنگەشە بکەین و دیسان من ژ وان خواست کو ئەندامێن پەکەکێ و جەماعەتا گولەنی دەستەسەر بکەن و بدەنە دادگەھێ و د وارێ ئابووری دا ژی ئەز ب باوەرم د دەمەکێ نێزیک دا دێ رەوشا ئابووریێ گەلەکێ باش بیت و بۆ ڤێ یەکێ مە ژ سەرمایەدارێن ئەلمانی خواست کو ل تورکیا کار بکەن).
ئەردۆگانی د پشکەکا دی یا ئاخڤتنا خوە دا ژی بەرسڤا رەخنێن ئێکەتیا ئورۆپا دا و راگەھاند کو دیمۆکراسیا تورکیا د ئاستەکێ بلند دایە و گۆت: (گەلەک کەس ھەبوون کو لێ ژێر ناڤێ رۆژنامەگەریێ کار بۆ رێکخستنێن تیرۆرست دکرن و نھێنیێن دەولەتێ بۆ دەرڤە ئاشکرا دکرن و دادگەھێن مە دەربارێ وان کەسان بریارا دەستەسەرکرنێ دان و دیسان ھژمارەکا زێدە ئەندامێن رێکخستنا تیرۆرست یا گولەنی ژ بەر کریارێن خوە یێن تیرۆرستی ھاتینە گرتن و ئەو یەک ژی کارەکێ قانوونی یە).
سەرۆک کۆمارێ تورکیا ل دۆر رۆژئاڤایێ کوردستانێ و باکورێ سووریێ ژی راگەھاند کو ئەو دێ ل رۆژھەلاتێ فراتێ ژی ئۆپەراسیۆنێن سەربازی ئەنجام بدەن و گۆت: (مخابن ب پشتەڤانیا ئەمریکا رێکخستنا تیرۆرست رۆژھەلاتێ فراتێ کریە ژێر کۆنترۆلا خوە، کا مە چاوا عەفرین ژ دەستێ وان دەرخست و ئازاد کر ئەم دێ وەسا ژی رۆژھەلاتێ فراتێ ژ کۆنترۆلا یەپەگێ دەرخینین و دڤێت ئەمریکا ژی ئێدی دەستان ژ پشتەڤانیکرنا یەپەگێ بەردەت و چەکان نەدەتە کوردان).
ئەردۆگانی د داویا ئاخڤتنا خوە دا ژی بەحسێ باشورێ کوردستانێ کر و راگەھاند کو ل شەنگالێ و قەندیلی ھژمارەکا زێدە ئەندام و چەکدارێن رێکخستنا تیرۆرست کۆم بووینە و ل وێرێ ھەم ژیانا خەلکی دکەنە ژێر مەترسیێ و ھەم ژی ھێرشی تورکیا دکەن و گۆت: (دەمێ ژناڤبرنا پەکەکێ ل قەندیلی و شەنگالێ ھاتیە و ھێزێن مە ئامادەکاریێ دکەن و د دەمەکێ نێزیک دا ئەم دێ قەندیلی و شەنگالێ ژ پەکەکێ پاقژ کەین).
ئه‌ڤرۆ نيوز:
چاڤدێرەکێ سیاسی دخازیت پارتی ل قوناغا داھاتی پێداچوونەکێ ل سیستەمێ حوکمرانیێ بکەت و ئەو مەترسیێن ل سەر دابەش بوون و نەمانا قەوارێ ھەرێمێ ھەین نەھێلیت.
رەمەزان کێڤلی چاڤدێرێ سیاسی بۆ رۆژناما ئەڤرۆ گۆت: پشت سالا 1992 کەتوارەک ل ھەرێما کوردستانێ ھەبوویە کو ھەبوونا دو ئیدران بووینە و پێشبینی دھێتەکرن کابینا داھاتی یا حوکمەتێ ھەر پارتی و ئێکەتی دروست بکەن، دوور بینم حوکمەتا بنگەە فراوان بھێتە دروستکرن چنکو کوردستانێ سەربور ل گەل ھەنە و کابیان چوویی حوکمەتا بنگەە فرەە نەشیایە خزمەتا خەلکێ کوردستانێ بکەت.
کێڤلی ئەو ژی ئاشکراکر کو پێدڤی یە ژ روویێ قانوونی ڤە دەست ھەلاتێن جێگرێ سەرۆک وەزیران ل قوناغا داھاتی بھێنەکێمکرن و رێکخستن وکار بھێتەکرن پتر خزمەتا خەلکێ کوردستانێ ژ ھەر روویەکی ڤە بھێتەکرن.
کێڤلی بگرنگی زانی پێنگاڤا دەسپێکا پارتی کو خودانا مەزنترین کورسیکێن پەرلەمانی، پێداچوونێ ل سیستەمێ حوکمرانیێ ل ھەرێمێ دا بکەت، نڤسینا دەستورێ ھەرێما کوردستانێ یە و ب ئەڤێ پێنگاڤێ مەترسی ل سەر ھەرێما کوردستانێ وەک ژ ناڤچوون و دابەش بوون نەمینت و ھەر دەما دەستور ھاتە پەسەندکرن ئێدی مەترسی یا دابەشبوونا ھەرێمێ ژلایێ پارتەکا سیاسی ڤە نامینت، خالا دووێ دڤێت چاکسازی بھێنە ئەنجامدان، ئێدی ھەلسنگاندنەکا ستراتیجی بۆ ھەموو کەرتێن ژیانێ ل ھەرێما کوردستانێ بھێتەکرن، چنکو ژلایێ گەشەپێدانا جڤاکی ڤە گەلەک کێم و کاسی ھەنە.
ھەمان چاڤدێرێ سیاسی ب گرنگی زانی سیستەمەک بھێتەدارێتن و جوداھی دناڤبەرا پارێزگەھا دا نەھێتەکرن و نەبتنێ بۆ خەلکێ پارێزگەھا دھۆکێ و ئەو پرۆژێن پێدڤی ل دھۆک بھێنە ئەنجامدان وەک پرۆژێ فرۆکخانێ، نەخوشخانە و رێک وبان و ئاڤاکرنا نەخوشخانا و قوتابخانا و ل دووڤ ھەمو داتایێن بەر دستێ مە ژ ئەنجامێ ئەو ھەڤرکیا توندا دناڤبەرا پارتی و ئێکەتیێ دا دھۆک بوویە قوربانی لەوما گرنگە چاڤ خشاندنەک ل رەوشا پارێزگەھا دھۆکێ دا بھێتەکرن، گرنگی ب ھەموو کەرتان بھێتەدان بۆ نموو دەستا سلێڤانیا یا ناڤدارە ب کەرتێ چاندنێ ماوێ چەندین سالە ھاتیە پشت گوە ھاڤێتن پێدڤی یە وەک کەرتێ چاندنێ مفا ژ ئەڤی سامانێ مەزن بھێتە وەرگرتن.
ئه‌ڤرۆ نيوز:
بەرپرسێ پشکا قانونی ل دەزگەھێ ھەلبژاردنا پارتی دیموکراتی کوردستان ئاشکرا کر: پارتی دیموکراتی کوردستان ھژمارەکا سکالایان تومارکریە ل پروسەیا ھەلبژارتنێن تایبەت و گشتی ، پارتی پتر ژ 300 سکالایا تومارکرینە ل گوری قانونا تومارکرنا سکالایا پێَشکەشی کومیسیونێ ھاتینە کرن ،چاڤەرێ بەرسڤادانا ئەنجامێن سکالایا دکەین ل کومیسیونێ پشتی ھویر بینیێ لسەر دکەت ل دەمەکێ دیارکریدا بەرسڤا مەبدەت ، ئەو سکالایێن پارتی دیموکراتی کوردستان تومارکری ل روژا ھەلبژارتنا تایبەت و گشتی ل سنورێ پارێزگەھا سلێمانیێ و گەرمیان و کویەو ئەو قەزا و ناحیێن سەر ب پارێزگەھاسلێمانیێ ڤە تومارکرینە .
ھەوار محەمەد بەرپرسێ پشکا قانونی ل دەزگەھێ ھەلبژاردنێن پارتی دیموکراتی کوردستان بۆ روژناما ئەڤرۆ راگەھاند : پێشبینی دھێت کرن پشتی راگەھاندنا ئەنجامێن سکالایان و دەستنیشانکرنا وان سندوقێن قردێلا سور ھاتیە لێدان ئەنجامێن ھەلبژارتنا گورانکاری بسەر دا بھێن ئەگەر رێژەکا کێم ژی بیت ، مە وەک پارتی باوەری ھەیە دێ سکالایێن مە گەھن جھێ خوەو دێ ئەنجام ھەبیت ژبەرکو بەلگەھێن ب ھێز ل گەلدا ھەنە ،ئەو ئەنجامێن ھەتا نوکە ھاتیە بەلاڤکرن ژلایێ دەزگەھێن ھەلبژارتنێن لایەنێن سیاسی و راگەھاندنێ پشتی ئەنجامێن سکالایا دێ گورانکاری ب سەر دا ھێن .
ناڤبری گۆتژی: پارتی دیموکراتی کوردستان ل سنورێ پارێزگەھا دھوک و ھەولێر ژی سکالا تومارکرینە بەلێ ب رێژەکا گەلەک کێم ژبەرکو پتریا سکالایێن پارتی دکەڤن سنورێ پارێزگەھا سلێمانیێ و ئیدارەیا راپەرین و گەرمیان ئەوێن ھاتیە تومارکرن ،ئەو سندوقا سکالا ل سەر ھاتیە تومارکرن قردێلا سور ھاتیە لێدان و ھەتا سکالا نەھێتە راگەھاندن ب ئەنجامڤە دەنگێن ناڤا وێ سندوقێ ناھێنە ھژمارتن بۆ چۆ لایەنەکێ ھەتا کومیسیون بریارێ لسەر نەدەت پشتی دیراسەکرنا سکالایێ ، وەک پارتی دیموکراتی کوردستان چاڤەرێ ئەنجامێن سکالایا دکەین کو ل ھەلبژارتنێن تایبەت و گشتی ھاتیە تۆمارکرن.
ئه‌ڤرۆ نيوز:
ئێکەتیا نیشتیمانی کوردستان بزاڤان دکەت پارێزگارەکێ ئێکەتی بۆ پارێزگەھا کەرکووکێ دانیت و بۆ ڤێ مەرەمێ چەندین کۆمبوون ل گەل لایەنێن عەرەبی ئەنجامداینە، بەرپرسەکێ پارتی ژی رەتکر ئێکەتی بێی پارتی بشێت پارێزگارێ کەرکووکێ دانیت، ودبێژیت ھەتا جڤاتا پارێزگەھێ کۆمبوونێ نەکەت ورێککەفتن نەھێتەکرن کۆمبوونێن ئێکەتیێ چ ئەنجام نابن.
پشتی روودانێن 16ی ئۆکتۆبەرا سالا بۆری حوکمەتا عیراقێ راکان سەعید ب وەکالەت کریە پارێزگارێ کەرکووکێ ل جھێ دکتۆر نەجمەدین کەریم و کورد ژی ل کەرکووکێ دژی پارێزگارێ عەرەبن، ژبەرکو ئەڤە پارێزگارەکێ سەربازیە و پۆستێ پارێزگاری پشکا کوردانە، بەلێ پارتی ئێکە ژوان لایەنێن دانپێدانێ ب ئیدارەیا نوکەیا کەرکووکێ ناکەت، و ب دەستھەلاتا داگیرکەر دزانن ھەتا وی دەمێ رەوش دھێتە ئاسایی کرن و پێشمەرگە ڤەدگەڕیت بۆ کەرکووکێ.
محەمەد کەمال جێگرێ سەرۆکێ جڤاتا پارێزگەھا کەرکووکێ بۆ رۆژناما ئەڤرۆ گۆت: د کۆمبوونێن بۆری یێن ھەردو مەکتەبێن سیاسی یێن پارتی و ئێکەتیێ بڕیار ھاتیەدان بۆ تەنا کرنا رەوشا کەرکووکێ و دانانا پارێزگارەکێ کورد لیژنەیەک بھێتە پێک ئینان، ئەز بخوە ئەندامێ لیژنێ مە، بەلێ ھێشتا ئەم نەگەھشتینە چو ئەنجامان و برادەرێن ئێکەتیێ دچنە کەرکووکێ و بارەگا ھەنە، بەلێ ئەم وەکی پارتی پشتی خیانەتا 16ی ئۆکتۆبەرێ ڤەنەگەڕیاینە کەرکووکێ و ناڤەگەڕین ھەتا مە دەستھەلات نەبیت، چونکە بێ دەستھەلات مە پارێزگارەکێ کورد ژی ھەبیت چو مفایێ خوە نینە، ژبەر کو حەشدا شەعبی یا فەرمانێ ب پارێزگاری دکەت.
محەمەد کەمال دیارکر” راستە ئەڤە چەند رۆژەکە ھژمارەک ژ ئەندامێن ئێکەتیێ ل گەل عەرەبێن ناڤا جڤاتا پارێزگەھا کەرکووکێ یێ کۆمبوونان بۆ دیارکرنا پارێزگارەکێ نوو دکەن، بەلێ کۆمبوونێن وانا دقانوونی نینە، چونکە کورد پشکدار نینە د ئەڤان کۆمبوونان دا و تنێ تورکومان ژی پشکدار نینە، لەوڕا ھەتا سەرۆکێ ئەنجوومەنی و زۆربەیا ئەندامان بەرھەڤی کۆمبوونی َنەبن دانانا پارێزگاری سەرناگریت، ھەر رێکەفتن و کۆمبوونەکا بھێتەکرن ئەم وەک ئەنجوومەن رەت دکەین، بەری نوکەژی مە گوتیە کۆمبوونا ئەنجوومەنی لھەر جھەکێ بھێتەکرن دێ بەرھەڤبین، بەلێ ئەم ناچینە کەرکووکێ بن دەستھەلاتا حەشدا شەعبی.
ب گورەی زانیاریێن دەست رۆژناما ئەڤرۆ کەفتین، ئێکەتی دخوازیت خالد شوانی ل شوونا دکتۆر نەجمەدین کەریم بکەتە پارێزگارێ کەرکووکێ، بەلێ ژلایێ قانوونی ڤە رێکناھێتەدان پارێزگار ل دەرڤەی ئەنجوومەنێ پارێزگەھێ بھێتە دیارکرن و ھەتا نوکە دکتۆر نەجمەدین کەریم پارێزگارێ فەرمیێ کەرکووکێ یە، بێی رێکەفتن دگەل پارتی و یەکگرتوویا ئیسلامی ب چو شێوەیەکی پارێزگار ناھێتە دانان، ژبەرکو دەنگێن پارتی و یەکگرتوو زۆرن ل ئەنجوومەنێ پارێزگەھێ.
ئەڤرۆ نيوز:
ئەندامێ سەرکرداتیا پارتی دیموکراتی کوردستان، ئاراس حەسۆ میرخان راگەھاند، ھێشتا گەلەک مایە بۆ پێکئینانا حوکمەتا نوویا ھەرێما کوردستانێ، بەلێ وەک قانوون و ماف ، مافێ پارتی دیموکراتی کوردستانە و دشێت ب تنێ حوکمەتێ پێکبینت، ل گەل وێ چەندێ ژی باوەرناکەم، پارتی ب تنێ حوکمەتێ پێکبینیت، بەلکێ ب پشکداریا ئالیەکی دبیت کو دڤێت پێگیری رێنمای و بنەمایێن حوکمەتی ببیت.
سەبارەت پێکئینانا حوکمەت بنکە فرەوان ژی، ئەندامێ سەرکدراتیا پارتی گۆت: جارەکا دیتر حوکمەتا بنکە فرەوان ناھێتە پێکئینان، چونکی حوکمەتا بنکە فرەوان بەری نوکە ئەزموونەکا شکەستن خوار ھەبوو و دووبارە نابیتە ڤە.
رۆژا ئێکەمبی رێککەفتی 30 ئەیلولا سالا 2018، ھەلبژاترنێن پەرلەمانێ ھەرێما کوردستانێ ھاتینە کرن، پارتی دیموکراتی کوردستان ب قەبارەکێ سەربخوە پشکداری ھەلبژارتنان کر، ژبلی پارتی (27) قەبارێن سیاسی یێن کوردستانی بۆ ب دەستڤەئینانا 100 کورسیان پشکداری د ھەلبژارتنان دا کرن، 11 کورسیێن دیتر بۆ کتایا پێکھاتێن دیتر یێن ھەرێما کوردستانێ کو ئەوژی دێ ھەڤڕکیێ ل سەر ئەنجام دەن، و ل گۆڕ ئەنجامێن بەراھیێ یێن ھەلبژارتنان پارتی دیموکراتی کوردستان، نیزیکی (45) کورسیێن پەرلەمانی ب دەستخوڤە برینە.
نيشاندان