ئه‌ڤرۆنيوز:

وه‌زاره‌تا ناڤخوه‌ ل هه‌رێما كوردستانێ راگه‌هاند، هه‌ر كارمه‌نده‌كێ ناڤێ وى دليستا ده‌نگدانا تايبه‌ت دا نه‌بيت، دشێت ل ده‌نگدانا گشتى ده‌نگى بده‌ت وهه‌موو كارمه‌ندێن هاتنوچوونێ وره‌گه‌زنامێ وبه‌رهنگاريا توندوتيژيا دژى ژنان دشێن ل ده‌نگدانا گشتى ده‌نگى بده‌ن.

وه‌زاره‌تا ناڤخوه‌ ب نڤيسارا خوه‌ يا هژمار 13912 ل 23/9/2018 كو ئاراسته‌ى هه‌موو رێڤه‌به‌ريێن گشتى يێن هێزێن ناڤخوه‌يى كريه‌، ئاماژێ ب وێ دكه‌ت ئه‌و كارمه‌ندێن ناڤێن وان دوان CD يان نينه‌ يێن هاتين، دشێن ل رۆژا ده‌نگدانا گشتى ده‌نگى بده‌ن.

رۆهنكر ژى كو هه‌موو كارمه‌ندێن رێڤه‌به‌ريا گشتى يا هاتنوچوونێ وره‌گه‌زنامێ وبه‌رهنگاريا توندوتيژيێ دژى ژنان دشێن ل رۆژا ده‌نگدانا گشتى ده‌نگ بده‌ن.

ئه‌ڤرۆنيوز:

ب به‌رهه‌ڤبوونا سه‌رۆك مه‌سعود بارزانى، ئه‌ڤرۆ پێنجشه‌مبى 27/9/2018 كه‌رنه‌ڤاله‌كا جه‌ماوه‌رى يا مه‌زن بۆ پشته‌ڤانيا ليستا 183 يا پارتى ديموكراتى كوردستان ل ياريگه‌ها دهۆكێ يا وه‌رزشى هاته‌ گێران.

سه‌رۆك بارزانى په‌يڤه‌ك دوێ كه‌رنه‌ڤالێ دا پێشكێشكر وگۆت” ئه‌م يێ به‌ر ب رۆژه‌كا ديرۆكى ڤه‌ دچين كو 30 ئه‌يلوولێ يه‌، پار وه‌كو ڤان رۆژان هه‌وه‌ ديرۆك دروستكر ل 25 ئه‌يلوولێ، د وێ باوه‌ريێ دامه‌ ل 30 ئه‌يلوولێ ژى دێ رۆژه‌كا دى يا ديرۆكى دروست كه‌ن وسه‌روه‌ريێ تۆماركه‌ن”.

گۆت ژى” هه‌وه‌ ل 25 ئه‌يلوولێ ئيرادا كوردستانێ سه‌رخست، پشتى خيانه‌تا 16 ئوكتۆبه‌رێ ژى، پێشمه‌رگێ قه‌هره‌مان كه‌رامه‌تا هه‌موويان پاراست، هوون وهه‌موو خه‌لكێ كوردستانێ پشت راست بن تا قه‌هره‌مان وپلنگێن كوردستانێ هه‌بن، دێ پاراستى مينن”.

دياركر” ل هه‌لبژارتنێن په‌رله‌مانێ عيراقێ ل 12 گۆلانا بۆرى، ديسان هه‌وه‌ سه‌روه‌ريه‌كا مه‌زن تۆماركر، گه‌له‌كان پێشبينى دكر چونكى پارتى سه‌ركێش وپێشه‌نگا كاروانێ سه‌ربخوه‌يێ بوو، دێ هێته‌ سزادان، به‌لێ نه‌زانى كو گه‌لێ كوردستانێ دێ پارتى كه‌نه‌ حزبا ئێكێ ل سه‌ر ئاستێ هه‌موو عيراقێ”.

ئاماژه‌ كر” دو تشتێن گه‌له‌ك گرنگ دوان هه‌لبژارتنان دا هاتنه‌ پێش، سه‌نگا پارتى دياربوو بۆ هه‌موو لايه‌كى رۆهن بوو پارتى هێزه‌كا مه‌زنه‌ وچو برياره‌ك بێ پارتى ناهێته‌ دان وئه‌من وئاسايش ل وه‌لاتى به‌رقه‌رار نابيت هه‌كه‌ پارتى هاريكار نه‌بيت”.

گۆت ژى” نوكه‌ ده‌ليڤه‌كا گونجاى يا هاتيه‌ پێش وهه‌موو بزاڤان دكه‌ين كێشێن دناڤبه‌را هه‌رێمێ وبه‌غدا ب رێزلێكگرتنێ ولێكتێگه‌هشتنێ بهێنه‌ چاره‌سه‌ركرن”.

سه‌رۆك بارزانى خوياكر”رۆژا ئه‌يلوولێ رۆژه‌كا چاره‌نڤيسساز وگرنگه‌، مه‌ به‌رنامه‌كێ مه‌زن وگوهۆرين وچاكسازيێن مه‌زن ل پێشه‌ بۆ دامه‌زراندنا حوكمه‌ته‌كا ب هێز، به‌رنامێ مه‌يه‌ نڤشێ نوو به‌رپرسياره‌تيا ئێكێ وه‌ربگرن، ئه‌م نابێژين كه‌موكۆرى نه‌بوون ونابن، كه‌موكۆرى گه‌له‌ك هه‌بوون، به‌لێ باش بيرا هه‌وه‌ بهێت ئه‌و ده‌ستكه‌فتا هه‌ى پشكا هه‌ره‌ مه‌زن ل سه‌ر ده‌ستێ پارتى يا هاتيه‌ پێش، ئه‌م سۆزێن مه‌زن ناده‌ين، به‌لێ سۆز بيت دێ وان گوهۆرينان كه‌ين كو داخوازا هه‌وه‌يه‌ ول به‌رژه‌وه‌نديا هه‌وه‌ دايه، پارتى يا ب هێز بيت، دێ كوردستان ب هێز بيت، پارتى مال دروستكر، لايه‌نێن دى شه‌رێ ناڤمالێ دكه‌ن، پارتى بۆ شه‌رێ چو حزبه‌كێ دروست نه‌بوويه‌، به‌لكو بۆ خزمه‌تكرنا هه‌وه‌ يا دروست بووى”.

ل دووماهيێ سه‌رۆك بارزانى گۆت” من دڤێت به‌رسڤا پرسياره‌كێ بده‌م كو گه‌له‌ك كه‌س حه‌زدكه‌ن بزانن  سامانێ من چه‌نده‌، هنده‌ك دبێن 48 ملياره‌ وهنده‌ك دبێژن 600 مليار دۆلاره‌، به‌لێ ئه‌ز ب خوه‌ ب زه‌نگينترين كه‌س دزانم ل سه‌ر روويێ جيهانێ، سامانێ من پشته‌ڤانيا 48 مليۆن كوردانه‌ نه‌كو 48 مليار دۆلار.

ئه‌ڤرۆ نيوز:

فرۆكێن شه‌ركه‌رێن هه‌ڤپه‌يمانان چه‌كدارێن داعش ل چيايێ قه‌ره‌چووغ بۆردۆمانكرن و سێ چه‌كدار كوشتن.

سيروان بارزانى، سه‌رپه‌رشتيارێ ميحوه‌رێ مه‌خمۆر بۆ رووداو راگه‌هاند ئه‌ڤرۆ فرۆكێن هه‌ڤپه‌يمانێن نێڤده‌وله‌تى د رێيا 27 بۆمبان دا 20 باره‌گايێن داعش ل چيايێ قه‌ره‌چووغ بۆردۆمانكرن.