ئەڤرۆ، عەزیز ھەورامی:

سەکرتێرێ گشتیێ حزبا سوسیالیستا دیموکراتی کوردستان دھەڤدیتنەکا تایبەت ‏بۆ رۆژناما ئەڤرۆ راگەھاند، ئەم ل گەل پێکئینانا حوکمەتا بنکەفرەوان نینین، ‏چونکی ئەو بتنێ بۆ رازیکرنا حزبایە، کوردستانێ پێدڤی ب دستووری و پۆستێ ‏سەرۆکێ ھەرێما کوردستانێ ھەیە.‏

مەحمەدێ حاجی مەحموود، دچاڤپێکەفتنەکا تایبەتدا بۆ رۆژناما ئەڤرۆ گۆت: ئەم ‏وەکی حزبا سوسیالیست دیموکراتی کوردستان، نە ل گەل حوکمەتا بنکەفرەوانین، ‏چونکی ئەو بتنێ بۆ رازیکرنا حزبایە، ل کوردستانێ کەتواری وەسا دیارە کو ھەکە ‏تۆ حوکمەتێ ل ھەولێرێ دروست بکەی، تو نەشێی حومکڕانیا خوە ل ھەلەبجە و ‏سلێمانیێ بکەی، ھەکە نە ل وەلاتێن دیموکراسی و دستووری، ھەر حزبەکا پڕانیا ‏کورسیێن پەرلەمانی ب دەستخوەڤە بینیت، ئەو ل گەل حزبەکێ ب قەدەر ‏کوردسیێن پێدڤی دێ پشکداریێ د پێکئینانا حوکمەتێ دا کەن، کو نوکە پارتی 45 ‏کورسیێن پەرلەمانی بدەستڤە ھاتبن دشێت ل گەل 11 کورسیێن دیتر حوکمەتێ ‏دروست بکەت، بەلێ ب باوەریا من نوکە پارتی و ئێکەتی دشێن پێکڤە حوکمەتێ ‏دروست بکەن، بەلێ حەز ھەیە حزبێن دیتر پشکداری د کابینا (9) یا حوکمەتا ‏ھەرێما کوردستانێ دا بکەت.‏

مەحمەدی حاجی مەحموود خوەیاکر، دڤێت ئەو حزبا پڕانیا دەنگان ب دەستخوەڤە ‏ئیناین، ددەمێ دانوستاندنێ دا ل گەل حزبێت کوردستانی وێ کێشێ بنبڕ بکەت، ‏کو ھەر حزبەکا پشکداری د حوکەتێ دا کر، دڤێت سەرەدەریا حوکمڕانیێ بکەت، و ‏نابیت د ئاقارەکێ دیتر بچیت، ئانکو دڤێت ل گەل حوکمەتێ بیت یان ژی ‏ئۆپۆزسیۆن بیت، نەک وەکی چار سالێن بۆری یێن ژیێ حوکمەتێ بۆ ھندێ خەلکێ ‏ب سەردا ببەن خوە ژ حوکمەتێ ڤەکێشان.‏

سکرتێرێ گشتی یێ حزبا سۆسیالیستا دیموکراتی کوردستان ھەروەسا گوت: ‏پڕانیا حزبان حەز دکەن پشکداریێ د حوکمەتا نوویا ھەرێمێ دا بکەن، بەلێ ب ‏باوەریا من یا پێدڤی ناکەت، ھەموو حزب پشکداریێ د حوکمەتێ دا بکەن، ژ بلی وان ‏حزبێن کو دشێن پێکڤە حوکمەتێ پێکبینن و برێڤەبرنا ھەرێمێ بکەن، ل دووماھیێ ‏پارتی و ئێکەتی دشێن ب ھەڤپشکی حوکمەتێ پێکبینن کو چ کێشە بۆ دروست نەبن. ‏

سەبارەت سەرەدانا سەرۆک بارزانی بۆ بەغدا، سەرکردێ حزبا سوسیالیست ‏گۆت: رەوشا نوکە وەسا دخوازیت چارەکرنا کێشان بھێتە کرن، کێشێن ناڤمالیا ‏شیعی و شیعی ھەنە، نەوەکی کێشێن شیعە و سونیانە، چونکی ئەوێ سونی نەبیت ‏یان یێ ڕەڤی بۆ دەرڤەی وەلاتی یان ژی یێ ھاتیە ھەرێما کوردستانێ، پشتی ‏رێککەفتنا ئەمریکا و بەریتانیا عیراقێ چ ڕێ نەمان ژ بلی رەونەکرنا پەترۆلا ‏کەرکووک ب رێیا بۆریێن کوردستانی، ئەڤە ھەموو بۆ دیار دکەن دەلیڤەکا دیتر ‏ھەمبەری کوردان ھەیە، ھەکە ئەم بشێین مفای ژ وێ دەلیڤێ وەربگرین تشتەکێ ‏باشە.‏

سەبارەت پێدڤیا دستووری بۆ ھەرێما کوردستانێ، حاجی مەحموود دبێژیت: پێدڤیە ‏خولا پەرلەمانیا نوکە، دستووری بۆ ھەرێما کوردستانێ دانیت، چونکی کوردستانێ ‏پێدڤی ب دستووری ھەیە بۆ دیارکرنا رەنگێ سیستەمێ حوکمڕانیا وەلاتی و ‏دەستھەلاتێن ب جھئینانێ و دانانا قانوونان و دادوەریێ بھێنە دیار کرن، زێدەباری ‏دیارکرنا پێڤەرەکێ بۆ وان کەسان یێن وەلاتی برێڤە دبەن.‏

سەبارەت رەوشا نوکە یا کوردستانێ ناڤبری گۆت: پشتی بۆرینا 27 سالێن ‏حوکمڕانیێ مە پێدڤی ب چاڤخشاندنەکێ ب رێڤەبرن و ئیدارەکرنا وەلاتی خوە ‏ھەیە، دا کو ئابۆرێ کوردستانێ بھێتە رێکخستن، ژیانا خەلکی بھێتە باشکرن کو ‏ئەرکێ حوکمەتێ یە، کێشا سەرۆکێ ھەرێما کوردستانێ بھێتە ئێکلاکرن، کو پۆستێ ‏سەرۆکێ ھەرێمێ بۆ کوردان یا گرنگە، ھەکە سەرۆکاتیا ھەرێمێ نەبیت، وی ‏دەمی پارێزگەە ب پارێزگەھێ ڤە دێ ھێتە گرێدان و دێ سەر ب بەغدایێ ‏ڤەبن، و سیستەمێ حوکمڕانیا کوردستانێ بھێتە دیارکرن، کا مە چ رەنگێ ‏سیستەمێ دڤێت، ئەرێ سیستەمێ پەرلەمانی یە، کا چەوا سیستەمێ عیراقێ یێ ‏پەرلەمانی یە، بەلێ بڕیارێن عیراقێ ب سیستەمێ پەرلەمانی ناھێنە دا، دەمێ ‏موقتەدا سەدر زێدەتر ژ پێنجێ کورسیێن پەرلەمانی ھەبن، بەلێ عادل ‏عەبدولمەھدی دبیتە سەرۆک وەزیرێن عیراقێ ؟!. ‏

ل دۆر ڤەگەریانا تیرۆرستێن داعش و مەترسیا وانا بۆ سەر عیراقێ، مەحمەد ‏حاجی مەحموود گۆت: ب باوەریا من داعش وەک ھێز نەمایە، وەک ھزر و ‏ئایدۆلۆجی داعشی مایە، گرۆپەکێ ئیسلامی و شوفینی یا عەرەبی توندڕوە کو دژی ‏ھەموو نەتەوە ژبلی خوە کەسێ قەبوول ناکەت، ئەڤە ددیرۆکێ ھەر ھەبوویە، بەلێ ‏ب ناڤونیشانێن جودا جودا، چ حەرس قەومی یان حەرس جمھوری یان فیدائیێن ‏سەدام و قایدە و جەیشول حوڕ و بەریێ نوسرە.‏

سەبارەت عادل عەبدولمھەدی وەک سەرۆک وەزیران، سکرتێرێ حزبا ‏سۆسیالیست دیموکراتی کوردستان گۆت: وەک کەساتیا وی یا باشە بۆ نوکە وەک ‏سەرۆک وەزیران، دڤێت ئەم چاڤەرێ کارێن وی بکەین، و بزانین چەوا حەیدەر ‏عەبادی کوردان ئینایە سەر حوکمی، بەلێ ئەوا سەدام حسێن نەکری حەیدەر ‏عەبادی ل گەل کوردان کر.‏