ئەڤرۆ نیوز ، زنار تۆڤی:
هەولێر 92%
دهۆک 93%
سلێمانی 89%
هەلەبجە 93%
کۆمسیۆن: رێژا پشکداریێ د دەنگدانا تایبەت دا 92% بوویە
سه‌ره‌كى نووترين نووچه
سەرکردەکێ پارتی: هژمارەکا زۆر یا کادرێن ئێکەتیێ و گورانێ هاتینە ناڤ رێزێن پارتی
ئەڤرۆ نیوز ، زنار تۆڤی:
ئەڤرۆ ئەینیێ سەركردەکێ پارتی ل سنۆرێ؛پارێزگەها سلێمانیێ ئاشكرا كر، کو هژمارەکا زۆر یا كادر و لایەنگرێن ئێکەتی و گۆرانێ و هەڤپەیمانی بۆ دیموكراسیێ هاتینە ناڤ رێزێن پارتی.
سەعید سەلیم بەرپرسێ لقا چار یا پارتی دیموکراتی کوردستان گۆتیە ، کو هژمارەکا زۆر یا کادر و لایەنگرێن ئێکەتی نیشتیمانی كوردستان و بزاڤا گۆڕان و نەوەی نوێ و ھەڤپەیمانی بۆ دیموکراسی و دادپەروەریێ دەست ژ حزبێن خوە بەردایه و پەیوەندی ب رێزێن پارتی دیموکراتی کوردستانێ کریە.
کۆمیسیۆن: دێ ئەنجامێن دەنگدانا تایبەت ل گەل یێن گشتی هێنە راگەهاندن
ئەڤرۆ نیوز ، زنار تۆڤی:
ئەڤرۆ ئەینیێ 28-9-2018 دەنگدانا تایبەت ل هەرێمی کوردستانێ برێڤەچوو، کو زێدەتر ژ 170 هزار کەسان مافێ دەنگدانێ هەبوو، کو ژ وەزارەتا پێشمەرگەی و هێزێن نافخۆ و هێزێن ئاسایشێ پێک دهاتن.
هەروەسا کۆمسیۆنێ سێ خالێن نوو راگەهاندینە:
ئێک: دەنگدانا تایبەت ل دەمژمێر 6 ئێڤارێ ب دووماهی هات و ب هیچ شێوەکێ ئەو ماوە ناهێتە درێژکرن و بەرۆڤاژی لێپرسینا قانوونێ دێ ل گەل هەر فەرمانبەرەکێ هێته کرن یێ کو پابەندی بریارا کۆمیسیۆنێ نەبیت.
دو: پشتی تەمامبوونا ماوێ قانوونی یێ دەنگدانێ دێ راستەوخۆ دەست ب جۆداکرن و هژمارتنا دەنگان ب بەشداریا چاڤدێرێن سیاسی و فۆرمێن ئەنجامێن دەنگان دێ ل سەر ئاستێ وێستگە و بنگەهان هێتە کرن ب چاڤدێریا قەوارێن سیاسی.
سێ: کۆمیسیۆن دێ ئەنجامێن بەراهیێ یێن دەنگدانا تایبەت ب فەرمی راناگەهینیت هەتاکو دەنگدانا گشتی ب دووماهی دهێت، هەر ئەنجامەکێ بهێتە بەلاڤەکرن کۆمیسیۆن ژێ بەرپرسیار نابیت.
ده‌نگدانا تایبه‌ت بۆ هه‌لبژارتنێن په‌رله‌مانێ كوردستانێ ب دوماهی هات
ئەڤرۆ نیوز ، زنار تۆڤی:
ئەڤرۆ ئەینیێ 28.9.2018 پرۆسا ده‌نگدانا تایبه‌ت بۆ هه‌لبژارتنا په‌رله‌مانێ كوردستانێ ب دوماهی هات و هێزێن پێشمه‌رگه‌ی و ئاسایش و هه‌موو هێزێن ناڤخوە ده‌نگ ژبۆ هه‌لبژارتنا خولا پێنجێ یا په‌رله‌مانێ كوردستانێ دا.
ئەڤرۆ ل دەمژمێر هەشتێ سپێدێ دەنگدانا تایبەت ل هەموو پارێزگەهێن هەرێمێ دەستپێکر و ل پارێزگه‌ها هه‌ولێرێ پتری 72 هزار ده‌نگده‌رێن تایبه‌ت، ل پارێزگه‌ها سلێمانیێ پتری 62 هزار ده‌نگده‌رێن تایبه‌ت، هه‌روه‌سا ل پارێزگه‌ها دهۆكێ پتری 33 هزار ده‌نگده‌رێن تایبه‌ت مافێ ده‌نگدانێ هه‌بوو.
هه‌روەسا ل پارێزگه‌ها هه‌له‌بجه كو پارێزگه‌ها چارێ یا هه‌رێما كوردستانێ یه، پتری دو هزار ده‌نگده‌رێن تایبه‌ت مافێ ده‌نگدانێ هه‌بوو.
ئەو ده‌نگده‌رێن ناڤێن وان نه‌هاتین دشێن ل ده‌نگدانا گشتى ده‌نگێ خوە بده‌ن
ئەڤرۆ نیوز ، زنار تۆڤی:
ڤێ جارێ ناڤێن نەساح و زیندانیان د تۆمارا دەنگدانا تایبەت یا هەلبژارتنان دا نەهاتینە و نەساخ ژی دشێن پشکداری دەنگدانا گشتی ببن.
عەلی بەندی، رێڤەبەرێ گشتی یێ فەرمانگەها کۆمسیۆنا بلندا هەلبژارتن و راپرسیێ ل پارێزگەها دهۆکێ ئەڤرۆ د کۆنگرەکێ رۆژنامەڤانی دا راگەهاند: کو ناڤێن نەساخ و زیندانیان د تۆمارا دەنگدانا تایبەت دا نەهاتینە و نەشێن ئەڤرۆ د دەنگدانا تایبەت دا دەنگێ خوە بدەن.
ناڤهاتی سەبارەت دەنگدانا گشتی دیارکر: کەسوکارێن نەساخان دشێن ل رۆژا دەنگدانا گشتی وان ببەنە بنگەهێن دەنگدانێ و پشکداری د دەنگدانێ دا بکەن، لێ زیندانی نەشێن پشکدار بن.
عەلی بەندی رێڤەبه‌رێ گشتى یێ فه‌رمانگه‌ها كۆمسیۆنا بلند یا هه‌لبژارتن و راپرسیێ ل دهۆكێ گۆت ژی: ئەڤرۆ ئەینیێ پرۆسا هه‌لبژارتنان ل دهۆكێ ب رەنگە‌كێ ئاسایی و رێكوپێك برێڤه دچیت.
كويه: هێرش كره سه‌ر ده‌نگده‌رێن پارتى
ئه‌ڤرۆ نيوز:
چه‌تۆ حه‌سه‌ن، به‌رپرسێ لژنا ناوچا پارتى ديموكراتى كوردستان ل باژێرێ كۆيه راگه‌هاند كو هێرش كريه سه‌ر وان و رێ نه‌دايه ده‌نگده‌رێن پارتى ب ره‌نگه‌كێ ئازادانه ده‌نگێ خوه بده‌ن.
شێروان زرار، به‌رپرسێ راگه‌هاندنێ ل كۆمسيۆنا بلندا سه‌ربه‌خۆيا هه‌لبژارتن و راپرسيێ ژى ل هه‌رێما كوردستانێ هيڤى خواست كو سندوقێن ده‌نگدانێ ل كۆيه نه‌كه‌ڤنه بن پرسيارێ.
كه‌نالێ رووداو ژى ل سه‌ر مالپه‌رێ خوه به‌لاڤكريه كو هه‌تا نوكه رێ ب كه‌نالێ وان نه‌هاتيه دان كو رۆمالا بنگه‌هێن ده‌نگدانێ ل كۆيه بكه‌ن.
ب وێنه ده‌نگدانا تايبه‌ت ل دهۆكێ
ئه‌ڤرۆ نيوز، نيوار محه‌مه‌د سه‌ليم:
ئەڤرۆ 28 ئیلۆنا 2018 ل دەمژمێر هەشتێ سپێدێ پرۆسا ده‌نگدانا تایبه‌ت بۆ هه‌لبژارتنێن په‌رله‌مانێ كوردستانێ ده‌ست پێكر، ئەڤرۆ ل بنگه‌هێن ده‌نگدانێ دێ هێزێن پێشمه‌رگێ كوردستانێ و هێزێن ئاسایشێ و هێزێن ناڤخوە و هەموو هێزێن ئێمناهیێ دەنگێ خوە ژبۆ پەرلەمانێ کوردستنانێ دان.
ل دووڤ زانیاریێن فه‌رمی یێن كۆمسیۆنا بلندا سه‌ربەخۆ یا هه‌لبژارتن و راپرسیێ ل هه‌رێما كوردستانێ، دێ پتری 170 هزار ده‌نگده‌رێن تایبه‌ت ل هه‌ر چار پارێزگه‌هێن هه‌رێما كوردستانێ دەنگێ خوە دەن.
ل پارێزگه‌ها هه‌ولێرێ پتری 72 هزار ده‌نگده‌رێن تایبه‌ت هەنە، ل پارێزگه‌ها سلێمانیێ پتری 62 هزار ده‌نگده‌رێن تایبه‌ت هەنە، هه‌روه‌سا ل پارێزگه‌ها دهۆكێ پتری 33 هزار ده‌نگده‌رێن تایبه‌ت هه‌نه.
ئەڤە ل ده‌مه‌كی کو ل پارێزگه‌ها هه‌له‌بجه كو ب پارێزگه‌ها چارێ یا هه‌رێما كوردستانێ دهێتە نیاسین، پتری 2000 ده‌نگده‌رێن تایبه‌ت لێ هەنه.
كۆمسیۆنا بلند یا سەربەخۆیا هەلبژارتن و راپرسیێ ل هه‌رێما كوردستانێ جارا ئێكێ يه هه‌لبژارتنێن پەرلەمانێ كوردستانێ برێڤه دبه‌ت، ژبۆ ده‌نگدانا تایبه‌ت ژی 99 بنگه‌هـ و بۆ نێزیكی 500 وێستگه‌هان داناینە کو ل پارێزگەها هه‌ولێرێ 41 بنگه‌هـ و ل پارێزگەها سلێمانیێ 37 و ل دهۆكێ 20 و ل هه‌له‌بجه ژی ئێك بنگه‌هـ هاتیه دانان.
رێژا چوونا دەنگدانێ 25% يه
ئەڤرۆنیۆز، سالار دۆسکی:
عەلی بەندی بەرپرسێ ئوفیسا دھۆک یا کومسیونا بالا یا سەربەخۆ و راپرسینێ ل ھەرێما کوردستانێ بۆ ئەڤرۆ نیۆز گۆت: ھەر کەسەکێ ناڤێ وی نەھاتبیت ل دەنگدانا تایبەت دشێت رۆژا دەنگدانا گشتی دەنگێ خوە بدەت، ناڤبری ئەو دەنگو رەدکرن کو ناڤ دوبارە ھاتبن دیارکر ھەتا نوکە چ حالەتێن بڤی رەنگی نەھاتینە، ئەو ژی ئاشکراکر کو زیندانی و نەخوشان مافێ دەنگدانێ نینە و ناڤێن وا نەھاتینە ڤێ پرۆسێسێ.
بەندی ئاشکراکر ژی ھەتا دەمژمێر 11 بەری نیڤرۆ رێژا ھاتنا ھێزێن نافخوە و پێشمەرگەی 25% بوویە.
ل دووماھیێ ئاشکراکر ژی کو پشتی دەرگەە دھێنەگرتن دێ دەنگ ھێنە ڤاڤارتن و دێ فورمەک ھێتە داگرتن و ل سەر قەوارێن سیاسی دێ ھێتە بەلاڤەکرن و ھەموو کەس دێ ئەنجاما زانیت و ئەنجام دێ چنە ئوفیسا نشتیمانی و ل دووڤ بریارا وا پشتی 72 دەمژمێران دێ ئەنجام ھێنە راگەھاندن.
کۆمسیۆن ئاگەهداریەکێ بەلاڤ دکەت
ئەڤرۆ نیوز، سالار دۆسكى:
کۆمسیۆنا بلندا سەربەخۆیا هەلبژارتن و راپرسیێ ئۆفیسا دهۆکێ ئاگەهداریەکا ب لەز بەلاڤ دکەت و تێدا دیارکریە، کو هەر ل گەل ڤەبوونا بنگەهێن دەنگدانێ گەلەک ژ پێشمەرگەیان و هێزێن ئێمناهیێ خەلەت بووینە و شاشی کرینە، کو بۆ دەنگدانێ وان کۆپیێن ناسنامێن خوە ئیناینە و دیسا ل جهێ قەلەمێ کۆمسیۆنێ ژی قەلەمێن خوە ب کارئیناینە و ئەڤە ژی خەلەتیە و چێنابیت، لەوما ئەو داخواز دکەن کو پێشمەرگە و هێزێن دیتر ناسناما عێراقی یان پاسەپورتا خوە، یان ژی ناسناما بارێ شارستانی ل گەل رەگەزناما بابێ خوە بینن و دەنگێ خوە پێ بدەن و هەروەسا قەلەمێ کۆمسیۆنێ ژی بکاربینن.
فرۆکێن تورکی دەڤەرا بەرواری بالا بۆمبە بارانکر
ئەڤرۆ نیوز ، زنار تۆڤی:
ل سپیدەهیا ئەڤرۆ ئەینیێ 28 ئیلۆنا 2018 فرۆکێن سۆپایێ توركیا دەڤەرا به‌روارى بالا بۆمبە بارانكر.
ئەڤرۆ سپێدێ و ل دەمژمێر 9:25 خولەک، ب بەهانەیا هەبوونا چەکدارێن پەکەکێ فرۆکێن سۆپایێ تورکی زنارا کێسته بۆمبە بارانکر و ئەڤە د ماوێ ڤان دو حەفتیان دا پتری چار جاران ئەڤ جهە ژلایێ فرۆکێن تورکیا ڤە دهێتە بۆمبە بارانکرن.
نيشاندان
WP Facebook Auto Publish Powered By : XYZScripts.com