ئه‌ڤرۆنيوز:
رێڤه‌به‌ريا گشتى يا گه‌شناسيێ وبيڤه‌له‌رزان ل هه‌رێما كوردستانێ پێشبينيێن پلێن گه‌رمێ يێن ئه‌ڤرۆ وسوباهى ل پارێزگه‌هێن هه‌رێما كوردستانێ وكه‌ركووكێ به‌لاڤكرن.
رێڤه‌به‌ريا ناڤبرى به‌لاڤكر كو پلا گه‌رمێ ل پارێزگه‌ها دهۆكێ ئه‌ڤرۆ ئێكشه‌مبى 9/9/2018 دێ 35 بيت وسوباهێ دوشه‌مبى 10/9/2018 پلا گه‌رمێ دهۆكێ دێ هه‌مان پله بيت ئانكو 35.
ئه‌ڤرۆ نیوز، نه‌وزاد هلۆرى:
هه‌ر چه‌ند پێربینه كه‌رسته‌یه‌كێ خوارنێ یێ سرۆشتى یه و ل ناڤا بیستانان درۆست دبیت و تام و خوشیه‌كا تایبه‌ت دده‌ته خوارن و ڤه‌خوارنان و ژ روویێ ساخله‌میێ ژى ڤه گرنیگه‌كا تایبه‌ت هه‌یه، و داكو زێده‌تر بكه‌ڤیته به‌رده‌ستێ وه‌لاتیان، وه‌لاتیه‌كێ شێلادزێ هژماره‌كا زۆر یا توفكێ پێرپینێ ئینایه شێلادزێ و داینه خه‌لكى ، و نها پێرپینه ل سه‌نته‌رێ ناحیا شێلادزێ زۆر دهێته چاندن.
ئه‌یوب خورشید ، خودانێ بازارێ فروتنا ده‌رمان و توفكێن ده‌رامه‌تى ل شێلادزێ بۆ ئه‌ڤرۆ نیوز گۆت: (د بنه‌ره‌ت دا پێرپینه كه‌رسته‌یه‌كێ سرۆشتى یه و دناڤا بیستان و زه‌ڤیێن چاندنێ دا ل گه‌ل ده‌رامه‌تى شوون دبیت ، و چوو زیان بو ده‌رامه‌تى نینن به‌لكو تنێ به‌رپێن ده‌رامه‌تى ته‌نگ دكه‌ت، و پێرپینێ تامه‌كا زور خوش بو ناڤا ڤه‌خوارن و خوارنان ژى هه‌یه، و بو ساخله‌میا مرۆڤى ژى گه‌له‌ك یا باشه ، و خه‌لك ب ره‌نگه‌كێ گشتى بكاردئینن ، به‌لێ ژبه‌ركو ل كوردستانێ و ده‌ڤه‌رێن مه ب تنێ ل وه‌رزێ چاندنێ دهێته دیتن ژبه‌رڤێ من هزر د وێ یه‌كێ دا كر كو ئه‌ز جوره پێرپینه‌كێ بینم كوردستانێ ل هه‌موو وه‌رزان بهێته‌خوارن).
زێده‌تر گۆت: (دبه‌روام لێگه‌ریانێ دا بو په‌یداكرنا جوره‌كێ پێرپینێ بو ده‌ڤه‌رێن كوردستانێ ل داویێ جوره‌كێ نووی ێ توڤێ پێرپینێ بناڤێ ARGETO ده‌ستخوڤه ئینا كو د ره‌سه‌ن دا دزڤریت بو به‌رهه‌مه‌كێ توكى و داهێنان لسه‌ر هاته‌كرن، و نوكه بویه ئێك ژ به‌رهه‌مێن جیهانى و ل گه‌له‌ك وه‌لاتان دهێته چاندن، و ئه‌ڤ پێرپینه ب ره‌نگ و شێوازێ خوه هه‌ر وه‌كو پێرپینا خومالى و سرۆشتى یا ناڤا بیستانێن مه‌یه ، به‌لێ به‌لگێن وێ مه‌زنترن و بلندتره و زێده‌تر به‌رهه‌مى دده‌ت و ره‌نگ و شێوازه‌كێ كه‌س و جوان هه‌یه و زێده‌تر ژ پێرپینا خومالى ژى دمینیت و شیانێن هه‌یى كو ل هه‌موو وه‌رزان ژى بهێته چاندن و دیسان ل بن خانویێن پلاستكى و لایلون ژى دهێته چاندن، و بتنێ ژ روویێ تامێ ڤه وه‌كو پێرپینا خومالى یه).
ناڤبرى د درێژاهیا ئاخفتنێن خودا دیاركر ژى كو خه‌لكێ شێلادزێ ب گه‌رمى پێشوازى ل ئه‌ڤى جورێ پێرپینێ كریه و ل مالێن خوه چاندینه.
پێرپینى ره‌هێن سوور هه‌نه و به‌لگێن وێ ژى دكه‌سكن ، و ره و تا و به‌لگێن وێ هه‌موو دهێنه خوارن، و خه‌لكێ كوردستانێ بو ناڤا زه‌لاتێ و ناڤا ئاڤه‌ماسێ و زه‌ركرنێ بكاردئینن ، و ژ روویێ ساخله‌میێ ڤه پێرپینه بو رێگریێ ل قه‌له‌ویێ دكه‌ت، رێژه‌یه‌كا زور یا ئاڤێ دناڤ پێرپینێ هه‌یه و هه‌ستا بیرسیبوونێ لده‌ڤ مرۆڤى گیرو دكه‌ت، و مه‌ترسیا توشبوون ب نه‌خوشیێن دلى و جه‌لتا دلى كێم دكه‌ت ، هاریكاره بو كێمكرنا ئاستێ كولسترولێ، و رێژه‌یه‌كا زور یا ڤیتامین Aى و ڤیتامین Cى دناڤ پێرپینێ هه‌یه.
ئه‌ڤرۆنيوز:
مافپه‌روه‌ر ورۆژنامه‌ڤانه‌كێ باژێرێ به‌سرا بۆ ئه‌ڤرۆنيوز ديار دكه‌ت، خوه‌نيشاندانێن ده‌ستپێكێ يێن خه‌لكێ به‌سرا دئاشتيانه بوون وداخوازيێن وان د ره‌وا بوون ژبه‌ركو سته‌مه‌كا ئابوورى يا مه‌زن ل به‌سرا دهێته كرن سه‌ره‌راى وێ چه‌ندێ ژێده‌رێ سه‌ره‌كيێ داهاتێ عيراقێ يه وئاماژه دا كو حوكمه‌تا عه‌بادى داخوازيێن خه‌لكێ به‌سرا پشت گوه هاڤێتيه وحزبا ده‌عوه شكه‌ستنه‌كا مه‌زن دحوكمرانيا عيراقێ دا ئينايه.
حه‌سه‌ن داوود رۆژنامه‌ڤان ومافپه‌روه‌ر ژ باژێرێ به‌سرا بۆ ئه‌ڤرۆنيوز دبێژيت” به‌سرا يا هاتيه پتشت گوه هاڤێتن ژلايێ حوكمه‌تێن خوه‌جهى ڤه وچو خزمه‌تكوزارى ژلايێ حوكمه‌تا ناڤه‌ندى وحوكمه‌تێن خوه‌جهى ڤه بۆ نه‌هاتينه پێشكێشكرن هه‌ر چه‌نده 80% بودجا عيراقێ ژ به‌سرا دهێت”
حه‌سه‌ن دبێژيت” ئاريشا ئاڤێ ل به‌سرا يا نوكه نينه، به‌لكو دزڤريت بۆ سالا 2009 وئه‌ڤه 9 ساله حوكمه‌تا عيراقى چاره‌سه‌ر نه‌كريه وئه‌ڤ ساله ژبه‌ر كێمبوونا هاتنا ئاڤا ديجله وفورات بۆ به‌سرا، كێشه‌كا مه‌زن دئاڤا ڤه‌خوارنێ دا په‌يدا بوو ژئه‌گه‌رێ سيربوونا ئاڤێ كو ژ كه‌نداڤى دهاته شه‌تولعه‌ره‌ب زێده‌بارى گرتنا ئاڤا رووبارێ كارۆن ب تمامى ژلايێ ئيرانێ ڤه، توركيا ژى هاتنا ئاڤێ بۆ ناڤ عيراقێ كێمكريه زێده‌بارى سه‌رێچيێن چه‌ند پارێزگه‌هێن عيراقى ب خوه ل سه‌ر به‌هرا ئاڤا به‌سرا، زێده‌بارى شكه‌ستنا حوكمه‌تا خوه‌جهى دچاره‌سه‌ركرنا كێشێ دا، هه‌رچه‌نده حوكمه‌ت دشيا هه‌ر ل سالا 2009 ئاريشێ چاره‌سه‌ركه‌ت ب رێيا دروستكرنا سكره‌كى ل شه‌تولعه‌ره‌ب وچێكرنا ويستگه‌هێن شرينكرنا ئاڤێ”.
ئاماژه دا” به‌سرا ژلايێ حزبان وكه‌سايه‌تيێن ده‌ستهه‌لاتدار دهێته ب رێڤه‌برن وئه‌و حوكمرانيێ لێ دكه‌ن وحوكمه‌تا ناڤه‌ندى ل به‌غدا ره‌فتارێ ل گه‌ل به‌سرا دكه‌ت وه‌كو نه پشكه‌ك ژ عيراقێ وسته‌مه‌كا مه‌زن ل به‌سرا هاتيه كرن ژلايێ ئابوورى ڤه”.
داوود دياركر زێده‌بارى وێ چه‌ندێ 80% په‌ترۆلا عيراقێ ژ به‌سرايه وئه‌و په‌ترۆل ژێده‌رێ سه‌ره‌كى يه بۆ بودجا سالانه يا عيراقێ، به‌لێ سته‌مه‌كا مه‌زن ل به‌سرا هاتيه كرن ژلايێ ئابوورى ڤه وگه‌له‌ك ژخه‌لكێ به‌سرا دبێ كارن وكۆمپانيێن په‌ترۆلێ ئه‌وێن ل به‌سرا كاردكه‌ن ژى پتريا كرێكارێن وان بيانى وخه‌لكێ پارێزگه‌هێن دى يێن عيراقێ نه”.
ل دۆر خوه‌نيشادانێن ڤێ دووماهيێ ئه‌وێن ل به‌سرا ده‌ركه‌فتين، گۆت” ل ده‌ستپێكێ خوه‌نيشادانێن ئاسايى بوون ودشيانێن حوكمه‌تا ناڤه‌ندى دا بوو چاره‌سه‌ر بكه‌ت وداخوازيێن خوه‌نيشانده‌ران بجهبينيت، به‌لێ حوكمه‌تا عه‌بادى يا راستگۆ نه‌بوو ل گه‌ل خوه‌نيشانده‌ران وئه‌ڤ چه‌نده بۆ ئه‌گه‌ر كو پێشڤه‌چوونێن مه‌زن دسێ رۆژێن بۆرى دا په‌يدا ببن ئه‌وژى سوتنا ئاڤاهيێن حكومى وباره‌گايێن حزبان وهنده‌ك ئاڤاهيێن ده‌زگه‌هێن راگه‌هاندنێ وداعشێ وبه‌عسيان مفايه‌كێ مه‌زن ژڤان خوه‌نيشادانان ديت ول دووڤ پلانا بۆ هاتيه دانان ره‌فتار كر، ديسا لايه‌نێن ده‌ره‌كى وحزبێن ده‌ستهه‌لاتێ ژى رۆل تێدا هه‌بوو بۆ نموونه سعوديێ كونسۆلخانا ئيرانێ ل به‌سرا سوت وه‌كو به‌رسڤه‌ك بۆ سوتنا باليۆزخانا سعوديێ ل ئيرانێ وداعشێ وبه‌عسيان باره‌گايێن حه‌شدا شه‌عبى سوتن وه‌كو به‌رسڤه‌ك ل سه‌ر رۆلێ حه‌شدێ دشكه‌ستنا داعشێ دا، حزبان ژى هه‌ر ئێكێ باره‌گايێ يا دى سوت، ئانكو ل ڤێرێ ديار دبيت كو هه‌ر لايه‌نه‌كى ئه‌جيندايێن خوه ل به‌سرا بجهئينان وتنێ وه‌لاتيێن به‌سرا دزياندارن.
حه‌سه‌ن داوود ئاشكراكر كو لژنا خوه‌نيشادانێن به‌سرا به‌ياننامه‌ك ده‌ركريه وتێدا ره‌ت دكه‌ت كو خوه‌نيشانده‌ران كارين تێكدانێ وسوتنا باره‌گايێن حزبان وئاڤاهيێ حوكمه‌تێ ئه‌نجام دابيت وب راشكاوى دبێژيت كو شانێن نڤستى يێن داعشێ وحزبا به‌عس ئه‌و كاره ئه‌نجامداينه وبۆ وێ چه‌ندێ بۆ خه‌لكێ به‌سرا وجادا به‌سرى ب سه‌لمينن كو خوه‌نيشادانێن وان دئاشتيانه‌نه وددورن ژ هه‌ر كاره‌كێ تێكدانێ وسوتنێ، بريار دابوو ل رۆژا شه‌مبيێ خوه‌نيشادانان نه‌كه‌ن بۆ ڤه‌خواندنا شاشيێن دده‌مێ خوه‌نيشادانان دا هاتينه كرن كو خوه‌نيشانده‌ران چو په‌يوه‌ندى ب وان كارين تێكده‌ر ڤه نه‌بوو.
ناڤبرى هوشدايێ دده‌ت كو ره‌وشا به‌سرا دێ به‌ر ب چاره‌نڤيسه‌كێ نه‌ديار ڤه چيت، هه‌كه حوكمه‌تا عيراقێ هێزه‌كا ئه‌منى يا مه‌زن بۆ چه‌سپاندنا قانوونێ نه ڤرێكه‌ت ورێ ل ئه‌وێن ب پلان هاتينه دناڤ خوه‌نيشانده‌ران دا نه‌هێته كرن ب رێيا ده‌سته‌سه‌ركرنا وان، ديسا پێدڤيه وه‌لاتيێن به‌سرا گه‌له‌ك دهشيار بن ل دۆر وێ پلانا مه‌زن ئه‌وا دژى وان دهێته ئه‌نجامدان وپێدڤيه رێگريێ ل ئه‌نجامده‌رێن وێ پلانێ بكه‌ن هه‌كه نه به‌سرا دێ بيته ئه‌نبارا دويێ.
ئه‌ڤرۆنيوز:
سترانبێژا ناڤدار يا لوبنانى ئه‌ليسا نووترێن وێنێ خوه بێ ميكياژ به‌لاڤكر ودبێته جهێ سه‌رنجا هه‌وادارێن وێ.
ئه‌ليسا ل به‌رپه‌رێ خوه ل سه‌ر تۆرا جڤاكى يا ئه‌نستگرامێ، نووترين وێنێ خوه بێ ميكياژ به‌لاڤكر ل گه‌ل هه‌ڤاله‌كا خوه دناڤ ميترۆيه‌كێ دا ل باژێرێ رۆما پايته‌ختا ئيتاليا وهنده‌ك ژ هه‌وادارێن وێ دكۆمێنتێن خوه دا ل سه‌ر وى وێنه‌ى ديار دكه‌ن كو ژيێ وێ كاريگه‌رى يا ل سه‌ر كرى.
ئه‌ليسا زه‌كه‌ريا خۆرى، ژدايكبوويا سالا 1971 يه بابێ وێ لوبنانى يه ودايكا وێ سوورى يه.. ژبه‌ر ده‌نگێ وێ يێ خوه‌ش ناسناڤێ ( شاژنا هه‌ستان) ل سه‌ر هاتيه دانان.
ئه‌ڤرۆنيوز:
په‌يڤدارێ پارتى ديموكراتى كوردستان پشتى كۆمبوونا جڤاتا سه‌ركردايه‌تيا پارتى ديموكراتى كوردستان دكۆنگره‌كێ رۆژنامه‌ڤانى دا راگه‌هاند، ل دووڤ وى به‌رنامێ دياركرى دێ ده‌ست ب بانگه‌شا هه‌لبژارتنان هێته كرن وخوه ب هنده‌ك بابه‌تێن لاوه‌كى ڤه مژوول ناكه‌ين.
مه‌حمود محه‌مه‌د، په‌يڤدارێ پارتى ديموكراتى كوردستان گۆت ژى” زه‌مينه خوه‌شكرن يا هه‌ى بۆ وێ چه‌ندێ هه‌لبژارتن بهێنه ئه‌نجامدان، لايه‌نێن سياسى ژى پتريا وان ل گه‌ل ئه‌نجامدانا هه‌لبژارتنانه”.
سه‌باره‌ت توپبارانكرنا باژێرێ كۆيه كو هه‌ردو حزبێن رۆژهه‌لاتا كوردستانێ كريه ئارمانج، په‌يڤدارێ پارتى گۆت”هه‌لويستێ پارتى ئه‌وه يا سه‌رۆك بارزانى راگه‌هاندى، ئه‌م دوى چارۆڤه‌ى دا دبێژين، مخابن بۆ وێ زيانا ب وى خه‌لكى گه‌هشتى، ئومێده‌وارين ژى دووماهى ب وان كرياران بهێت”.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ ئێكشه‌مبى 9/9/2018 پێشوازى ل جه‌نه‌رال جوزێف ئه‌ندرسۆن رێڤه‌به‌رێ سه‌نته‌رێ هه‌ماهه‌نگيێ ل كوردستانێ وشاندێ دگه‌لدا كر.
ل ده‌ستپێكا ديدارێ مه‌سرور بارزانى نيگه‌رانيا خوه به‌رامبه‌ر توپبارانكرنا باره‌گايێ حزبا ديموكرات ل كۆيه دياركر وسه‌ره‌خوه‌شى ل كه‌سوكارێن شه‌هيدان وهيڤيا زوو چاكبوونێ بۆ برينداران كر.
پاشى دووماهى پێشهاتێن سياسى وله‌شكرى وئه‌منى ل ده‌ڤه‌رێ دانوستاندن ل سه‌ر هاته كرن ودووپاتى ل هه‌ماهه‌نگيا زێده‌تر دناڤبه‌را هێزا پێشمه‌رگه‌ى وهێزا هه‌ڤپه‌يمانان دچارچۆڤێ به‌رنامێ كارپێكرى هاته كرن ورۆناهى هاته خستن ل سه‌ر رێكخستنێ وزێده‌كرنا مه‌شق وراهێنانێ ب پێشمه‌رگێ كوردستانێ وئاماژه ب وێ چه‌ندێ هاته دان كو ب هێزكرنا پێشمه‌رگه‌ى دێ بيته ئه‌گه‌رێ سه‌قامگيريێ ل ده‌ڤه‌رێ.
دپشكه‌كا دى يا ديدارێ دا، به‌حسێ ره‌وشا ده‌ڤه‌رێن ده‌رڤه‌ى ئيدارا هه‌رێما كوردستانێ ب گشتى وره‌وشا كه‌ركووكێ ب تايبه‌تى هاته كرن كو ئه‌وا ل وێرێ روودده‌ت جهێ نيگه‌رانيێ يه وپێدڤيه ئه‌گه‌رێن نيگه‌رانيێ نه‌مينن، ل دۆر وێ چه‌ندێ مه‌سرور بارزانى راگه‌هاند” ل ده‌ف مه كه‌ركووك يا داگيركريه وروودان دقبوو‌لكرى نينن وپێدڤيه دچارچۆڤێ مادێن دستوورى ره‌وشا كه‌ركووكێ بهێته چاره‌سه‌ركرن”.
هه‌ر دڤێ ديدارێ دا ئاماژه ب پێشڤه‌برنا په‌يوه‌نديێن هه‌رێما كوردستانێ وئه‌مريكا هاته كرن، كو پێدڤيه ئه‌و په‌يوه‌نديێن ستراتيژى بهێنه پێشڤه‌برن.
هه‌روه‌سا ئاماژه ب زێده‌بوونا چالاكيێن گرۆپێن تيرۆرستى هاته كرن، هه‌كه ب جدى پێنگاڤ بۆ چاره‌سه‌ركرنا كێشان ب گشتى نه‌هێنه هاڤێتن، پێشبينى دهێته كرن ل پاشه‌رۆژێ ب ناڤه‌كى دى بزڤرن وره‌وشێ ئالۆزتر بكه‌ن.
ئەڤرۆ نیوز،باسم قاسم شنگالی
ئەڤرۆ ئێك شەمبی 9/9/2018 ێ ژن و زارۆیەکێ ئێزدی ژ دەستێن رێکخراوا داعش يا تیرۆرستی ل سووریێ هاتنە رزگارکرن.
حسێن قائيدى، بەرپرسێ نڤسینگەها کاروبارێن رەڤاندیان ل دهۆکێ بۆ ئەڤرۆنيوز گۆت “ئەڤرۆ ب هەڤکاریا نڤیسنگەها مە ژن و زارۆیەکێ ئێزدى ژده‌ستێن داعشێ ل سووریێ هاتە رزگارکرن”.
زێده‌تر گۆت” زارۆیێ رزگاربووی ب ناڤێ (س ،د،س) ژيێ وی 15 سالن و ئەو ژن ژی بناڤێ (م،خ،ك) ژيێ وێ 36 سالن کو هەردو خەلکێ گوندێ کۆچۆ نە”.
پتر گۆت “ل دەمێ ل 3/8/2014 داعشێ دەڤەرا شنگالێ داگێرکری ئەڤ ژن و زاروك ژی مینا ب هەزاران کچ و ژنێن ئێزدی هاتبوو ره‌ڤاندن ژلایێ رێکخراوا تیرۆرستیا داعشێ ڤە
خوياكر ژى”،نڤیسنگەها کاروبارێن رەڤاندیان ل دهۆکێ یا بەردەوامە بۆ هەولدانا رزگاركرنا وان ره‌ڤانديێن هەتا نۆکە ماینه ددەستێن تیرۆرستێن داعشێ دا و ژ سەرجەمێ( 6714) کەسێن گرتی هەتا نۆکە (3327 ) ژ وان هاتینە رزگارکرن
ئه‌ڤرۆ نيوز:
پشتى ب دووماهى هاتنا كۆمبوونا ئه‌ڤرۆ يا جڤاتا سه‌ركرداتيا پارتى ب سه‌رپه‌رشتيا سه‌رۆك بارزانى، نێچيرڤان بارزانى جێگرێ سه‌رۆكێ پارتى ديموكراتى كوردستان د داخۆيانيه‌كا رۆژنامه‌ڤانى دا ته‌كست ل سه‌ر وێ چه‌ندێ كر كو هه‌لبژارتنێن په‌رله‌مانێ كوردستانێ دێ د ده‌مێ خوه دا هێنه كرن.
نێچيرڤان بارزانى ئاشكه‌را كر كو سوبه‌هى دێ ل گه‌ل ئێكه‌تى نشتيمانى كوردستان كۆم بن و ته‌وه‌ره‌كێ سه‌ره‌كى يێ كۆمبوونێ ژى دێ چاوانيا پشكداريكرنێ د حوكمه‌تا نوو يا عيراقێ دا بيت”.
ده‌رباره‌يى دانوستاندنێن لايه‌نان ژى و شاندێ هه‌ڤپشكێ پارتى و ئێكه‌تى ل به‌غدا، نێچيرڤان بارزانى گۆت: “كۆمبوونێن مه د به‌رده‌وامن و د ناڤ خوه ژى دا كۆمبوونان دكه‌ين دا كو دووماهى بڕيار بده‌ين، ديسا بڕياره 15ى ڤێ هه‌يڤێ جڤاتا نوونه‌رێن عيراقێ جاره‌كا دى كۆم ببيت و هيڤيدارين هه‌تا وى ده‌مى لايه‌ن د ناڤ خوه بگه‌هنه ئه‌نجامه‌كى”.
نێچيرڤان بارزانى ئاشكه‌را ژى كر كو سه‌ره‌دانا وان بۆ لايێ لايه‌نێن سياسى يێن دى ئه‌وان ته‌كست كريه كو پيدڤيه پێكڤه بچنه به‌غدا.
ئه‌ڤرۆ نيوز:
پشتى ب دووماهى هاتنا كۆمبوونا ئه‌ڤرۆ يا جڤاتا سه‌ركرداتيا پارتى ب سه‌رپه‌رشتيا سه‌رۆك بارزانى، نێچيرڤان بارزانى جێگرێ سه‌رۆكێ پارتى ديموكراتى كوردستان د داخۆيانيه‌كا رۆژنامه‌ڤانى دا ته‌كست ل سه‌ر وێ چه‌ندێ كر كو هه‌لبژارتنێن په‌رله‌مانێ كوردستانێ دێ د ده‌مێ خوه دا هێنه كرن.
ل به‌رسڤا پرسياره‌كێ دا، ل دۆر ئه‌نجامدانا هه‌لبژارتنێن په‌رله‌مانێ كوردستانێ، نێچيرڤان بارزانى، گۆت: “هه‌لبژارتن دێ د ده‌مێ خوه دا هێنه كرن و لايه‌نێن دى ژى ته‌كست ل سه‌ر وێ چه‌ندێ كريه نه ب تنێ پارتى”.
ئه‌ڤرۆ نيوز:
جڤاتا سه‌ركرداتيا پارتى ديموكراتى كوردستان بۆ گه‌نگه‌شه‌كرنا هه‌لبژارتنێن په‌رله‌مانێ كوردستانێ و پێكئينانا حوكمه‌تا نوو يا عيراقێ يا د كۆمبوونێ دا.
ئه‌ڤ كۆمبوونا جڤاتا سه‌ركرداتيا پارتى د ده‌مه‌كى دايه كو ئه‌و پارتى يا رژده ل سه‌ر ئه‌نجامدانا هه‌لبژارتنێن كوردستانێ و دخوازيت ل 30ى ڤێ هه‌يڤێ بهێنه ئه‌نجام دان.
ژ لايه‌كێ دى ڤه، شاندێ هه‌ڤپشك ل گه‌ل ئێكه‌تى نشتيمانى كوردستان مژوولى دانوستاندنايه ل سه‌ر پێكئينانا حوكمه‌تا نوو يا عيراقێ كو دخوازن مافێن گه‌لێ كورد تێدا ب ده‌ست ڤه بينن.
نيشاندان