ئه‌ڤرۆنيوز:

سه‌رۆك مه‌سعود بارزانى ئه‌ڤرۆ ئه‌ينيێ 31/8/2018 پێشوازى ل برێت ماكگۆرك هنارتيێ تايبه‌ت يێ سه‌رۆكێ ئه‌مريكا بۆ هه‌ڤپه‌يمانيا نێڤده‌وله‌تى  يا شه‌رێ دژى داعشێ وشانده‌كێ دگه‌لدا كر كو پێكهاتبوو ژ دۆگلاس سيليمان باليۆزێ ئه‌مريكا ل عيراقێ وستيڤ فاگين كونسۆلێ ئه‌مريكا ل هه‌ولێرێ.

دديداره‌كێ دا دووماهى پێشهاتێن سياسى وگوهۆرينێن هه‌ڤكێشان دناڤ پرۆسا سياسى يا عيراقێ دا هاتن به‌حسكرن وبيرورا ل دۆر رێيێن پێكئينانا حوكمه‌تا نوو يا عيراقێ هاتن ئالوگۆركرن.

هه‌ر د وێ كۆمبوونێ دا دووپاتى ل سه‌ر پێگيرى ب پرنسيبێن هه‌ڤپشكيا راسته‌قينه‌ دناڤبه‌را نوونه‌رێن پێكهاتێن عيراقێ هاته‌ كرن وهه‌ردو لا ل سه‌ر وێ چه‌ندێ دهه‌را بوون كو هه‌تا راسته‌رێكرنا پرۆسا سياسى يا عيراقێ، هه‌ردو لا د راوێژ وپه‌يوه‌نديا به‌رده‌وام دابن.

ئه‌ڤرۆنيوز:

عه‌مباره‌كا چه‌ك وته‌قه‌مه‌نيان ئه‌ڤرۆ ئه‌ينيێ ل باژێرێ كه‌ربه‌لا په‌قى وزيانێن گيانى ل دووڤ خوه‌ هێلان.

ئه‌بو جه‌نه‌ ئه‌لمه‌يالى، چالاكڤانێ مه‌ده‌نى ژ كه‌ربه‌لا بۆ ئه‌ڤرۆنيوز گۆت” ئه‌و عه‌مبارا چه‌ك وته‌قه‌مه‌نيان ب سه‌ر حه‌شدا شه‌عبى ڤه‌يه‌ وژئه‌نجامێ په‌قينا وێ دو كه‌س يێن بريندار بووين”.

دياركر ژى” پشتى چه‌ندين عه‌مبارێن چه‌كى ل هنده‌ك پارێزگه‌هێن باشوورێ عيراقێ په‌قين، حوكمه‌تێ بريار دابوو عه‌مبارێن ژ وى جۆرى ژناڤ باژێران بهێنه‌ ڤه‌گوهاستن بۆ ده‌رڤه‌ى باژێران، به‌لێ هه‌تا نوكه‌ ئه‌و  بريار نه‌هاتيه‌ بجهئينان”.

ئه‌ڤرۆنيوز:

مالپه‌رێ سومه‌ر نيوز يێ عيراقى ژزارده‌ڤێ ژێده‌ره‌كێ كوردى يێ ئاگه‌هدار به‌لاڤكر كو بزاڤێن ئيرانى يێن هه‌ين بۆ ده‌ست نيشانكرنا به‌رهه‌م سالح وه‌كو سه‌رۆك كۆمارا عيراقێ ل شوونا فوئاد مه‌عسووم.

وى ژێده‌رى بۆ سه‌مه‌ر نيوز گۆت”نوكه‌ بزاڤه‌كا ئيرانى يا هه‌ى بۆ ڤه‌گه‌راندنا به‌رهه‌م سالح بۆ ناڤ رێزێن ئێكه‌تى نيشتمانى كوردستان ب مه‌ره‌ما به‌ربژاركرنا وى بۆ پۆستێ سه‌رۆكاتيا كۆمارێ كو ئه‌و پۆسته‌ به‌هرا كوردانه‌”.

دياركر ژى” ئه‌و لڤينا ئيرانى نه‌ ژحه‌ژێكرنێ يه‌ بۆ به‌رهه‌م سالحى، به‌لكو ژبۆ به‌رژه‌وه‌نديێن ئيرانێ يه‌ كو ئيران بزاڤێ دكه‌ت سه‌رۆكاتيا كۆمارێ كونترۆل بكه‌ت وه‌كو ترسه‌ك ژ نه‌ بده‌ستڤه‌ئينانا هه‌ڤپه‌يمانێن وێ (فه‌تح وده‌وله‌تا قانوونێ) بۆ پۆستێ سه‌رۆكاتيا وه‌زيران”.

به‌رهه‌م سالح جێگرێ دويێ يێ سكرتێرێ گشتيێ ئه‌كه‌تى نيشتمانى كورستان ل 17/9/2017 ژ ئێكه‌تيێ جودابوو وحزبا ( هه‌ڤپه‌يمانى بۆ ديموكراسيێ ودادپه‌روه‌ريێ) دامه‌زراند.

ئه‌ڤرۆنيوز:

ژێده‌ره‌كێ رۆژنامه‌ڤانى ژ پارێزگه‌ها به‌سرا بۆ ئه‌ڤرۆنيوز دياركر كو نوكه‌ خوه‌نيشادان ل به‌سرا دهێنه‌ ئه‌نجامدان.

وى ژێده‌رى زێده‌تر بۆ ئه‌ڤرۆنيوز گۆت” خوه‌نيشانده‌ر بزاڤا چوونا دناڤ كۆمه‌لگه‌ها حكومى وئااهيێ پارێزگه‌ها باسرا دكه‌ن”.

ديار كر ژى” ديوارێ ئاڤاهيێ پارێزگه‌هێ يێ هاتيه‌ سوتن ژلايێ خوه‌نيشانده‌ران ڤه‌ ونوكه‌ خوه‌نيشانده‌ر يێ بزاڤا ئێخستنا رێگريێن كونكريتى ئه‌وێن ل به‌رده‌م ديوانا پارێزگه‌ها به‌سرا هاتينه‌ دانان وه‌كو نه‌رازيبوونه‌ك ل سه‌ر كێمبوونا خزمه‌تگوزاريان ب تايبه‌تى يا ئاڤا ڤه‌خوارنێ”.