ئەڤرۆ نيوز:
خانەقین ل رۆژا 16 ئۆکتۆبەرا سالا بۆری قەزا خانەقین ژ ئالیێن ھێزێن میلیشیاتێن حەشدا شەعبی و ھێزێن عیراقێ ڤە ھاتیە داگیرکرن، وەلاتیێن وێ قەزایێ دخوازن ئەو میلیشیات ھەموو دەرکەڤن و ھێزا پێشمەرگەی جارەکا دیتر ڤەگەریت.
جێگرێ بەرپرسێ لقێ 15 یێ خانەقین ئەکبەر حەیدر بۆ رۆژناما ئەڤرۆ راگەھاند و گۆت: وەلاتیێن باژێرێ خانەقین ھەردەم گازندێن خوە ژ مانا ھێزا حەشدا شەعبی ل باژێرێ خانەقین و ھەموو ناحیە سنوورێ قەزایێ دکەن، کو ل گەل دانوستاندنێن ل گەل بەغدا مەرجەک ئەو بیت، کو ھێزێن حەشدا شەعبی ل باژێری نەمینن و بھێنە چوول کرن و ل وان دەڤەران نەمینن.
ئەکبەر حەیدەر گۆت: خەلکێ خانەقین داخوازا ڤەگەراندنا پێشمەرگەێ کوردستانێ دکەن، بۆ وان جھێن کێشە و کارەساتێن 16 ئۆکتۆبەرێ تێدا ئامادەبوون بوون، باوەی بتنێ ب ھێزا پێشمەرگەی ھەیە وانا ژ دەستێن تیرۆرستان ب پارێزیت، کو نوکە ل گەل ھەبوونا داعشێ ل دەڤەرێ ب ئاشکرایی ھەیە.
سەبارەت ڤەگەریانا پارتی و ڤەکرنا بنگەھێ پارتی ل ھەموو ناحیە و دەڤەرێن سەر ب قەزا خانەقین ڤە، جێگرێ بەرپرسێ لقێ 15 گۆت: نوکە بارەگایێ لقێ مە و ھەر ئێک ژ بارەگایێن دەڤەرێن جەلەولا و سەعدیە و مەندەلی، ژ ئالیێ ھێزێن عیراقێ و میلیشیاتێن حەشدا شەعبی ڤە ھاتینە داگیرکرن.
ھەروەسا ئاماژەدا ھندێ کو، سەرکرداتیا پارتی ب رێککەفتن دێ بارەگایێن مە زڤڕینیتن، ب سەر بلندی ڤە و ب ئالایێ پیرۆزێ کوردستانێ ڤە و ھێزا پێشمەرگەیی بۆ وان جھان کو بەری 16 ئۆکتۆبەرێ لێ ئاکنجیبوون ڤەگەن، دێ بارەگایێن خەوە ڤەکین و وەلاتی ژی بەردەوام دێ سەرەدانێن مە کەن، ئەم ب پارتی سەر بلندین.
نيشاندان
