ئه‌ڤرۆنيوز:

وه‌زاره‌تا دارايى وئابوورى ل هه‌رێما كوردستانێ فه‌رمانبه‌ران پشت راست دكه‌ت كو به‌غدا 317 مليار ديناران دێ ڤرێكه‌ته‌ هه‌رێما كوردستانێ وخشتێ دويێ يێ مووچه‌ى دێ هێته‌ راگه‌هاندن،

په‌يڤدارێ نڤيسينگه‌ها سه‌رۆك وه‌زيرێن عيراقێ دبێژيت، رێككه‌فتن يا به‌رده‌وامه‌ وچو په‌يوه‌ندى ب ب وان خوه‌نيشادان ونه‌رازيبوونان نينه‌ كو نوكه‌ ل به‌غدا وچه‌ند پارێزگه‌هێن باشوورێ عيراقێ ڤه‌گرتين.

ژێده‌ره‌كى ژ وه‌زاره‌تا دارايى وئابوورى ل هه‌رێما كوردستانێ راگه‌هاند” چو مه‌ترسيه‌ك ل سه‌ر وان 317 مليار ديناران نينه‌ ئه‌وێن به‌غدا بۆ مووچێ فه‌رمانبه‌رێن هه‌رێما كوردستانێ ڤرێ دكه‌ت، چونكى رێككه‌فتن يا ل سه‌ر وێ چه‌ندێ هاتيه‌ كرن ودێ هه‌يڤانه‌ به‌رده‌وام بيت”.

ل سێ هه‌يڤێن بۆرى 317 مليار دينارێن به‌غدا ل چه‌ند ده‌مێن جودا بۆ هه‌رێمێ هاتن ڤرێكرن،

ئەڤرۆ نيوز:

ماجد شنگالی پەرلەمانتارێ خولا بەرێ یێ پەرلەمانێ عیراقێ دیارکر، دیتنا حوکمەتێن عیراقی بۆ دەڤەرێن کوردستانی یێن دەرڤەی دەسھەلاتا ھەرێما کوردستانێ و چارەسەرکرنا مادێ 140 یێ دستۆرێ عیراقێ دیتنەکا خراب بوویە، ھەروەسا گەلەک کەمتەرخەمی ژ لایێ حوکمەتا عیراقێ ڤە ھاتیە کرن.

ماجد شنگالی ب تایبەت بۆ رۆژناما ئەڤرۆ گۆت: مە وەکو کوردان سەرەدەریەکا حزبی ل گەل ڤی بابەتی کریە و مە سەرەدەریا کوردایەتی ل گەل نەکریە، جونکو نە یا بەر ئاقل بوو، کو پشتی ھادی عامری ھاتی سێ نڤێسینگەە بۆ ئالیێن شیعی ڤەکرن و دو نڤێسینگەە بۆ وان دەڤەرێن کوردستانی ڤەکرن یێن دەرڤەی دەستھەلاتا ھەرێما کوردستانێ کو ئێک ل شنگالێ و ئێک ژی ل کەرکووکێ بوویە، دیسا ھەر کەسێ دبوو سەرۆکێ بجھئیانا مادێ 140 یێ دستۆری دا سەر ژنوو دەست ب ڤێ کەیسێ کەت، و ئەو تشتێ بەری ھنگێ ھاتیە کرن ھەموو نە دھێلا و دچوو خالا دەستپێکێ ڤە، ھەروەسا حزبێن مە یێن کوردستانی کادرێن خوە یێن حزبی دناڤا وان نڤێسنگەھان دا دانان و کادرێن شارەزا و خودان شیان نە دھاتنە دانان، ژ پێخەمەت بشێن گوتۆبێژان ل گەل ئالیێن عیراقی بکەن، و بگەھنە چارەسەریان، دیسا یا باشتر ئەوە کو ئەڤ کەیسە ڤەکری بمینیت و چو دەمێن دیارکری بۆ نەھێنە دانان، ھەروەسا د دەمێ سەرژمێریێ دا ھاتیە دیارکرن کو خەلکێ وان دەڤەران کوردن و ئەڤ چەندە تێرا ھندێ ھەیە کو ب سەلمینیت کو ئەڤ دەڤەرە یێن کوردانە، دیسا ریفراندۆمێ ژی ئەڤ چەندە سەلماندیە.

ناڤھاتی زێدەتر دبێژیت: پشتی ئەنجامێن ھەلبژارتنێن پەرلەمانێ عیراقێ دھێنە پشت راستکرن و ئەنجام ب رەنگەکێ فەرمی دھێنە راگەھاندن، دڤێت کارێ سەرەکی یێ کوردان بجھئینانا مادێ 140 و ڤەگەراندنا ئاواران بۆ دەڤەرێن وان بیت، ھەروەسا پێدڤیە ھێزێن پێشمەرگەی ژی بۆ وان دەڤەران بھێنە ڤەگەراندن و دڤێت ڤێ جارێ کورد بۆ خوە ڤێ دەلیڤێ باش وەرگرن و وەکو سالا 2003 نەکەن، چونکو ل وی دەمی ھەردو ئالیێن شیعی و سوننی د بێھێز بوون، لێ مخابن مە وەکو کورد چو مفا ژ بێھێزیا وان نەدیت، ھەروەسا دڤێت ئەم وەک کورد دەست ژ شیعاراتان بەردەین و دڤێت ئێدی ئەم دەست ب قۆناغا چەسپاندنێ بکەین.

ماجد شنگالی زێدەتر دبێژیت: ھەردو سەرۆک کۆمارێن عیراقێ چو رۆل نەگێرایە ژ بۆ پاراستنا مافێ کوردان د عیراقێ دا، ھەر چەندە سەرۆک کۆمار پارێزەرێ دستۆری یە و دشیا سکالایەکێ ل دادگەھا فیدرالی تۆمار بکەت. لێ ھەتا نوکە وان بەرەڤانی ژ مافێ خەلکێ کوردستانێ نەکریە و بێ دەنگ ماینە، ھەر چەندە حوکمەتا عیراقێ چەندین جاران دستۆر بن پێ کریە و مافێ کوردان پێشێلکرینە.