ئه‌ڤرۆنيوز:
سه‌رۆكێ ئێكه‌تيا ته‌پا پێ يا ئيسپانى، لويس روبياليس، ئه‌ڤرۆ دوشه‌مبى 9/7/2018 ناڤێ راهێنه‌رێ نوو يێ هه‌لبژارتيێ ئيسپانيا راگه‌هاند.
روبياليس خوياكر كو لويس ئينريكى، راهێنه‌رێ به‌رێ يێ يانا به‌رشه‌لونا، دێ ئه‌ركێ راهێنه‌ريا هه‌لبژارتيێ ئيسپانيا وه‌رگريت ل شوينا راهێنه‌رێ به‌روه‌خت فرناندۆ هيرۆى.
دياركر ژى كو هه‌ڤبه‌ستا ئينريكى دێ بۆ ده‌مێ دو سالان بيت.
ئه‌ڤرۆنيوز:
وه‌زيرێ ناڤخوه يێ عيراقێ يێ به‌رێ ئاشكراكر كو تيرۆرستێن داعشێ 75 گوند ژ حه‌مرين هه‌تا سامه‌را يێن داگيركرين.
باقر جه‌بر زوبێدى, وه‌زيرێ ناڤخوه يێ عيراقێ يێ به‌رێ دبه‌ياننامه‌كێ دا گۆت” پێزانينێن باوه‌رپێكرى يێن گه‌هشتينه من ل دۆر كونترۆلا داعشێن ( ويلايه‌تا سه‌لاحه‌يدن) ئه‌وێن خوه ل چيايێن حه‌مرين ئاسێ كرى، ل سه‌ر 75 گوندان هه‌ر ژ باشوورێ ناحيا ره‌شاد هه‌تا ده‌ڤه‌را متێبيجه ل رۆژئاڤايێ عوزه‌يم”.
زوبێدى كو سه‌ركرده‌كێ ديارێ جڤاتا ئيسلامى يا بلنده ل عيراقێ، گۆت ژى” ئه‌وا ئه‌ز تێبينيێ دكه‌م ئه‌و كو ده‌وله‌تا خيلافه‌تێ ل مووسلێ يا هاتيه ژناڤبرن، به‌لێ هه‌تا نوكه يا ماى ژ حه‌مرين هه‌تا سامه‌را”.
دهێته زانين كو چه‌كدارێن داعشێ ل ده‌مێن بۆرى چه‌ندين هێرش دژى له‌شكرێ عيراقێ وحه‌شدا شه‌عبى ووه‌لاتيێن مه‌ده‌نى كرينه ب تايبه‌تى ل رێيا دناڤبه‌را به‌غدا – كه‌ركووك، دئه‌نجامدا هێزێن عيراقێ ل رۆژا سێشه‌مبيا بۆرى ده‌ست ب ئۆپه‌راسيۆنه‌كێ كر ل بيابانێن ديالا وسه‌لاحه‌دين وده‌وروبه‌رێن كه‌ركووكێ بۆ پاقژكرنا وان دڤه‌ران ژ چه‌كدارێن داعشێ.
حه‌يده‌ر عه‌بادى سه‌رۆك وه‌زيرێن عيراقێ وفه‌رماندێ گشتيێ هێزێن چه‌كدار ل هه‌يڤا كانوونا ئێكێ 2017 راگه‌هاندبوو” عيراق ب تمامى ژ رێكخستيا داعشێ يا هاتيه ئازادكرن وپاقژكرن”.
ئه‌ڤرۆنيوز:
پارتى ديموكراتى كوردستان ل دۆر نڤيساره‌كا سه‌خته رادگه‌هينيت، ئه‌و نڤيسارا سه‌خته ئه‌وا به‌حس ل رێككه‌فتنێ ل دۆر وه‌رگرتنا پۆستێ سه‌رۆك كۆمارى ژلايێ سه‌رۆك بارزانى ڤه دكه‌ت، يا دووره ژ راستيێ وچو رێككه‌فتنێن ژ وى جۆرى نه‌هاتينه كرن.
ئه‌ڤرۆ دوشه‌مبى 9/7/2018، دتۆرێن جڤاكى دا، نڤيساره‌كى ب ده‌ست هاتيه نڤيسين به‌لاڤبوويه وتێدا وه‌سا هاتيه دياركرن كو نوونه‌رێ پارتى ديموكراتى كوردستان وچه‌ند لايه‌نێن دى يێن رێككه‌فتين وپارتى داخوازا پۆستێ سه‌رۆك كۆماراى يا كرى، ژلايێ نڤيسينگه‌ها راگه‌هاندنا فازل ميرانى، سكرتێرێ مه‌كته‌با سياسى يا پارتى ديموكراتى كوردستان، دراگه‌هاندنه‌كێ دا ره‌تكر وێ نڤيسارێ چو بنه‌ما بۆ هه‌بن.
نڤيسنگه‌ها راگه‌هاندنێ يا سكرتێرێ مه‌كته‌با سياسى يا پارتى دبێژيت” بۆ رايا گشتى رۆهن دكه‌ين كو ئه‌و به‌لگه‌نامه يا سه‌خته‌يه وچو راستى تێدا نينه وشێوازه‌كێ بۆ نێچيرا د ئاڤێ شێلى دا”.
هه‌روه‌سا ديار دكه‌ت” وى ده‌نگوباسى دبنه‌ره‌ت دا ره‌ت دكه‌ين وداخوازێ ژى ژ لايه‌نێن په‌يوه‌نديدار دكه‌ين، ڤه‌كۆلينێ بكه‌ن بۆ ده‌ستنيشانكرنا وى لايه‌نێ ئه‌و جۆره ده‌نگوباسه به‌لاڤكرى ولێپرسين دگه‌لدا بهێته كرن وبهێته دادگه‌هكرن”.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ دوشه‌مبى 9/7/2018 پێشوازى ل برێت مه‌كگورك هنارتيێ تايبه‌ت يێ سه‌رۆكێ ئه‌مريكى بۆ هه‌ڤپه‌يمانيا نێڤده‌وله‌تى يا دژى داعشێ وشانده‌كێ دگه‌لدا كر كو پێكهاتبوو ژ دۆگلاس سيليمان باليۆزێ ئه‌مريكا ل عيراقێ وكين كرۆس كونسۆلێ ئه‌مريكا ل هه‌رێما كوردستانێ .
دديداره‌كێ دا بيرورا ل دۆر دووماهى پێشهاتێن سياسى ل ده‌ڤه‌رێ وهه‌روه‌سا ره‌وشا سووريێ ونيگه‌رانيێن ل دۆر پاشه‌رۆژا گه‌لێ كورد ل سووريێ هاتن ئالوگوركرن، ومه‌كگوركى سياسه‌تا وه‌لاتێ خوه سه‌باره‌ت گوهۆرينێن هه‌رێمايه‌تى ونێڤده‌وله‌تى وره‌وشا سياسى وئه‌منى يا سووريێ به‌رچاڤكر.
ره‌وشا سياسى يا عيراقێ پشتى هه‌لبژارتنان وبزاڤێن پێكئينانا حوكمه‌تا نوو يا عيراقێ ته‌وه‌ره‌كێ دى يێ دديارێ بوو و تێدا سه‌رۆك بارزانى دووپاتكر كو ژبۆ دووباره نه‌بوونا شاشيێن بۆرى وگه‌هشتن ب هه‌ڤپشكيا راسته‌قينه، پێدڤيه هه‌ڤپيه‌مانيه‌كا هه‌مه‌لايه‌نه ل سه‌ر بنه‌مايێ هه‌ڤپشكيێ وسازانێ وهه‌ڤسه‌نگيێ ب هه‌موو هوورده‌كاريێن خوه‌ڤه بهێته دروستكرن وميكانيزم وسه‌قفێ زه‌مه‌نى ژى بۆ بجهئينانا وان هه‌رسێ پرنسيبان بهێته دانان بۆ وێ چه‌ندێ هه‌موو پێكهات هه‌ست ب وێ چه‌ندێ بكه‌ن كو دپرۆسا سياسى يا عيراقێ دا هه‌ڤپشكن وهه‌ر ل بن رۆناهيا وان هه‌رسێ پرنسيبان حوكمه‌ت بهێته پێكئينان.
دپشكه‌كا دى يا وێ كۆمبوونێ دا، هنارتيێ تايبه‌ت يێ سه‌رۆكێ ئه‌مريكا بۆ هه‌ڤپه‌يمانيا نێڤده‌وله‌تى يا دژى داعشێ راگه‌هاند كو وه‌لاتێ وى دێ به‌رده‌وام بيت دهاريكاريا عيراقێ وهه‌رێما كوردستانێ دا وبه‌رچاڤكر كو گه‌له‌ك ده‌ليڤه بۆ كارێ هه‌ڤپشك يێن هه‌ين ژبۆ بده‌ستڤه‌ئينانا سه‌قامگيريێ وباوه‌ريێ.
ئه‌ڤرۆنيوز:
ده‌روێش ئاكره‌يى ده‌مێ 33 سالايه باقلكێن كه‌لاندى ل دهۆكێ دفرۆشيت ودبێژيت ده‌مێ ماعونا باقلكا ب 10 فلسا و دو درهه‌م وسێ درهه‌مان من خێزانا خوه يا هه‌شت كه‌سى ب فرۆتنا باقلكان ب خودان دكر، به‌لێ نوكه وه‌سا نينه وژيان يا ب زه‌حمه‌تتر لێ هاتى.
ده‌رويش بۆ ئه‌ڤرۆنيوز دبێژيت” ل سالا 1985 من ده‌ست ب فرۆتنا باقلكێن كه‌لاندى ل سه‌ر عه‌ره‌بانێ كريه وهه‌تا نوكه ئه‌ز يێ به‌رده‌وامم وده‌ستپێكا كارێ من ل ناڤ بازارێ دهۆكێ بوو “.
دياركر” نوكه كارێ من وه‌كو به‌رێ نه‌مايه، رۆژانه ئه‌ز چار هه‌تا پێنج كيلۆيان دفرۆشم، به‌رى نوكه من رۆژانه نێزيكى 20 كيلۆيان دفرۆتن وئه‌ز دچمه هه‌موو جه وتاخێن باژێرێ دهۆكێ، ده‌مه‌كى ژى ئه‌ز ل ناڤ بازارى بووم ، به‌لێ نوكه پتر ئه‌ز يێ دناڤ كۆلانێن تاخێ شاخكێ دا”.
گۆت ژى” ده‌مێ ماعونا باقلكا ب 10 فلسا وپاشى ب درهه‌مه‌كى بوو گه‌له‌ك بۆ من باشتر بوو وژيان ژى يا ب ساناهيتر بوو ژ نوكه”.
ده‌روێش دبيژيت” ئه‌ز ب خوه باقلكان دكرم ودكه‌لينم ومن مه‌عميلێن خوه يێن تايبه‌ت ژى يێن هه‌ين وگه‌له‌ك كه‌س يێن هه‌ين ته‌له‌فۆنا من دكه‌ن ودبێژن تو نوكه ل كيرێى دا بۆ خوه بهێنه باقلكا”.
ل دۆر ده‌مێن وى يێن كارى، دبێژيت” ل هاڤينان ژبه‌ركو سه‌قا يێ گه‌رمه وباقلك زوو خراب دبن، ئه‌ز ل ده‌مژمێر 2:30 نيڤرۆ ده‌ردكه‌ڤم ول ده‌مێ زڤستانان ژى ل ده‌مژمێر 8:30 سپێدێ ده‌ردكه‌ڤم”.
ئەڤرۆ نیوز ، زنار تۆڤی :
ئەڤرۆ دوشەمبی 9.7.2018 جارەکادی فرۆکێن سۆپایێ تورکی ب بەهانەیا هەبوونا چەکدارێن پەکەکێ گەلیێ بازێ ل سنورێ ناحیا کانی ماسێ بۆمبە بارانکر.
ئامەد سالح وەلاتیەکێ وێ دەڤەرێ یە بۆ ئەڤرۆ نیوز دیارکر: ئەڤرۆ دوشەمبی و لدەمژمێر 4:40 خولەک جارەکا دی فرۆکێن سۆپایێ تورکی گەلیێ بازێ ل ناحیا کانی ماسێ یێ سەر ب قەزا ئامێدیێ ڤە بۆمبە بارانکر و ڤێ چەندێ ترسەک ئێخستە دلێ خەلکێ گوندێن دەوروبەر و هەروەسا ئەڤە د ماوێ ڤان رۆژان دا دو جاران فرۆکان ئەڤ گەلیە بۆمبە بارانکر.
ئه‌ڤرۆنيوز:
كۆمسيۆنا بلند يا هه‌لبژارتنان ل عيراقێ راگه‌هاند، ئه‌ڤرۆ هژمارتنا ب ده‌ست يا ده‌نگان بۆ وان سندووقان دێ هێته ئه‌نجامدان كو تانه ل سه‌ر هاتين ل شه‌ش پارێزگه‌هێن عيراقێ، ژێده‌ره‌كێ رۆژنامه‌ڤانى ژى ل پارێزگه‌ها موسه‌نا بۆ ئه‌ڤرۆنيوز دياركر بريار ئه‌وبوو ده‌نگێن سندووقێن تانه ل سه‌ر يێن پارێزگه‌ها موسه‌نا، ل باژێرێ سه‌ماوه سه‌نته‌رێ پارێزگه‌هێ بهێنه هژمارتن، به‌لێ ب شه‌ڤ يێن هاتينه ڤه‌گۆهاستن بۆ به‌غدا.
له‌يس جه‌بر، په‌يڤدارێ كۆمسيۆنا بلند يا هه‌لبژارتنان ل عيراقێ د به‌ياننامه‌كێ دا راگه‌هاند” ئه‌ڤرۆ دوشه‌مبى 9/7/2018 هژمارتنا ب ده‌ست بۆ وان سندووقان دێ هێته ئه‌نجامدان كو تانه ل سه‌رن ل پارێزگه‌ها به‌غدا، ئه‌وژى هه‌ر شه‌ش پارێزگه‌هێن به‌سره وميسان وناسريه وموسه‌نا وديوانيه وواست”.
دياركر” پرۆسا هژمارتنا ده‌نگان ب ده‌ست ل هۆلێن پێشانگه‌ها نێڤده‌وله‌تى يا به‌غدا دێ ب رێڤه‌چيت ونوونه‌رێن نه‌ته‌وێن ئێكگرتى وباليۆزخانان ولايه‌نێن سياسى وده‌زگه‌هێن راگه‌هاندنێ دێ تێدا به‌رهه‌ڤ بن”.
ژلايه‌كێ دى ڤه، ژێده‌ره‌كێ رۆژنامه‌ڤانى ل پاريزگه‌ها موسه‌نا بۆ ئه‌ڤرۆنيوز گۆت” بريار بوو هژمارتنا ب ده‌ست يا ده‌نگێن دناڤ سندووقێن تانه ل سه‌ر هاتين ل پارێزگه‌ها موسه‌نا هه‌ر ل باژێرێ سه‌ماوه سه‌نته‌رێ پارێزگه‌هێ بهێته ئه‌نجامدان، به‌لێ دياره ئه‌و سندووقێن ده‌نگدانێ ب شه‌ڤ يێن هاتينه ڤه‌گۆهاستن بۆ به‌غدا تاكو ئه‌و پرۆسه ل وێرێ بهێته ئه‌نجامدان”.
وى ژێده‌رى گۆت ژى” ئه‌و دادوه‌رێ هاتيه راسپاردن بۆ ب رێڤه‌برنا ئۆفيسا پارێزگه‌ها موسه‌نا يا كۆمسيۆنا بلند يا هه‌لبژارتنان ل عيراقێ، چو داخۆيانيێن رۆژنامه‌ڤانى ناده‌ت”.
ئه‌ڤرۆنيوز:
نوشداره‌كا تایبەتمەند ب نەخوه‌شيێن گوهـ و دفن و گەوريێ ل دھۆکێ دیارکر ھەکە هێدفۆن ب ره‌نگه‌كێ دروست بھێتە بکارئينان ئەو ژی دەنگ نورمال بیت بۆ دەمێ گەلەک دەمژمێران نەھێتە بکارئینان چو مەترسى ل سەر گوھلێبوونێ نينە.
سه‌یران سالم محه‌مەد سه‌لیم، نوشدارا تایبەتمەندا گوهـ و دفن و گەوریێ ل نەخوه‌شخانا ئازادی یا فێرکرنێ ل دھۆکێ بۆ نوش نیوز دیارکر کو گه‌له‌ك تشتێن گرنگ يێن هه‌ين پێدڤیە بکارئينەرێن ھێدفۆنا بزانن ئەو ژی بلنداھیا دەنگی و درێژاھیا وەختی بکارئينانا ھێدفۆنێ ئەڤە ھەردو تشت گه‌له‌ك دگرنگن بۆ وان کەسێن ھێدفۆنێ بکاردئینن، چونکى ھەکە دەنگ گەلەک یێ بلند بیت، دبيت مەترسی ل سەر گوھلێبوونێ ھەبیت و کارتێکرنێ ل دەمارا گوھلێبوونێ بکەت ھەتا ھەتایێ و ھەکە دەنگ یێ نزم بیت یێ نورمال بیت به‌لێ بۆ دەمێ چەند دەمژمێران بۆ نموونە سێ ھەتا چار دەمژمێران د رۆژێ دا بێ بێنڤەدان رۆژ ل دووڤ رۆژێ دێ کارتێکرنێ ل گوھی کەت و ب درێژیا سالان دێ مەترسى کەڤيتە سەر گوھى و گوھلێبوونێ.
سه‌یران سالم ئاشکەرا کر کو شێوێ دروست بۆ بکارئینانا ھێدفونێ ئەوە مرۆڤ ب دەنگەکێ نورمال بۆ دەمەکێ کێم بکار بینيت، باشترە مرۆڤ گەلەک بکارنەئینيت د رۆژێ دا، ئانکو زێدەتر نەبیت ژ دەمژمێره‌كێ و بێھنڤەدان د ناڤبەرا بکارئینانا ھێدفۆنێ دا ھەبیت،دياركر ژى كو ئەو ھێدفۆنێن کوالێتیا وان باش دچێترن ژ یێن کوالێتیا وان نەباش ئانکو کوالێتیا ھێدفۆنێ ژی گەلەک یا گرنگە بۆ وان کەسێن بکاردئینن.
ئەڤرۆ نیوز ، زنار تۆڤی:
وەزارەتا پەروەردێ یا حوکمەتا هەرێما کوردستانێ رێنمایێن پێدانا مۆلەتا بێ مووچە بۆ مامۆستایان دەركرن، كو دێ ل سالا خواندنا (2018-2019) كار پێ هێتە کرن.
ئەڤرۆ دووشەمبی 9 تەمۆزا 2018، وەزارەتا پەروەردا هەرێما کوردستانێ رێنمایێن نوو بۆ پێدانا مۆلەتا بێ مووچەیێ بۆ مامۆستایان دەكرن، كو لدووڤ وێ بڕیارێ مامۆستا دشێن هەر ژ سوبەهی 10 تەمۆزێ هەتا 15 ئیلۆنا 2018 داخوازیا خوە پێشكێش پەروەردێن قەزایان بكەن.
نيشاندان