ئه‌ڤرۆنيوز:

به‌رپرسێ ميحوه‌رێ رۆژئاڤايێ ديجله‌ يێ هێزێن پێشمه‌رگه‌ى، بابه‌كر زێبارى، ل دووڤ مالپه‌رێ فه‌رميێ پارتى راگه‌هاند، هاتنا هێزه‌كا ئه‌مريكى بۆ شنگالێ، پێنگاڤه‌كا ئه‌رێنى يه‌ بۆ وێ چه‌ندێ ئيدارا هه‌ڤپشك دناڤبه‌را هێزێن عيراقێ وپێشمه‌رگه‌ى دا بهێته‌ دروستكرن ودياركر ئه‌مريكا مامه‌لێ ل گه‌ل حه‌شدا شه‌عبى وپه‌كه‌كێ ناكه‌ت.

دوهى هێزه‌كا ئه‌مريكى گه‌هشته‌ شنگالێ وشه‌ڤا بۆرى ژى ئه‌و هێز چو سه‌ر چيايێ شنگالێ وهێزه‌كا له‌شكرێ عيراقێ ل گه‌ل وێ هيزا ئه‌مريكى بوو.

ل دووڤ گۆتنا سه‌رۆكێ جڤاتا قه‌زا شنگالێ، وه‌يس نايف، هاتنا وێ هێزێ بۆ شنگالێ جهێ دلخوه‌شيا خه‌لكێ شنگالێ يه‌ ووان پێ خوه‌شه‌، چونكى دبه‌رژه‌وه‌نديا خه‌لكێ وێ ده‌ڤه‌رێ دايه‌ وره‌نگه‌ ببيته‌ ئه‌گه‌رێ وێ چه‌ندێ جاره‌كادى خه‌لكێ شنگالێ ڤه‌گه‌رن بۆ سه‌ر مال وحالێ خوه‌.

هه‌ر گرێداى ڤێ پرسێ ول دووڤ پێزانينێن بابه‌كر زێبارى به‌رپرسێ ميحوه‌رێ رۆژئاڤايێ ديجله‌ يێ هێزێن پێشمه‌رگه‌ى، هێزه‌كا ئه‌مريكى وله‌شكرێ عيراقێ چووينه‌ وێ ده‌ڤه‌رێ تاكو سنورێ دناڤبه‌را عيراقێ وسووريێ دا بپارێزين وهاريكاريا پۆليسێن ل سه‌ر سنورى بكه‌ن، وه‌كو زێبارى ب مالپه‌رێ فه‌رميێ پارتى گۆتى” شيانێن هێزێن پۆليسان دكێمن وره‌وش ژى يا باش ننيه‌ وهێشتا داعشێ هه‌بوون يا هه‌ى، ئه‌مريكا كو هاتى ب و شيوه‌كى مامه‌لێ ل گه‌ل حه‌شدار شه‌عبى وپه‌كه‌كێ ناكه‌ت، له‌وما هێزه‌كا له‌شكرێ عيراقێ ل گه‌ل وێ هيزا ئه‌مريكى هاتيه‌”.

بابه‌كر زێبارى، هاتنا وێ هێزا ئه‌مريكى بۆ شنگالێ ب پێنگاڤه‌كا باش دزانيت وب ديتنا وى ئه‌ڤ پێنگاڤه‌ ده‌ستپێكه‌كه‌ بۆ وێ چه‌ندێ هيزێن پێشمه‌رگه‌ى ژى جاره‌كادى ڤه‌گه‌رن بۆ وان ده‌ڤه‌ران ول گه‌ل له‌شكرێ عيراقێ ئيدارا هه‌ڤپشك دروست بكه‌ن.

بابه‌كر زێبارى دياركر ژى” ب هاتنا وێ هيزا ئه‌مريكى ئومێده‌ك بۆ خه‌لكێ شنگالێ دروستبوو  كو ژ حه‌شدا شه‌عبى وپه‌كه‌كێ قورتال ببن. چونكى حه‌شدا شه‌عبى چه‌ندين گرۆپن ل ده‌ڤه‌رێ وره‌فتارێن خراب به‌رامبه‌ر خه‌لكێ ده‌ڤه‌رێ دكه‌ن، له‌وما وان پێ خوه‌شه‌ ئه‌و هێزا ئه‌مريكا هاتى بۆ شنگالێ”.

ئێك ژ ئه‌گه‌رێ دى يێن چوونا وێ هێزێ بۆ سه‌ر چيايێ شنگالێ، ل دووڤ بۆچوونا بابه‌كر زێبارى ئه‌وه‌ كو ل ده‌مێ خوه‌ رژێما به‌عس ل وى چياى مووشه‌ك ئاراسته‌ى ئيسرائيلى دكرن، نوكه‌ ژى مه‌ترسى يا هه‌ى ل وێ چه‌ندێ كو ئيران شانێن خوه‌ وێ ده‌ڤه‌ري كربيت وگۆت” ده‌ڤه‌را چل مێرا ل چيايێ شنگالێ گه‌له‌ك يا هه‌ستياره‌، له‌وما ئه‌و جهێ گرنگ دده‌ستێ كێ دابيت، دشێت كونترۆلا هه‌موو ده‌ڤه‌رێ بكه‌ت، چوونا هێزێن ئه‌مريكى ژى بۆ وى جهى هه‌ر ئه‌و چه‌نده‌ ئه‌گه‌ره‌”.

ئه‌ڤرۆنيوز:

ژه‌گه‌رێ گرتنا ئاڤا زێ بچووك ژلايێ ئيرانێ ڤه‌ هزاران ماسى ژناڤچوون، هه‌روه‌سا كێشه‌ بۆ ئاڤا ڤه‌خوارنێ ل قه‌لادزێ په‌يدابوو.

ريڤه‌به‌ريا گشتى يا به‌نداڤ وعه‌مبارێن ئاڤێ ل وه‌زاره‌تا چاندنێ وژێده‌رێن ئاڤێ ل هه‌رێما كوردستانێ د رۆهنكرنه‌كێ دا به‌لاڤكر” بۆ جارا دويێ ئيرانێ ئاڤا زێ بچووك ل سه‌ر هه‌رێما كوردستانێ گرت، هه‌ر چه‌نده‌ نوكه‌ ده‌مێ گرتنا ئاڤێ ژى نينه‌”.

ژئه‌گه‌رێ گرتنا وێ ئاڤێ، هزاران ماسى دناڤ زێ بچووك ژناڤچوون، رێڤه‌به‌ريا گشتى يا به‌نداڤێن هه‌رێمێ دياركر كو گرتنا ئاڤا زێ بچووك كێشه‌ بۆ ئاڤا ڤه‌خوارنێ ل قه‌لادزێ دروست بوو.

ئه‌ڤرۆنيوز:

پارێزگه‌رێ به‌رێ يێ كه‌ركووكێ راگه‌هاند، كار دكه‌ين بۆ ئازادكرنا كه‌ركووكێ وهه‌موو ئه‌و ده‌ڤه‌رێن كو ل 16 ئوكتۆبه‌رێ هاتينه‌ داگيركرن.

نه‌جمه‌دين كه‌ريم، ئه‌ندامێ مه‌كته‌با سياسى يا ئێكه‌تى نيشتمانى كوردستان وپارێزگه‌رێ به‌رێ يێ كه‌ركووكێ، ل دووڤ مالپه‌رێ كوردستان تى ڤى، راگه‌هاند  ل ساليادا 43 يا دامه‌زراندنا ئێكه‌تى نيشتمانى كوردستان، سلاڤ بۆ گيانێ پاكێ مام جه‌لال وهه‌موو شه‌هيدێن كوردستانێ، سلاڤ ل پێشمه‌رگێن قه‌هره‌مان وجه‌ماوه‌ر وگه‌لێ كوردستانێ.

گۆت ژى، سۆزێ دده‌ين كو دبه‌رده‌وام بين ل خه‌باتێ بۆ گه‌هشتن ب مافێ چاره‌نڤيسێ گه‌لێ مه‌.

راگه‌هاند ژى، دڤێ رۆژا ديرۆكێ دا دووپات دكه‌ين كو كاردكه‌ين بۆ ئازادكرنا كه‌ركووكێ وهه‌موو وان ده‌ڤه‌رێن كو ل 16 ئوكتۆبه‌رێ هاتينه‌ داگيركرن.

ئه‌ڤرۆنيوز:

نيڤرۆيا ئه‌ڤرۆ شه‌مبيێ 2/6/2018 وه‌زاره‌تا دارايى وئابوورى ل هه‌رێما كوردستانێ رۆهنكرنه‌ك به‌لاڤكر وتێدا ئاماژێ دده‌ت كو به‌رهه‌ڤى ورێكخستنا ليستێن مووچان وبه‌لاڤكرنێ ل ده‌مێ خوه‌ بوو، مخابن ل هنده‌ك كه‌نالێن راگه‌هاندنێ وتۆرێن جڤاكى ده‌نگوباسێن جۆراوجۆر دهێنه‌ به‌لاڤكرن ب تايبه‌ت ل سه‌ر مووچێ وه‌زاره‌تا پێشمه‌رگه‌، له‌وما مه‌ ب فه‌ر زانى رۆهنكرنێ ل سه‌ر ڤى بابه‌تى بده‌ين.

وه‌زاره‌تا دارايى دوێ رۆهنكرنا خوه‌ دا دبێژيت” وه‌زاره‌تا دارايى ل ده‌ستپێكا كاركرنێ ب سيسته‌مێ نوو يێ مووچه‌ى راگه‌هانديه‌ كو ژێده‌رێ پێدانا ڤى مووچه‌ى داهاتێ په‌ترۆلێ يه‌ وئه‌و كۆژمێ پاره‌يه‌ كو ژ به‌غدا دهێت ل گه‌ل هاريكاريا هه‌ڤپه‌يمانان يا تايبه‌ت بۆ پێشمه‌رگه‌ى”.

وه‌زاره‌تا دارايى دياركر كو ل 3/6/2018 دێ ده‌ست ب به‌لاڤكرنا مووچه‌ى هێته‌ كرن وه‌كو هه‌يڤا بۆرى دێ دو ليست بيت، ليستا ئێكێ ل سه‌ر داهاتێ په‌ترۆلێ وليستا دويێ ل سه‌ر وى كۆژمێ پاره‌يه‌ كو ژبه‌غدا دهێت، ل گه‌ل گه‌هشتنا وى كۆژمێ پارێ به‌غدا، راسته‌وخوه‌ ليستا دويێ دێ هێته‌ راگه‌هاندن كو پێك دهێت ژ وه‌زاره‌تا پێشمه‌رگه‌ ووه‌زاره‌تا ناڤخوه‌ وده‌زگه‌هێ ئاسايش وليوايێن په‌ترۆل وغازێ وخانه‌نشينێن له‌شكرى ومه‌ده‌نى.

خوياكر ژى كو بۆ هه‌يڤا داهاتى، وه‌زاره‌تا پێشمه‌رگه‌ دێ بيته‌ وه‌زاره‌تا ئێكێ مووچه‌ ل سه‌ر دهێته‌ به‌لاڤكرن.