سەرۆك بارزانی و ئەحمەد شەرع د پەیوەندییەكا تەلەفۆنیدا دووماهی پێشهاتێن سیاسی یێن سووریێ و گوهۆڕینێن دەڤەرێ گەنگەشەكر.
بارەگەهێ بارزانی بەلاڤكر، ئەحمەد شەرع سەرۆكێ سووریێ ب رێكا تەلەفۆنێ پەیوەندی ب سەرۆك بارزانی كر.
د وێ پەیوەندییا تەلەفۆنیدا دووماهی پێشهاتێن سیاسی یێن سووریێ و گوهۆڕینێن دەڤەرێ هاتنە باسكرن و هەردو ئالییان دووپاتی ل گرنگییا ئارامی و هەماهەنگییا هەڤپشك كر.
هەروەسا سەرۆكێ سووریێ بۆ سەرۆك بارزانی دووپاتكر كو كورد پێكهاتەیەكێ رەسەن و سەرەكیێ گەلێ سووریێ یە و دووپاتی ل پێگیریبوونا دەولەتا سووریێ بۆ گەرەنتیكرنا هەموو مافێن نیشتمانی و مەدەنی یێن كوردان ل گەل پێكهاتەیێن دی یێن سووریێ ب شێوەیەكێ وەكهەڤ و بێی جوداهی كر.
هەر د وێ پەیوەندییا تەلەفۆنیدا سەرۆك بارزانی رێز بۆ وێ بۆچۆنا سەرۆكێ سووریێ هەبوو و پشتەڤانییا خوە بۆ حەز و خواست و هیڤیێن سوورییان بۆ ئاڤاكرنا دەولەتەكێ راگەهاند كو هەموو ئالی و پێكهاتەیان ب خوەڤە بگریت و تێدا هەڤپشك بن.
هەروەسا سەرۆك بارزانی دوپاتی ل پێدڤییا بەردەوامییا راوێژ و هەماهەنگیێ كر ئەوژی ژ پێخەمەت ل بەرچاڤ وەرگرتنا بەرژەوەندیێن هەموو ئالییان و پاراستنا ئاشتییا جڤاكی.

مەسرور بارزانی، سەرۆكێ حوكمەتا هەرێما كوردستانێ پەیامەك ل دۆر روودانێن حەلەبێ بەلاڤكر وراگەهاند: روودانێن حەلەب و ب ئارمانجگرتنا گوردان ژ پێخەمەت گوهۆڕینا دیموگرافییا دەڤەرێ و دروستكرنا مەترسیێ ل سەر ژیانا وەلاتیێن سڤیل، دەستهەلاتا دیمەشقێ و ویژدانا جڤاكێ نێڤدەولەتی د ئێخیتە بن پرسیاری.
سەرۆكێ حوكمەتا هەرێمێ ئاماژە ب وێ چەندێ ژی كر، شەڕ و توندوتیژی، چارەسەەرییا بنەڕەتییا هیچ كێشەیەكێ ناكەت. هیچ بەهانە نابیت رێكێ ب ژناڤبرنا رەگەزی بدەت. هێرش ل سەر تاخێن كوردێن باژێرێ حەلەبێ، ئەم ب گەلەك دلتەنگ كرینە.
ل دووماهییا پەیاما خوە مەسرور بارزانی گوت» هیڤیدارین هەموو ئالییەك ژیانا وەلاتییان بپارێزن و بۆ چارەسەرییا كێشەیان، پەنایێ بۆ دیالۆگێ و دانوستاندنێ ببەن، هەروەسا هیڤیدارین سیستەمێ حوكمڕانییا نوكە یا سووریێ ل ئاستێ بەرپرسیارییا دەستهەلاتەكا دیموكرات و گشتگیر بۆ هەموو خەلكێ سووریێ بیت.

فازل میرانی، بەرپرسێ دەستەیا كارگێرییا مەكتەبا سیاسی یا پارتی پێشوازی ل فیونا بویتەرز، هاریكاریا قونسلێ گشتیێ بریتانیا ل هەولێرێ و شاندێ د گەلدا كر.
د دیدارەكێدا فازل میرانی پیرۆزباهی ل هاریكارا قونسلێ بریتانیا ل هەولێرێ كر ب هەلكەفتا دەستبكاربوونا وێ د ئەركێ خوە یێ نوو دا و هیڤییا سەركەفتنێ بۆ خواست.
بەرپرسێ دەستەیا كارگێرییا مەكتەبا سیاسی یا پارتی پوختەیەك ژ دیرۆكا پارتی دیموكراتی كوردستان و بزاڤا رزگاریخوازا گەلێ كوردستان پێشكێش كر.
د تەوەرەكێ دیدا میرانی سەبارەت ب رەوشا ئەڤرۆ یا كوردستانێ، ئیراقێ و دەڤەرێ ئاماژە ب وێ چەندێ كر كو دەڤەر د قووناغەكا هەستیاردا دەرباز دبیت و بەر ب گوهۆڕینان دچیت.
ل دۆر بزاڤێن ئالیێن سیاسی یێن ئیراقی و كوردستانی بۆ پێكئینانا حوكمەتا ئیراقا فیدرال و حوكمەتا هەرێما كوردستانێ، میرانی دووپاتكر بزاڤ بەردەوامن و هیڤییا مە ئەوە ل نێزیك حوكمەتا ئیراقا فیدرال و حوكمەتا هەرێما كوردستانێ بهێنە پێكئینان.
ژ ئالیێ خوە ڤە هاریكارا قونسلێ گشتیێ بریتانیا ژی ل هەولێرێ، خوەشحالییا خوە دیاركر بۆ دەستپێكرنا بجهئینانا ئەركێ خوە یێ نوو ل هەولێرێ، هەروەسا هیڤی خواست هەرێما كوردستانێ و گەلێ كوردستانێ هەر د پێشكەفتنێدا بن.

ل بارەگەهێ مەكتەبا سیاسی یا پارتی دیموكراتی كوردستان ل پیرمام، فازل میرانی، بەرپرسێ دەستەیا كارگێرییا مەكتەبا سیاسی، پێشوازی ل یان برێم، قونسلێ گشتیێ فرەنسا ل هەولێرێ كر.
د دیدارەكێدا فازل میرانی، بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان، رۆناهێ ئێخستە سەر رەوشا ئەڤرۆ یا هەرێما كوردستانێ ب تایبەتی و ئیراقا فیدرال و دەڤەرێ و جیهانێ ب گشتی.
میرانی گوت» جیهان و دەڤەر ب رەوشەكا هەستیاردا دەرباز دبیت، روودان و گوهۆڕین ب لەزن و دڤێت ژێرانە سەرەدەری بهێتە كرن».
بەرپرسێ دەستەیا كارگێرییا مەكتەبا سیاسی سەبارەت ب پێكئینانا حوكمەتا هەرێما كوردستانێ گوت» دانوستاندنێن پارتی دیموكراتی كوردستان ل گەل هێز و ئالیێن سیاسی یێن كوردستانی بەردەوامن، بۆ پێكئینانا حوكمەتا ئیراقا فیدرال ژی بزاڤ و دانوستاندنێنێن هەموو هێز و ئالیێن سیاسی یێن كوردستانێ و ئیراقی بەردەوامن، هیڤیدارین حوكمەتا داهاتییا ئیراقا فیدرال هەموو كێشەیان چارەسەر بكەت، بەری هەموویان ژی كێشەیێن د ناڤبەرا بەغدا و هەولێرێ دا و كار بهێتە كرن بۆ بجهئینانا بڕگەیێن دەستوروێ ئیراقا فیدرال».
فازل میرانی ئاماژە ب هەڤبەندیێن د ناڤبەرا هەرێما كوردستانێ و فرەنسا و هەڤبەندییا گەلێ كوردستانێ و گەلێ فرەنسا دا و ب هەڤبەندییا دیرۆكی و ل ئاستەكێ بلند هەژمارت.
یان برێم، قونسلێ گشتیێ فرەنسا ژی ل هەولێرێ هیڤی خواست كوردستان و گەلێ كوردستانێ هەر د پێشكەفتنێدا بن و هەڤبەندیێن د ناڤبەرا هەرێما كوردستانێ و فرەنسا د هەموو واراندا هەر د گەشەكرنێدا بن.

ئەندامەكێ جڤاتا نوونەرێن ئیراقێ راگەهاند: هەرێما كوردستانێ هەموو پێگیریێن دارایی یێن خوە، بجهئیناینە و هیچ ئاستەنگەكا قانوونی ل پێشبەری هنارتنا مووچەیێن فەرمانبەرێن هەرێما كوردستانێدا نینە. هەروەسا دبێژیت: حوكمەتا نوكە یا ئیراقێ یا كاربڕێڤەبەرە و پێكئینانا كابینەیا نوو یا حوكمەتا ئیراقێ ژی پێدڤی ب وەختییە، لەوما پێشبینی دهێتە كرن ل سالا 2026 ئیراق نەشێت د وەختێ خوە دا قانوونا بودجەی پەسەند بكەت.
سیپان شێروانی، ئەندامێ جڤاتا نوونەرێن ئیراقێ ژ فڕاكسیۆنا پارتی دیموكراتی كوردستان د داخۆیانییەكا رۆژنامەڤانیدا گوت» ژ بەر كو حوكمەتا نوكە یا ئیراقێ حوكمەتەكا كاربڕێڤەبەر و پرۆسەیا پێكئینانا كابینەیا نوو یا حوكمەتا ئیراقێ ژی پێدڤی ب وەختییە، پێشبینی دهێتە كرن ل سالا 2026 ئیراق نەشێت د وەختێ خوە یێ قانوونیدا بودجەی پەسەند بكەت».
سیپان شێروانی ئاماژە ب وێ چەندێ ژی كر كو د رەوشەكا ب وی شێوەیدا، قانوونا كارگێرییا داراییا ئیراقێ میكانیزمێ (ئێك ل سەر دوازدە 1/12) بجه دئینیت، كو رێكێ ب حوكمەتێ د دەت خەرجیێن بنەڕەتی و مووچەی ل دووڤ بودجەیا سالا بۆری بەردەوام بكەت تاكو وی وەختێ قانوونا نوو دهێتە پەسەندكرن.
سەبارەت ب گرفتێن ل سەر بەهرا هەرێما كوردستانێ، سیپان شێروانی دوپاتكر كو مووچەیێن فەرمانبەرێن هەرێما كوردستانێ گرێداینە ب بڕیارەكا دادگەها فیدرالی و نابیت تووشی هیچ ئیفلیجبوونەكا ببن».
رۆهنكر ژی» هەرێما كوردستانێ هەموو پێگیریێن خوە یێن دارایی، ژ وان ژی رادەستكرنا داهاتێ پەترۆلی و نە پەترۆلی، بجهئینایە. ژ بەر وێ چەندێ، پێدڤییە بەغدا ژی هەڤشێوەیێ پارێزگەهێن دی یێن ئیراقێ، مەهانە مافێن دارایی یێن هەرێما كوردستانێ بهنێریت».
وی ئەندامێ جڤاتا نوونەرێن ئیراقێ باس ل وێ چەندێ ژی كر كو هیچ پارێزگەهەكا ئیراقێ وەك هەرێما كوردستانێ پێگیریێن خوە بەرامبەر ب ناڤەندی بجهنەئیناینە. ڤێ پێگیربوونێ وەكریە كو هەر جۆرە بڕین یا گیرۆبوونەكا مووچەی، بەهانەیا قانوونی نەمینیت».
دووپاتكر ژی» هەتا وەختێ دەستبكاربوونا حوكمەتا نوو یا ئیراقا فیدرالی و داڕێشتنا بۆچۆنەكا نوو بۆ بودجەی، پرۆسەیا هنارتنا مووچەی بێی گرفت دێ بەردەوام بیت».

ل دۆر گوهۆڕينێن رۆژئاڤايێ كوردستانێ سه‌رۆك مه‌سعود‌ بارزانى په‌يامه‌ك به‌لاڤكر و راگه‌هاند كو گه‌فا قڕكرنا نه‌ژادى ل دژى كوردان ل رۆژئاڤا هه‌يه‌.
سه‌رۆك مه‌سعود بارزانى د په‌ياما خوه‌ دا ديار دكه‌ت كو گوهۆڕینێن سیاسی یێن سووریێ دەلیڤەيه‌کا باش بوون بۆ دیتنا چارەسەریەکا گونجای داکو مافێن ڕەوا یێن گەلێ کورد ل سووریێ به‌رچاڤ بهێتە وه‌رگرتن و هەموو ئاریشە ژی بهێنە چارەسەرکرن و گۆت: «ژ بۆ وێ مەرەمێ ژی مە د گەل هەموو لایەنان گه‌له‌ك بزاڤ كرن کو فەرە هەر چ ئاريشه‌ و هەڤنەكرنێن هەین ب ڕێيا دیالۆگێ و ب شێوازەکێ ئاشتیانە بهێنە چارەسەرکرن».
گۆت ژى: «به‌لێ ئەو كاودانێ مەترسیدار و ئەو شەڕ و توندوتیژییا کو نوکە ل باژێڕێ حەلەبێ هەی، جهێ دلگرانییەکا زۆرە و مەترسی ل سەر ژیانا خەلکێ سڤیل و وەلاتیێن بێگونەهـ دروست کرییه و گەفێن قڕكرنا نه‌ژادى ل دژی کوردان ل وێ دەڤەرێ هەنە».
سه‌رۆك مه‌سعود بارزانى داخواز ژ دەستهەلاتدارێن سووريێ كر کو هەڤنه‌كرنێن سیاسی نەبنە هەڤنەكرنێن نەتەوەیی و د وان ئاریشە و گرفتێن ل دەڤەرا حەلەبێ دا هەین و گۆت: «ڕێ نەهێتە دان وەلاتیێن کورد تووشی فشار و زەبروزەنگيێ و دەرکرنێ ژ جهێ باب و باپیرێن وان ببن و روو ب روويێ پاقژکرنا نەژادی ببن».
هەروەسا سه‌رۆك بارزانى داخواز ژ لایەنێن کوردی و ب تایبەت (هسد)ێ كر، ئەوا د شیانێن وان دا هەبیت بکەن ژ پێخەمەت ڕاگرتنا شەڕ و پێکدادانان و ڕێگرتن ل ڕشتنا خوینێ یا زێدەتر.
هيڤى ژى خواست كو هەردولا کار بۆ گرتنەبەرا ڕێيا دیالۆگ و دانوستاندنان بکەن بۆ چارەسەرکرنا ئاریشه‌يان.
سه‌رۆك بارزانى ل دووماهيا په‌ياما خوه‌ دخوازيت هه‌بوونا لهه‌ڤنه‌كرنێن سياسى نه‌بيته‌ ئه‌گه‌رێ وێ چه‌ندێ كو ژيانا خه‌لكێ سڤیل بکەڤیتە د بن مەترسیێ دا و پاقژکرنا نەژادی ل دژی گەلێ کورد بهێته‌ بكارئينان، چونکى ئەڤە تاوانەکا دژی مرۆڤاتیێ یە و دێ ئەنجامێن مەترسیدار ل دووڤ خوه‌ ئینیت.

ل بارەگەهێ مەكتەبا سیاسی یا پارتی دیموكراتی كوردستان، فازل میرانی بەرپرسێ دەستەیا كارگێرییا مەكتەبا سیاسی، پێشوازی ل ئەرمان تۆپچو، قونسلێ گشتیێ توركیا ل هەولێرێ كر.
د دیدارەكێدا، فازل میرانی رۆناهی ئێخستە سەر رەوشا ئەڤرۆ یا هەرێما كوردستانێ و ئیراقێ و دەڤەرێ و ئاماژە ب وێ چەندێ كر» دەڤەر ب رەوشەكا هەستییاردا دەرباز دبیت و دڤێت ئەم هەموو ب بەرپرسیاری سەرەدەیێ ل گەل پێشهاتان بكەین».
بەرپرسێ دەستەیا كارگێرییا مەكتەبا سیاسی یا پارتی ل دۆر پێكئینانا حوكمەتا هەرێما كوردستانێ و حوكمەتا ئیراقێ گوت» كۆمبوون بەردەوامن و هیڤیداۆم د دوەختێ دەستووریدا كێشە بهێنە چارەسەركرن و هەردو حوكمەت بهێنە پێكئینان».
د تەوەرەكێ دی یێ ڤێ دیدارێدا، فازل میرانی دوپاتكر «پارتی دیموكراتی كوردستان یا بەرهەڤە هەر هاریكارییەكێ پێشكێش بكەت بۆ بڕێڤەچوونا پرۆسەیا ئاشتیێ ل توركیا و هیڤی خواست ئەڤ پرۆسەیە بگەهیتە ئەنجامەكی و كێشەیا گەلێ كورد ل توركیا ب رێكێن سیاسی و ئاشتییانە بهێتە چارەسەركرن».
دیاركر ژی» دڤێت كێشەیا كوردی ل هەر جهەكی ب ئاشتییانە و دوور ژ دەنگێ چەكی بهێتە چارەسەركرن».
ژ ئالیێ خوەڤە قونسلێ گشتیێ توركیا ل هەولێرێ ئاماژەكر كو هەڤبەندیێن د ناڤبەرا توركیا و هەرێما كوردستانێدا د هەموو واراندا د ئاستێ گەلەك باش دانە.
هەروەسا دووپاتكر كو پرۆسەیا ئاشتیێ ل توركیا ب باشی بڕێڤە دچیت و گوت» هیڤییا مە ئەوە هەموو ئالییەك ب ئەرێنی هاریكار بن د سەرئێخستنا ڤێ پرۆسەیێدا».
ل دووماهیێ هیڤی خواست، هەرێما كوردستانێ د گەشەكرن و پێشكەفتنێدا بیت.

بەرپرسێ دۆسێیا ئیراقێ ل بارەگەهێ بارزانی، رەخنێن توند ل وێ ململانێ دگریت ئەوا ل سەر پۆستان ل ئیراقێ هەی.
د. عەرەفات كەرەم، بەرپرسێ دۆسێیا ئیراقێ ل بارەگەهێ بارزانی گوت» بۆچۆن ل دۆر پۆستان ل وەلاتی هاتیە گوهارتن بۆ ئامرازەكێ دەستكەفتان، ڤێ چەندێ ژی وەكریە جوداهییەكا مەزن د ناڤبەرا ژیانا سیاسەتمەداران و وەلاتییاندا دروست ببیت».
د. عەرەفات كەرەم د تۆرا جڤاكییا ئێكس دا گوت ژی» ئەگەرێ سەرەكیێ وێ هەڤڕكییا توند ئەوا ل سەر پۆستان ل ئیراقێ دهێتە كرن، بۆ وێ چەندێ دزڤریت كو ئەو پۆستە وەك دەستكەفتێن تایبەت دهێنە هەژمارتن».
دووپاتكر ژی» پۆست ل ئیراقێ بووینە جهێ گەهشتنێ ب بەرژەوەندییان و ناڤودەنگیێ، نەك ئەركەكێ نیشتمانی و بەرپرسیارەتییەك بۆ خزمەتكرنا گشتی».
هەروەسا ئاماژە ب وێ چەندێ ژی كر» ئەنجامێ ڤێ جۆرە ململانێ وەكریە كو وەلاتیێن ئاسایی د ناڤ هەژاری وژیانەكا دژوار دا بمینن، د وەختەكیدا ئەو سیایەتمەدارێن پۆستان ب دەستڤەدئینن، د ژیانەكا شاهانەدا دژین. ئەڤە ژی وەك ئامارەیەك بۆ وێ نە دادپەروەرییا د بەلاڤكرنا سامانێ وەلاتی و بكارئینانا دەستهەلاتێدا هەی».
سیستەمێ سیاسی ل ئیراقێ پشتی سالا 2003 ل سەر بنەمایێ پشكپشكانەیا حزبی و مەزهەبی هاتیە دروستكرن، ئەڤە ژی گەلەك جاران بوویە ئەگەرێ وێ چەندێ ئالیێن سیاسی ململانیێەكا توند بكەن بۆ ب دەستڤەئینانا وان وەزارەت و پۆستێن كو داهاتەكێ مەزن تێدایە، ب دیتنا چاڤدێرێن سیاسی ئەڤ شێوازێ حوكمڕانیێ بوویە ئەگەرێ ئیفلیجكرنا پرۆسەیا چاكسازیێ و زێدەبوونا گەندەلیێ، كو دەرئەنجاما وێ تنێ وەلاتیێن سادە باجێ د دەن.

جێگرێ سەرۆكێ جڤاتا نوونەرێن ئیراقێ دوپاتی ل گرنگییا پێگیربوونا هێزێن چەكدار ب دەستووری و پاراستنا سەروەرییا نیشتمانی كر.
فەرهاد ئەترووشی، جێگرێ سەرۆكێ جڤاتا نوونەرێن ئیراقێ گوت» پێدڤییە دەزگەهێ سەربازی ب تمامی پێگیری دەستوورێ ئیراقێ بیت و ئەركێ سەرەكیێ كو پاراستنا وەلاتییە، ب باشترین شێوە بجه بینیت».
ئەترووشی بزاڤێن دلسۆزانە یێن هێزێن ئەمنی د ئەنجامدانا ئەركێن خوە بلند هەلسەنگاند و ئاماژە ب وێ چەندێ كر كو لەشكری رۆلەكێ كاریگەر هەبوویە د روو ب رووبوونا قەبخوازییان و مەترسیێن دەرەكی».
جێگرێ سەرۆكێ جڤاتا نوونەرێن ئیراقێ دیاركر ژی» هێزێن چەكدار قوربانیێن مەزن داینە ژ پێخەمەت بەرهنگاربوونا توندڕەویێ و تیرۆرێ ب هەموو جۆر و شێوەیان، ئەڤە ژی جهێ دەستخوەشیێیە».

دیدار/ دلۆڤان ئاكرەیی

شیرەتكارێ مەكتەبا سیاسی یا پارتی دیموكراتی كوردستان دیاركر، هێشتا ل گەل ئێكەتیێ ل سەر بابەتی پۆستێ سەرۆككوماری نەگەهشتینە رێككەفتنێ و ئارمانجا پارتی ئەوە پۆست د خزمەتا خەلكێ كوردستانێ دا بیت و ل دەف پارتی گرنگە پۆستێ سەرۆككۆماری پۆستەكێ خودان باندۆر بیت.
عارف روشدی، شیرەتكارێ مەكتەبا سیاسی یا پارتی بۆ رۆژنامەیا (ئەڤرۆ) گوت»پارتی دیموكراتی كوردستان بڕیار دا‌ بوو بۆ پۆستێ سەرۆككۆمارێ ئیراقێ، بەربژارێن خوە پێشكەش بكەت، چونكی ب گۆرەی وەختێ دەستووری، ژڤانێ دیاركری بۆ خوەبەربژاركرنێ بۆ وی پۆستی ب دووماهی دهات و پارتی بۆ هندێ دەسپێشخەرییا خوە بكەت، فوئاد حوسێن و نەوزاد هادی دیار كرن، چونكی تا نوكە ژی ل گەل ئێكەتیێ نەگەهشتینە ئەنجامەكی و پارتی ئارمانجا وێ ئەوە پۆست د خزمەتا خەلكێ كوردستانێدا بن و ل دەف پارتی گرنگە پۆستێ سەرۆككۆماری پۆستەكێ پڕ ب پێستێ خۆ بیت و ب گۆرەی دەستووری بەرگریێ ژ مافێن خەلكێ كوردستانێ بكەت و بنپێكرنان قەبوول نەكەت كو ژ هەر ئالییەكی بهێنە كرن و ل دووڤ نێرینا من پەیاما سەرۆك بارزانی گەلەك یا رۆهن و ئاشكربوو كو دیاركریە پوستێ سەرۆككوماری مافێ خەلكێ كوردستانێیە و هەر كوردەكێ كو هەژی هندێ بیت، مافێ هەی داخوازا وی پۆستی بكەت و مەرج نینە ژ پارتی و ئێكەتیێ بیت، دشێت ژ دەرڤەی ڤان هەردو حزبان ژی بیت، ئەڤە دیاركرنا وێ چەندێیە كو خواستا سەرۆك بارزانی خواستەكا رەوا و نیشتیمانی و نەتەوەییە، نەك د چارچۆڤەیێ حزبەكێدا بیت».
ل دۆر هەلوەستێ پارتی ئاشكراكر» پێشنیازەك هاتیە كرن بۆ ئێكەتیێ، هشیار زێباری، بافل تاڵەبانی هەڤدوو دیتییە، پارتی دو مەرجێن كوردانە هەنە، كو ئەو ژی ل سەر ئێك بەربژاری رێكبكەڤێن یان ژی دێ پارتی بۆچۆنا خوە هەبیت، هەروەسا ئێكەتی ژی بهێتە پێش بۆ پێكئینانا كابینەیا دەهێ یا حوكمەتا هەرێما كوردستانێ و هەكە ئەڤ دو پێشنیازە بهێنە قەبوول كرن، دشێین ل سەر كەسەكێ هەڤپشك رێكبكەڤێن و جودا ل وێ بێی زڤرین بۆ وان بنەمایێن پارتی و سەرۆك بارزانی، هەر كەسێ ببیتە سەرۆككۆمار، دێ وەك سەرۆككۆمارێن دی یێن بەرێ دەسهەلات هەبیت، چونكی ئەویین ئەڤ پۆستە وەرگرتی، نەشیاینە ب گۆرەی وێ دەسهەلاتا هەبووی ئەركێ خوە بجهبینن، چونكی پۆستێ سەرۆككۆماری ب تنێ تەشریفاتی نینە، ب گۆرەی دەستووری دەسهەلاتا وی زێدەترە و پێش سەرۆك وەزیران ناڤێ سەرۆككۆماری هاتیە و پشكەكا هەرە گرنگ یا دەستهەلاتا بجهئینانێ سەرۆككۆمارە و هەكە هات و سەرۆككۆمارەكێ ب هێز و نیشتیمانپەروەر بیت، دەسهەلاتا وی گەلەكە و دشێت ستەمان ل دژی كوردستانێ ب راوەستینیت و نەهێلیت خواستێن دوژمنان سەربگرن».