ئه‌ڤرۆ نیوز:
شه‌رڤان ده‌روێش، په‌یڤدارێ جڤاتا سه‌ربازی یا منبج ل رۆژئاڤایێ كوردستانێ ژ بزاڤه‌كا تیرۆركرنێ رزگاربوو.
ده‌روێش كو رۆله‌كێ مه‌زن ل باژارێ منبج هه‌یه ل گۆری میدیا هه‌سه‌دێ ژ بزاڤه‌كا تیرۆرێ رزگاربوو و نها ل نه‌خۆشخانێ يه.
نه جارا ئێكێ یه بزاڤا كوشتنا وی و به‌رپرسێن دی یێن كوردستانا رۆژئاڤا ڤه دهێته كرن كو پرانییا جاران توركیا و ئۆپۆزسیۆنا سووری یا سه‌ر ب توركیا ڤه ب وان بزاڤان دهێنه سووچباركرن.
ئه‌ڤرۆ نیوز:
به‌رى چه‌نده‌كێ وه‌زاره‌تا دارایى، خشته‌كێ نوو یێ مووچان راگه‌هاند كو دێ ب ڤى ره‌نگى بیت:
سوبه ئێك شه‌مبى 25/3/2018 ئه‌ڤ جهه دێ وه‌رگرن
1_وەزارەتی خوێندنی باڵا و توێژینەوەی زانستی
2_وەزارەتی داد
3_ ئەنجوومەنی دادوەری
4_وەزارەتی كارو كاروباری كۆمەڵایەتی
5_دەرماڵەی كۆمەڵایەتی
6_وەزارەتی پلاندانان
7_وەزارەتی سامانە سروشتیەكان
8_وەزارەتی گواستنەوە و گەیاندن
9_وەزارەتی ئاوەدانكردنەوە و نیشتنەجێكردن
10_ وەزارەتی پیشەسازی و بازرگانی
11_ئەنجوومەنی ئاسایش
دوشه‌مبیێ 26/3/2018
1_ وەزارەتی كارەبا
2_دەزگای مین
3_دیوانی چاودێری دارایی
4_دەستەی مافی مرۆڤ
5_ ناوچەكانی دەرەوەی هەرێم
6_ دەستەی ژینگە
7_دەستەی وەبەرهێنان
8_دەستەی دەسپاكی
9_ كۆمسیۆنی هەڵبژاردن و راپرسی
10_وەزارەتی كشتوكاڵ و سەرچاوەكانی ئاو
11_وەزارەتی رۆشنبیری و لاوان
12_ وەزارەتی ئاوقاف و كاروباری ئاینی
13_ دەزگای ئاسایش
14_ سەرۆكایەتی هەرێم
15_ پەرلەمان
16_ ئەنجوومەنی وەزیران
سێ شه‌مبیێ 27/3/2018
1_فەرماندەی زێرەڤانی و پێشمەرگەی بەرگری و فریاكەوتن
2_لیوای نەوت
چوارشه‌مبیێ 28/3/2018
یەكەی حەفتا و هەشتا
پێنج شه‌مبیێ 29/3/2018
دیوان ولیواكانی وەزارەتی پێشمەرگە.
ئه‌ڤرۆنيوز:
ب تۆمه‌تا سڤكاتيكرنێ ب پۆليسان، دادگه‌ها ئامه‌دێ سزايێ زيندانكرنێ بۆ ده‌مێ سال ونيڤان ب سه‌ر عوسمان بايده‌مير په‌رله‌مانتارێ هه‌ده‌پێ سه‌پاند.
عوسمان بايده‌مير، په‌رله‌مانتارێ پارتى ديموركراتى گه‌لان( هه‌ده‌په) ب وێ چه‌ندێ هاته تۆمه‌تباركرن كو ل ده‌مێ سه‌رۆكێ باژێرڤانيا ئامه‌دێ سڤكاتى ب پۆليسێن ده‌وله‌تێ كربوو.
دتۆمه‌تباركرنا بايده‌ميرى دا هاتيه كو ل سالا 2012 ده‌مێ سه‌رۆكێ باژێرڤانيا ئامه‌دێ بوو، ل به‌رده‌م پارێزگه‌هێ سڤكاتى ب پۆليسان كربوو، وى ده‌مى سكالا ل سه‌ر هاتبوو تۆماركرن، به‌لێ بێده‌نگى ل دۆر وێ سكالايێ هاتبوو كرن ودادگه‌هێ هه‌تا نوكه چو بريار نه‌دابوون.
ل دووماهيا سالا بۆرى ژى ژ ئه‌گه‌رێ بكارئينانا ناڤێ كوردستان دگۆتاره‌كا خوه دا ل ناڤ په‌رله‌مانێ توركيا، عوسمان بايده‌مير ژئاليێ ده‌سته‌يا سه‌رۆكاتيا په‌رله‌مانێ توركيا ڤه ب دو رۆژ ده‌رخستن هاته سزادان، پاشى ب 12 هزار و322 لێرێن توركى (3240 دۆلارێن ئه‌مريكى) ب سزايێ دراڤى هاته سزادان.
ئه‌ڤرۆنيوز:
دنامه‌كێ دا بۆ سه‌رۆك وه‌زيرێن هه‌رێما كوردستانێ، وه‌زيرێ ده‌رڤه‌يێ بريتانيا سه‌ره‌راى پيرۆزيێ ب هه‌لكه‌فتا جه‌ژنا نه‌ورۆزێ، دبێژيت نوكه ده‌ليڤه‌ك يا هه‌ى بۆ دروستكرنا پاشه‌رۆژه‌كا سه‌قامگيرتر وديموكراسى وپێشكه‌فتى ل هه‌رێما كوردستانێ.
مالپه‌رێ فه‌رميێ حوكمه‌تا هه‌رێما كوردستانێ به‌لاڤكر كو دنامه‌كێ دا بۆ نێچيرڤان بارزانى سه‌رۆك وه‌زيرێن هه‌رێما كوردستانێ، به‌ريس جۆنسۆن وه‌زيرێ ده‌رڤه‌يێ بريتانيا، پيرۆزيێن جه‌ژنا نه‌ورۆزێ ل نێچيرڤان بارزانى دكه‌ت ودناما خوه دا دبێژيت” ب هه‌لكه‌فتا جه‌ژنا نه‌ورۆزێ پيرۆزيێ ل ته ومالباته ته وگه‌ل وحوكمه‌تا هه‌رێما كوردستانێ دكه‌م، سالا بۆرى دشه‌رێ داعشێ دا، هه‌رێما كوردستانێ وگه‌لێ كورد قه‌هره‌مانى وقوربانيدانه‌كا مه‌زن ومێهڤانپه‌روه‌ريه‌كا مه‌زن دپێشوازيا هژماره‌كا مه‌زن يا ئاواره وپه‌نابه‌ران نيشان دا”.
وه‌زيرێ بريتانى دياركر ژى” نوكه ده‌ليڤه‌ك يا هه‌ى بۆ دروستكرنا پاشه‌رۆژه‌كا سه‌قامگيرتر وديموكراسى وپێشكه‌فتى ل هه‌رێما كوردستانێ يا هه‌ى، بۆ گه‌هشتنێ بۆ ڤى ئارمانجى ژى، چاڤێ مه ل وێ چه‌ندێ يه هه‌ڤكاريێ ل گه‌ل هه‌وه‌يێن به‌رێز بكه‌ين”.
ل دووماهيا ناما خوه دا بۆ نێچيرڤان بارزانى، وه‌زيرێ ده‌رڤه‌يێ بريتانى دبێژيت” هيڤيدارين ل ده‌مه‌كێ داهاتى دئه‌ڤ ساله‌دا ئه‌م هه‌وه‌يێن به‌رێز ل له‌نده‌ن ببينين”.
وه‌زيرێ ده‌رڤه‌يێ بريتانى ناما خوه ب پارچه‌كێ ژ سروده‌كا كوردى يا ناڤدار ب نه‌ورۆزێ ب دووماهى دئينيت ودنڤيسيت ( ئه‌م رۆژى سالى تازه‌يه، نه‌ورۆزه هاته‌وه).
ئه‌ڤرۆ نیوز، نه‌وزاد هلۆرى:
ژ ئه‌گه‌را درۆستبوونا توزه‌كا زور بۆ سه‌ر مالێن كومه‌لگه‌ها هێتوت و ب خاڤ ب رێڤه‌چوونا كاروبارێن رێیا سه‌ره‌كى ژلایێ ئاليێن په‌يوه‌نديدار ڤه، وه‌لاتیێن كومه‌لگه‌ها هێتوت رێیا سه‌ره‌كى یا دناڤبه‌را هه‌ردو ناحیێن دێره‌لوك و شێلادزێ گرت.
به‌حرى چێى، وه‌لاتیه‌كێ شێلادزێ یه بو ئه‌ڤرۆ نیوز گۆت”ده‌مه‌ك به‌ریا نها رێیا سه‌ره‌كى دناڤبه‌را هه‌ردو ناحیێن شێلادزى و دێره‌لوك ل كومه‌لگه‌ها هێتوت هاته گرتن و هه‌تا نها ژى یا گرتیه”.
” رێ ژئاليێ خه‌لكێ كومه‌لگه‌ها هێتوت ڤه يا هاتیه گرتن، ژ به‌ركو هژماره‌كا زور یا وه‌لاتیان د رێیا هێتوتى را هاتنوچونى دكه‌ن و بوویه ئه‌گه‌ر كو هه‌موو توزا ده‌ڤه‌رێ بچیته سه‌ر مالێن وان، دیسان ئه‌ڤه نێزیكێ دو سالانه كار د چێكرنا رێ دا دهێته‌كرن و كارێن وێ ب خاڤى ب رێڤه دچن”.
ب گوره‌ى ئاخڤتنێن ناڤبرى، زێده‌ترى دو هزار ترومبێلان ل پشت هه‌ڤدو دراوستیاينه و دناڤ وان دا خه‌لكێ نه‌خوه‌ش و گه‌شتیار و رێڤینك هه‌نه و نه‌شێن بچنه مالێن خوه و هه‌تا به‌رهه‌ڤكرنا ڤى ده‌نگوباسى ژى رێ یا گرتیه.
ئیسماعیل موسته‌فا، قایمقامێ قه‌زا ئامێدیێ ده‌نگوباسێ گرتنا وێ رێ پشتراستكر و بۆ ئه‌ڤرۆ نیوز گۆت” وه‌لاتیێن كومه‌لگه‌ها هێتوت رێ گرتیه و نه‌هێلا كه‌س هاتنوچونێ بكه‌ت، مه تیمێن خوه بۆ چاره‌سه‌ركرنا كێشێ ڤرێكرينه ده‌ڤه‌رێ و سوزێ دده‌ینه وه‌لاتیێن ده‌ڤه‌رێ ده‌ڤه‌رێ كو ل هه‌یڤا نیسانا بهێت دەست ب تمامکرنا جوتسایدێ بهێتەکرن و دەمەک نێزيك دێ ب دووماهى هێت”.
زێده‌تر گۆت” دنها دا بریار هاتیه‌دان كو رۆژانه ئه‌و رێ بهێته ره‌شاندن ب ئاڤێ داكو نه‌بیته توز هه‌تاكو تمام دبیت دێ روژانه دێ هێته ره‌شاندن و دخوازین كو وه‌لاتى دبێهن فرهه بن چونكى قه‌یرانا دارایى كارتێكرن يا ل سه‌ر ب رێڤه‌چوونا كاروبارێن وێ رێ كری”.
ئه‌ڤرۆنيوز:
نوونه‌رێ ئێكه‌تى نيشتمانى كوردستان ل توركيا، نامه‌كێ ئاراسته‌ى كۆسره‌ت ره‌سول وهيرۆ ئيبراهيم عه‌لى دكه‌ت ول دۆر دووماهى داخۆيانيا وه‌زيرێ ده‌رڤه‌يێ توركيا ئاگه‌هدار دكه‌ت.
به‌هرۆز گه‌لالى، نوونه‌رێ ئێكه‌تى نيشتمانى كوردستان ل توركيا دناما خوه دا دبێژيت” وه‌زيرێ ده‌رڤه‌يێ توركيا ب ئاشكرا دبێژيت كو ئێكه‌تى پشته‌ڤانيا په‌كه‌كێ دكه‌ت”.
گه‌لالى، ل دووڤ باسنيوز، دبێژيت” ئه‌و داخۆيانيا وه‌زيرێ ده‌رڤه‌يێ توركيا گه‌له‌ك يا مه‌ترسيداره، ئه‌ڤه ژى ئه‌نجامێ داخۆيانيێن هنده‌ك كه‌سێن دناڤ ئێكه‌تيێ دا كو ده‌مێ كاميرا ته‌له‌ڤزيۆنێ دبينن، خوه وبه‌رژه‌وه‌نديێن ئێكه‌تيێ وئه‌و ده‌ڤه‌را ئێكه‌تيێ ژبيردكه‌ن، به‌حسێ هنارتنا هێزێ بۆ عه‌فرينێ دكه‌ن”.
دياركر ژى” بلا هه‌وه داخۆيانى نه‌دابا، هه‌كه هه‌وه هێز ژى هه‌يه فه‌رموون بۆچى هێزێ بۆ عه‌فرينێ نا هنێرن؟ راكرنا به‌رێ مه‌زن نيشانا نه‌هاڤێتنا وى يه! بۆچى مالا كوردى وئێكه‌تيێ ب ئاخڤتنان وێران دكه‌ن، كه‌س ژ هه‌وه ژمام جه‌لالى ب هێزتر نينن، وى چو جاران داخۆيانيێن وه‌سا نه‌داينه كو بێژيت دێ هێزێ به‌رامبه‌ر له‌شكرێ فلان وه‌لاتى هنێرم”.
گۆت ژى” ئێكه‌تيێ په‌يڤدارێ خوه يێ هه‌ى، هه‌كه دلێ مه ب كوردان وئێكه‌تيێ دسوژيت، بلا ده‌ست ژ ئاخڤتن وداخۆيانيێن نه‌گونجاى به‌رده‌ين وئێكه‌تيێ دناڤ ئێكه‌تيێ دا ب هێز بكه‌ين وبزاڤا ئاساييكرنا په‌يوه‌نديێن خوه ل گه‌ل به‌غدا وتوركيا وئيرانێ بكه‌ين”.
به‌هرۆز گه‌لالى دناما خوه دا دبێژيت” هوون دزانن ئه‌و داخۆيانيا وه‌زيرێ ده‌رڤه‌يێ توركيا چ خواندن بۆ هه‌يه؟ ب باوه‌ريا من توركيا ژئاليێ خوه‌ڤه دێ ئێكه‌تيێ كه‌ته دليستا تيرۆرێ دا وئه‌ڤه رامانا وێ ئه‌وه كو دشێت بهێته سنورێ پارێزگه‌ها سلێمانيێ”.
رۆژا پێنجشه‌مبيا بۆرى 22/3/2018 ، مه‌ولود چاوش ئوگلۆ وه‌زيرێ ده‌رڤه‌يێ توركيا دديداره‌كێ دا ل گه‌ل ئاژانسا ئه‌نادۆل يا توركى راگه‌هاندبوو” ئێكه‌تى نيشتمانى كوردستان هه‌ماهه‌نگيێ ل گه‌ل په‌كه‌كێ دكه‌ت وئه‌ڤ چه‌نده ژى زيانێ ب كوردێن عيراقێ وتوركيا ژى دگه‌هينيت”.
دوهى رۆژا ئه‌ينيێ ژى 23/3/2018، بينالى يه‌لدرم سه‌رۆك وه‌زيرێن توركيا ل ده‌مێ راگه‌هاندنا ده‌ستپێكرنا گه‌شتێن ئه‌سمانى يێن راسته‌وخوه دناڤبه‌را ئه‌نقه‌ره وهه‌ولێرێ دا، گۆت” ژبه‌ركو ل سلێمانيێ پشته‌ڤانيا چالاكيێن دژى توركيا دهێته كرن، گه‌شتێن ئه‌سمانى به‌ر ب وى باژێرى ده‌ست پێ ناكه‌ن”.
ئه‌ڤرۆنيوز:
وه‌زاره‌تا په‌روه‌ردێ ل هه‌رێما كوردستانێ، ئه‌ڤرۆ شه‌مبيێ 24/3/2018 رۆهنكرنه‌كا فه‌رمى بۆ هه‌موو قوتابيان به‌لاڤ دكه‌ت.
وه‌زاره‌تا په‌روه‌ردێ درۆهنكرنا خوه‌دا دبێژيت” هه‌موو قوتابيان ب گشتى وقوتابيێن رێزا نه‌هێ بنه‌ره‌تى و12 ئاماده‌يى ب تايبه‌تى ئاگه‌هدار دكه‌ين كو ب چ شێوه‌كى گوه نه‌ده‌نه ده‌نگوباسێن چێكرى يێن تۆرێن جڤاكى (فه‌يسبووك وئينيستيگرام) كو دبه‌رژه‌وه‌نديا وان وپاشه‌رۆژا وان كار ناكه‌ن”.
وه‌زاره‌تا په‌روه‌ردێ دياركر، ژبۆ وه‌رگرتنا دووماهى بريارێن فه‌رمى وده‌نگوباسێن وه‌زاره‌تا په‌روه‌ردێ وپرۆسا خواندنێ، دشێن سه‌ره‌دانا مالپه‌رێ فه‌رميێ وه‌زاره‌تا په‌روه‌ردێ بكه‌ن https://moe-krg.com/
ئه‌ڤرۆنيوز:
رێڤه‌به‌ريا هاتنوچونێ ل پارێزگه‌ها دهۆكێ ئامارێن روودانێن ترافيكى يێن هه‌رسێ رۆژێن جه‌ژنا نه‌ورۆزێ به‌لاڤكرن.
رێڤه‌به‌ريا ناڤبرى ل به‌رپه‌رێ خوه ل سه‌ر تۆرا فه‌يسبووكێ به‌لاڤكر كو دهه‌رسێ رۆژێن جه‌ژنا نه‌ورۆزێ دا 13 روودانێن ترافيكى يێن جۆراوجور يێن په‌دابووين وژئه‌نجامێ وان روودانان، كه‌سه‌كى ب تنێ گيانێ خوه ژ ده‌ستدايه وسێ كه‌س ژى ب گرانى برينداربووينه و37 كه‌س ژى ب سڤكى برينداربووينه.
ئه‌ڤرۆنيوز:
رێڤه‌به‌ريا گشتى يا كه‌شناسيێ وبيڤه‌له‌رزا ل هه‌رێما كوردستانێ ئه‌ڤرۆ شه‌مبيێ 24/3/2018پێشبينيێن سه‌قاى بۆ دو رۆژێن بهێت به‌لاڤكرن وتێدا ئاماژه ب وێ چه‌ندێ كر كو ئه‌ڤرۆ ل هه‌موو پارێزگه‌هێن هه‌رێما كوردستانێ ئه‌سمان دێ عه‌ور بيت ول ده‌ڤه‌رێن چيايى ل هه‌ولێرێ ودهۆكێ دێ باران باريت.
ل دۆر ره‌وشا سه‌قايێ ئه‌ڤرۆ، كه‌شناسيا هه‌رێمێ وه‌لاتيان ئاگه‌هدار دكه‌ت كو ئه‌ڤرۆ پشتى نيڤرۆ با دێ زێده‌تر بيت وبيته ئه‌گه‌رێ بلندبوونا رێژا تۆزێ ل هه‌رێمێ ومه‌ودايێ ديتنێ ژى دێ ژ 100 متران كێمتر بيت.
دياركر ژى كو سوباهى ئێكشه‌مبى 25/3/2018 ل هه‌موو پارێزگه‌هێن هه‌رێما كوردستانێ دێ ئه‌سمان عه‌ور بيت وباران دێ باريت.
ئه‌ڤرۆو نیوز ، نه‌وزاد هلۆرى:
ئه‌ڤرۆ ئێڤارى ترومبێله‌ك ب چوار كه‌س ڤه چوو د رووبارێ شین دا ل سنوورێ ناحیا شێلادزێ یا سه‌ر ب قه‌زا ئامێدیێ. عه‌بدوللا سلێمان ئێكه ژ وه‌لاتیێن ناحیا شێلادزێ بو ئه‌ڤرۆ نیوز گۆت: ( ئه‌ڤرۆ ئێڤارى ده‌ما كو ئه‌م ل سه‌یرانێن نه‌ورۆزێ ل ده‌ڤه‌را نێروه رێكان دزڤرین ل نێزیك گوندێ سیدان ترومبێله‌ك ب چوار كه‌س ڤه چو بوویه د رووبارى دا و هه‌ر چوار كه‌س ژى برینداربووینه كو برینا دوو ژ وان كه‌سان گرانه و هاتینه ره‌وانه‌كرن بو نه‌خوشخانێ)
زێده‌تر گۆت: ( ترومبێل ژ بن كونترولا شوفێرى ده‌ركه‌فت بوو ، و دخوازین كو وه‌لاتى و شوفێر هوشیارى خوه بن ژ به‌ركو قه‌ره‌بالغه و خه‌لكه‌كێ زور ده‌ردكه‌ڤیت ب مه‌ره‌ما سه‌یران و گه‌شتان)
نيشاندان