ئه‌ڤرۆ نيوز:
ئێڤاريا رۆژا چارشه‌مبى 31ى كانوونا دويێ ديارده‌يه‌كا كێم وێنه يا هه‌يڤێ دێ ل ئه‌سمانى رووده‌ت و روونشتڤانێن سه‌ر ئه‌ردى دێ ب ره‌نگه‌كێ جودا هه‌يڤێ بينن. ديارده پێكهاتيه ژ روودانا چه‌ند تشته‌كان پێكڤه وه‌كو هه‌يڤ غه‌يرينێ و هه‌يڤا شين (بلۆمۆن) و هه‌يڤا خوينى (بلۆدمۆن) و هه‌يڤا تژى (سۆپه‌ر مۆن).
ئه‌ڤرۆ نيوز:
پێزانین ژ ئالیێ کەسوکارێن پێشمەرگێن ئێخسیر د دەستێن تیرۆرستێن داعش دا گەھشتینە نوونەرێن کورد ل بەغدا کو پێشمەرگێن ئیخسیرێن د زیندانێن عیراقێ دانە و پەرلەمانتارەکێ کورد ژی دیار کر کو ئەو دێ دووڤچوونا ڤی بابەتی کەن.
سیروان سیرینی، ئەندامێ فڕاکسیۆنا پارتی ل پەرلەمانێ عیراقێ بۆ رۆژناما ئەڤرۆ دیار کر کو ئەو ژ ئالیێ کەسوکارێن پێشمەرگێن ئێخسیرێن د دەستێن تیرۆرستێن داعش دا ھاتینە ئاگەھدارکرن کو پشتی تیرۆرستێن داعش شکەستین ھژمارەکا پێشمەرگێن ئیخسیر کەفتینە دەستێن ھێزێن عیراقی و نوکە د زیندانێن عیراقێ دانە و گۆت: “ئەڤ پێشمەرگێن ئیخسیر ھەموو کەسوکارێن مەنە و ژ بەر ئاخا کوردستانێ خوە کریە قوربانی، بەلێ ئەز بخوە د وێ باوەریێ دانینم نوکە ئەو د ژیانێ دا مابن یان ل دەف ھێزێن عیراقی بن، چونکی پەیوەندیێن مە دگەل بەغدا د باشن و جێگرێ دەزگەھێ ھەوالگەریا عیراقێ بخوە کوردە و پارتیە ھەکە بابەتەکێ ب ڤی رەنگی ھەبا بێگومان دا ھەرێمێ ئاگەھدار کەت”.
ناڤھاتی خویا کر کو ئەو دێ دووڤچوونا ڤی بابەتی کەن و گۆت: “ھیڤیدکەم بابەت ب ڤی رەنگی بیت پێشمەرگێن ئیخسیر د زیندانێن عیراقێ ڤە بن داکو بۆ ناڤ کەسوکارێن وان بھێنە ڤەگەڕاندن”.
ئه‌ڤرۆ نيوز:
عەبدولقادر سەلڤی رۆژنامەڤانێ ناڤدارێ تورکیا و کەسایەتیێ نێزیک ل پارتیا دەستھەلاتدار یا تورکیا دیار دکەت کو بەری دەمەکێ پەیوەندیەکا تەلەفۆنی د ناڤبەرا ئەردۆگانی و ترامپی دا ھەبوو و د وێ پەیوەندیێ دا ترامپی ب توندی رەخنە ل ئۆپەراسیۆنێ عەفرینێ گرتن و داخواز ژ ئەردۆگانی کر کو ئۆپەراسیۆنێ سنوردار بکەت، لێ ئەردۆگانی ژی دیار کر کو ئەو دێ ھەتا منبجێ بچن و ژ بەر ھندێ ژی ترامپی ھۆشداری دا ئەردۆگانی کو کارەکێ وەسا نەکەت ببیتە ئەگەرێ شەرێ ئەمریکا و تورکیا و ئەردۆگانی ژی دیار کو وی ھەموو تشتەک دایە بەرچاڤ.
ناڤبری د پشکەکا دی یا ئاخڤتنا خوە دا ئاماژە ب ھندێ کریە کو پەیوەندیێن تورکیا و ئەمریکا نھا د ئاستەکێ ھەری خراب دانە، ھەتا مرۆڤ دشێت بێژیت کو بەر ب نەمانێ ڤە دچن، چونکو نھا تورکیا ل سووریێ ھێرشی بەرژەوەندیێن ئەمریکا دکەت، عەفرین د بن کۆنترۆلا ئەمریکا دا نەبوو و ژ بەر ھندێ ژی ئەمریکا بێدەنگ ما، لێ ھەکە تورکیا بخوازیت بچیتە منبجێ یان دەڤەرێن دی کو ھێزێن ئەمریکی لێ نە وی دەمی دێ ئاریشەکا نوو دروست ببیت، تشتێ نھا دیارە ئەردۆگانی شەرێ ل گەل ئەمریکا ژی دایە بەرچاڤ، چونکو ئەردۆگان وەسا ھزر دکەت ھەکە نھا یەپەگێ لاواز نەکەت و ئەو دەڤەرێن ل ژێر کۆنترۆلا وان ژێ وەرنەگریت دێ مەترسیەکا مەزن بۆ تورکیا دروست بیت.
رۆژنامەڤانێ ناڤدارێ تورکیا ئاماژە ب ھندێ ژی دکەت کو ئەردۆگان یێ رژدە دێ ئۆپەراسیۆنا وان گەھیتە منبجێ ژی، ئەمریکی ژی دبێژن ھێزێن مە ل وێرێ ھەنە و نابیت ھوون ڤی کاری بکەن، لێ ئەردۆگان باش دزانیت ھەکە نھا ل سووریێ پێگەھێ خوە ب ھێز نەکەت ئەو یەک دێ کاریگەریێ ل پێگەھێ تورکیا ل ھەموو رۆژھەلاتا ناڤین کەت، چونکو سیاسەتا ھەتا نھا یا ئەردۆگانی ل سووریێ تووشی شکەستنێ ھاتیە و تنێ ب شەرێ ل گەل یەپەگێ دخوازیت سەرکەڤتنا خوە راگەھینیت، لێ ئەمریکا ل دژی ڤێ پیلانا ئەردۆگانی یە، ژ بەر ھندێ ژی رەنگە شەرێ ل دژی کوردێن سووریێ ببیتە ئەگەرێ نەمانا پەیوەندیێن ئەمریکا و تورکیا.
ئه‌ڤرۆ نيوز:
جێگرێ ئێکەتیا دبلۆماتکارێن روسیا راگەھاند کو ل سووریێ ب چو رەنگەکێ ئەم ناھێلین دەولەتەکا کوردی بھێتە ئاڤا کرن، چونکو ئەو ئاخا نھا کورد تێدا دژین یا کوردان نینە و گەلەک نەتەوە و پێکھاتێن دی ژی ل گەل کوردان دژین و د راستی دا ھەموو ئاخا سووریێ نە، ژ بەر ھندێ ژی دڤێت کورد چو دەمەکێ ھزرا جودابوونێ نەکەن و ئەم ژی وەکو روسیا ناھێلین سووریە بھێتە پارچە کرن.
جێگرێ ئێکەتیا دبلۆماتکارێن روسیا ئاندرێ باکلانۆڤ د داخۆیانیەکێ دا راگەھاند کو روسیا ھەتا نھا ل سووریێ گەلەک قوربانی داینە، ب سەدان سەربازێن مە ل سووریێ د شەرێ ل دژی داعشێ دا جانێ خوە ژ دەست دان و گەلەک زیانێن ئابووری ژی گەھشتنە روسیا، لێ ئەم بەردەوام بووین ھەتا داعش ل سووریێ لاواز بوویی و نھا ژی بەر ب نەمانێ ڤە دچیت و گۆت: (ھەموو بزاڤێن مە بۆ ھندێ بووینە دا سووریە وەکو وەلاتەکێ ئێکگرتی بمینیت و سیاسەتا مە یا نھا ژی ئەڤە کو ھەموو پرسێن سووریێ د چارچۆڤێ سووریەکا ئێکگرتی دا بھێنە چارەکرن و ئەم رێ نادەین کو سووریە بھێتە پارچەکرن).
ناڤبری ل دۆر دەڤەرێن کوردان و رۆلێ وان یێ د شەرێ ل دژی داعشێ دا ژی راگەھاند کو چو گومان د ھندێ دا نینە کو کوردان رۆلەکا گرنگ د شەرێ ل دژی داعشێ و گرۆپێن دی یێن تیرۆرستی دیتن، لێ ئەو یەک رامانا ھندێ نادەت کو ئەڤرۆکە کورد داخوازا جودابوونێ ژ سووریێ بکەن، چونکو پارچەبوونا سووریێ د بەرژەوەندیا چو ئالیەکێ دا نینە و گۆت: (ئەو دەڤەرێن جوغرافی کو نھا کورد تێدا دژین د راستی دا دەڤەرێن کوردی نینن، چونکو ل گەل کوردان گەلەک نەتەوە و پێکھاتێن دی ژی ل وێرێ دژین و ژ بەر ھندێ ژی نابیت کورد بێژن ئەو دەڤەر یێن مە نە و دێ ژ سووریێ جودا بین، روسیا ب چو رەنگەکێ ل گەل ھندێ نینە).
بەرپرسی روسی ئەو یەک ژی دیار کر کو ئەمریکا چەکێن گران دانە کوردان و پشتەڤانی ل کوردان کر، ژ بەر ھندێ ژی تورکیا دلگران بوو و ھێرشی باژیرێ عەفرینێ کر، چونکو تورکیا دترسیت ئەو چەک رۆژەکێ ل دژی وێ بھێنە بکار ئینان، مە بەری نھا ژی دیار کربوو کو ئەمریکا ھندەک سۆزێن جودا داینە کوردان کو ل گەل راستیا نھا ل سووریێ ناگونجن، سەرەرای ھۆشداریێن مە ئەمریکا بەردەوام چەکێن گران دانە کوردان و ئەو یەک بۆ ئەگەرێ ھندێ تورکیا ژی ھێرشی ھێزێن کوردی بکەت و گۆت: (بۆ کوردان یا باش ئەڤە کو ل گەل سووریەکا نوو دا بژین و مە بەری نھا ژی دیار کربوو کو دێ د سووریا نوو دا ھەموو مافێن کوردان و پێکھاتێن دی ھێنە گەرەنتی کرن، لێ مخابن ئەمریکا ب سیاسەتا خوە یا شاش یا پرچەککرنا کوردان وەسا کر کو تورکیا ھێرشی باکورێ سووریێ بکەت).
چاڤدێرێن سیاسی ژی دیار دکەن کو دژبەریا روسیا ژ بەر ب ھێزبوونا کوردان نینە، بەلکو ئەگەرێ سەرەکی ئەمریکایە، روسیا ژ ھندێ دترسیت کو ئەمریکا ب رێیا کوردان کاریگەریێ ل سووریا نوو بکەت، ژ بەر ھندێ ژی ب ھەموو رەنگەکێ ل دژی ئاڤابوونا کیانەکێ کوردی یە ل رۆژئاڤایێ کوردستانێ و پشتی روودانێن ڤێ دووماھیێ ل عەفرینێ ژی جارەکا دی بۆ کوردان ئاشکرا بوو کو روسیا دیسان ئەو ب تنێ ھێلان و خیانەت ل وان کر.
ئەڤرۆ نيوز:
سکرتێرێ گشتیێ پارتی گەلی تورکمانی دیارکر، ڤەگەریان بۆ پارێزگەھا کەرکووکێ ب زەحمەتەو بڤێ رەوشێ و نوکە کەرکوک وەک سەربازگەھەکێ لێ ھاتیەو بۆیە زیندانەکا مەزن ھاتیە داگیرکرن، ناف خوەیا کەرکووکێ ھەموو بوویە چەکدارێن حەشدا شەعبی و پولیسێن فیدرالی و ھێزێن بەرسڤدانا بلەز و ھێزێن دژە تیرورا عیراقێ ، ژبەر وێ چەندێ چۆ پارت و لایەنێن سیاسی نەشێن بزڤرنە ڤە ناڤ کەرکووکێ.
سکرتێرێ گشتیێ پارتی گەلی تورکمانی عیرفان کەرکووکی بۆ روژناما ئەڤرۆ خویاکر، رەوشا ئەمنی ل ناف خوەیا کەرکووکێ یا پاراستی نیە و روژ بۆ روژێ رەوشا وێ پارێزگەھێ خراپتر دبیت و خەلک دھێتە رەڤاندن و حالەتێن کوشتن و دزیا زێدەکریە ئەڤە ھەمو ئەگەر و ئاستەنگن کو خەلک نەشێن ب زڤرنەڤە بۆ کەرکووکێ، ھەر لژنەکا دەربارێ کەرکووکێ بھێت دروستکرن ئەگەر ژ خەلکێ کەرکووکێ و نونەرێن کەرکووکێ نەبیت و یا پێدڤی نابیت و ژبەرکو چۆ لژنە بێ خەلکێ کەرکووکێ نەشێن ب ساناھی کارێن خوە بکەن ئاستەنگێن مەزن دێ دروست بن زەحمەتە،لبەر وێ رێڤەبرنا نوکە ل کەرکووکێ ھەی ب وێ ئەقلیەتا خراب مروڤ بشێت رەفتارێ و گفتوگویێ ل گەل بکەت ئەگەر رەوش نەھێتە گوھۆرین ل وێ پارێزگەھێ.
کەرکووکی گوتژی : ئەم وەک گەلی تورکمانی ئالایێ کوردستانێ ب ئالایێ خوە دزانین دێ پارێزین ژی پێدڤیە ماددەیا 140 بھێتە بجھکرن و ھەمو چەکدارێن ناڤا کەرکووکێ ل وی باژێری و دەڤەرێ دەرکەڤن، ژبەرکو دەمێ چار سالان بۆ پێشمەرگەی بێ جوداھیا ئاینی و نەتەوی و سیاسی کەرکووک و خەلکێ وێ دپاراست بەلێ پشتی رودانێن 16 ئوکتوبەرێ کەرکووک بۆیە زیندان و جھێ ئێشاندنا خەلکی.
ناڤبری تەکەز کر، پێدڤیە لسەر ھەمو لایەنێن کوردستانی ب ئێکگرتوویێ ب ئێک دەنگ و رەنگ ئێک ھەلوێست ھەبیت مە وەک پارتی گەلی تورکمانی بایکوتا پشکداری ل ھەلبژاردنێن عیراقێ راگەھاندیەو ل ناوچەیێن کەرکووک و خورماتو خانەقین ژبەرکو پرانیا بارەگەھێن مە وەک پارتی گەلی تورکمان و مالێن مە و ئەندامێن مە ژلایێ حەشدا شەعبی ھاتینە داگیر کرن ل وان دەڤەران.
ئه‌ڤرۆ نيوز:
بەرپرسەکێ پارتی دیموکراتی کوردستان ئاماژە بڤێ چەندێ دکەت، کو دەزگەھێ ھەوالگەریا حەشدا شەعبی فشارێن زۆر ئێخستینە سەر کوردێن زوممار و وانکێ بۆ گۆھڕینا نەتەوا خوە و دبێژیت، حەشدا شەعبی دخوازیت دیمۆگرافیا دەڤەرا نەینەوا بگوھۆڕیت.
عسمەت رەجەب، بەرپرسێ لقێ 14یێ پارتی دیموکراتی کوردستان ل مووسل بۆ رۆژناما ئەڤرۆ گۆت” رەوشا پارێزگەھا نەینەوا ژلایێ ئەمنی ڤە ھێشتا یا جێھگیر نینە و رۆژ بۆ رۆژێ بەرەف خراپترە، چونکە لیوا 30 یا حەشدا شەعبی کو ژلایێ کەسەکێ شەبەک دھێتە رێڤەبرن ھەموو تشتەکی د بەرژەوەندیا خوەدا دگۆھۆڕن، نوکە پیلان ھەیە بۆ گۆھۆڕینا بەرپرسێن یەکەیێن ئیداری ل دەشتا نەینەوا و دانانا کەسێن نێزیکی خوە، ھەتا گەھشتیە ئاستەکی دخوازن موختارێن تاخ و گوندان ژی گرێدایی حەشدا شەعبی بن، ئاستەنگێن زۆر بۆ وەلاتیێن کورد و کریستیانێن دەشتا نەینەوا دھێنە چێکرن و ل چەند دەڤەرەکان ئەردێ کریستیانان ھاتیە داگیرکرن و ل خالێن ھاتن وچوونێ سفکاتی ب وەلاتیێن کورد دھێتەکرن، بتایبەتی ئەوێن سەرەدانا ھەرێما کوردستانێ دکەن و بەرۆڤاژی ئەوێن لھەرێما کوردستانێژی بۆ مووسلێ دچن.
بەرپرسێ لقێ 14ێ یێ پارتی دیارکر” ل سنورێ ھەردو ناحیێن زوممار و وانکێ پڕۆسا تەعریبێ دەستپێکریە و دەزگەھێ ھەوالگەریا سەر ب حەشدا شەعبی لڕۆژێن بۆری فۆڕمەک لسەر ئاکنجیێن ھەردو ناحیان بەلاڤکرینە و د خالەکا ناڤا فۆڕمێ دا داخوازکریە ھەر وەلاتیەک نەتەوا خوە دیار بکەت، بەلاڤکرنا ئەڤێ فۆڕمێ و خواستنا زانیاریان ل وەلاتیێن دەڤەرێ پێنگاڤەکا ژبۆی گۆھۆڕینا دیمۆگرافیا دەڤەرێ و ب عەرەبکرنا زممار و وانکێ، چونکە گروپا حەشدا شەعبی فشارێن زۆر ئێخستینە سەر وەلاتیێن کورد یێن ئاکنجیێن زوممار و وانکێ ھەتا نەتەوا خوە ژ کورد بگۆڕن بۆ عەرەب، ئەڤێ چەندێ ژی مەرەما خوە ھەیە بۆ زێدەکرنا رێژەیا عەرەبێن دەڤەرێ و ھەمبەردا رێژا کوردان بھێتە کێمکرن.
ل دۆر رەوشا ناڤا سەنتەرێ باژێڕێ مووسل عسمەت رەجەب گۆت” چەندین ھێزێن جۆراو جور یێن سەربازی و ئەمنی ل سەنتەرێ باژێڕێ مووسل ھەنە، بەلێ خویایە دەستھەلات تنێ ددەستێ میلیشیاتێن سەر ب حەشدا شەعبی دایە، وەلاتیێن باژێڕێ مووسل زۆر بێزاربووینە ل رەفتارێن حەشدا شەعبی و دخوازن بادەکا ئەمنیا باژێڕی رادەستی ھێزێن ئەمنی بھێتەکرن نەک ددەستێ حەشدا شەعبی دابیت.
ئەڤرۆ نيوز:
بەرپرسەکێ دەستەیا دەستپاکیێ ل ھەرێما کوردستانێ ئاشکرا کر، کو دەستەیا وان گۆمان یا ل سەر ھندەک باوەرنامان ل زانکۆیان یا ھەی و ھووربینیێ د باوەرنامە وبسپۆریا مامۆستایێن زانکۆیان دا دکەن.
موشیر رەشید، رێڤەبەرێ گشتیێ کاروبارێن قانوونی ل دەستەیا دەستپاکیێ ل ھەرێما کوردستانێ راگەھاند” نوکە پرۆسا ھووربینیێ د باوەرنامێن دکتۆرایێ دا یا دەستپێکری کو ھژمارا وان 2300 باوەرنامەنە”.
موشیری زێدەتر گۆت” ھەرچەندە مە گۆمان ھەبوو کو ئەو ھژمارا باوەرنامێن دکتۆرایێ ل زانکۆیێن حکومی ھەبن، لێ ئەو ھژمارە ژ لایێ وەزارەتا خواندنا بلند ڤە یا بۆ مە ھاتیە ھنارتن و ئەو ژێ دبەرپرسن”.
ئه‌ڤرۆنيوز:
برياره سوباهى سێشه‌مبى 30/1/2018 لژنه‌كا هووربينيێ ژ به‌غدا بۆ چه‌ند وه‌زاره‌تێن دى يێن حوكمه‌تا هه‌رێما كوردستانێ دێ گه‌هيته هه‌ولێرێ وده‌ست ب پرۆسا هووربينيێ دليستا مووچێن وان دا كه‌ت.
ڤيان محه‌مه‌د، ريڤه‌به‌را گشتى يا پلاندانانێ ل وه‌زاره‌تا ساخله‌ميێ ل هه‌رێمێ راگه‌هاند” رۆژا سێشه‌مبى چار ه‌تا پێنج لژنێن هووربينيێ دليستا مووچێ فه‌رمانبه‌ران دا ب رێيا فرۆكخانا نێڤده‌وله‌تى يا هه‌ولێرێ دێ گه‌هنه هه‌رێما كوردستانێ ودێ ده‌ست ب پرۆسا هووربينيێ بۆ چار هه‌تا پێنج وه‌زاره‌تان كه‌ن”.
ڤيانێ زێده‌تر بۆ رووداوێ گۆت” هووربينى دێ دليستێن مووچين وه‌زاره‌تێن خواندنا بلند، پلاندانان، چاندن، باژێرڤانيان وگه‌شتوگزار، پيشه‌سازى وبازرگانى هيته ئه‌نجامدان”.
ئه‌ڤرۆنيوز:
سه‌رۆكێ ئێكه‌تيا مامۆستايێن كوردستانێ راگه‌هاند، وه‌زاره‌تا دارايێ وئابوورى يا هه‌رێمێ ب مه راگه‌هانديه كو ژبلى به‌لاڤكرنا وى مووچێ ژلايێ به‌غدا ڤه هاتى، حوكمه‌تا هه‌رێمێ دێ مووچێ هه‌يڤا 10 يێ سالا 2017 ل سه‌ر وه‌زاه‌رتا په‌روه‌ردێ به‌لاڤكه‌ت، ب ڤێ چه‌ندێ ژى دێ وه‌زاره‌تا په‌روه‌ردێ دو مووچان وه‌رگريت.
ئه‌ڤرۆ دوشه‌مبى 29/1/2018، پشتيوان سادق وه‌زيرێ په‌روه‌ردێ ل هه‌رێما كوردستانێ ل گه‌ل سه‌رۆك وسكرتاريه‌تا ئێكه‌تيا مامۆستايان كۆمبوو.
ل دۆر ناڤه‌رۆكا كۆمبوونێ، ئه‌حمه‌د گه‌رميانى سه‌رۆكێ ئێكه‌تيا مامۆستايێن كوردستانێ بۆ دوارۆژ گۆت” وه‌زيرێ په‌روه‌ردێ بۆمه دياركر كو ژلايێ وه‌زاره‌تا دارايى ڤه هايتنه ئاگه‌هداركرن كو ژبلى مووچێ كو دێ ژبه‌غدا بۆ وه‌زاره‌تێن په‌روه‌ردێ وساخله‌ميێ هێته مه‌زاختن، مووچێ هه‌يڤا 10 يێ سالا 2017 ژى ل سه‌ر وه‌زاره‌تا په‌روه‌ردێ ژلايێ حوكمه‌تا هه‌رێمێ ڤه هێته به‌لاڤكرن”.
دهێته زانين ئه‌و كۆژمێ به‌غدا بۆ مووچێن هه‌ردو وه‌زاره‌تێن په‌روه‌ردێ وساخله‌ميێ هنارتين كو 250 مليار دينارن، مووچێ هه‌يڤا ئێك يا سالا 2018 يه.
ئەڤرۆ نیوز ، زنار تۆڤی :
روانگه‌ها سوری بۆ مافێن مرۆڤی ئاشكرا دکەت،کو توركیا بۆردومانا به‌نداڤا مه‌یدانكێ ل باكورێ شارێ عه‌فرینێ دکەت و دبێژیت گومان دهێتە کرن،کو ئارمانجا تورکیا ژ بوردومانکرنا وێ بەنداڤێ بۆ بن ئاڤکرنا عه‌فرینێ بیت.
رۆژا دووشه‌مبی 29.1.2018 روانگه‌ها سوری بۆ مافێن مرۆڤی راگەهاندیە،کو فرۆكێن توركیا به‌نداڤا مه‌یدانكێ كریە ئارمانج ب مه‌به‌ستا بن ئاڤکرنا عه‌فرینێ،ئاماژه ب هندێ ژی دایه،کو ئەڤ كارێ توركیا پشتی شكەستنا سوپایێ وێ دهێت بۆ كۆنترۆلکرنا عه‌فرینێ ب شێوه‌کێ سه‌ربازی.
هەروەسا دیارکریە،کو ل شه‌ڤا ئێکشەمبی ل سه‌ر دوشه‌مبی یا ڤێ حەفتیێ هێرشێن ئەسمانی یێن توركیا بۆ سه‌ر به‌نداڤا مه‌یدانكێ هاتینە ئه‌نجامدان،کو د‌كه‌ڤیته باكورێ عه‌فرینێ ب دووراتیا 10 کیلۆمەترا،لەورا ترسیا هندێ ژێ دهێتە کرن،کو توركیا بڤێت ب رێیا ته‌قاندنا ڤێ به‌نداڤێ شارێ عه‌فرینێ نقوم بكەت، چونكی ئه‌ڤە جاری سێیێ یە ل 10 رۆژێن ئۆپەراسیۆنا چلیێ زه‌یتینێدا كو تورکیا هێرش دکەتە سه‌ر ڤێ به‌نداڤێ.
نيشاندان