ئەڤرۆنیۆز، هەرهین محەمەد:
دەرهێنەرێ گەنج محەمەد جەمال ددیدارەكێ دا بۆ ئەڤرۆنیۆز دياركر كو نوكە ئەو مژوولی چێكرنا سترانەكا دو قولی یە بۆ سترانبێژ (یەلمازئایان) ل گەل سترانبێژا گەنج (رۆژبین)ێ ب ناڤێ(شەرێ مان و نەمانێ) كو ژده‌رهێنان وپه‌يڤ و ئاوازێن وی ب خوە نە و سەرمەد ئیسماعیل ب كارێ وێنه‌گريێ
گۆت ژى”ناڤە رۆكا ڤێ كلیپێ ل سەر باژێرێ عەفرینێ یە و دیاركرنا رولێ گەرمێ كوردان ل هەمبەری عەفرینێ”.
ئه‌ڤرۆنيوز:
تایبەتمەنده‌كێ نشتەرگەریێن سینگ و دل و دەمارێن خوینێ ل دھۆکێ دیارکر کو ل پارێزگەھا دھۆکێ نوشدارێن دلی رێيا دەمارێن د ناڤ سینگێ مرۆڤێ دا ڤەدگوھێزن. دەمێ کەسەک تووشی ئێشا دلی دبیت د حالەتێ نشتەرگەریێ دا ئەو دەمارێن تەنگ ، یان یێن گرتی چارەسەر دکەن.
ئاشور یوحه‌نا، نوشدارێ تایبەتمەندێ نشتەگەریێن سینگ و دل و دەمارێن خوینێ بۆ (نۆش نیوز) گۆت” چاندنا دەمارێن خوینێ ل دھۆکێ وەکو دەولەتێن پێشکەفتی دھێتە ئەنجامدان ورێژا سەرکەفتنێ ژی گەلەک يا باشە”.
ئاماژە دا وێ چەندێ ژی کو هه‌كه دەمارێن خوینێ د تەنگ ، یان د گرتى بن خوینا نه‌خوه‌شى ب ره‌نگەکێ دروست ناگەھيتە زه‌بله‌كێن دلی و بێھنا نەخوه‌شى تەنگ دبیت و سینگێ وى بۆ دەمەکى دئێشيت وگۆت “چو ئەگەرێن دەست نيشانکری ژى نینن، به‌لێ ھندەک تشت ھەنە ڤێ نەخوه‌شيێ زێدە دکەن وەکو کێشانا جگاران”.
دياركر ژى كو ئێشا شەکری و فشارا خوینێ و کولسترۆل و کێم ئه‌نجامدانا وەرزشێ ئەگەرن كو وەلاتی تووشی ئێشا دلی ببن وگۆت” بەری نوکە کەسێن سەر 50 سالیێ دا تووشی ڤێ نەخوه‌شيێ دبوون، به‌لێ نوکە ئەم یێ دبینن نه‌خوه‌شێن مە پتر گەنجن، سینگی وان دئێشيت و بێھنا وان تەنگ دبیت ب تایبەتی د حالەتێ ب رێڤەچوونێ دا، پتر بێھن تەنگى بۆ وان دروست دبیت”.
زێدەتر گۆت: “دەمێ دەمار تەنگ دبیت، ب دەرمان و بالونێ ناهێته ڤه‌كرن، بەلکو دەمێ دھێتە گرتن یان تەنگ دبیت پێدڤیە نشتەرگەریا چاندنا ده‌ماران بۆ بهێته کرن”.
دا زانين ژى كو ئەو دەمارێن د ناڤ سینگى دا ئەو ب رێيا وان ڤەدگوھێزن و دداننە سەر دلی و گۆت: “ئەو خوینێ ب ره‌نگه‌كێ دروست ڤەگودھێزن، ب رێژەکا باش سەرکەفتنێ دئینيت. ل دھۆکێ زۆر حالەت ھەنە كو زارۆ پێدڤی نشتەرگەریا دلی بن، ئەڤە ڤەدگەریت بۆ کێم ئه‌نجامدانا وەرزشێ و خوارنا نە ساخلەم و گەلەک ئەگەرێن دى ھەنە و پێدڤیە ڤەکۆلینەک ل دھۆک بھێتە کرن دا ئەگەرێن تووشبوونا وەلاتیان ب ڤان نەخوه‌شیان بھێتە دەست نێشانکرن”.
خوياكر ژی کو ل دھۆکێ چاندنا دەماران دھێتە کرن و زۆر حالەت ھەنە و ئەو کێماسیين بەرێ ھەموو نەماینە، چونکى ئامیرێن پێشکەفتی یێن ھاتینە دابینکرن بۆ نشتەگەریێن چاندنا ده‌مارێن دلێ، بەری نوکە ھەتا حه‌فت دەمژمێران نەخوه‌ش د نشتەرگەريێ دا دما، “به‌لێ نوکە کێمتر دمینيت و رێژا سەرکەفتنی ژی پترە ژ جاران”.
ئه‌ڤرۆنيوز:
په‌رله‌مانتاره‌كێ نێزيك ژ سه‌رۆك وه‌زيرێن عيراقێ ئاشكراكر، نێچيرڤان بارزانى سه‌رۆك وه‌زيرێن هه‌رێما كوردستانێ، ب مه‌ره‌ما به‌حسكرنا پرسێن دناڤبه‌را حوكمه‌تا هه‌رێمێ وعيراقێ، دێ سه‌ره‌دانا به‌غدا كه‌ت.
عه‌باس به‌ياتى، ئه‌ندامێ جڤاتا نوونه‌رێن عيراقێ ويێ نێزيك ژ حه‌يده‌ر عه‌بادى سه‌رۆك وه‌زيرێن عيراقێ راگه‌هاند” ل دووڤ پێزانينێن مه، نێچيرڤان بارزانى سه‌رۆك وه‌زيرێن هه‌رێمێ دێ سه‌ره‌دانا به‌غدا كه‌ت وئه‌م پێشوازيێ ل وێ سه‌ره‌دانێ دكه‌ين وبه‌رى نوكه ژى ديدار دناڤبه‌را عه‌بادى ونێچيرڤان بارزانى هاتينه ئه‌نجامدان ودوان ديداران دا ل سه‌ر پرسێن دناڤبه‌را به‌غدا وهه‌ولێرێ دا دانوستاندنێن ئاڤاكه‌ر هاتينه كرن وديدارێن داهاتى دناڤبه‌را وان دا بێگومان دێ ئه‌نجامێن وان رێككه‌فتن ولێك تێگه‌هشتن بيت ب تايبه‌تى دانوستاندنێن ل سه‌ر هنارتنا مووچێ فه‌رمانبه‌رێن هه‌رێما كوردستانێ وڤه‌كرنا فرۆكخانان وخالێن سنورى ژى”.
عه‌باس به‌ياتى بۆ كوردستان 24 گۆت ژى” سه‌ره‌دانا داهاتى يا نێچيرڤان بارزانى درێژه‌پێدانا دانوستاندنێن دناڤبه‌را وى وعه‌بادى دايه كو دده‌مێ چه‌ند هه‌فتيێن بۆرى دا، دو ديدار ئه‌نجامداينه، له‌وما پێدڤيه بزاڤ بهێته كرن بۆ چاره‌سه‌كرنا كێشان”.
ئه‌ڤرۆ نیوز ، زنار تۆڤى:
ب ئه‌گه‌رێ وان هه‌موو پێشێلكاریێن توركیا هه‌مبه‌رى “ناتۆ” د ماوێ بوریدا كرین،ب تایبه‌تى ئاشكرابوونا هاریكاریكرنا گرووپێن تیرۆرستى و ل سووریێ و حه‌واندنا سه‌ركردێن تیرۆرستى و ده‌ستێوه‌ردان د كاروبارێن وه‌لاتان و گه‌له‌ك پرسێن دیتر،ژ وان ژى پشتكرن ل ناتۆ و به‌ستنا هه‌ڤپه‌یمانیێ ل گه‌ل رووسیا،وه‌كریه كو چاڤدیرێن سیاسى ئاخفتنێ ل سه‌ر ده‌ركرنا توركیا د ناتۆ دا بكه‌ن،ئه‌ڤه پترى 60 سالانه توركیا ئه‌نداما ناتۆیه،نوكه ئێكه ژ هیزێن سه‌ره‌كى یێن وێ هه‌ڤپه‌یمانیێ،لێ هوكارێن بهێزبوونا توركیا د ناتۆدا په‌یوه‌ندى ب نه‌رماتیا هه‌لویستێ ئه‌مریكا و ئورۆپا ڤه هه‌یه،ل هه‌مبه‌رى سیاسه‌تا توركیا دا د ماوێ بوریدا،نوكه توركیا به‌رۆڤاژى بنه‌مایێن دامه‌زراندنا ناتۆ دبزڤیت و ڤێ وه‌كریه،كو گه‌له‌ك ژ سیاسى و ڤه‌كۆله‌ران ده‌رگه‌هێ ده‌رخستنا توركیا د ناتۆدا ڤه‌كه‌ن و ئاخفتنێ ل سه‌ر دكه‌ن.
مایكل ج توتون ڤه‌كۆله‌رێ ئه‌مریكى د گۆتاره‌كێدا ل گۆڤارا”ورلد ئه‌فیرز” دبێژیت:ئه‌نقه‌ره گه‌له‌ك پێشێلكارى د بنه‌مایێن ناتۆدا كرینه،ل سه‌ر توركیا ئاشكرابوویه،كو هاریكاریا گرووپێن تیرۆرستى دكه‌ت و ده‌ستێوه‌ردانێ د كاروبارێن ولاتاندا دكه‌ت،یا ئاماده نینه پابه‌ند بیت،ب وان برگێن دناتۆدا هه‌ین،ل گه‌ل هندێ ژى هێرشكریه سه‌ر عه‌فرینێ،هه‌روه‌سا ده‌مێ واشنتۆن راگه‌هاندى،كو پشتگیریێ ل یه‌په‌گێ دكه‌ت ل باكۆرێ سووریێ،ئه‌ردۆغانى ب تۆندى به‌رسڤا ئه‌مریكا دایه و راگه‌هاندیه،به‌رى ئه‌و هێزه دروست بیت،دێ ژناڤبه‌ین،دیسا ئه‌ردۆغانى گوتیه،ئه‌مریكا دڤێت سۆپایه‌كێ تیرۆرستى ل سه‌ر سنورێ باشۆرێ توركیا دابمه‌زرینیت،دیسا ئه‌و بژارده ژى دایه ئه‌مریكا،یان دڤێت ده‌ست ژ هاریكاریا وێ هێزا تیرۆرستى به‌رده‌ت،یان ژى ئه‌م دنه‌چارین هێرش كه‌ینه سه‌ر عه‌فرینێ،مایكلى گوتیه”هێرشا توركیا یا راسته‌وخۆ ل دژى ئه‌مریكا ب روونى هه‌موو سنور ده‌ربازكرینه،ڤێجا ئه‌و سنوره د تۆكمه‌بن یان نه،ئه‌ڤه وێ دگه‌هینیت كو توركیا راسته‌وخۆ هێرشێ بكه‌ته سه‌ر وه‌لاته‌كێ ئه‌ندام د ناتۆدا،به‌لێ هێرشكرن بۆ سه‌ر هه‌ڤپه‌یمانه‌كێ ل ده‌رڤه‌ى ناتۆ دا یا ئالۆزتره.
ناتۆ ل سالا 1949 هاتیه دامه‌زراندن و ئارمانج ژێ به‌رهنگاربوونا هه‌ژموونا ئێكه‌تیا سووڤیه‌تیا جاران بوو ل سه‌ر ئورۆپا،ل سالا 1952 توركیا بوویه ئه‌ندام تێدا،ل وى ده‌مێ ناتۆ هاتیه دامه‌زراندن،هیچ مه‌ترسیه‌ك ل سه‌ر جڤاكێ نێڤده‌وله‌تى ب ناڤێ كۆمارا ئیسلامى یا ئیرانێ نه‌بوو،رژێما به‌عس ژى ل سووریێ یا ده‌ستهه‌لاتدار نه‌بوو،چو گرووپێن تیرۆرستى یێن كوردى نه‌بوون،داعش ژى نه‌بوو،لێ ب تنێ بزاڤا رزگاریخوازا كوردى هه‌بوو،لێ نوكه جیهان ب ره‌نگه‌كێ گه‌له‌ك مه‌زن هاتیه گوهۆرین،هه‌موو ده‌مان هه‌ڤپه‌یمانى ل دووف ده‌مى و جهى دهێنه گوهۆرین و ژ هه‌ڤالینیێ دبنه دوژمن،دیسا چو ده‌مان بریتانیا دوستێ ئه‌مریكا نه‌بوویه،چو ده‌مان رووسیا ژى دوژمنێ به‌رده‌وامێ ئه‌مریكا نینه،له‌وما بۆ قه‌بوولكرنا راستیان ئێدى توركیا هه‌ڤپه‌یمان نینه د ناتۆ دا،به‌لكو زێده‌تر وه‌ك دوژمن ده‌ردكه‌ڤیت،دیسا دوژمنداریا ناتۆ ل وى ده‌مى ده‌ركه‌فت،ده‌مێ توركیا ره‌تكرى كو ئاخا وێ ل شه‌رێ دژى رژێما سه‌دامى بكار بینیت،ئه‌گه‌ر ژى ئه‌و بوو،كو ئه‌نقه‌ره نه‌دڤیا كوردستان ببیته ناڤه‌نده‌كا بهێز یا ئابوورى و سه‌ربازى.
هه‌روه‌سا ئه‌ردۆغانى هاریكاریا ئیرانێ كر،بۆ ڤه‌گوهاستنا چه‌كى بۆ حزبوللا و پشتگیرى ل داعشێ كریه ل سووریا،داكو چو هه‌رێمێن كوردى ل باكۆرێ سووریێ دروست نه‌بن،وه‌ك ئه‌وا ل عێراقێ دروست بووى،دیسا ده‌مێ ئه‌ردۆغانى سه‌ره‌دانا رووسیا كرى،ناتۆ راگه‌هاندبوو،كو ئه‌ندامبوونا توركیا جهێ گۆمانێ نینه،لێ مایكلى گوتیه”بێگۆمان ئه‌ندامبوونا توركیا جهێ گۆمانێ یه.
ئه‌ڤرۆ نيوز:
بەرپرسێ پەێوەندى و راگەھاندنێ ل رێڤەبەریا ھاتنوچوونا دھۆکێ دیارکر کو ئەڤرۆ 4ى شوباتا 2018ێ د روودانەکا ھاتنوچوونێ دا د ناڤبەرا شیخان و ئەلقوش دا پێنچ کەس بوونە قوربانی.
ئازاد تەھا، بەرپرسێ پەيوەندى و راگەھاندنێ ل رێڤەبەریا ھاتنوچوونا دھۆکێ دیارکر کو نێزیک گۆندێ بێبانی ل سەر ناحیا ئەلقوش ڤە بۆ شێخان روودانه‌كا دلتەزینا ترافیکێ روودایە، د ئەنجام دا پێنچ کەس یێن بووینە قوربانی ژوانا ژی دو کەسان گیانی خوە ژ دەستدان و سێ کەس ژی بریندار بووینە.
گۆتژی: “ئەڤ روودانا ھاتنوچوونێ د ناڤبەرا ترۆمبێلەکا تایبەت و ترۆمبێلەکا بارھەلگر دا روودایە، ب مخابنی ڤە ژبلی زیانین دارایی زیانێن گیانی ژی ل دووڤ خوە ھێلان”.
ئه‌ڤرۆ نيوز:
ل دووڤ ئامارێن رێڤەبەریا گشتی یا ساخلەمیێ ل پارێزگەھا دھۆکێ كو مالپه‌رێ نوش نيوز ل سالا 2017 ئەو کەسێن گیانێ خوە ژ دەستدای ل پارێزگەھا دھۆکێ (4457) وەلاتی بووینە و دەە ئەگەرێن سەرەکی یێن مرنێ ئەڤێن ل خوارێ دیارکرینە:
1- نەخۆشیێن دلی بووینە ئەگەرێ مرنا (1150) وەلاتیان.
2- نەخۆشیێن مێشکی و دەمارێن خوینێ بووینە ئەگەرێ مرنا (590) وەلاتیان.
3- نەخۆشیێن دومدرێژ و ڤەگر بووینە ئەگەرێ مرنا (461) وەلاتیان.
4- نەخۆشیێن پەنجەشێرێ بووینە ئەگەرێ مرنا (431) وەلاتیان.
5- نەخۆشیێن زارۆیان و یێن پێش وەخت بووین بووینە ئەگەرێ مرنا ( 353) زارۆیان.
6- نەخۆشیێن میزەرۆیێ و کوئەندامێ زاوزێ بووینە ئەگەرێ مرنا ( 241) وەلاتیان.
7- روودانێن ترۆمبێلا بووینە ئەگەرێ مرنا ( 202) وەلاتیان.
8- نەخۆشیێن ھەناسێ بووینە ئەگەرێ مرنا ( 190) وەلاتیان.
9- تەقینێن جورا و جور بووینە ئەگەرێ مرنا ( 117) وەلاتیان.
10- نەخۆشیێن سوتنێ بووینە ئەگەرێ مرنا (112) کەسان.
ئەڤرۆ نيوز:
ھێنری کسینجەر وەزیرێ بەرێ یێ دەرڤە یێ ئەمریکا ل دۆر شکەستنا بزاڤێن کو ل ژێر ناڤێ چاکسازیێ د ڤان چەند سالێن بۆری دا ل ئیرانێ دەرکەفتینە و نەشیاینە چو گوھۆرینان بکەن دیار دکەت کو یێن ھەتا دوھی خەلک دکوشتن و پارێزڤانێ سەرەکی یێ رژێما ئیرانی بوون، نھا ژ بەر بەرژەوەندیێن خوە بەحسێ گوھۆڕینان دکەن، لێ ھێشتا ژی وەکو کەسەکێ ھشکباوەر ھزر دکەن و تنێ تشتێ وان دڤێت کورسیکا دەستھەلاتێ یە، ژ بەر ھندێ ژی ھەتا نھا نەشیاینە ببنە نوونەرێن راستەقینە یێن گەلێ ئیرانێ.
ناڤبری ئاماژە ب ھندێ ژی دکەت کو گەلێ ئیرانێ داخوازا گوھۆڕینا سیستەمی دکەت و بزاڤا کەسک و سەرھلدانێن ڤێ دووماھیێ ل ئیرانێ نیشانێن ھندێ نە کو گەلێ ئیرانێ ژ سیستەمێ نھا بێزار بووینە لێ مخابن کەسێن وەکو موسەوی و کەروبی بووینە ئەگەرێ ھندێ کو دەنگ و داخوازیێن خەلکی ببنە قوربانیا بەرژەوەندیێن وان و ژ بەر ھندێ ژی ھەتا نھا سەرەرای داخوازیێن خەلکی چو گوھۆڕین ل ئیرانێ دروست نەبووینە.
ئه‌ڤرۆ نيوز:
پەیامنێرێ رۆژناما گاردیان ژ عەفرینێ راگەھاند کو دەولەتا تورکیا ب فرۆکێن شەری و گولە ھاوان و تۆپێن دوورھاڤێژ گوندێن عەفرینێ و مالێ وەلاتیێن سڤیل بۆمبەباران دکەت و د ناڤا ١٥ رۆژان دا نێزیکی چارسەد وەلاتیێن سڤیل ژ ئەنجاما ھێرشێن تورکیا جانێ خوە ژ دەست داینە و بریندار بووینە.
مارتین شولۆڤ پەیامنێرێ رۆژناما گاردیان یا برتانیا د داخۆیانیەکی دا راگەھاند کو ل عەفرینێ کارەساتەکا مەزن یا مرۆڤی روو دایە و سوپایێ تورکیا و چەکدارێن سوپایێ ئازاد گوندێن عەفرینێ و مالێن وەلاتیێن سڤیل بۆمبەباران و تۆپباران دکەن و د ئەنجاما ھێرشێن وان دا نێزیکی چارسەد وەلاتیێن سڤیل بووینە قوربانی و نەخوەشخانەیێن عەفرینێ ب بریندارێن سڤیل کو پرانیا وان ژن و زارۆکن پر بووینە و دەرمان ژی گەلەک کێمن.
پەیامنێرێ گاردیان راگەھاند ژی کو مخابن تورکیا و چەکدارێن سوپایێ ئازاد ب تەمامی ھێرشی وەلاتیێن سڤیل دکەن و گۆت: (من ب چاڤێن خوە گوندێن ژ بەر ھێرشا فرۆکێن شەری و تۆپان وێران بووینە دیت و وەلاتیێن کو شیاینە گیانێن خوە رزگار بکەن بەر ب ناڤەندا عەفرینێ و گوندێن دی رەڤیاینە و ژیانا خەلکێ سڤیل ب تەمامی ل ژێر مەترسیێ دایە و ب تەمامی کارەساتەکا مرۆڤی روو دایە).
ل ئالیێ دی ل گوندێن سەر سنورێن عەفرینێ و باکورێ کوردستانێ شەر ب دژواری بەردەوام دکەت و دەولەتا تورکیا یەپەگێ ب ھاڤێتنا سارۆخان بۆ ناڤ باژێرێن کلیس و رەیھانلی تۆمەتبار دکەن و ل ھەمبەر دا بەرپرسێ کۆمسیۆنا پاراستنا کانتۆنا عەفرینێ راگەھاند کو د دەستێ وان دا ساروخێن دوورھاڤێژ نینن و دەزگەھێ ھەوالگیریا تورکیا (میت) ب خوە ساروخان دھاڤێژیتە ناڤەندا باژێرێن خوە و مەرەما وان ئەڤە کو د رایا گشتی یا جیھانێ دا ھێرشا سەر عەفرینێ و کوشتنا وەلاتیێن سڤیل رەوا نیشا بدەن و گۆت: (پەرلەمانتارێن پارتا گەل یا کۆماریا و ھژمارەکا رۆژنامەڤانێن تورکیا ژی ئاشکرا کرن کو ساروخ ژ ناڤا ئاخا تورکیا ڤە دھێتە ھاڤێتن و رۆژنامەڤانێن جیھانی و پەیامنێرێن کو نھا ل عەفرینێ نە ژی راگەھاندینە کو کوردان چو سارۆخ نەھاڤێتنە ناڤەندێن باژێرێن تورکیا ئانکۆ ئاشکرایە بەرپرسێن دەولەتا تورکیا درەوان دکەن و نە دوورە کو ھەموو تاوانێن وان یێ دژی مرۆڤاتیێ بھێنە ئاشکرا کرن).
ل ئالیێ دی د شەرێ رۆژا ١٤ و ١٥ دا ھێزێن یەپەگێ ل بلبلێ و راجۆ ھێرشێن دژوار برنە سەر سەربازێن تورک و چەکدارێن سەر ب تورکیا ڤە و شیان ٣٤ سەرباز و چەکدار بکوژن و چار کەسان ژی دیل بگرن، د ڤێ مژارێ دا رام عەبدولرەھمان بەرپرسێ کۆمەلا مافێ مرۆڤ یا سووریا کو بنگەھێ وێ ل بریتانیایە راگەھاند کو حەتا نھا ب تنێ ٣% ژ ئاخا عەفرینێ کەڤتیە ژێر کۆنترۆلا سوپایێ تورکیا و چەکدارێن سوپایێ ئازاد و تورکیا و سوپایێ ئازاد زێدەتر ھێرشی گوندان و وەلاتیێن سڤیل دکەن و د رۆژا ١٤یێ ئۆپەراسیۆنا سوپایێ تورکیا دا ھەشت سەربازێن تورک جانێ خوە ژ دەست داینە و سەربازێن تورک و چەکدارێن سوپایێ ئازاد نەچار ماینە خوە ژ گوندان ڤەکێشین).
ئەڤرۆ نيوز، ئەیاد بەرواری:
پشتی چەندین مەھێن گرژیبوونێ دناڤبەرا بەغدا وھەرێمێ ونەبوونا دانوستاندنان، ل ڤێ دووماھیێ سەرۆک وەزیرێن عیراقێ دەرگەھێن دانوستاندن ل گەل ھەرێمێ ڤەکرینە وبەردەوام دکۆنگرێن خوە یێ رۆژنامەڤانی یێن ھەفتیانە دا بەحسێ رژدبوونا حوکمەتا خوە ل سەر ھنارتنا مووچێن فەرمانبەرێن کوردستانێ دکەت وھەتا گەھشتیە وێ رادێ چەندین لژنێن دانوستاندنێ ویێن ھووربینیێ دلیستێن فەرمانبەرین چەند وەزارەتێن ھەرێمێ ڤرێکەت بۆ مەزاختنا مووچێن وان.
پێزانین وەسا دیاردکەن کو نەرمبوونا عەبادی ل بەرامبەر ھەرێما کوردستانێ ژبەر دو ھۆکارانە، یا ئێکێ نێزیکبوونا ھەلبژارتنێن گشتی یە ل عیراقێ کو دێ ل 12/5/2018 ھێنە ئەنجامدان وپێدڤیا عەبادی ب دروستکرنا مەزنترین ھەڤالبەندی پشتی ھەلبژارتنان، ژلایەکێ دی ڤە ژبەر مەرجێن بەنکا نێڤدەولەتی یە ب پێنەدانا چو قەران ب عیراقێ، ھەکە دەست ب دانوستاندنان ل گەل ھەرێما کوردستانێ نەکەت وپارەی وبودجەی بۆ کوردستانێ نەھنێریت.
حوکمەتا عیراقێ دەست ب پێنگاڤێن لادانا سزایێن ل سەر ھەرێما کوردستانێ سەپاندین کر، ل دەستپێکێ ھژمارەکا بەنکی ب ناڤێ حوکمەتا ھەرێما کوردستانێ ڤەکر وپاشی وەزارەتا دارایی یا عیراقێ ئاگەھداریا بەنکا ناڤەندی یا عیراقی کر ب مەزاختنا کوژمێ 250 ملیار دیناران بۆ ھەرێما کوردستانێ، ئەو کوژمە ب کریار یێ گەھشتیە ھەرێما کوردستانێ وپشکا دویێ یا پارەی ژی دێ ھێتە ھنارتن.
دەزگەھێن راگەھاندنێ وەسا بەلاڤکر کو ئەو کوژمێ پارەی یێ تایبەتە ب مووچێن کارمەندێن ھەردو وەزارەتێن پەروەردێ وساخلەمیێ، بەلێ وەزارەتا دارایی ل ھەرێما کوردستانێ دیارکر کو ئەو پارە یێ گەھشتیە لقێ بەنکا ناڤەندی یا عیراقی ل ھەولێرێ کو ب سەر عیراقێ ڤەیە ونەھاتیە ھنارتن بۆ وەزارەتا دارایی یا ھەرێمێ، ھەرێما کوردستانێ ژی نوکە چاڤەرێ بەغدایە تاکو ب نڤیسارا فەرمی ھووردەکاریێن وی کوژمێ پارەی بۆ ب ھنێریت.
ئەو پێشڤەچوونا دناڤبەرا بەغدا وھەولێرێ پشتی کۆمبوونا حەیدەر عەبادی سەرۆک وەزیرێن عیراقێ ونێچیرڤان بارزانی سەرۆک وەزیرێن ھەرێما کوردستانێ ل بەغدا کو ئەو کۆمبوونە بەری سەرەدانا نێچیرڤان بارزانی بوو بۆ ئیرانێ وپاشی ل کوربەندێ دافۆس یێ جیھانێ ل سویسرا ژی دووبارە کۆمبوون، بەرپرسێن ھەردولا کۆمبوونا عەبادی ونێچیرڤان بارزانی ل دافۆس ب کۆمبوونەکا بەرھەمدار ھژمارتبوو.
ژلایەکی دی ڤە، عەزیز کازم پەرلەمانتارێ رەوتێ (حکمە) ب سەرۆکاتیا عەمار حەکیم راگەھاند” جڤاتا نوونەرێن عیراقێ بریار دا ب ھەلوەشاندنا دۆرپێچا ل سەر مامەلێن دراڤی ل گەل بەنک ودەزگەھین دارایی ل ھەرێما کوردستانێ، پشتی کو ئەو ئارمانجا کو ئەو بریار ل پێناڤی وێ دابوو ھاتیە دێ، ھەڤدەم جڤاتا نوونەران مەرج بۆ بەنکا ناڤەندی یا عیراقی دانایە کو ھەیڤانە راپۆرتەکا تایبەت ب دەستھەلاتا بەنکان ومامەلێن وان ورۆلێ وان دپاراستنا داراییا گشتی پێشکێشی لژن تایبەتا جڤاتا نوونەران بکەت”.
مەحموود عوسمان، سیاسەتمەدارێ کورد، دداخۆیانیەکێ دا بۆ رۆژناما (العربی الجدید) دبێژیت” عەبادی دخوازیت گرفتان ل گەل ھەرێما کوردستانێ ب دووماھی بینیت ودەرگەھێ دانوستاندنێ دناڤبەرا ھەردولا ڤەکەت وئەڤە ژی یا ھەڤدەمە ل گەل پێکئینانا ھەڤپەیمانیێن ھەلبژارتنان، سەرۆک وەزیرێن عیراقێ دترسیت لایەنێن دی وان گرفتان بۆ بدەستڤەئینانا بەرژەوەندیێن سیاسی وحزبی بکاربینن “.
نيشاندان