ئه‌ڤرۆ نيوز:

ئەندامەکا لیژنا دارایی یا پەرلەمانێ کوردستانێ ئەشکرەکر، ئەولەویەتا فڕاکسیۆنا پارتی ئەڤە پڕۆژە قانوونا چاکسازیێ ددەمێ خوە بھێتە پەسەندکرن و دیارکر، ب ئەڤی داھاتێ د ئەنجامێ چاکسازیێ ڤەدگەڕیت بۆ حکوومەت دێ ئێکسەر چیتە سەر مووچێ فەرمانبەران و تشتەک بناڤێ پاشەکەفت و گیرووبونا مووچەی نامینیت.

مەدینە ئەیوب، ئەنداما فڕاکسیۆنا پارتی لپەرلەمانێ کوردستانێ بۆ رۆژناما ئەڤرۆ گۆت” ھەموو بزاڤێن فڕاکسیۆنا پارتی ئەڤن ھەتا 15ی ئەڤێ ھەیڤێ پڕۆژە قانوونا چاکسازیێ بھێتە پەسەندکرن و بکەڤیتە بیاڤێ بجە ئینانێ دا، ئەف بڕگە و مادەیێن خەلکێ گازندە لسەر ھەی دێ راستڤەکرن، ھەموو داھاتێ ب ئەگەرێ قانوونا چاکسازیێ ڤەدگەڕیت بۆ حوکمەتێ دێ چیتە سەر مووچێ فەرمانبەران ، لەوڕا وی دەمی تشتەک بناڤێ سیستەمێ پاشەکەفت نامینیت و مووچێن فەرمانبەران ھەیڤانە بێ گیرووبون دێ ھێنە بەلافکرن،

مەدینە ئەیوب گۆتژی” ئەگەر پشتی نەھێلانا پاشەکەفتێ لسەر مووچەی پارە بۆ حوکمەتێ بمینیت ئەڤە پلان ھەیە ئێکەم پێنگاڤ دەستپێکرنا پێشینەیا خانی و بەران بیت، چونکە وەلاتیان پێدڤی ب دانا پێشینەیان ھەیە و بەری قەیرانێ ژی ھژمارەکا زۆرا وەلاتیان مفاداربووینە ل پێشینەیێن حوکمەتێ بتایبەتی پێشینەیا خانی و بەرا، لەوڕا دێ ھەموو بزاڤەک ھێتەکرن پشتی ئاسایی بوونا مووچەی پێشینەیێن خانیان بھێنە بەلافکرن.

ئەڤرۆ نيوز:
رێڤەبەرێ گشتی یێ پەروەردا پارێزگەھا دھۆکێ ب وەکالەت بۆ رۆژناما ئەڤرۆ دیار کر کو ل دووڤ بڕیارا وەزارەتا پەروەردا حوکمەتا ھەرێما کوردستانێ رەنگە سوبەھی رۆژا 3/5/2018ێ د رێورەسمەکی دا رێڤەبەرێن پەروەردێن سێ قەزایێن سنوورێ پارێزگەھا دھۆکێ بھێنە گوھۆڕین.

عەمەر عەلی تەھا، رێڤەبەرێ گشتی یێ پەروەردا پارێزگەھا دھۆکێ ب وەکالەت ئاشکرا کر کو پشتی وەزارەتا پەروەردا حوکمەتا ھەرێما کوردستانێ بڕیارا گوھۆڕینا رێڤەبەرێن ھەر ئێک ژ پەروەردێن قەزایێن (سێمێل) و (دھۆک رۆژھەلات) و (بەردەرەش) دەرکری د قووناغا ئێکێ دا بڕیارە سوبەھی رۆژا پێنجشەمبی د رێورەسمەکی دا (درباس مستەفا) ل جھێ (عەبدوللا حەسەن) وەکو رێڤەبەرێ نوو یێ پەروەردا قەزا سێمێلێ بھێتە دانان و (فادیا عەبدولقەھار) وەکو رێڤەبەرا نوو یا پەروەردا قەزا دھۆک رۆژھەلات ل جھێ (سەمیر عەبدولعەزیز) بھێتە دانان.

ناڤھاتی ئاماژە دا وێ چەندێ کو د قووناغا دویێ یا گوھۆڕینا رێڤەبەرێن پەروەردێن قەزایێن سنوورێ پارێزگەھا دھۆکێ دا بڕیارە پشتی ب دووماھی ھاتنا ئەزموونێن دووماھیا وەرزێ دویێ یێن سالا خواندنێ 2017 – 2018ێ د رێورەسمەکی دا رێڤەبەرێ پەروەردا قەزا بەردەرەش ژی بھێتە گوھۆڕین و (مەھدی خەلیل) وەکو رێڤەبەرێ نوو یێ پەروەردا قەزا بەردەرەش ل جھێ (غازی گوران) بھێتە دانان.

ئەڤرۆ نیوز، نەوزاد ھلۆری:

ل ناڤا سەنتەرێ قەزا بەردەرەش سه‌ر ب پارێزگه‌ها دهۆك ڤه‌ چەند دارەکێن مەزن ھەبوون، بەلێ ھندەک ژ وان ھاتینە بڕین و شوونا وان دیوار ھاتینە چێکرن و ل سەر وان دیواران وێنێن داران ھاتینە چێکرن.

ئیبراھیم حەسەن وەلاتیەکێ “بەردەرەش”ه‌ بۆ ئەڤرۆ نیوز گۆت: “کومەکا دارێن مەزن و کەڤن د ناڤا سەنتەرێ باژێرێ بەردەرەش دا ھەبوون، بەلێ ب مخابنى ڤە ژ لایێ جھێن پەیوەندیدار ب به‌ھانەیا بەفرەھکرنا جاددا و دروستکرنا خزمەتگوزاریان ھاتینە بڕین، ل شوونا وان چەند دیوار ھاتینە چێکرن و ل سەر وان دیواران وێنێن داران ھاتینە چێکرن کو دەربڕینێ ژ پاراستنا دارا و ژینگەھێ دکەن”.

زێدەتر گۆت: “بەھرا پتریا وان داران دکەڤنە ناڤا سەنتەرێ بازارێ بەردەرەش و تەنشت گورستانا بەردەرەش، د وەرزێن جودایێن سالێ دا خەلکەکێ زۆر قەستا بن وان داران دکر دا کو کەش و ھەوایەکێ خوه‌ش ھەلكێشن و بێھنا خوە بدەن”.

ئەوی وەلاتی داخواز ژ جھێن شولەژێ کر کو پێدڤی یە رێژەیا کەسکاتی و چاندنا داران زێدە بکەن و گۆتژی: (بەردەرش دکەڤیتە دەشتەکا بەفرەهـ و رێیەکا ستراتیژی ھەیە و رۆژانە ھزاران ترۆمبێلێن بارھەلگر تێدا دبۆرن و ژینگەھێ پیس دکەن، ئەڤە زێدەباری وێ یەکێ ھند کارگەھێن پیشەسازی ھەنە کو ئەو ژی ژینگەھێ پیس دکەن”.

ب گورەی زانیاریێن ئەڤرۆ نیوز د پلانێ دا بوو کو 20% رێژا کەسکاتی ل سنوورێ قەزا بەردەرش بھێتە زێدەکرن ب تایبەتی د ناڤا بازارێ بەردەرەش ، بەلێ کێمتر ژ 11% ژی ئەو رێژە نەھاتیە بجھکرن و ئەڤێ یەکێ وەلاتی دلگران کرینە.