ئه‌ڤرۆ نیۆز،زنار تۆڤى:

پشتى په‌یدابوونا قه‌یرانان ل هه‌رێما كوردستانێ،ئێدى پرانیا خه‌لكێ مه‌ حه‌ز دكه‌ن به‌رهه‌مێن خۆمالى بكرن و نوكه‌ تا راده‌یه‌كێ باش خه‌لكێ مه‌ به‌رێ خوه‌ دایه‌ كرینا به‌رهه‌مێن خۆمالى و دوكانداره‌ك ژى دده‌ته‌ خۆیاكرن،كو ئه‌و شیاینه‌ پتریا به‌رهه‌مێن خۆكالى یێن كوردى په‌یدا بكه‌ن و ب بهایه‌كێ گونجاى ژى دفرۆشنه‌ خه‌لكێ و رۆژانه‌ خه‌لك سه‌ره‌دانا وان دكه‌ن ژبۆ كرینا به‌رهه‌مێن خۆمالى.

ژنه‌ك بناڤێ حه‌لیما سادق بۆ رۆژناما ئه‌ڤرۆ دبێژیت:ئه‌ڤ ساله‌ هه‌ر ل ده‌ستپێكا وه‌رزێ بهارێ وێ ده‌ست ب چێكرنا به‌رهه‌مێ خۆمالى یێ كوردى كریه‌ و ئه‌و شیایه‌ گه‌له‌ك به‌رهه‌مێ چاندنێ و یێ چیایى ژى بۆ خوه‌ كوم ڤه‌ بكه‌ت و وێ پرانیا وى به‌رهه‌مى فرۆتیه‌ و شیایه‌ ب وى به‌رهه‌مى چه‌نده‌كێ ژ پێدڤیێن ژیانا خوه‌ یا رۆژانه‌ پێ دابین بكه‌ت و گوت ژى:ل وه‌رزێ بهارێ سه‌ره‌راى مه‌ترسیا بۆمبه‌بارانكرنا ده‌ڤه‌رێن سنۆرى لێ وێ قه‌ستا چیایان دكر و ئه‌و شیایه‌ به‌رهه‌مێن گیایێن چیایى یێن وه‌كى سۆریازێ و كاریێ و ستركێ و لیشێ و هنگه‌دانێ و مه‌ند و جه‌ڤرێ بینیت و پرانیا وان هشك كرینه‌ و ل وه‌زرێ پاییزێ ئه‌و به‌رهه‌م فرۆتیه‌ و بكره‌كێ با ژى بۆ وان به‌رهه‌مان هه‌بوویه‌،دیسا ل وه‌رزێ هاڤینێ و پاییزێ ژى وێ به‌رهه‌مێن هشك كرى وه‌كى كتكێن هژیرا و سه‌وكێن هژیرا و قه‌یسى یێن حلیكا و مشمشا و كه‌زان و بێمك و سێڤه‌لۆك و هرمیكێن هشك كرى و حلیكێن هشك كرى و مێویژ چێكرینه‌ و ئه‌و ژى فرۆتینه‌ و وه‌سا دده‌ته‌ خۆیاكرن كو بكرێن به‌رهه‌مێن خۆمالى هه‌بووینه‌ و ئه‌ڤ ساله‌ تاراده‌یه‌كێ باش به‌رهه‌مێ خۆمالى یێ كوردى دچیت.

سه‌لیم حسێن دوكانداره‌كێ خۆدانێ متایێن هشك یێن كورده‌وارى یه‌ دبێژیت:ئه‌ڤ ساله‌ حه‌زا خه‌لكێ ل سه‌ر كرینا به‌رهه‌مێن خۆمالى د زێده‌بوونێ دایه‌ و پتریا وان به‌رهه‌مان یێن ده‌ڤه‌رێن جۆدا یێن دهۆكێ نه‌ و مه‌ هه‌ولدایه‌ كو هه‌ر به‌رهه‌مه‌كێ هه‌بیت ئه‌م ب ده‌ست خوه‌ بێخین،ژ پێخه‌مه‌ت ئه‌م ب شێین ب ره‌نگه‌كێ باش خزمه‌تا خه‌لكێ خوه‌ و هه‌روه‌سا یێ بیانى ژى بكه‌ین،چونكى گه‌له‌ك خه‌لكێ بیانى ژى قه‌ستا مه‌ دكه‌ن و به‌رهه‌مێ مه‌ یێ خۆمالى دكرن.

هەروەسا دیاركر ژى:پرانیا وى خه‌لكێ سه‌ره‌دانا مه‌ دكه‌ن به‌رهه‌مێن خۆمالى یێن وه‌كى هنگڤینى و كه‌زان و بێمك و باهیڤ و قه‌یسى و گیز و كتكێن هژیرا و سماقێ و برنجێ كوردى و گه‌له‌ك به‌رهه‌مێن دى یێن جۆدا بۆ خوارنا خوه‌ دكرن و دیسا خه‌لك گه‌له‌ك گیایێن هشك كرى ژى هه‌م بۆ خوارنا خوه‌،هه‌م بۆ ده‌رمانێن كورده‌وارى ژى دكرن،ئه‌ڤ ساله‌ جۆره‌ بزاڤه‌ك كه‌فتیه‌ ناڤ به‌رهه‌مێن خۆمالى یێن كوردى و ژ سالێن به‌رى نوكه‌ باشتره‌.

ئەڤرۆ نیۆز ،زنار تۆڤى:

د به‌رێدا پرانیا خه‌لكێ گوندان و ب تایبه‌تى زه‌لامان كارێن ده‌ستى چێدكرن و ب وان كاران هه‌موو پێدڤیێن خوه‌ یێن رۆژانه‌ پێ د قه‌تاندن و گه‌له‌ك ژ وان یێن كو ئه‌و كارى ده‌ستى چێدكرن ژى د شیان داهاته‌كێ بۆ خوه‌ ژ وان كاران په‌یدا بكه‌ن،لێ نوكه‌ پرانیا وان كاران نه‌ماینه‌ و هه‌كه‌ ب ڤى ره‌نگێ نوكه‌ بیت،دێ گه‌له‌ك ژ وان كاران به‌رزه‌ بن و نامینن.

سه‌لمان ئۆسمان دانعه‌مره‌كه‌ بۆ ئه‌ڤرۆ نیۆز دبێژیت:بۆ په‌یداكرنا پاریێ ژیانا رۆژانه‌ مه‌ هه‌موو كارێن ده‌ستى دكرن،چونكى د وى سه‌رده‌میدا ژیانا مه‌ یا ب زه‌حمه‌ت بوو،مه‌ هه‌موو كارێن خوه‌ ب ده‌ستان دكرن و ئه‌ڤ پێشكه‌فتنا نوكه‌ ل به‌ر ده‌ستێ مه‌ نه‌بوو،هه‌روه‌سا د به‌رێدا مرۆڤ ب زه‌حمه‌ت دشیا داهاتیه‌كێ بۆ خوه‌ په‌یدا بكه‌ت و خێزانا خوه‌ پێ خودان بكه‌ت،له‌ورا ژ دارى مه‌ پرانیا پێدڤیێن خوه‌ یێن رۆژانه‌ دابین دكرن و مه‌ كارێن خوه‌ پێ د قه‌تاندن ژى،دیسا بێكارى د فه‌رهه‌نگا مه‌ یا رۆژانه‌ دا نه‌بوو،مه‌ چو جاران كارێ خوه‌ نه‌ دهێلا ل سه‌ر ئێك و گوت ژى:ژبه‌ركو ئه‌م ل گوندان د ژیاین،له‌ورا ئه‌م فێر ب بووینه‌ هه‌موو جۆرێن كارى،هه‌روه‌سا ئه‌م فێر ب بووینه‌ پرانیا كارێن ده‌ستى ژى،هه‌روه‌سا مه‌ گۆپال چێدكرن و ژ پرانیا داران مه‌ گۆپال چێدكرن،لێ دارێ كنێرى ژ هه‌موویان چێتر بوو،هه‌ر چه‌نده‌ چێكرنا وان كاره‌كێ ب سه‌ر گێژى بوو،دیسا مه‌ هه‌ڤجار و نیرك چێدكرن،كو مه‌ جۆت كێل پێ دكر،كو ئه‌و كاره‌ ب ده‌واران و گا و چێلان دهاته‌ كرن،دیسا مه‌ مه‌تركه‌ بۆ مه‌ران چێكرن بۆ كارێ كۆلانا زه‌ڤیان كو ب پێیان دهاته‌ كرن،هه‌روه‌سا د وى سه‌ر ده‌مى دا مه‌ هه‌موویان پێدڤیێن ئێكودۆ د قه‌تاندن.

هەروەسا دیاركر ژى:لێ گه‌نجێن نوكه‌ چو ژ وان كاران نزانن و كه‌س ژ وان نزانیت وان كارێن ده‌ستى چێكه‌ت و گه‌له‌ك ژ وان ناڤێن وان ئامیران ژى نزانن یێن كو مه‌ ژ داران چێدكرن،له‌ورا ئه‌ز دبینم گه‌له‌ك ژ وان كاران هه‌ رنوكه‌ یێن به‌رزه‌ بووین و كه‌س گرنگیێ پێ ناده‌ت،ژبه‌ركو خه‌لكێ مه‌ د نوكه‌دا پێدڤى وان كاران نا بیت.

سه‌دیق وه‌یسى دانعه‌مره‌كێ دیتره‌ دبێژیت:هه‌ر چه‌نده‌ ژیانا سه‌ر ده‌مێ مه‌ یا ب زه‌حمه‌ت بوو،لێ مه‌ خۆشیه‌ك ژێ ددیت،چونكى پرانیا وى كارێ مه‌ رۆژانه‌ دكر مه‌ ب ده‌ستێ خوه‌ په‌یدا دكر،هه‌روه‌سا مه‌ سه‌له‌مێشك و سه‌ڤیك ژ شفكێن دارێن بى زه‌ركان چێدكرن و مه‌ گه‌له‌ك كار ب وان سه‌فیكان دكرن و دیسا مه‌ مێش ژى د ناڤا سه‌له‌مێشكان دا بخودان دكرن و نوكه‌ ژى ل گه‌له‌ك جهان هێشتا خه‌لك سه‌له‌مێشكان بۆ مێشێن هنگڤینى ب كار د ئینن،ناڤهاتى گوت ژى:مه‌ به‌فریك و ده‌ستكێن بڤرا و ته‌ڤر و مه‌ران و ده‌ستكێن ملهێبان چێدكرن و دیسا مه‌ ته‌به‌قێن نانى و چه‌په‌ر و په‌رژانێن زه‌ڤیان و هه‌ستیك و هه‌ڤچك و تیرۆك و بستك و خانكێن نانى ژ داران چێدكرن و مه‌ هه‌موو پێدڤێن خوه‌ یێن سالانه‌ و یێن رۆژانه‌ ژى ژ وان داران په‌یدا دكرن،لێ نوكه‌ ئه‌و كار نه‌ماینه‌،له‌ورا ب نه‌مان و به‌رزه‌كرنا وان كاران به‌رزه‌كرنا پارچه‌كا گرنگا ژیانا مه‌ یا كورده‌واریێ یه‌،له‌ورا نابیت ئه‌و كاره‌ بهێنه‌ ژبیركرن.