دوهی ئێكشەمبی 16/11/2025، سەرۆك مەسعود بارزانی ل پیرمام پێشوازی ل عرفان سدیق، بالیۆزێ بریتانیا ل ئیراقێ كر.
بارەگەهێ بارزانی بەلاڤكر» د دیدارەكێدا بالیۆزێ بریتانیا ل ئیراقێ پیرۆزباهی ل سەرۆك بارزانی كر بۆ سەركەفتنا پڕۆسەیا هەلبژارتنێن جڤاتا نوونەرێن ئیراقێ و ئەو سەركەفتنا مەزن یا پارتی دیموكراتی كوردستان ب دەستڤەئینای كو زێدەتر ژ ملیۆن دەنگان بوون. هەروەسا هیڤی خواست كو پڕۆسەیا سیاسی پشتی هەلبژارتنان ل ئیراقێ رێیا خوە بگریت ژ پێخەمەت پێكئینانا حوكمەتەكا فیدرالی ب پشكدارییا هەموو ئالیێن سیاسی».
ژ ئالیێ خوەڤە سەرۆك بارزانی سوپاسییا بالیۆزا بریتانیا كر و راگەهاند كو سەرەرای ئەو ئاستەنگێن بۆ پارتی هاتینە دروستكرن بەلێ ب باوەرییا ب هێز یا گەلێ كوردستانێ، پارتی شیا سەركەفتنەكا مەزن ب دەستڤەبینیت. هەروەسا سەرۆك بارزانی قووناغا پشتی هەلبژارتنان ب گرنگ هەژمارت و ئاماژەكر، پێدڤییە بۆ راستڤەكرنا رێڕەوێ حوكمڕانیێ ل ئیراقێ بجهئینانا بڕگەیێن دەستووری، هەموو ئالیێن سیاسی ب جدی كار ل سەر ڤێ پرسێ بكەن و ژ هەڤدو نێزیك بن و ئەزموونێ ژ شاشیێن بۆری وەربگرن.
هەروەسا سەرۆك بارزانی راگەهاند، گرێدای ب پارتی و هەرێما كوردستانێ، بجهئینانا دەستوورێ دێ بیتە بنەمایێ سەرەكی بۆ دانوستاندنان بۆ پێكئینانا حوكمەتا داهاتییا ئیراقێ و مە ڤیتۆ ل سەر هیچ كەس و ئالییەكی نینە، ل دەف مە خالا گرنگ ئەوە هەر كەس و ئالییەك باوەری ب فیدرالییا تمام هەبیت ل سەر بنەمایێ دەستووری، هەروەسا باوەری ب بجهئینانا دەستووری و دەركرنا قانوونان بۆ وان بڕگەیێن د دەستووریدا هاتین و بجهئینانا وان قانوونا كو ل سەر بنەمایێ دەستووری هاتینە دەركرن هەبیت كو هەتا نوكە نەهاتینە بجهئینان، وەك قانوونا جڤاتا فیدرالی و قانوونا پەترۆل و غازێ . هەر كەس و ئالییەكێ پێگیر بیت ب بجهئینانا دەستووری دێ نێزیكترین كەس و ئالی بیت ژ مە و ژ هەرێما كوردستانێ.
گرێدای ب ناڤخوەیا هەرێما كوردستانێ، سەرۆك بارزانی راگەهاند كو بەری هەلبژارتنێن جڤاتا نوونەرێن ئیراقێ مە نەرمی نیشادا، پێشتر ژی مە راگەهاندبوو، مەرج نینە ئەو رەوشا بەری هەلبژارتنان هەی پشتی هەلبژارتنان بمینیت. بەلێ گرنگە دەرگەهێن دانوستاندنێ د ڤەكری بن تاكو بشێین پێكڤە كێشەیان چارەسەر بكەین.
ل سەر پرسا ئێكڕێزییا كوردان ل بەغدا سەرۆك بارزانی، ئاماژە ب وێ چەندێ كر، بنەمایێ ئێكڕێزییا كوردان ل بەغدا ئەوە كو باوەرییەكا هەڤپشك هەبیت ل سەر پرسێن ستراتیژی یێن هەرێما كوردستانێ و ل سەر بابەتێ فیدرالییەتێ و پێگیریبوونا بەغدا ب هەموو بڕگەیێن دەستووری.
هەڤبەندیێن د ناڤبەرا بریتانیا ل گەل هەرێما كوردستانێ وئ یراقێ تەوەرەكێ دی دیدارێ بوون، هەردو ئالی هەڤڕا بوون ل گرنگییا بەردەوام یا وان هەڤبەندییان و بەر ب پێشڤەبرنا وان د هەموو واراندا.

شاهـ عەبدوللا، شاهێ ئوردنێ پیرۆزباهییا سەركەفتنا پارتی و ب دەستڤەئینانا زێدەتر ژ ملیۆن دەنگان ل سەرۆك بارزانی كر و دوپاتی ل ب هێزكرن وب ەرفرەهكرنا هەڤبەندیێن دۆستایەتی د ناڤبەرا ئوردنێ و هەرێما كوردستانێ كر. شاهـ عەبدوللا، شاهێ ئوردنێ پیرۆزباهییا سەركەفتنا پارتی و ب دەستڤەئینانا زێدەتر ژ ملیۆن دەنگان ل سەرۆك بارزانی كر و دوپاتی ل ب هێزكرن وب ەرفرەهكرنا هەڤبەندیێن دۆستایەتی د ناڤبەرا ئوردنێ و هەرێما كوردستانێ كر. بارەگەهێ بارزانی بەلاڤكر» ل رۆژا ئێكشەمبی 16/11/2025، ل پیرمام سەرۆك مەسعود بارزانی پیشوازی ل زیاد بەتارسە، قونسلێ گشتیێ نوو یێ وەلاتێ ئوردنێ ل هەولێرێ كر، كو ب مەبەستا دانەنیاسینا خوە سەرەدانا سەرۆك بارزانی كربوو».د دیدارەكێدا قونسلێ نوو یێ ئوردنێ سلاڤ و رێزێن تایبەت یێن شاه عەبدوللا شاهێ ئوردنێ گەهاندنە سەرۆك بارزانی و ئەوژی دوپاتكر كو فەرمان وشیرەتێن شاهێ ئوردنێ هەردەم ئەو بوون كو هەڤبەندی و دۆستایەتییا د ناڤبەرا ئوردنێ و هەرێما كوردستانێ ب هێزتر و بەفرەهتر ببیت. قونسلێ گشتیێ ئوردنێ پیرۆزباهی ل سەرۆك بارزانی كر بۆ سەركەفتنا پارتی و ب دەستڤەئینانا زێدەتر ژ ئێك ملیۆن دەنگان وەك بەلگەیەكێ رۆهن هەژمارت ل سەر پێگەهێ پارتی دناڤ خەلكێ كوردستانێدا  و ئەو پێشكەفتن و ئاڤەدانییا ل ژێر سیبەرا پارتی پەیدابووی. هەر د وێ دیدارێدا سەرۆك بارزانی سوپاسییا شاه عەبدوللا و گەلێ ئوردنێ كر كو ل رۆژێن تەنگاڤییاندا پشتەڤانێن گەلێ كوردستانێ بوون و شاه عەبدوللا وەك برا و دۆستەكێ ئەزیز هەژمارت. هەروەسا دوپاتی ل ب هێزكرنا هەڤبەندی و دۆستایەتیێ د ناڤبەرا هەرێما كوردستانێ و ئوردنێ كر. پرۆسەیا سیاسییا ئیراقێ پشتی هەلبژارتنان و رەوشا سیاسییا ناڤخوەیا هەرێما كوردستانێ تەوەرێ دی یێ دیدارێ بوون.

دوهی ئێكشەمبی 16/11/2025 ل پیرمام، سەرۆك مەسعود بارزانی پێشوازی ل لی جو نیل ، بالیۆزێ كۆریایا باشوور ل ئیراقێ كر.
بارەگەهێ بارزانی بەلاڤكر» د دیدارەكێدا كو سن چۆل لیم، قونسلێ گشتیێ كۆریایا باشوور ل هەولێرێ بەرهەڤ بوو، بالیۆزێ كۆریا باشوور پیرۆزباهی ل سەرۆك بارزانی كر بۆ وێ سەركەفتنا مەزن یا پارتی ل هەلبژارتنێن جڤاتا نوونەرێن ئیراقێ ب دەستڤەئینای و هەروەسا پێشكەفتن و گوهۆڕینێن كو ل سالێن بۆری ل ژێر سیبەرا ئارامیێ ل هەرێما كوردستانێ پەیدابووین بلند هەلسەنگاندن. راگەهاند كو هەڤبەندیێن وەلاتێ وی ل گەل گەلێ كوردستانێ ل دەمێ تیپا زەیتون ل هەولێرێ پەیدابووینە و نوكە گەشەكرنا مەزن د وارێن وەبەرهێنانێ و تەكنۆلۆژیایێ و وارێن دی دیتییە و هیڤی خواست ئەو هەڤبەندیین بەرفرەهتر ببن».
هەر د وێ دیدارێدا سەرۆك بارزانی دوپاتی ل دۆستایەتی و هەڤبەندییا د ناڤبەرا گەلێ كوردستانێ و گەلێ كۆریا باشوور كر. ئەوژی بەرچاڤكر كو گەلێ كوردستانێ روانگەهەكا گەلەك ئەرێنی بەرانبەر وەلاتێ كۆریا باشوور و گەلێ وێ هەیە.
د پشكەكا دی یا وێ دیدارێدا باس ل دیرۆكا خەباتا گەلێ كوردستانێ هاتە كرن و سەرۆك بارزانی دوپاتكر كو هەر مللەتەكێ ئیرادە هەبیت ل دووماهیێ دێ سەركەڤیت و پێشكەڤیت.
پرۆسەیا سیاسییا ئیراقێ و پێنگاڤێن پشتی هەلبژارتنێن جڤاتا نوونەرێن ئیراقێ و هەروەسا مەرتسییا گەفێن تیرۆرێ ل سەر ئارامییا دەڤەرێ تەوەرێ دی یێ دیدارێ بوون.

سەرۆكێ حوكمەتا هەرێما كوردستانێ، بەرێ بنیاتێ پڕۆژەیێ ویستگەها پاقژكرنا ئاڤا ئاڤڕۆیێن هەولێرێ دانا و راگەهاند: ئاڤ ل ئیراقێ و دەڤەرێ بوویە خەم و كێشەیەكا مەزن، لەوما مە زووتر دەست ب چەند پڕۆژەیێن گرنگ د وارێ دابینكرنا ئاڤێدا كر.
دوهی ئێكشەمبی 16/11/2025، مەسرور بارزانی، سەرۆكێ حوكمەتا هەرێما كوردستانێ بەرێ بنیاتێ پڕۆژەیێ ویستگەها پاقژكرنا ئاڤا ئاڤرۆیا هەولێرێ دانا و تێدا پەیڤەك پێشكێشكر و گوت» ئەڤ پڕۆژەیە كو وەزارەتا باژێرڤانیان و گەشتوگوزارێ ب هاریكارییا كۆمپانییا (ئاوزان) ئەنجام ددەت، هەروەسا بڕیارە ئێك ژوان هەشت یەكەیێن ڤی پڕۆژەی، ب سوپاسی ڤە، ژ ئالیێ ئاژانسا جایكا یا چاپۆنی بهێتە بجهئینان. هەروەك دیارە، ئەڤ پڕۆژەیە ژ هەشت یەكەیان پێكهاتییە و ئێك ژوان یەكەیان، هیڤیدارین كو ئاژانسا جایكا یا چاپۆنی بجهبینیت و ئومێدەوارین د دەمەكێ زوودا ئەوژی دەست ب كارێن خوە بكەن».
مەسرور بارزانی گوت ژی» ئەڤ پڕۆژەیێ گرنگ رێگریێ ل تێكهەلبوونا ئاڤا ئاڤڕۆیان ل گەل ژێدەرێن سروشتی و ئاڤا بن ئەرد و پیسبوون و نەخوەشیێن ڤەگوهێز یێن ئاڤێ، دكەت. هەروەسا زێدەتر هاریكارییا كەرتێ چاندنێ و ژینگەهپارێزیێ ژی دكەت، چونكە ئاڤ پشتی چارەسەركرنێ و پارزینكرنێ دوبارە دهێتە بكارئینان. ب ڤێ چەندێ ژی، هەتا ئاستەكێ مەزن فشارێ ل سەر ئاڤا بن ئەرد كێم دكەت».
دیاركر ژی» ئەڤ پڕۆژەیە باشترین ژێدەرە بۆ ئاڤدێرییا پارك و كەسكاتیێ، هەروەسا دێ بیتە پالپشتەكێ ب هێز بۆ هەموو پلانێن مە بۆ زێدەكرنا رێژەیا كەسكاتیێ ل هەولێرێ. ژ وان ژی، پالپشتیكرنا هەردو پڕۆژەیێن (كەمەرا كەسكاتیێ) و (رێیا ژیانێ) و هەموو پاركێن دی، كو كاریگەرییەكا باش د وارێ دابینكرنا ئاڤێ و پاراستنا ئاڤابن ئەرد و باشتركرنا رەوشا ژینگەهێ و ساخلەمییا باژێرێن مە دێ هەبیت».
د پشكەكا دی یا ئاخڤتنێن خوە دا، سەرۆكێ حوكمەتا هەرێمێ ئاشكراكر» حوكمەتا هەرێما كوردستانێ پلان هەیە پڕۆژەیێن هەڤشێوە ل باژێر و باژێركێن دی یێن كوردستانێ ژی ئەنجام بدەت، ب ئارمانجا خزمەتكرنا وەلاتییان و برنا ئاستێ ژیانێ و خزمەتگوزاریێن گشتی بەر ب قووناغەكا پێشكەفتیتر».
مەسرور بارزانی هیڤی خواست پڕۆژەیێ ناڤبری د دەمێ دیاركریێ خوە دا بهێتە تمامكرن و ببیتە جهێ خێر و خوەشیێ بۆ ئاكنجیێن باژێرێ هەولێرێ و هەموو كوردستانێ.

دوهی ئێكشەمبی 16/11/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ جڤاتا بازرگانییا ئەمریكا – كوردستان كر.
ل دەستپێكا كۆمبوونێ، دەیڤد تەفوری، سەرۆكێ جڤاتێ پیرۆزباهییا سەركەفتن و ئەنجامدانا هەلبژارتنێن جڤاتا نوونەرێن ئیراقێ ل سەرۆكێ حوكمەتێ كر و كورتییەك ل دۆر ئارمانجا سەرەدانا خوە و پێكهاتەیێ شاندی بۆ هەرێما كوردستانێ بەرچاڤكر.
سەرۆكێ حوكمەتا هەرێمێ رۆناهی ئێخستە سەر دووماهی پێشهات و گوهۆڕینێن هەرێما كوردستانێ و ئیراقێ ب گشتی. هەروەسا باس ل چاكسازیێن كابینەیا نەهێ یا حوكمەتا هەرێما كوردستانێ ل كەرتێن جۆراوجۆر، ب تایبەتی وزەیێ و غازا سروشتی كر. دوپاتی ژی ل گرنگییا پێشڤەبرنا وەبەرهێنانا كۆمپانیێن ئەمریكی ل هەرێما كوردستانێ كر.

پەیڤدارێ پارتی دیموكراتی كوردستان ستراتیژییەت و هەلوەستێ پارتی پشتی هەلبژارتنان بەرچاڤكر و راگەهاند: دێ ژ وان كەسان نێزیك بیت كو دەستووری بجه دئینن و باوەری ب ئیراقەكا فیدرال هەیە، هەروەسا ئاماژە ب وێ چەندێ ژی كر: پارتی ژ باوەرییا خەلكی رازییە، بەلێ قانوونا نوكە یا هەلبژارتنێن ئیراقێ ب نەدادپەروەرانە هەژمارت و دبێژیت پێدڤییە بهێتە راستڤەكرن.
سەبارەت سەرەدانا چاڤەڕێكرییا محەمەد شیاع سوودانی بۆ هەرێما كوردستانێ و دهۆكێ وكۆمبوونێن وی ل گەل سەرۆك بارزانی و سەرۆكێ هەرێما كوردستانێ وسەرۆكێ حوكمەتا هەرێما كوردستانێ، ئایا دێ باسێ پێكئینانا حوكمەتا نوو یا ئیراقێ هێتە كرن؟ مەحموود محەمەد، پەیڤدارێ پارتی دیموكراتی كوردستان د پشكەكا هەڤدیتنا خوە دا ل گەل كەنالێ رووداو، گوت» بێگومان دێ باس هێتە كرن، و ئە پشكەكن ژ وان دانوستاندان كو ژ نوكە و وێڤە دێ دەستپێكەن و هەتا وی دەمی دبیت كۆمسیۆن ژی ئەنجامێن دوماهیێ یێن هەلبژارتنان رابگەهینیت. لەوما چاڤەڕێ وێ چەندێ دهێتە كرن هەموو د ناڤبەرا سیاسەتمەدارێن دێ هێن پشكداریێ د كۆڕبەندێ میپس دا ل دهۆكێ كەن، بابەتێ پێكئینانا كابینەیا حوكمەتا ئیراقێ بهێتە باسكرن».
ل دۆر وێ چەندێ كو كوردان بەردەوام گازندە هەبوون ژ بجهنەئینانا دەستووری. پارتی ژی ئەڤ خولا ب خولا بجهئینانا دەستووری ناڤكریە هەكە رێككەفتن ژی نەهێنە بجهئینان. پارتی گەلەك پشتەڤانییا سودانی كر، هەروەسا بۆ سەرۆك وەزیرێن پێشتر ژی هەر هەمان شێوە بوو، بەلێ هێشتا كێشەیا مووچەی و گەلەك كێشەیێن دی نەهاتینە چارەسەركرن، تاكو ئەڤ چەندە دوبارە نەبیتە ڤە ئایا پارتی دێ چ كەت و پلانا وێ چیە؟ پەیڤدارێ پارتی گوت» مە پەسنا سودانی كریە ل سەر بنەمایێ وان رێككەفتنێن مە ل گەل وی و چارچۆڤەیێ هەماهەنگیێ. ژ بلی بابەتێ دەستووری، دو رێككەفتنێن بنەڕەتی مە ل گەل هەبوون. یا ئێكێ رێككەفتنا سیاسی و یا دی ژی رێككەفتنا ئیداری كو كۆمەكا خالان تێدانە ژ مادەیا 140 هەتا شایستەیێن دارایی یێن خەلكێ هەرێما كوردستانێ و چەندین بابەتێن دی كو پێدڤی بوو هاتبا چارەسەركرن بۆ وێ چەندێ سیمایێ ئیراقێ ببیتە دەولەتەكا فیدرالی كو ب راستی نوكە كێمییەك د فیدرالییا ئیراقێدا هەیە، ئەوژی چەندین دەزگەه هەنە كو پێدڤی بوو بهێنە دامەزراندن بۆ وێ چەندێ بێژینێ دەولەتەكا فیدرالی، ئەو نەهاتنە دامەزراندن و وان باوەری ژی ب وێ چەندێ نینە كو بهێنە دامەزراندن».
سەبارەت وێ چەندێ پترە ژ سالەكێ هەلبژارتنێن پەرلەمانێ كوردستانێ هاتینە ئەنجامدان و هەتا نوكە كابینەیا نوو یا حوكمەتا هەرێما كوردستانێ نەهاتیە پێكئینان، گوت» ئەڤە بۆمە جهێ داخێیە. ل دەستپێكێ مە بزاڤكر و دەرگەه ڤەكرن و مە سەرەدانا هەموو ئالییان كر بۆ وێ چەندێ ئەڤ كابینەیە و دەزگەهێن مە یێن قانوونی بهێنە پێكئینان، ب راستی مە بەرسڤەكا وەسا ژ هەموو ئالییان نەدیت، هندەك جاران وەسا دهێتە خواندن كو د خەما وێ چەندێ دا نەبوون كو ئەڤ دەزگەهە و كابینەیە بهێتە پێكئینان، كو مە پێدڤی ب وان هەیە و سەرۆكایەتییا هەرێما كوردستانێ و پەرلەمان بوو، بەلێ ئەو رژدبوونا مە هەی ل دەف پترییا حزبان مە نەدیت، ئەو چەندە ژی بوو ئەگەرێ گیروبوونێ، نوكە ژی دڤێت بهێتە ئێكلاكرن، چاوان و كەنگی، دێ مینیت بۆ وان دانوستاندنێن هەكە د دەمێن داهاتیدا هاتنە پێش».

سەرۆك مەسعود بارزانی پەیامەك ب هەلكەفتا سەركەفتنا پرۆسەیا هەلبژارتنێن جڤاتا نوونەرێن ئیراقێ بەلاڤكر و هیڤی خواست ئەو هەلبژارتنە و ئەنجامێن وێ ببنە ئەگەرێ وێ چەندێ ئیراق بكەڤیتە سەر رێیا خوە یا دروست.
د پەیاما خوە دا سەرۆك بارزانی دبێژیت» ب هەلكەفتا سەركەفتنا پرۆسەیا هەلبژارتنێن جڤاتا نوونەرێن ئیراقێ، پیرۆزباهیێ ل خەلكێ هەرێما كوردستانێ و هەموو ئیراقێ دكەم».
دەقێ پەیاما سەرۆك بارزانی:
ب هەلكەفتا سەرۆكەفتنا پرۆسەیا هەلبژارتنێن جڤاتا نوونەرێن ئیراقێ پیرۆزباهیێ ل وەلاتیێن خوەشتڤیێن كوردستانێ و هەموو ئیراقێ دكەم، هەروەسا پیرۆزباهیێ ل مالباتێن سەربلندێن شەهیدان و پێشمەرگەیێن قەهرەمان و هەموو تەخ و چینێن كوردستانێ دكەم.
ب پێدڤی دزانم سوپاسییا سەركردایەتی و ئەندام و كادر و جەماوەرێ پارتی و هەروەسا دامودەزگەهێن ئەمنی و هەموو ئالیێن پەیوەندیدار بكەم، كو ب وەستیان و كارێ وان یا بەردواوم سەقایەكێ ئارام و بۆ ئەنجامدانا پرۆسەیا هەلبژارتنان پەیداكر. هیڤیدارم ئەو هەلبژارتنە و ئەنجامێن وێ ببنە ئەگەرێ وێ چەندێ ئیراق بكەڤیتە سەر رێیا خوە یا دروست.
ژ ئالیێ خوەڤە نێچیرڤان بارزانی، جێگرێ سەرۆكێ پارتی دیموكراتی كوردستان پیرۆزباهی ل سەرۆك بارزانی، مالباتێن شەهیدان و ئەندام و جەماوەرێ پارتی كر و دیاركر: ئەڤ سەركەفتنە، سەرۆكەفتنا هەموو كوردستانێ وئیراقێیە و جهێ كەیف و شانازییا مە هەموویانە.
د پەیاما جێگرێ سەرۆكێ پارتی دا هاتیە» ژ ناخێ دلێ خوە ب گەرمی پیرۆزباهیێ ل سەرۆك بارزانی، مالباتێن شەهیدان، ئەندام و جەماوەرێ پارتی و مللەتێ وەفادارێ كوردستانێ دكەم بۆ سەركەفتنا مەزن و دیرۆكییا پارتییا مە د هەلبژارتنێن جڤاتا نوونەرێن ئیراقێدا».
نێچیرڤان بارزانی گوت ژی» ئەڤ سەركەفتنە، سەركەفتنا هەموو كوردستانێ و ئیراقێیە و جهێ دلخوەشی وشانازییا مە هەموویایە».
هەڤدەم دەستخوەشی و رێز و سوپاسی ئاراستەی هەموو وان دلسۆزان كر ئەوێن ئەرك و زەحمەتكێشای و وەستیاین و ب جوامێری كاركری هەتا دەنگێن پارتی گەهاندینە زێدەتر ژ ملیۆنەكێ و پارتی كریە حزبا ئێكێ.
جێگرێ سەرۆكێ پارتی دیاركر ژی» دلسۆزێن پارتی چالنجا مە سەرئێخست و حزبا خوە ب هێزتر كر تاكو دەنگێ وێ ل بەغدا دلێرتر بیت و بشێت باشتر بۆ بجهئینانا دەستووری و چەسپاندنا باشتر یا فیدرالییەتێ كار بكەت».
هەر د پەیاما خوە دا، نێچیرڤان بارزانی دوپاتی ل وێ چەندێ كر» سۆزا مە بۆ سەرۆك بارزانی رێبەر و مەزنێ خوە دوپات دكەین كو بەردەوام ل ژێر رێنما و فەرمانێن جەنابێ وی، خزمەتا مللەت و وەلاتێ خوە بكەین و ببینە پارێزەرێن مافێن هەموو پێكهاتەیێن كوردستانێ و ئیراقێ و كار بكەین بۆ وێ چەندێ ئیراق ببیتە وەلاتێ مە هەموویان و ئەم هەموو پێكڤە پاشەڕۆژەكا گەشتر بۆ كوردستانێ و ئیراقێ پەیدا بكەین».
هەر ب هەلكەفتا سەركەفتنا هەلبژارتنێن جڤاتا نوونەرێن ئیراقێ و سەركەفتنا پارتی دیموكراتی كوردستان د وان هەلبژارتناندا ، مەسرور بارزانی، جێگرێ سەرۆكێ پارتی دیموكراتی كوردستان پیرۆزباهی ل سەرۆك بارزانی و نێچیرڤان بارزانی و ل لایەنگر و ئەندامێن پارتی كر.
مەسرور بارزانی، جێگرێ سەرۆكێ پارتی د پەیاما خوە یا پیرۆزباهیێدا گوت» سوپاس بۆ خودایێ مەزن و بۆ هەلوەست و خواستا وەلاتیێن كوردستانێ و ئەندامێن پارتی، دەنگێن پارتی دیموكراتی كوردستان ژ ملیۆن دەنگان دەرباز بوون و ل ئەنجامێ دووماهیێ دێ زێدەتر بن».
هەڤدەم جێگرێ سەرۆكێ پارتی پیرۆزباهی ل « سەرۆك و رێبەرێ مللەتێ مە جەنابێ سەرۆك بارزانی» كر.
چالنجا ملیۆن دەنگان ل دەمێ هەلبژارتنان ژ ئالیێ نێچیرڤان بارزانی، جێگرێ سەرۆكێ پارتی دیموكراتی كوردستان هاتبوو راگەهاندن، مەسرور بارزانی د پەیاما خوە یا پیرۆزباهیێدا دبێژیت» پیرۆزباهیێ ل برایێ خوە یێ بەرێز و خوەشتڤی كاك نێچیرڤان دكەم كو چالنجا ئێم ملیۆن دەنگان راگەهاندبوو».
هەروەسا جێگرێ سەرۆكێ پارتی سوپاسی دەستخوەشی ل هەموو سەركردایەتی و ئەندام و لایەنگرێن پارتی كر و پیرۆزباهی ژی ل خەلكێ كوردستان كر و گوت» ئەڤ سەركەفتنا مەزن ل پرۆسەیا دیموكراسی و ل هەموو خەلكێ ئیراقێ پیرۆز بیت».
ل دوماهییا پەیاما خوە مەسرور بارزانی راگەهاند» ب گەرمی و تێهنەكا زێدەتر دێ د خزمەتا هەموو كوردستانییان و وەلاتێ خوە دا بەردەوام بین، بەر ب وەلاتەكێ ئارامتر و ئاڤەدانتر».

نێچیرڤان بارزانی، سەرۆكێ هەرێما كوردستانێ، د كۆنفرانسەكێ رۆژنامەڤانیدا باسێ پرۆسەیا هەلبژارتنێن جڤاتا نوونەرێن ئیراقێ كر و بەرسڤا پرسیاران دا و ئەڤە دەقێ داخۆیانیێن سەرۆكێ هەرێما كوردستانێ نە:
بێگومان ئەڤ پرۆسەیە پرۆسەیەكا گرنگە و ب دیتنا من ئەڤ هەلبژارتنە ئێك ژ گرنگترین هەلبژارتنێن كو هەتا نوكە ل ئیراقێ هاتینە كرن.
پشتی سالا 2005 و ئەو قووناغێن كو ب سەر ئیراقێ دا هاتین، هیڤیدارم ئەڤ هەلبژارتنە دەستپێكەكا نوو بیت بۆ ئیراقەكا دیموكراتی و فیدرال كو هەموو پێكهاتەیێن وێ د چارچۆڤەیێ ئیراقێدا بگەهنە ماف و دەستكەفتێن خوە.
بێگومان پرسا دەنگدانێ ماف و بەرپرسیارەتییەكا مەزنە. هیڤیدارم هەموو ئالییەك ل ئیراقێ ڤێ پرسێ ب گرنگی ڤە وەربگریت، ئیراق ل سەر رێیەكا دروست یا دیموكراسی دچیت
دخوازم سوپاسییا هەموو هێزێن ئەمنی یێن ئیراقی و هێزێن ئەمنی ل هەرێما كوردستانێ بكەم كو ب راستی گەلەك ب باشی ئەركێ خوە بجهئینا. سوپاسییا وان دكەم و دەستخوەشیێ لێ دكەم. سوپاسییەكا تایبەت یا كۆمسیۆنا بلند یا سەربخوە یا هەلبژارتنان ل ئیراقێ دكەم بۆ وان پێرابوونێن وەرگرتین. سوپاسییا وەستیانا وان دكەین.
هیڤیدارین ئەڤ هەلبژارتنە دەستپێكا قووناغەكا نوو بیت بۆ ئیراقێ. گەلێ ئیراقێ هەژی ژیانەكا باشتر و هەژی رۆژێن باشترنن د ژیانا خوەدا. هیڤیدارم. ئەڤە دەستپێكەك بیت بۆ وێ چەندێ خزمەتا زێدەتر پێشكێشی گەلێ ئیراقێ بهێتە كرن، ژیانا وان باشتر بیت وهەر د خوەشیێ و سەلامەتیێدا بن.
پاشی د بەرسڤا پرسیارێن رۆژنامەڤاناندا، ل دەستپێكێ ل دۆر جوداهییا ڤان هەلبژارتنان ل گەل هەلبژارتنێن دی یێن ئیراقێ و هەرێما كوردستانێ، نێچیرڤان بارزانی گوت» جوداهی ئێك خالە، ئەوژی ب دیتنا مە نوكە ئیراق ژ روویێ ئەمنی و ژ روویێ ئابۆری ژی ڤە گوهۆڕینێن باش ب سەردا هاتینە. بۆمە ئە هەلبژارتنە وەسایە كو دەستپێكەكا نوو دەست پێ دكەت ل قووناغا بجهئینانا دەستووێ ئیراقێ بۆ وێ چەندێ ببیتە گرەنتییا ئارامیێ و ئاسایشێ بۆ هەموو گەلێ ئیراقێ. ب دیتنا مە ئەڤە دەستپێكا قووناغەكا نوویە بۆ بجهئینانا دەستووی.
سەبارەت دانوستاندنێن د ناڤبەرا پارتی دیموكراتی كوردستان و ئێكەتی نیشتمانی كوردستان بۆ پێكئینانا كابینەیا نوو یا حوكمەتا هەرێما كوردستانێ و بەییاننامەیەكا پارتی ل دۆر وێ چەندێ، سەرۆكێ هەرێما كوردستانێ ئاشكراكر» ئەوا ژ ئالیێ پارتی ڤە هاتیە بەلاڤكرن، ناڤەڕۆكا وان دانوستاندن و كۆمبوونان بوو كو پارتی ل گەل ئێكەتیێ ئەنجامداین. بێگومان هەلبژارتن رەوشا خوە یا تایبەت هەیە، پشتی هەلبژارتنان ژی رەوشا تایبەت دێ هێتە پێش، بەلێ ئەم دانوستاندنێ ل گەل هیچ ئالییەكی رەت ناكەین، بەرۆڤاژی دڤێت ئەو كێشە ب دانوستاندنێ بهێنە چارەسەركرن، بێگومان بلا بزانین پشتی ڤان هەلبژارتنان جارەكا دی دێ كۆمبین و دانوستاندنان كەین و چاوان بشێین وان كێشەیان چارەسەر بكەین».
سەبارەت ئەگەرێ وێ چەندێ ئایا ڤان هەلبژارتنان دێ هێزا گوهۆڕینێ ل دەڤەرێ هەبیت؟ هەروەسا ل دۆر دەمێ دەستپێكرنا دانوستاندنێن د ناڤبەرا پارتی و ئێكەتیێ دا بۆ پێكئینانا كابینەیا نوو یا حوكمەتا هەرێما كوردستانێ، نێچیرڤان بارزانی ئاماژە ب وێ چەندێ كر» هەروەك من باسكری هەر هەلبژارتنەك یا گرنگە، گرنگییا ڤان هەلبژارتنان ژی بۆ هەرێما كوردستانێ ئەوە كو ب دیتنا مە دەستپێكەكا نوو ل ئیراقێ دەستپێكریە و دڤێت هەرێما كوردستانێ گەلەك ب هێز ل بەغدایێ بیت، چونكە د ئەنجامدا ئەوا ئیراقێ و هەرێما كوردستانێ دەنگ بۆ دای، دەستوورێ ئیراقێ بوو. هەتا نوكە ئەو دەستوورە نەهاتیە بجهئینان، بێگومان گرنگترین كار كو دڤێت پشتی ڤان هەلبژارتنان بهێتە ئەنجامدان، ئەوە دەلیڤەیەكا جدی بهێتە دان بۆ وێ چەندێ دەستوورێ ئیراقێ بهێتە بجهئینان، بلا بزانین ئەڤ قووناغا نوو چاوان دێ دەستپێكەت. ئێكەتی نیشتمانی و ئالیێن دی ژی هەر پشتی هەلبژارتنان دێ چینە دناڤ قووناغەكا نوو یا دانوستاندناندا بۆ پێكئینانا كابینەیا نوو یا حوكمەتا هەرێما كوردستانێ».
نێچیرڤان بارزانی دیاركر ژی» هەروەك یا دیار پشتی راگەهاندنا ئەنجامێن هەلبژارتنان دێ دەست ب دانوستاندنان هێتە كرن بۆ پێكئینانا كابینەیا نوو یا حوكمەتا ئیراقا فیدرال، بەلێ ئەوا هەموو ئالیێن سیاسی یێن ئیراقی ل سەر هەڤڕانە ئەوە كو ل بەرچاڤ وەرگرتنا وان گوهۆڕینێن ل دەڤەرێ هەین، هەر ئالییەك ب هەموو پێكهاتەیێن سیاسی یێن ئیراقێ ڤە بزاڤێ دكەن پێكئینانا كابینەیا نوو یا حوكمەتا ئیراقێ دەمەكێ درێژ نەڤەكێشیت، وەك بنەما ئەڤە هەیە، ئەڤە ژی دێ چەند هێتە بجهئینان، ئەڤە دێ ل سەر دانوستاندنان مینیت».
سەبارەت پەیاما سەرۆكێ هەرێمێ بۆ بەغدا، نێچیرڤان بارزانی گوت» پەیاما مە بۆ وان ئەوە، ئەم هەموو د وەلاتەكیدا دژین كو ئیراقە. ئیراق مولكی مە هەموویانە و پێدڤییە ئەو كێشەیێن د ناڤبەرا هەرێما كوردستانێ و بەغدایێ دا هەین، هەموو د چارچۆڤەیێ ئیراقەكا ئێكگرتی، ب دانوستاندن و ل بەرچاڤ وەرگرتنا خێر و خوەشیێ بۆ هەموو گەلێن ئیراقێ، ب گۆڕەی دەستووری ودانوستاندنان بگەهینە چارەسەریێ. ب دیتنا من كلیلا چارەسەرییا كێشەیان ل بەغدایە و پێدڤییە بۆ ئارامییا سیاسی و جڤاكی و ئابۆری یا خەلكێ ئیراقێ، گەلەك گرنگە ئەو كێشەیێن كو د ناڤبەرا هەرێما كوردستانێ و بەغدایێ دا هەین ب دانوستاندنێ بهێنە چارەسەركرن. مە ل هەرێما كوردستانێ خێرا هەموو ئیراقێ دڤێت و خوەشحالین ب وێ چەندێ كو ببینین بەسرا ژی یا پێشكەفتییە، زاخۆ ژی یا پێشكەفتییە، ئەنبار ژی یا پێشكەفتییە، نەجەف و كەربەلا و بەغدا ژی د پێشكەفتینە. هیڤییا مە ئەوە و دخوازین هەموو ئیراقییەك د خێر و خوەشیێدا بیت».
ل دووماهیێ سەبارەت ب سیاسەتا ئەمریكا بەرامبەر هەرێما كوردستانێ، سەرۆكێ هەرێمێ راگەهاند» سیاسەتا نێڤدەولەتی و ئەمریكا هەبوونا هەرێما كوردستانەكا ب هێزە د چارچۆڤەیێ ئیراقەكا ئێكگرتی و فیدرالیدا. ئەڤە یا رۆهنە و ئەم وەك هەرێما كوردستانێ فاكتەرێ ئارامیێ و ئاسایشێ نە ل دەڤەرێ چ ل ئیراقێ و چ ل دەرڤەی ئیراقێ. ئەوا كو دكەڤیتە سەر هەرێما كوردستانێ بۆ وێ چەندێ رۆلێ خوە ببینیت، بێگومان هەرێما كوردستانێ دێ وی رۆلی ل گەل برایێن مە ل بەغدا بینیت، هەروەسا ئەو ئارامییا كو نوكە ل ئیراقێ هەی، مە رۆلەكێ مەزن تێدا هەبوویە، ئەو رۆلێ مە بۆ ئارامییا ئیراقێ دێ بەردەوام بیت. هیڤیدارم پشتی هەلبژارتنان ئیراق بكەڤیتە د قووناغەكا نوو یا ئارامییا سیاسی و ئابۆری و جڤاكی دا».

كۆمسیۆنا بلند یا سەربخوە یا هەلبژارتنان ل ئیراقێ دوهی ئامارێن فەرمی یێن دەستپێكی یێن هەلبژارتنێن جڤاتا نوونەرێن ئیراقێ بەلاڤكرن و تێدا دیاردبیت پارتی دیموكراتی كوردستان پتر ژملیۆن دەنگ ب دەستڤەئیناینە و ب ڤێ چەندێ ل رێزا ئێكێ ل هەرێما كوردستانێ هات، هەروەسا دهێتە هەژمارتن حزبا ئێكێ ل سەر ئاستێ هەرێما كوردستانێ كو ئەڤ رێژەیا مەزن یا دەنگان ب دەستڤەئینای.
ژ ئالییەكێ دیڤە پارێزگەها دهۆكێ ل رێزا ئێكێ هات ل سەر ئاستێ پارێزگەهێن هەرێما كوردستانێ و ئیراقێ ب رێژەیا پشكداریێ د دەنگدانا گشتی دا ب 76.6%.
ل دووڤ كۆمسیۆنا هەلبژارتنان، پارتی ل هەولێرێ 369118 دەنگ و ل سلێمانیێ 68596 دەنگ و ل دهۆكێ 413698 دەنگ و ل كەركووكێ 59294 دەنگ و ل نەینەوا 189120 دەنگ ب دەستڤەئینان و سەرجەمێ گشتیێ دەنگێن پارتی ل هەولێرێ و سلێمانیێ و دهۆكێ و كەركووكێ و نەینەوا، دگەهیتە پتر ژ ملیۆن دەنگان، كو هەژمارا گشتییا دەنگان دگەهیتە 1099826 دەنگان و ب ڤێ چەندێ پارتی دیموكراتی كوردستان 27 كورسیێن جڤاتا نوونەرێن ئیراقێ مسۆگەركرن وپێنج كورسیێن كۆتایا ژی، هەروەسا ئێكەتێ 18 كورسی و هەلویست پێنج كورسی و ئێكگرتوو چار كورسی و نەوەی نوو سێ كورسی و كۆمەلا دادگەری كورسییەك.
ل دووڤ ئامارێن كۆمسیۆنێ، پارتی ل پارێزگەهێن هەولێرێ و دهۆكێ و نەینەوا ب رێژەیەكا مەزن بەری ئالیێن دی یە و پلەیا ئێكێ ب دەستڤەئینایە.

پەیڤدارێ پارتی دیموكراتی كوردستان دبێژیت: شێوازێ رەفتاركرنا مە ل گەل ئالیێن سیاسی دێ جودا بیت ژ شێوازێ مە بەری هەلبژارتنان هەی، هەروەسا باس ل وێ چەندێ ژی كر، ژ نوكە و وێڤە ئیراق تنێ ب ئالییەكێ دیاركریێ نەتەوەیی یان ژی مەزهەبی ناهێتە بڕێڤەبرن.
مەحموود محەمەد، پەیڤدارێ پارتی دیموكراتی كوردستان، د كۆنگرەیەكێ رۆژنامەڤانیدا ل رۆژا هەلبژارتنێن جڤاتا نوونەرێن ئیراقێ راگەهاند» شێوازێ رەفتاركرنا پارتی ل گەل ئالییان دێ یا جودا بیت ژ وی شێوازێ كو بەرێ هەلبژارتنان راگەهاندی بۆ پێكئینانا كابینەیا نوو یا حوكمەتا هەرێما كوردستانێ».
مەحموود محەمەد گوت ژی» خەلكێ كوردستانێ دەنگ دابوو بۆ وێ چەندێ پەرلەمان و حوكمەت بهێنە پێكئینان و دڤێت هیڤییا ئومێدا خەلكێ كوردستانێ ب دەستڤە بهێت».
پەیڤدارێ پارتی ئاماژە ب وێ چەندێ ژی دا» دڤێت دەستوور بهێتە بجهئینان كو مادەیا 140 و كۆمەكا بابەتێن دی ژی ب خوەڤە دگریت و مافێ خەلكێ كوردستانێ نە و دڤێت هەموو پێكڤە بهێنە بجهئینان و ئێدی قەبوول ناكەین هندەك مادەیێن دەستووری بهێنە بجهئینان و هندەك بهێنە بنپێكرن».
باس ل وێ چەندێ ژی كر» 53 مادەیێن دەستووری هەنە كو هەتا نوكە قانوون بۆ نەهاتینە دەركرن، هەروەسا كۆمەكا دەزگەهێن گەلەك گرنگ یێن حوكمەتا ئیراقێ هەنە، كو فیدرالییەتێ بەرجەستە دكەن و هەتا نوكە هەر هەبوون نینە».
ل دۆر ئەگەرێ پێكئینانا هەڤپەیمانییەكێ د ناڤ جڤاتا نوونەرێن ئیراقێدا، پەیڤدارێ پارتی گوت» هەڤپەیمانی یا دژوار نابیت هەكە مەژییێ هەموو ئالییەكی بگەهیتە وێ چەندێ ژ نوكە و وێڤە ئیراق تنێ ب ئالییەكێ دیاركریێ نەتەوەیی یان مەزهەبی بڕێڤەناچیت، بەلكو دڤێت هەموو ئالیێن ئایینی و نەتەوەیی و مەزهەبی پێكڤە ئیراقێ بڕێڤەببەن چونكە ئەزموونا حوكمڕانییا تاكلایەنەیا پێشتر شكەستن ئینایە».