ئه‌ڤرۆ نيۆز:

فه‌رماندێ ئۆفيسا هه‌ماهه‌نگيا ئاسايشا هه‌ڤپشك ل عيراقێ راگه‌هاند، ئه‌مريكا دێ به‌رده‌وام بيت ل سه‌ر پرچه‌ككرنا پێشمه‌رگه‌ى وكۆنگرسێ ئه‌مريكى برياردايه‌ بۆ سالا داهاتى 364 مليۆن دۆلاران وه‌كو هاريكارى پێشكێشى وه‌زاره‌تا پێشمه‌رگه‌ى بكه‌ت.

ئه‌ڤرۆ چار شه‌مبى 29/11/2017 ل هه‌ولێرێ، كه‌ريم شنگالى وه‌زيرێ پێشمه‌رگه‌ى ب وه‌كاله‌ت پێشوازى ل جه‌نه‌رال برادلى بێكه‌ر فه‌رماندێ ئۆفيسا هه‌ماهه‌نگيا ئاسايشا هه‌ڤپشك ل عيراقێ وشانده‌كێ دگه‌لدا كر.

ل دووڤ به‌ياننامه‌كا وه‌زاره‌تا پێشمه‌رگه‌ى، دكۆمبوونێ دا فه‌رماندێ ئۆفيسا هه‌ماهه‌نگيا ئاسايشا هه‌ڤپشك ل عيراقێ گۆت، ئه‌مريكا دێ به‌رده‌وام بيت ل سه‌ر پرچه‌ككرنا پێشمه‌رگه‌ى وكۆنگرسێ ئه‌مريكى بريار دايه‌ بۆ سالا داهاتى 2018 گۆژمێ 364 مليۆن دۆلاران وه‌كو هاريكارى پێشكێشى وه‌زاره‌تا پێشمه‌رگه‌ى بكه‌ت. دووپاتى ل سه‌ر وێ چه‌ندێ ژى كر كو ئه‌مريكا پشته‌ڤانيێ ل هه‌رێما كوردستانێ يا ب هيز دكه‌ت.ديسا سوپاسيا هيزێن پێشمه‌رگه‌ى كر دشه‌رِێ دژى داعشێ دا.

وه‌زيرێ پێشمه‌رگه‌ى ب وه‌كاله‌ت، سوپاسيا هێزێن ئه‌مريكا ووه‌لاتێن هه‌ڤپه‌يمان كر بۆ وێ هاريكارى وپشته‌ڤانيا پێشكێشى هێزێن پێشمه‌رگه‌ى كرى وهه‌ڤده‌م داخوازكر هێزێن هه‌ڤپه‌يمانان ل هه‌رێما كوردستانێ بمينن بۆ به‌رده‌واميدان ب پێشخستنا هێزێن پێشمه‌رگه‌ى وپيشكێشكرنا مه‌شق وراهينانان.

به‌يانناما وه‌زاره‌تا پێشمه‌رگه‌ى ئاماژه‌ دا كو دوێ كۆمبوونێ دا دووپاتى ل سه‌ر دانوستاندنێ دناڤبه‌را هه‌رێمێ وحوكمه‌تا عيراقێ بۆ چاره‌كرنا كێشێن دناڤبه‌را هه‌ردولا هاته‌ كرن.

شاندێ ئه‌مريكى ته‌ئكيد ل پرۆسا ريفۆرم وپێگه‌هاندنا ئه‌فسه‌رێن پێشمه‌رگه‌ى ل ناڤخوه‌ وده‌رڤه‌ى هه‌رێما كوردستانێ كر وئاماژه‌ كر كو هه‌ماهه‌نگيا وان ل گه‌ل وه‌زاره‌تا پێشمه‌رگه‌ى دێ به‌رده‌وامبيت.

ئه‌ڤرۆنيۆز:

سه‌رۆكێ كۆمسيۆنا بلند يا هه‌لبژارتن وراپرسيان ل هه‌رێما كوردستانێ دنڤيساره‌كێ دا بۆجڤاتا وه‌زيرێن هه‌رێمێ، داخواز دكه‌ت رۆژا هه‌لبژارتنان بهێته‌ دياركرن.

هندرين محه‌مه‌د سه‌رۆكێ كۆمسيۆنا بلند يا هه‌لبژارتن وراپرسيان ل هه‌رێما كوردستانێ راگه‌هاند، بۆ كۆمسيۆنێ باشه‌ هه‌رسێ هه‌لبژارتنێن سه‌رۆكاتيا هه‌رێما كوردستانێ وپه‌رله‌مانى وجڤاتێن پارێزگه‌هان پێكڤه‌ بهێنه‌ ئه‌نجامدان، وى ده‌مێ دێ كۆمسيۆن ده‌ست ب به‌رهه‌ڤيان كه‌ت بۆ هه‌رسێ هه‌لبژارتنان وژبه‌ركو كۆمسيۆن سه‌رپه‌رشتيا ريفراندۆمێ يا كرى، ئه‌و به‌رهه‌ڤيێن بۆ هه‌لبژارتنان هه‌ر دێ دوى چارچۆڤى دابن ب تايبه‌تى مه‌شقكرنا كارمه‌ندان وشاره‌زايى وكاركرنا جڤاتا كۆمسياران ل سه‌ر سيكته‌رێن هه‌لبژارتنان.

سه‌رۆكێ كۆمسيۆنا هه‌لبژارتن وراپرسيان زێده‌تر بۆ باسنيۆز گۆت، نوكه‌ ژى كۆمسيۆنێ په‌يره‌وه‌كێ ده‌ركرى بۆ پاككرنا ناڤێن ده‌نگده‌ران ومريان وناڤێن دووباره‌كرى بۆ وێ چه‌ندێ به‌رهه‌ڤى بهێنه‌ كرن بۆ هه‌لبژارتنان وئه‌ڤ پرسه‌ ژى بهێته‌ چاره‌كرن.

پێشتر نێچيرڤان بارزانى سه‌رۆك وه‌زيرێن هه‌رێما كوردستانێ دكۆگره‌كێ رۆژنامه‌ڤانى دا ئاشكراكربوو كو ب مه‌ره‌ما دياركرنا ژڤانه‌كى بۆ ئه‌نجامدانا هه‌لبژارتنان ل هه‌رێما كوردستانێ، دێ سه‌رۆكاتيا حوكمه‌تێ ل گه‌ل حزب ولايه‌نێن سياسى ل هه‌رێمێ كۆمبيت.

ئه‌ڤرۆنيۆز:

ژێده‌ره‌كى ژوه‌زاره‌تا شه‌هيد وئه‌نفالكريان ل هه‌رێما كوردستانێ راگه‌هاند، مه‌ پێزانينێن دروست ل سه‌ر گۆرێن ب كۆم نينن، ل گه‌ل هاتنا تيرۆرستێن داعشێ ژى هژمارا وان گۆران زێده‌تر وئالۆزتر بوويه‌.

په‌روين عوسمان رێڤه‌به‌را گشتى يا گۆرێن ب كۆم ل وه‌زاره‌تا شه‌هيد وئه‌نفالكريان گۆت، ئه‌م دبه‌رده‌وامين ل سه‌ر لێگه‌ريانێ ل گۆرێن ب كۆم وب وى شێوازێ هاتيه‌ دياركرن ژلايێ حوكمه‌تا هه‌رێما كوردستانێ ووه‌زاره‌تێن ناڤخوه‌يى وساخله‌مى يێن عيراقێ وده‌زگه‌هێ شێهيدێن عيراقێ.

په‌روينێ زێده‌تر بۆ نه‌وا گۆت، مه‌ هژماره‌كا دروست ل به‌رده‌ست نينه‌ تاكو بزانينن گۆرێن ب كۆم چه‌ندن، چونكى مه‌ ده‌زگه‌هه‌كێ پێشكه‌فتى دڤێت كو ب رێيا هه‌يڤێن ده‌ستكرد بۆمه‌ بشكنيت ودياربكه‌ت كا جهێن گۆرێن ب كۆم ل كيرێ نه‌.