ئه‌ڤرۆنيوز:

سه‌رۆكێ باژێرڤانيا زاخۆ، بژار مونيب، ئه‌ڤرۆ چارشه‌مبى 24/1/2018 ب تۆمه‌تا داگيركرنا مۆلكێ حوكمه‌تێ هاته‌ ده‌سته‌سه‌ركرن.

هيمن سلێمان، په‌يڤدارێ رێڤه‌به‌ريا پۆليسێن پارێزگه‌ها دهۆكێ راگه‌هاند”ل سه‌ر داخوازا داواكارێ گشتى وب هاريكاريا نڤيسينگه‌ها ده‌ستپاكيێ ل زاخۆ، ئه‌ڤرۆ بژار مونيب سه‌رۆكێ باژێرڤانيا زاخۆ هاته‌ ده‌سته‌سه‌ركرن”.

په‌يڤدارێ پۆليسێن پارێزگه‌ها دهۆكێ، ل دووڤ روداو، گۆت ژى” سه‌رۆكێ باژێرڤانيا زاخۆ ب تۆمه‌تا داگيركرنا مۆلكێ وه‌زاره‌تا دارايى يا حوكمه‌تا هه‌رێمێ ومۆلكێ وه‌زاره‌تا چاندنێ يێ هاتيه‌ ده‌سته‌سه‌ركرن وچاڤه‌رێ بريارا دادگه‌هێ دكه‌ين بۆ دياربوونا ئه‌نجامێن ڤه‌كۆلينێ”.

هێمنى گۆت ژى” نه‌ ب تنێ ئه‌و به‌رپرسێ باژێرڤانيێ هاتيه‌ ده‌سته‌سه‌ركرن، به‌لكو پێشتر سه‌رۆكێ باژێرڤانيێن دهۆك وئاكرێ وشێخان ژى هاتبوونه‌ ده‌سته‌سه‌ركرن”.

ئه‌ڤرۆ نیوز، نه‌وزاد هلۆرى:

چار رێكخراوێن ژینگه‌پارێز وپاراستنا ئاژه‌لان ل پارێزگه‌ها دهۆكێ سه‌ره‌دانا ده‌ڤه‌را ئامێدیێ و چیایێ گاره‌ى كر و ده‌خلودان و خوارن بۆ بالنده‌یان ل وان جهێن كو به‌فربارى دانا داكو ژ برسان نه‌مرن.

سلێمان ته‌مه‌ر، به‌رپرسێ رێكخراوا كوردستان بۆ پاراستنا مافێن ئاژه‌لان بۆ ئه‌ڤرۆ نیوز گۆت”  ب مه‌ره‌ما پاراستنا بالنده‌یان ژ مرنێ ب تایبه‌تى ژ برسان دا، مه‌ چار رێكخراوێن پاراستنا ئاژه‌لان ل پارێزگه‌ها دهۆكێ سه‌را چیایێ گاره‌ى ل ده‌ڤه‌را ئامێدیێ كر و زێده‌ترى 400 كیلۆیێن ده‌خلودانى ل جهێن به‌فر لێ بارى به‌لاڤكرن داكو ئه‌و بالنده‌ بهێن بخون و ژ برسان نه‌مرن”.

زێده‌تر گۆت” ل ده‌ڤه‌را ئامێديێ ب سه‌دان جۆرێن بالنده‌یان يێن هه‌ين و د وه‌رزێ زڤستانێ دا بۆ ده‌ڤه‌رێن نزم دهێنه‌خوار وئه‌و هاتنه‌ خوارا وان مه‌ترسى بۆ سه‌ر ژیانا وان هه‌یه‌ و دبنه‌ نێچیرا مرۆڤان، به‌لێ هه‌كه‌ ده‌خلودان ل ده‌ڤه‌رێن چیایى بهێته‌ به‌لاڤكرن ل وى ده‌مى ئه‌و بالنده‌ ناهێنه‌خوارێ و دێ هێنه‌ پاراستن ژ مرنێ”.

ئەڤرۆ نیوز ، تۆڤی:

ئه‌ڤرۆ به‌رى نيڤرۆ 24/1/2018 عومەر عەلی تاها ريڤه‌به‌رێ گشتى يێ په‌روه‌ردێ و ب ئاما‌ده‌بوونا هاريكارێ رێڤه‌به‌رێ گشتى بو كاروبارێن ته‌كنيكى پێشوزايا نوونه‌رێ وه‌زاره‌تا په‌روه‌ردا حكومه‌تا عيراقێ ل نوونه‌راتيا وه‌زاره‌تا په‌روه‌ردا عيراقێ ل پارێزگه‌ها دهوكێ وشاندێ دگه‌ل دا كر.
دكومبونه‌كێ دا و ب ئاماده‌بونا نوينه‌رێن بورها ل پاريزگه‌ها دهوكێ عومەر عەلى تاها رێڤه‌به‌رێ گشتى يێ په‌روه‌ردێ دا دياركرن كو دماوێ بورى دا هاريكارى وهه‌ماهه‌نگييه‌كا ئێكجار باش دگه‌ل رێڤه‌به‌ريا گشتى يا په‌روه‌ردا مۆسل هاتيه‌ كرن وخزمه‌ته‌كا مه‌زن ژلايێ په‌روه‌ردا پارێزگه‌ها دهوكێ ڤه‌ بۆ قوتابێن ئاواره‌ هاتيه‌ كرن .

ژلايێ خوڤه‌ نوونه‌رێ وه‌زاره‌تا په‌روه‌ردا حكومه‌تا عيراقێ ل نوونه‌راتيا وه‌زاره‌تا په‌روه‌ردا عيراقێ ل پارێزگه‌ها دهوكێ سوپاسيێن وه‌زيرێ په‌روه‌ردا عيراقێ گه‌هاندنه‌ خه‌لك و حوکمه‌تا هه‌رێما كوردستانێ كو د ماوێ پتر ژسێ سالان هاريكارى وخزمه‌ته‌كا ئێكجار مه‌زن پێشكێشى ئاواره‌يان و ب تايبه‌ت قوتابيێن ئاواره‌ ئه‌وێن ئاكنجى ل پارێزگه‌ها دهوكێ ، هه‌روه‌سا سوپاسيا وه‌زاره‌تا په‌روه‌ردێ ورێڤه‌به‌ريا گشتى يا په‌روه‌ردێ ل پارێزگه‌ها دهوكێ بو هه‌مان مه‌به‌ست كر.
هه‌ر د وێ دكومبوونێ دا چه‌ندين بابه‌تێن گرێداى دەڤه‌را زومار وشنگالێ و پاشه‌رۆژا وان ده‌ڤه‌ران ژلايێ پروسا په‌روه‌رده‌ و فێركرنێ ، ديسان به‌حسێ بريارا حكومه‌تا عيراقێ سه‌باره‌ت ڤه‌كێشانا نوونه‌راتيێن خو بو جهێن خو يێن بنه‌ره‌ت نه‌خاسمه‌ پشتى رزگاركرنا ئه‌و پارێزگه‌هێن به‌رى نوكه‌ د ده‌ستێ داعش دا وه‌كى مۆسل وكه‌له‌ك پارێزگه‌هێن دى.

ئه‌ڤرۆ نيوز:

رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو پێله‌كا باران بارينێ دێ ب سه‌ر هه‌رێما كوردستانێ دا هێت و ده‌ليڤا به‌فر بارينێ ژى يا هه‌يى، تۆز ژى دێ ل گه‌ل ڤێ پێلا به‌فر و بارانان بيت.

بژار ئه‌كره‌م به‌رپرسێ پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك ب ده‌ست ئه‌ڤرۆ نيوز كه‌فتيه‌، تێدا ئاشكه‌را كريه‌ كو سوبه‌هى رۆژا پێنجشه‌مبى كارتێكرنا فشارێن نزمێن ده‌ريا ناڤه‌راست كار دكه‌ته‌ سه‌ر هه‌رێما كوردستانێ ل ده‌مێن شه‌ڤێ يێن رۆژا پێنجشه‌مبێ باران بارين دێ ل پتريا ده‌ڤه‌ران باريت.

ئاشكه‌را ژى كريه‌ كو ل ده‌ڤه‌رێن چيايى و هه‌تا راده‌كى چيايى يێن پارێزگه‌ها هه‌ولێر باران دێ زێده‌تر باريت ل چاڤ ده‌ڤه‌رێن دى، فشارێن نزمێن ده‌ريا ناڤه‌راست ل سه‌ر هه‌رێما كوردستانێ دێ د به‌رده‌وام بن هه‌تا رۆژا شه‌مبى و وێ شه‌ڤێ دێ ب دووماهى هێن.

پشكا پێشبينيان خۆيا كريه‌ ژى كو د ماوێ كارتێكرنا فشارێن نزمێن ده‌ريا ناڤه‌راست ئه‌سمانێ هه‌رێمێ دێ ئه‌وره‌كێ ناڤه‌ندى بيت ل ده‌مێ بارانێ بۆ ئه‌ورێن ته‌مام دێ هێته‌ گوهۆڕين، ل رۆژا شه‌مبى بارسته‌ هه‌وايه‌كێ سار دێ روو ل ده‌ڤه‌رێ كه‌ت ل گه‌ل هه‌بوونا بارانێ و ئه‌وى بارسته‌ هه‌وايێ سار يێ دێ ژ ده‌ڤه‌رێن چيايى هێت، ئه‌گه‌رێن به‌فر بارينێ زێده‌ دكه‌ن.

رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ ئاماژه‌ ب وێ چه‌ندێ ژى كر كو دێ بارسته‌ هه‌وايه‌كێ تۆزى ژى دێ روو ل ده‌ڤه‌رێ كه‌ت كو ل گه‌ل بارانێ تێكه‌ل بيت و ل هنده‌ك ده‌ڤه‌رێن باشوورێ هه‌رێمێ دێ كارتێكرن هه‌بيت وه‌كو تۆزبارينه‌كێ ده‌ردكه‌ڤيت كو دبيته‌ ئه‌گه‌رێ كێمبوونا ماوێ ديتنێ، به‌لێ ئاستێ ڤێ تۆزبارينێ ژى كێمتره‌ ل چاڤ تۆزبارينێن رۆژێن بۆرى.

نه‌ڤه‌شارتيه‌ ژى كو رۆژا ئێكشه‌مبى فشارێن نزمێن ده‌ريا ناڤه‌راست دێ ل سه‌ر هه‌رێما كوردستانێ ب دووماهى هێت و ئه‌سمانێ وێ دێ ساهى بيت ل گه‌ل هنده‌ك ئه‌ورێن كێم.