ئه‌ڤرۆنيۆز:

رێكخراوا نه‌ته‌وێن ئێكگرتى داخوازكر ب زووترين ده‌م گه‌شتێن نێڤده‌وله‌تى ل فرۆكخانێن كوردستانێ بهێنه‌ ڤه‌كرن.

يان كوبيش هنارتيێ نه‌ته‌وێن ئێكگرتى ل عيراقێ (يۆنامى) دگوتاره‌كێ دا ل به‌رده‌م جڤاتا ئاسايشا نێڤده‌وله‌تى ل نيويۆرك گۆت، پێدڤيه‌ ب زووترين ده‌م گه‌شتێن نێڤده‌وله‌تى ل فرۆكخانێن كوردستانێ بهێنه‌ ڤه‌كرن.

كوبيش گۆت ژى، ل گه‌ل نوونه‌رێن حوكمه‌تێ كاردكه‌ين بۆ وێ چه‌ندێ دانوستاندنێ ل سه‌ر كێشێن دى بكه‌ين بۆ چاره‌سه‌ريا وان وه‌كو بودجه‌ ومووچێن فه‌رمانبه‌رێن هه‌رێما كوردستانێ. ناڤبرى دياركر، ژئه‌گه‌رێ ئۆپه‌راسيۆنێن له‌شكرى، ئاكنجيێن كورد ل هنده‌ك ده‌ڤه‌رێن ناكۆكى ل سه‌ر يێن ئاواره‌ بووين، هنده‌ك جاران ره‌فتارێن حوكمه‌تا عيراقێ وه‌كريه‌ وه‌لاتيێن كورد نه‌شيابن بزڤرن بۆ جهێن خوه‌ ومه‌ يا داخواز كرى ڤه‌كۆلين بهێته‌ كرن ولێپرسين ل گه‌ل وان كه‌سان بهێته‌ كرن يێن بووينه‌ ئه‌گه‌رێ دروستكرنا گرژى وئالۆزيان.

 ئه‌ڤرۆنيۆز:

هيزێن له‌شكرێ عيراقى، ئه‌ڤرۆ چارشه‌مبى 22/11/2017، گۆره‌كێ ب كۆم يێ كوردێن ئێزدى ل رۆژئاڤايێ مووسل ديت، كو  ل دووڤ ئاخڤتنێن به‌رپرسێن ده‌ڤه‌رێ قوربانيێن دناڤ وى گۆرى دا ژلايێ داعشێ ڤه‌ هاتينه‌ شه‌هيدكرن.

دوى گۆرێ ب كۆم دا، ل دووڤ ئاژانسا فرانس پرێس، رووفاتێن 73 كوردێن ئێزدى هاتينه‌ ديتن كو هنده‌ك ژوان ژن وزارۆكن.

شه‌كر حامد ئه‌لياس رێڤه‌به‌رێ ناحيا قه‌حتانيه‌ يا سه‌ر ب شنگالێ ڤه‌ راگه‌هاند، دوێ گۆرێ ب كۆم دا رووفاتێن ژن وزه‌لام وزارۆكان يێن هه‌ين كو ل ده‌مێ داگيركرنا  ده‌ڤه‌رێ يێن هاتينه‌ شه‌هيدكرن وپاشى ل ده‌ڤه‌را (ره‌مببوورسى) يا سه‌ر ب وێ ناحيێ ڤه‌ هاتينه‌ بن ئاخكرن.

مه‌حما خه‌ليل قايمقامێ قه‌زا شنگالێ گۆت، پشتى ئازادكرنا شنگالێ ژداعشێ  ژلايێ پێشمه‌رگه‌ى ڤه‌ ل 2015، هه‌تا نوكه‌ 37 گۆرێن ب كۆم ل ده‌ڤه‌رێن جودا جودا ل شنگالێ يێن هاتينه‌ ئاشكراكرن.

مه‌حماى دووپاتكر كو هه‌موو قوربانيێن دناڤ وان گۆرين ب كۆم دا، كوردێن ئێزدى نه‌، هه‌ڤده‌م ره‌خنێن توند ل حوكمه‌تا عيراقێ گرت كو هاريكارى پێشكێشى كه‌سوكارێن قوربانيان نه‌كريه‌.