ئه‌ڤرۆنيۆز:

ئه‌ندامه‌كێ كورد دجڤاتا نوونه‌رێن عيراقێ دا داخواز دكه‌ت نوونه‌رێن هه‌ريما كوردستانێ ب زووترين ده‌م خوه‌ ژ پرۆسا سياسى ل عيراقێ ڤه‌كێشن ورادگه‌هينيت، به‌غدا ناخوازيت دانوستاندنێ ل گه‌ل هه‌رێما كوردستانێ بكه‌ت.

عادل نوورى په‌رله‌مانتارێ سه‌ربخوه‌ ل جڤاتا نوونه‌رێن عيراقێ بۆ باسنيۆز گۆت، به‌غدا ب چو شێوه‌كى يا راستگۆ نينه‌ ل گه‌ل كوردستانێ، به‌لكو دڤێت كوردستان سه‌رێ خوه‌ بۆ شۆر بكه‌ت، له‌وما هه‌كه‌ ئه‌م سنوره‌كى بۆ ده‌ستدرێژى وپێشيلكارى ودفن بلنديا به‌غدا نه‌دانين، دێ كورد تووشى زيانه‌كا مه‌زن بن.

عادلى رۆهنكر ژى، كو كارتێن ب هێز يێن دده‌ستێ هه‌ريما كوردستانێ دا ماين وگۆت، نزانم بۆچى سه‌كردايه‌تيا سياسى يا كوردستانێ وان كارتان بكارنائينيت؟ ئه‌م دشێين گورزێن كه‌مه‌ر شكێن ل به‌غدا بده‌ين، ب تايبه‌تى پشكداريا مه‌ دپرۆسا سياسى دا ل عيراقێ، له‌وما دڤێت نوكه‌ سه‌رۆك كۆمار وپه‌رله‌مانتار ووه‌زير وجێگرێ سه‌رۆكێ په‌رله‌مانى خوه‌ ڤه‌كێشن وبۆ كوردستانێ بزڤرن.

دياكر ژى، ژئه‌گه‌رێ چه‌ندين خيانه‌تكاريان، شكۆيا كوردان شكه‌ستيه‌، پێدڤيه‌ ئه‌م بۆ كوردستانێ بزڤرين ودوباره‌ خوه‌ رێك بێخين، له‌وما دخوازم هه‌كه‌ بۆ 10 رۆژان ژى بيت فوئاد مه‌عسووم خوه‌ ژبه‌غدا ڤه‌كێشيت.

زێده‌تر گۆت، هه‌كه‌ ئه‌م خوه‌ ڤه‌كێشين، دێ پرۆسا سياسى ل عيراقێ تێكچي، چونكى عيراق يا ل سه‌ر بنه‌مايێ ته‌وافوقێ دروستببووى، نابيت شيعان‌ سه‌رۆك وه‌زيران وسه‌رۆك كۆمار هه‌بيت، هه‌كه‌ سه‌رۆك كۆمار خوه‌ ڤه‌كێشيت، جێگرێ ئێكێ يێ سه‌رۆك كۆمارى كو نورى مالكى يه‌، دێ وێ ده‌ستهه‌لاتێ وه‌رگريت وهه‌كه‌ مالكى بوو سه‌رۆك كۆمار، وى ده‌مى عه‌بادى وسه‌در رازى نابن، چونكى سه‌در دوژمنێ سه‌رسه‌ختێ مالكى يه‌ ودێ سه‌در مليۆنه‌ها كه‌سان ئينيته‌ سه‌ر جاده‌يان.

دووپاتكر ژى، به‌غدا دڤێت سه‌روه‌ريا ئاخا كوردستانێ پێشيل بكه‌ت وداخواز دكه‌ين ئه‌و پشكێن ل به‌غدا ماين، ڤه‌كێشين، چونكى ل به‌غدا ئه‌م دبێ رێزين ودبێ هێزين، بۆچى دێ وه‌سا بين ل به‌رامبه‌ر به‌غدا؟.

ئه‌ڤرۆنيۆز:

سه‌رۆكێ فراكسيۆنا پارتى ل جڤاتا نوونه‌رێن عيراقێ راگه‌هاند، پێدڤيه‌ دانوستاندنێن داهاتى ل گه‌ل به‌غدا ب چاڤدێريا ئه‌مريكا ونه‌ته‌وێن ئێكگرتى بهێنه‌ ئه‌نجامدان.

عه‌ره‌فات كه‌ره‌م، سه‌رۆكێ فراكسيۆنا پارتى ل جڤاتا نوونه‌رێن عيراقێ دياكر، هه‌رێما كوردستانێ برياره‌كا وێره‌كانه‌ دا ب هه‌لاويستنا ريفراندۆمێ ب ئارمانجا ده‌ستپێكرنا دانوستاندنان ل گه‌ل حوكمه‌تا به‌غدا، تاكو شه‌ر دناڤبه‌را پێكهاتێن ئێك وه‌لاتى روو نه‌دت، دانوستاندن ژى دووباره‌ ده‌ستپێ بهێنه‌ كرن بۆ چاره‌كرنا كێشان.

گۆت ژى، پێدڤيه‌ ئێكه‌م جار مالا كوردى بهێته‌ رێكخستن هه‌تاكو بشێين روو ب روويێ ته‌حه‌دياتێن قۆناغا داهاتى ببين، ئه‌ڤه‌ ژى دێ پێدڤى ب پشكداريا هێزێن كوردستانى ييت بۆ رزگاربوونێ ژ وێ قه‌يرانێ.

عه‌ره‌فاتى، ل دووڤ پاشه‌رۆژ، زێده‌تر گۆت، سه‌رۆك وه‌زيرێن هه‌رێما كوردستانێ  وپارتى ديموكراتى كوردستان ژى ب زڤرينا په‌رله‌مانتارێن كورد بۆ جڤاتا نوونه‌ران خوه‌شحالبوون، چونكى ئه‌ڤه‌ به‌رپرسياره‌تيه‌كا ديرۆكى يه‌ ودڤێت ئه‌م هه‌موو ب ئێك رێز ل به‌رامبه‌ر به‌غدا ب راوه‌ستين.

ئاماه‌ ب وێ چه‌ندێ ژى كر، پێدڤيه‌ ل روونشتنێن داهاتى يێن هه‌ولێرێ وبه‌غدا، داخوازا چاڤدێريا نێڤده‌وله‌تى وه‌كو نه‌ته‌وێن ئێكگرتى وئێكه‌تيا ئورۆپى وئه‌مريكا، ب تايبه‌تى ئه‌مريكا چونكى كاريگه‌ريه‌كا مه‌زن ل ده‌ڤه‌رێ يا هه‌ى.

رۆهن كرژى، پێدڤيه‌ كاركرنا نوونه‌رێن كورد ل گه‌ل وان حزبێن عيراقى بيت يێن باوه‌رى ب ديموكراسيه‌تێ ومه‌ده‌نيه‌تێ هه‌ى تاكو پێكڤه‌ كێشێن دناڤبه‌را هه‌ولێرێ وبه‌غدا چاره‌سه‌ربكه‌ن.

خوياكر ژى، به‌غدا دانوستاندنێ قه‌بوول دكه‌ت، به‌لێ دێ دانوستاندنه‌كا ب زه‌حمه‌ت وپر ئاسته‌نگ وكێشه‌ بيت، هه‌كه‌ نه‌گه‌هشتينه‌ چاره‌سه‌ريه‌كێ كو گه‌لێ كوردستانێ پێ رازى بيت، باشترين رێ چاره‌ خوه‌ڤه‌كێشانه‌ ژ پرۆسا سياسى ل عيراقێ ئه‌ڤه‌ژى دڤێت برياره‌كا هه‌موو لايه‌نێن كوردستانى بيت تاكو ببيته‌ پرسا ملله‌ته‌كى نه‌كو چه‌ند حزبێن دياركرى.

ئه‌ڤرۆنيۆز:

ل دۆر پێدانا مۆله‌تێ ب پشكه‌كا فه‌رمانبه‌ران، وه‌زيره‌ك رۆهنكرنه‌كێ دده‌ت وئاشكرا دكه‌ت، هه‌ر مۆله‌ته‌كا بۆ ب خودانكرنا كێم ئه‌ندامان بيت، پێدڤيه‌ ژوه‌زاره‌تا كار وكاروبارێن جڤاكى بهێته‌ وه‌رگرتن.

ل دووڤ رێنمايه‌كا وه‌زاره‌تا دارايى كو يا تايبه‌ته‌ ب مۆله‌تا دايكينيێ ڤه‌، ئاماژه‌ ب چاوانيا پێدانا مۆله‌تێ دايه‌ ب وان فه‌رمانبه‌رێن زارۆكێن وان تووشى نه‌خوه‌شيێ بووينه.

دوێ رێنمايێ دا هاتيه‌، مۆله‌تا دايكاتيێ دێ هێته‌ دان ب وان دايكێن كو زارۆكێن وان تووشى نه‌خوه‌شيێن دومدرێژ بووين وه‌كو( ئيفلجا مێشكى وچه‌ند نه‌خوه‌شيێن دى يێن دوم درێژ) بۆ چاڤدێريكرنا زارۆكێن خوه‌ ب وى مه‌رجى شه‌ش هه‌يڤان جاره‌كێ راپۆرتا نوشدارى يا تايبه‌ت ب ره‌وشا ساخله‌ميا زارۆكى پێشكه‌شى رێڤه‌به‌ريا خوه‌ بكه‌ن.

ديسا هاتيه‌ دياركرن كو ئه‌و مۆله‌ته‌ تنێ ده‌ستهه‌لاتا وه‌زيرێ تايبه‌تمه‌نده‌ كو بده‌ت.

محه‌مه‌د قادر هاوديانى وه‌زيرێ كار وكاروبارێن جڤاكى ل هه‌رێمێ بۆ باس راگه‌هاند، هه‌موو ئه‌وێن كێم ئه‌ندام وپێدڤى ب چاڤدێريكرنێ نه‌، فه‌رمانا مۆله‌تدانێ ژده‌ستهه‌لاتێن وه‌زيرێ كارو وكاروبارێن جڤاكى يه‌.

گۆت ژى، هه‌كه‌ كه‌سه‌ك مۆله‌تا درێژ وه‌ربگريت، په‌يوه‌ندى ب وان ڤه‌ نينه‌، خوياكر ژى، هه‌ر فه‌رمانبه‌ره‌كا دايك ل هه‌ر وه‌زاره‌ته‌كێ بيت و پێدڤى ب مۆله‌تا ب خودانكرنا كێم ئه‌ندامێ خوه‌ بيت، دانا وێ مۆله‌تێ ژده‌ستهه‌لاتێن وه‌زاره‌تا كار وكاروبارێن جڤاكى يه‌.

وه‌زيرێ كار وكاروبارێن جڤاكى دياركر ژى، دڤێت فه‌رمانبه‌ر جوداهيێ بكه‌ن دناڤبه‌را مۆله‌تا بۆ ب خودانكرنا كێم ئه‌ندامان دهێته‌ دان وئه‌و مۆله‌تا بۆ دايكاتيێ دهێته‌ دان وپه‌يوه‌ندى ب چاڤدێريكرنێ وب خودانكرنا كێم ئه‌ندامى ڤه‌ نه‌، خوياكر ژى، هه‌كه‌ بابه‌تى په‌يوه‌ندى ب خودانكرنا كێم ئه‌ندامى ڤه‌ نه‌‌بيت، نابيت نڤيسار بۆ وه‌زاره‌تا مه‌ بهێته‌ ئاراسته‌ كرن، چونكى ژبلى وێ جۆرێ مۆله‌تێ، مه‌ په‌يوه‌ندى ب مۆله‌تێن دى ڤه‌ نينه‌.

ل دووڤ قانوونا هژمار 22 يا ماف وئيمتيازاتێن كێم ئه‌ندامانكو وه‌زاره‌تا كار وكاروبارێن جڤاكى رێنمايێن تايبه‌ت بۆ ده‌ركرينه‌، هه‌ر فه‌رمانبه‌ره‌ك خوه‌ بۆ ب خودانكرنا كێم ئه‌ندامه‌كى زه‌ ته‌رخان بكه‌ت، مۆله‌تا ب مووچه‌ ڤه‌ پێ دهێته‌ دان.